[335] 64 Chayimāni bhikkhave tathāgatassa tathāgatabalāni yehi balehi
samannāgato tathāgato āsabhaṇṭhānaṁ paṭijānāti parisāsu sīhanādaṁ nadati
brahmacakkaṁ pavatteti katamāni cha idha bhikkhave tathāgato ṭhānañca
ṭhānato aṭṭhānañca aṭṭhānato yathābhūtaṁ pajānāti yampi bhikkhave
tathāgato ṭhānañca ṭhānato aṭṭhānañca aṭṭhānato yathābhūtaṁ pajānāti
idampi bhikkhave tathāgatassa tathāgatabalaṁ hoti yaṁ balaṁ āgamma
tathāgato āsabhaṇṭhānaṁ paṭijānāti parisāsu sīhanādaṁ nadati brahmacakkaṁ
pavatteti.
Puna caparaṁ bhikkhave tathāgato atītānāgatapaccuppannānaṁ kammasamādānānaṁ
ṭhānaso hetuso vipākaṁ yathābhūtaṁ pajānāti yampi bhikkhave
tathāgato atītānāgatapaccuppannānaṁ kammasamādānānaṁ ṭhānaso hetuso
vipākaṁ yathābhūtaṁ pajānāti idampi bhikkhave tathāgatassa tathāgatabalaṁ
hoti yaṁ balaṁ āgamma tathāgato āsabhaṇṭhānaṁ paṭijānāti parisāsu
sīhanādaṁ nadati brahmacakkaṁ pavatteti.
Puna caparaṁ bhikkhave tathāgato jhānavimokkhasamādhisamāpattīnaṁ
saṅkilesaṁ vodānaṁ vuṭṭhānaṁ yathābhūtaṁ pajānāti yampi bhikkhave tathāgato
.pe. Idampi bhikkhave tathāgatassa tathāgatabalaṁ hoti yaṁ balaṁ
āgamma tathāgato āsabhaṇṭhānaṁ paṭijānāti parisāsu sīhanādaṁ nadati
brahmacakkaṁ pavatteti.
Puna caparaṁ bhikkhave tathāgato anekavihitaṁ pubbenivāsaṁ anussarati
Seyyathīdaṁ ekampi jātiṁ dvepi jātiyo .pe. Iti sākāraṁ sauddesaṁ
anekavihitaṁ pubbenivāsaṁ anussarati yampi bhikkhave tathāgato anekavihitaṁ
pubbenivāsaṁ anussarati seyyathīdaṁ ekampi jātiṁ dvepi
jātiyo .pe. Iti sākāraṁ sauddesaṁ anekavihitaṁ pubbenivāsaṁ
anussarati idampi bhikkhave tathāgatassa tathāgatabalaṁ hoti yaṁ balaṁ
āgamma tathāgato āsabhaṇṭhānaṁ paṭijānāti parisāsu sīhanādaṁ nadati
brahmacakkaṁ pavatteti.
Puna caparaṁ bhikkhave tathāgato dibbena cakkhunā visuddhena
atikkantamānusakena .pe. Yathākammūpage satte pajānāti yampi bhikkhave
tathāgato dibbena cakkhunā visuddhena atikkantamānusakena .pe.
Yathākammūpage satte pajānāti idampi bhikkhave tathāgatassa tathāgatabalaṁ
hoti yaṁ balaṁ āgamma tathāgato āsabhaṇṭhānaṁ paṭijānāti parisāsu
sīhanādaṁ nadati brahmacakkaṁ pavatteti.
Puna caparaṁ bhikkhave tathāgato āsavānaṁ khayā anāsavañcetovimuttiṁ
paññāvimuttiṁ diṭṭheva dhamme sayaṁ abhiññā sacchikatvā upasampajja
viharati yampi bhikkhave tathāgato āsavānaṁ khayā .pe.
Sacchikatvā upasampajja viharati idampi bhikkhave tathāgatassa tathāgatabalaṁ
hoti yaṁ balaṁ āgamma tathāgato āsabhaṇṭhānaṁ paṭijānāti parisāsu
sīhanādaṁ nadati brahmacakkaṁ pavatteti. Imāni kho bhikkhave cha tathāgatassa
tathāgatabalāni yehi balehi samannāgato tathāgato āsabhaṇṭhānaṁ
Paṭijānāti parisāsu sīhanādaṁ nadati brahmacakkaṁ pavatteti.
Tatra ce bhikkhave pare tathāgataṁ ṭhānañca ṭhānato aṭṭhānañca
aṭṭhānato yathābhūtaṁ ñāṇena upasaṅkamitvā pañhaṁ pucchanti yathā
yathā bhikkhave tathāgatassa ṭhānañca ṭhānato aṭṭhānañca aṭṭhānato
yathābhūtaṁ ñāṇaṁ viditaṁ tathā tathā tesaṁ tathāgato ṭhānañca ṭhānato
aṭṭhānañca aṭṭhānato yathābhūtaṁ ñāṇena pañhaṁ puṭṭho byākaroti.
Tatra ce bhikkhave pare tathāgataṁ atītānāgatapaccuppannānaṁ kammasamādānānaṁ
ṭhānaso hetuso vipākaṁ yathābhūtaṁ ñāṇena upasaṅkamitvā pañhaṁ
pucchanti yathā yathā bhikkhave tathāgatassa atītānāgatapaccuppannānaṁ
kammasamādānānaṁ ṭhānaso hetuso vipākaṁ yathābhūtaṁ ñāṇaṁ viditaṁ tathā
tathā tesaṁ tathāgato atītānāgatapaccuppannānaṁ kammasamādānānaṁ ṭhānaso
hetuso vipākaṁ yathābhūtaṁ ñāṇena pañhaṁ puṭṭho byākaroti. Tatra
ce bhikkhave pare tathāgataṁ jhānavimokkhasamādhisamāpattīnaṁ saṅkilesaṁ vodānaṁ
vuṭṭhānaṁ yathābhūtaṁ ñāṇena upasaṅkamitvā pañhaṁ pucchanti yathā
yathā bhikkhave tathāgatassa jhānavimokkhasamādhisamāpattīnaṁ saṅkilesaṁ vodānaṁ
vuṭṭhānaṁ yathābhūtaṁ ñāṇaṁ viditaṁ tathā tathā tesaṁ tathāgato
jhānavimokkhasamādhisamāpattīnaṁ saṅkilesaṁ vodānaṁ vuṭṭhānaṁ yathābhūtaṁ ñāṇena
pañhaṁ puṭṭho byākaroti. Tatra ce bhikkhave pare tathāgataṁ
pubbenivāsānussatiṁ yathābhūtaṁ ñāṇena upasaṅkamitvā pañhaṁ pucchanti yathā
yathā bhikkhave tathāgatassa pubbenivāsānussatiṁ yathābhūtaṁ ñāṇaṁ viditaṁ
Tathā tathā tesaṁ tathāgato pubbenivāsānussatiṁ yathābhūtaṁ ñāṇena pañhaṁ
puṭṭho byākaroti. Tatra ce bhikkhave pare tathāgataṁ sattānaṁ cutūpapātaṁ
yathābhūtaṁ ñāṇena upasaṅkamitvā pañhaṁ pucchanti yathā yathā
bhikkhave tathāgatassa sattānaṁ cutūpapātaṁ yathābhūtaṁ ñāṇaṁ viditaṁ tathā
tathā tesaṁ tathāgato sattānaṁ cutūpapātaṁ yathābhūtaṁ ñāṇena pañhaṁ
puṭṭho byākaroti. Tatra ce bhikkhave pare tathāgataṁ āsavānaṁ khayaṁ 1
yathābhūtaṁ ñāṇena upasaṅkamitvā pañhaṁ pucchanti yathā yathā
tathāgatassa āsavānaṁ khayaṁ yathābhūtaṁ ñāṇaṁ viditaṁ tathā tathā tesaṁ
tathāgato āsavānaṁ khayaṁ yathābhūtaṁ ñāṇena pañhaṁ puṭṭho byākaroti.
Tatra bhikkhave yampidaṁ 2 ṭhānañca ṭhānato aṭṭhānañca aṭṭhānato yathābhūtaṁ
ñāṇaṁ tampi samāhitassa vadāmi no asamāhitassa. Yampidaṁ
atītānāgatapaccuppannānaṁ kammasamādānānaṁ ṭhānaso hetuso vipākaṁ yathābhūtaṁ
ñāṇaṁ tampi samāhitassa vadāmi no asamāhitassa. Yampidaṁ
bhikkhave 3 jhānavimokkhasamādhisamāpattīnaṁ saṅkilesaṁ vodānaṁ vuṭṭhānaṁ yathābhūtaṁ
ñāṇaṁ tampi samāhitassa vadāmi no asamāhitassa. Yampidaṁ
bhikkhave 3 pubbenivāsānussatiṁ yathābhūtaṁ ñāṇaṁ tampi samāhitassa vadāmi
no asamāhitassa. Yampidaṁ sattānaṁ cutūpapātaṁ yathābhūtaṁ ñāṇaṁ tampi
samāhitassa vadāmi no asamāhitassa. Yampidaṁ āsavānaṁ khayaṁ yathābhūtaṁ
ñāṇaṁ tampi samāhitassa vadāmi no asamāhitassa. Iti
1 Ma. Yu. khayā. aparaṁpi evaṁ ñātabbaṁ. 2 Po. yadidaṁ. sabbattha evaṁ īdisameva.
3 Ma. Yu. ayaṁ pāṭho natthi.
Kho bhikkhave samādhi maggo asamādhi kummaggoti.
Mahāvaggo paṭhamo.
Tassuddānaṁ
soṇo phagguṇo chaḷābhijātiyo āsavā dārukammena 1
pañca passe cittaparāyanaṁ udakaṁ nibbedhi cha imā balena vaggoti.
-------
Devatāvaggo dutiyo

[336] 65 Cha bhikkhave dhamme appahāya abhabbo anāgāmiphalaṁ
sacchikātuṁ katame cha assaddhiyaṁ ahirikaṁ anottappaṁ kosajjaṁ
muṭṭhasaccaṁ duppaññattaṁ ime kho bhikkhave cha dhamme appahāya
abhabbo anāgāmiphalaṁ sacchikātuṁ. Cha bhikkhave dhamme pahāya bhabbo
anāgāmiphalaṁ sacchikātuṁ katame cha assaddhiyaṁ ahirikaṁ anottappaṁ
kosajjaṁ muṭṭhasaccaṁ duppaññattaṁ ime kho bhikkhave cha dhamme
pahāya bhabbo anāgāmiphalaṁ sacchikātunti.

[337] 66 Cha bhikkhave dhamme appahāya abhabbo arahattaṁ sacchikātuṁ
katame cha thīnaṁ middhaṁ uddhaccaṁ kukkuccaṁ assaddhiyaṁ
pamādaṁ ime kho bhikkhave cha dhamme appahāya abhabbo arahattaṁ
sacchikātuṁ. Cha bhikkhave dhamme pahāya bhabbo arahattaṁ sacchikātuṁ
katame cha thīnaṁ middhaṁ uddhaccaṁ kukkuccaṁ assaddhiyaṁ pamādaṁ
ime kho bhikkhave cha dhamme pahāya bhabbo arahattaṁ sacchikātunti.
1 Yu. ... chaḷabhijātiyo āsavā dārukammahatthipassa cittaparāyanaṁ udakaṁ
nibbedhikasīhanādena vaggoti.

[338] 67 So vata bhikkhave bhikkhu pāpamitto pāpasahāyo
pāpasampavaṅko pāpamitte sevamāno bhajamāno payirupāsamāno tesañca
diṭṭhānugatiṁ āpajjamāno abhisamācārikaṁ dhammaṁ paripūressatīti netaṁ ṭhānaṁ
vijjati abhisamācārikaṁ dhammaṁ aparipūretvā sekhadhammaṁ paripūressatīti
netaṁ ṭhānaṁ vijjati sekhadhammaṁ aparipūretvā sīlāni paripūressatīti
netaṁ ṭhānaṁ vijjati sīlāni aparipūretvā kāmarāgaṁ vā rūparāgaṁ vā arūparāgaṁ
vā pajahissatīti netaṁ ṭhānaṁ vijjati so vata bhikkhave bhikkhu kalyāṇamitto
kalyāṇasahāyo kalyāṇasampavaṅko kalyāṇamitte sevamāno
bhajamāno payirupāsamāno tesañca diṭṭhānugatiṁ āpajjamāno abhisamācārikaṁ
dhammaṁ paripūressatīti ṭhānametaṁ vijjati abhisamācārikaṁ dhammaṁ paripūretvā
sekkhadhammaṁ paripūressatīti ṭhānametaṁ vijjati sekhadhammaṁ paripūretvā
sīlāni paripūressatīti ṭhānametaṁ vijjati sīlāni paripūretvā kāmarāgaṁ
vā rūparāgaṁ vā arūparāgaṁ vā pajahissatīti ṭhānametaṁ vijjatīti.

[339] 68 So vata bhikkhave bhikkhu saṅgaṇikārāmo saṅgaṇikārato
saṅgaṇikārāmataṁ anuyutto gaṇārāmo gaṇarato 2 gaṇārāmataṁ anuyutto eko
paviveke abhiramissatīti netaṁ ṭhānaṁ vijjati eko paviveke anabhiramanto
cittassa nimittaṁ gahessatīti netaṁ ṭhānaṁ vijjati cittassa nimittaṁ
aggaṇhanto sammādiṭṭhiṁ paripūressatīti netaṁ ṭhānaṁ vijjati sammādiṭṭhiṁ
aparipūretvā sammāsamādhiṁ paripūressatīti netaṁ ṭhānaṁ vijjati
sammāsamādhiṁ aparipūretvā saññojanāni pajahissatīti netaṁ ṭhānaṁ vijjati
1 Po. Ma. saṅgaṇikarato. 2 Po. gaṇārāmarato.
Saññojanāni appahāya nibbānaṁ sacchikarissatīti netaṁ ṭhānaṁ vijjati
so vata bhikkhave bhikkhu na saṅgaṇikārāmo na saṅgaṇikārato na saṅgaṇikārāmataṁ
anuyutto na gaṇārāmo na gaṇarato na gaṇārāmataṁ anuyutto
eko paviveke abhiramissatīti ṭhānametaṁ vijjati eko paviveke abhiramanto
cittassa nimittaṁ gahessatīti ṭhānametaṁ vijjati cittassa
nimittaṁ gaṇhanto sammādiṭṭhiṁ paripūressatīti ṭhānametaṁ vijjati
sammādiṭṭhiṁ paripūretvā sammāsamādhiṁ paripūressatīti ṭhānametaṁ vijjati
sammāsamādhiṁ paripūretvā saññojanāni pajahissatīti ṭhānametaṁ vijjati
saññojanāni pahāya nibbānaṁ sacchikarissatīti ṭhānametaṁ vijjatīti.

[340] 69 Atha kho aññatarā devatā abhikkantāya rattiyā
abhikkantavaṇṇanā kevalakappaṁ jetavanaṁ obhāsetvā yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ aṭṭhāsi
ekamantaṁ ṭhitā kho sā devatā bhagavantaṁ etadavoca chayime bhante
dhammā bhikkhuno aparihānāya saṁvattanti katame cha satthugāravatā
dhammagāravatā saṅghagāravatā sikkhāgāravatā sovacassatā
kalyāṇamittatā ime kho bhante cha dhammā bhikkhuno aparihānāya
saṁvattantīti. Idamavoca sā devatā. Samanuñño satthā ahosi.
Atha kho sā devatā samanuñño me satthāti bhagavantaṁ abhivādetvā
padakkhiṇaṁ katvā tatthevantaradhāyi.
Atha kho bhagavā tassā rattiyā accayena bhikkhū āmantesi
Imaṁ bhikkhave rattiṁ aññatarā devatā abhikkantāya rattiyā abhikkantavaṇṇā
kevalakappaṁ jetavanaṁ obhāsetvā yenāhaṁ tenupasaṅkami
upasaṅkamitvā maṁ abhivādetvā ekamantaṁ aṭṭhāsi ekamantaṁ ṭhitā
kho bhikkhave sā devatā maṁ etadavoca chayime bhante dhammā
bhikkhuno aparihānāya saṁvattanti katame cha satthugāravatā dhammagāravatā
saṅghagāravatā sikkhāgāravatā sovacassatā kalyāṇamittatā
ime kho bhante cha dhammā bhikkhuno aparihānāya saṁvattantīti.
Idamavoca bhikkhave sā devatā idaṁ vatvā maṁ abhivādetvā padakkhiṇaṁ
katvā tatthevantaradhāyīti.
Evaṁ vutte āyasmā sārīputto bhagavantaṁ abhivādetvā
etadavoca imassa kho ahaṁ bhante bhagavatā saṅkhittena bhāsitassa
evaṁ vitthārena atthaṁ ājānāmi idha bhante bhikkhu attanā ca
satthugāravo hoti satthugāravatāya ca vaṇṇavādī ye caññe
bhikkhū na satthugāravā te ca satthugāravatāya samādapeti ye caññe
bhikkhū satthugāravā tesañca vaṇṇaṁ bhaṇati bhūtaṁ tacchaṁ kālena
attanā ca dhammagāravo hoti .pe. Saṅghagāravo hoti .. Sikkhāgāravo ..
Hoti ... Suvaco hoti .pe. Kalyāṇamitto hoti kalyāṇamittatāya
ca vaṇṇavādī ye caññe bhikkhū na kalyāṇamittā te ca
kalyāṇamittatāya samādapeti ye caññe bhikkhū kalyāṇamittā
tesañca vaṇṇaṁ bhaṇati bhūtaṁ tacchaṁ kālena imassa kho ahaṁ bhante
Bhagavatā saṅkhittena bhāsitassa evaṁ vitthārena atthaṁ ājānāmīti.
Sādhu sādhu sārīputta sādhu kho tvaṁ sārīputta imassa mayā
saṅkhittena bhāsitassa evaṁ vitthārena atthaṁ ājānāsi idha sārīputta
bhikkhu attanā ca satthugāravo hoti satthugāravatāya ca vaṇṇavādī
ye caññe bhikkhū na satthugāravā te ca satthugāravatāya samādapeti
ye caññe bhikkhū satthugāravā tesañca vaṇṇaṁ bhaṇati bhūtaṁ tacchaṁ
kālena attanā ca dhammagāravo hoti .pe. Saṅghagāravo hoti ...
Sikkhāgāravo hoti ... Suvaco hoti .pe. Kalyāṇamitto hoti
kalyāṇamittatāya ca vaṇṇavādī ye caññe bhikkhū na kalyāṇamittā
te ca kalyāṇamittatāya samādapeti ye caññe bhikkhū kalyāṇamittā
tesañca vaṇṇaṁ bhaṇati bhūtaṁ tacchaṁ kālena imassa kho
sārīputta mayā saṅkhittena bhāsitassa evaṁ vitthārena attho daṭṭhabboti.

[341] 70 So vata bhikkhave bhikkhu na santena samādhinā na
paṇītena na paṭippassaddhiladdhena na ekodibhāvādhigatena anekavihitaṁ iddhividhaṁ
paccanubhavissati ekopi hutvā bahudhā bhavissati bahudhāpi hutvā
eko bhavissati .pe. Yāva brahmalokāpi kāyena vasaṁ vattissatīti 1
netaṁ ṭhānaṁ vijjati. Dibbāya sotadhātuyā visuddhāya atikkantamānusikāya
ubho sadde suṇissati dibbe ca mānuse ca ye dūre
santike cāti netaṁ ṭhānaṁ vijjati. Parasattānaṁ parapuggalānaṁ cetasā
ceto paricca pajānissati sarāgaṁ vā cittaṁ sarāgaṁ cittanti
1 Yu. kāyena va saṁvattissatīti.
Pajānissati .pe. Avimuttaṁ vā cittaṁ avimuttaṁ cittanti [1]- pajānissatīti
netaṁ ṭhānaṁ vijjati. Anekavihitaṁ pubbenivāsaṁ anussarissati
seyyathīdaṁ ekampi jātiṁ dvepi jātiyo .pe. Iti sākāraṁ sauddesaṁ
anekavihitaṁ pubbenivāsaṁ anussarissatīti netaṁ ṭhānaṁ vijjati. Dibbena
cakkhunā visuddhena atikkantamānusakena satte passissati .pe.
Yathākammūpage satte pajānissatīti netaṁ ṭhānaṁ vijjati. Āsavānaṁ khayā
.pe. Sacchikatvā upasampajja viharissatīti netaṁ ṭhānaṁ vijjati.
So vata bhikkhave bhikkhu santena samādhinā paṇītena
paṭippassaddhiladdhena ekodibhāvādhigatena anekavihitaṁ iddhividhaṁ paccanubhavissati
.pe. Yāva brahmalokāpi kāyena vasaṁ vattissatīti ṭhānametaṁ vijjati.
Dibbāya sotadhātuyā visuddhāya atikkantamānusikāya ubho sadde
suṇissati dibbe ca mānuse ca ye dūre santike cāti ṭhānametaṁ vijjati.
Parasattānaṁ parapuggalānaṁ cetasā ceto paricca pajānissati sarāgaṁ
vā cittaṁ sarāgaṁ cittanti pajānissati .pe. Avimuttaṁ vā cittaṁ
avimuttaṁ cittanti pajānissatīti ṭhānametaṁ vijjati. Anekavihitaṁ
pubbenivāsaṁ anussarissati seyyathīdaṁ ekampi jātiṁ dvepi jātiyo
.pe. Iti sākāraṁ sauddesaṁ anekavihitaṁ pubbenivāsaṁ anussarissatīti
ṭhānametaṁ vijjati. Dibbena cakkhunā visuddhena atikkantamānusakena
satte passissati cavamāne upapajjamāne hīne paṇīte suvaṇṇe dubbaṇṇe
sugate duggate yathākammūpage satte pajānissatīti ṭhānametaṁ
1 Po. Yu. .pe. vimuttaṁ vā cittaṁ vimuttaṁ cittanti ....
Vijjati. Āsavānaṁ khayā anāsavañcetovimuttiṁ .pe. Sacchikatvā
upasampajja viharissatīti ṭhānametaṁ vijjatīti.

[342] 71 Chahi bhikkhave dhammehi samannāgato bhikkhu abhabbo tatra
tatreva sakkhibhabbataṁ pāpuṇituṁ sati sati āyatane katamehi chahi idha
bhikkhave bhikkhu ime hānabhāgiyā dhammāti yathābhūtaṁ nappajānāti
ime ṭhitibhāgiyā dhammāti yathābhūtaṁ nappajānāti ime visesabhāgiyā
dhammāti yathābhūtaṁ nappajānāti ime nibbedhabhāgiyā dhammāti yathābhūtaṁ
nappajānāti asakkaccakārī ca hoti asappāyakārī ca imehi kho
bhikkhave chahi dhammehi samannāgato bhikkhu abhabbo tatra tatreva
sakkhibhabbataṁ pāpuṇituṁ sati sati āyatane.
Chahi bhikkhave dhammehi samannāgato bhikkhu bhabbo tatra tatreva
sakkhibhabbataṁ pāpuṇituṁ sati sati āyatane katamehi chahi idha bhikkhave
bhikkhu ime hānabhāgiyā dhammāti yathābhūtaṁ pajānāti ime ṭhitibhāgiyā 1
dhammāti yathābhūtaṁ pajānāti ime visesabhāgiyā dhammāti yathābhūtaṁ
pajānāti ime nibbedhabhāgiyā dhammāti yathābhūtaṁ pajānāti sakkaccakārī
ca hoti sappāyakārī ca imehi kho bhikkhave chahi dhammehi
samannāgato bhikkhu bhabbo tatra tatreva sakkhibhabbataṁ pāpuṇituṁ sati
sati āyataneti.

[343] 72 Chahi bhikkhave dhammehi samannāgato bhikkhu abhabbo
samādhismiṁ balataṁ pāpuṇituṁ katamehi chahi idha bhikkhave bhikkhu
1 Po. vuḍḍhibhāgiyā....
Na samādhissa samāpattikusalo hoti na samādhissa ṭhitikusalo hoti na
samādhissa vuṭṭhānakusalo hoti asakkaccakārī ca hoti asātaccakārī
ca asappāyakārī ca imehi kho bhikkhave chahi dhammehi samannāgato
bhikkhu abhabbo samādhismiṁ balataṁ pāpuṇituṁ.
Chahi bhikkhave dhammehi samannāgato bhikkhu bhabbo samādhismiṁ balataṁ
pāpuṇituṁ katamehi chahi idha bhikkhave bhikkhu samādhissa samāpattikusalo
hoti samādhissa ṭhitikusalo hoti samādhissa vuṭṭhānakusalo
hoti sakkaccakārī ca hoti sātaccakārī ca sappāyakārī ca
imehi kho bhikkhave chahi dhammehi samannāgato bhikkhu bhabbo samādhismiṁ
balataṁ pāpuṇitunti.

[344] 73 Cha bhikkhave dhamme appahāya abhabbo paṭhamaṁ jhānaṁ upasampajja
viharituṁ katame cha kāmacchandaṁ byāpādaṁ thīnamiddhaṁ uddhaccakukkuccaṁ
vicikicchaṁ kāmesu kho panassa ādīnavo na yathābhūtaṁ sammappaññāya
sudiṭṭho hoti ime kho bhikkhave cha dhamme appahāya
abhabbo paṭhamaṁ jhānaṁ upasampajja viharituṁ.
Cha bhikkhave dhamme pahāya bhabbo paṭhamaṁ jhānaṁ upasampajja
viharituṁ katame cha kāmacchandaṁ byāpādaṁ thīnamiddhaṁ uddhaccakukkuccaṁ
vicikicchaṁ kāmesu kho panassa ādīnavo yathābhūtaṁ sammappaññāya sudiṭṭho
hoti ime kho bhikkhave cha dhamme pahāya bhabbo paṭhamaṁ jhānaṁ
upasampajja viharitunti.