[385] 114 Tayome bhikkhave dhammā katame tayo asantuṭṭhitā
asampajaññaṁ mahicchatā ime kho bhikkhave tayo dhammā imesaṁ
kho bhikkhave tiṇṇaṁ dhammānaṁ pahānāya tayo dhammā bhāvetabbā
katame tayo asantuṭṭhitāya pahānāya santuṭṭhitā bhāvetabbā
asampajaññassa pahānāya sampajaññaṁ bhāvetabbaṁ mahicchatāya pahānāya
appicchatā bhāvetabbā imesaṁ kho bhikkhave tiṇṇaṁ dhammānaṁ pahānāya
ime tayo dhammā bhāvetabbāti.

[386] 115 Tayome bhikkhave dhammā katame tayo dovacassatā
pāpamittatā cetaso vikkhepo ime kho bhikkhave tayo dhammā
1 Po. vihesā ....
Imesaṁ kho bhikkhave tiṇṇaṁ dhammānaṁ pahānāya tayo dhammā bhāvetabbā
katame tayo dovacassatāya pahānāya sovacassatā bhāvetabbā pāpamittatāya
pahānāya kalyāṇamittatā bhāvetabbā cetaso vikkhepassa
pahānāya ānāpānassati bhāvetabbā imesaṁ kho bhikkhave tiṇṇaṁ
dhammānaṁ pahānāya ime tayo dhammā bhāvetabbāti.

[387] 116 Tayome bhikkhave dhammā katame tayo uddhaccaṁ
asaṁvaro pamādo ime kho bhikkhave tayo dhammā imesaṁ kho bhikkhave
tiṇṇaṁ dhammānaṁ pahānāya tayo dhammā bhāvetabbā katame tayo
uddhaccassa pahānāya samatho bhāvetabbo asaṁvarassa pahānāya saṁvaro
bhāvetabbo pamādassa pahānāya appamādo bhāvetabbo imesaṁ
kho bhikkhave tiṇṇaṁ dhammānaṁ pahānāya ime tayo dhammā bhāvetabbāti.
Tikavaggo paṭhamo.
Tassuddānaṁ
rāgaduccaritavitakka saññādhātūti pavuccati 1
assādārati tuṭṭhi duve ca 2 uddhaccena vaggoti.
-------
1 Ma. Yu. vuccati. 2 Yu. dovaca ....
Vaggāsaṅgahitā suttantā

[388] 117 Cha bhikkhave dhamme appahāya abhabbo kāye kāyānupassī
viharituṁ katame cha kammārāmataṁ bhassārāmataṁ niddārāmataṁ
saṅgaṇikārāmataṁ indriyesu aguttadvārataṁ bhojane amattaññutaṁ
ime kho bhikkhave cha dhamme appahāya abhabbo kāye kāyānupassī
viharituṁ.

[389] 118 Cha bhikkhave dhamme pahāya bhabbo kāye kāyānupassī
viharituṁ katame cha kammārāmataṁ bhassārāmataṁ niddārāmataṁ saṅgaṇikārāmataṁ
indriyesu aguttadvārataṁ bhojane amattaññutaṁ ime
kho bhikkhave cha dhamme pahāya bhabbo kāye kāyānupassī viharitunti.

[390] 119 Cha bhikkhave dhamme appahāya abhabbo ajjhattaṁ kāye
kāyānupassī viharituṁ .pe. Bahiddhā kāye ajjhattabahiddhā kāye

[391] 120 Cha bhikkhave dhamme appahāya abhabbo vedanāsu
vedanānupassī viharituṁ .pe. Ajjhattaṁ vedanāsu bahiddhā vedanāsu
ajjhattabahiddhā vedanāsu

[392] 121 Cha bhikkhave dhamme appahāya abhabbo citte cittānupassī
viharituṁ .pe. Ajjhattaṁ citte bahiddhā citte ajjhattabahiddhā citte

[393] 122 Cha bhikkhave dhamme appahāya abhabbo dhammesu
dhammānupassī viharituṁ .pe. Ajjhattaṁ dhammesu bahiddhā dhammesu
Ajjhattabahiddhā dhammesu dhammānupassī viharituṁ katame cha kammārāmataṁ
bhassārāmataṁ niddārāmataṁ saṅgaṇikārāmataṁ indriyesu aguttadvārataṁ
bhojane amattaññutaṁ ime kho bhikkhave cha dhamme appahāya abhabbo
ajjhattabahiddhā dhammesu dhammānupassī viharituṁ.

[394] 123 Cha bhikkhave dhamme pahāya bhabbo ajjhattabahiddhā dhammesu
dhammānupassī viharituṁ katame cha kammārāmataṁ .pe. Bhojane amattaññutaṁ
ime kho bhikkhave cha dhamme pahāya bhabbo ajjhattabahiddhā
dhammesu dhammānupassī viharitunti.