[155] Pañcime bhikkhave dhammā saddhammassa sammosāya
antaradhānāya saṁvattanti katame pañca idha bhikkhave bhikkhū dhammaṁ na
pariyāpuṇanti suttaṁ geyyaṁ veyyākaraṇaṁ gāthaṁ udānaṁ itivuttakaṁ jātakaṁ
abbhūtadhammaṁ vedallaṁ ayaṁ bhikkhave paṭhamo dhammo saddhammassa sammosāya
antaradhānāya saṁvattati. Puna caparaṁ bhikkhave bhikkhū yathāsutaṁ yathāpariyattaṁ
Dhammaṁ na vitthārena paresaṁ desenti ayaṁ bhikkhave dutiyo dhammo
saddhammassa sammosāya antaradhānāya saṁvattati. Puna caparaṁ bhikkhave
bhikkhū yathāsutaṁ yathāpariyattaṁ dhammaṁ na vitthārena paraṁ 1 vācenti ayaṁ
bhikkhave tatiyo dhammo saddhammassa sammosāya antaradhānāya saṁvattati.
Puna caparaṁ bhikkhave bhikkhū yathāsutaṁ yathāpariyattaṁ dhammaṁ na vitthārena
sajjhāyaṁ karonti ayaṁ bhikkhave catuttho dhammo saddhammassa sammosāya
antaradhānāya saṁvattati. Puna caparaṁ bhikkhave bhikkhū yathāsutaṁ
yathāpariyattaṁ dhammaṁ na cetasā anuvitakkenti anuvicārenti manasānupekkhanti
ayaṁ bhikkhave pañcamo dhammo saddhammassa sammosāya antaradhānāya
saṁvattati. Ime kho bhikkhave pañca dhammā saddhammassa sammosāya
antaradhānāya saṁvattanti. Pañcime bhikkhave dhammā saddhammassa ṭhitiyā
asammosāya anantaradhānāya saṁvattanti katame pañca idha bhikkhave
bhikkhū dhammaṁ pariyāpuṇanti suttaṁ geyyaṁ veyyākaraṇaṁ gāthaṁ udānaṁ
itivuttakaṁ jātakaṁ abbhūtadhammaṁ vedallaṁ ayaṁ bhikkhave paṭhamo dhammo
saddhammassa ṭhitiyā asammosāya anantaradhānāya saṁvattati. Puna caparaṁ
bhikkhave bhikkhū yathāsutaṁ yathāpariyattaṁ dhammaṁ vitthārena paresaṁ desenti
ayaṁ bhikkhave dutiyo dhammo saddhammassa ṭhitiyā asammosāya
anantaradhānāya saṁvattati. Puna caparaṁ bhikkhave bhikkhū yathāsutaṁ yathāpariyattaṁ
dhammaṁ vitthārena paresaṁ vācenti ayaṁ bhikkhave tatiyo dhammo
saddhammassa ṭhitiyā asammosāya anantaradhānāya saṁvattati. Puna caparaṁ
1 Yu. paresaṁ.
Bhikkhave bhikkhū yathāsutaṁ yathāpariyattaṁ dhammaṁ vitthārena sajjhāyaṁ karonti
ayaṁ bhikkhave catuttho dhammo saddhammassa ṭhitiyā asammosāya
anantaradhānāya saṁvattati. Puna caparaṁ bhikkhave bhikkhū yathāsutaṁ yathāpariyattaṁ
dhammaṁ cetasā anuvitakkenti anuvicārenti manasānupekkhanti ayaṁ
bhikkhave pañcamo dhammo saddhammassa ṭhitiyā asammosāya anantaradhānāya
saṁvattati. Ime kho bhikkhave pañca dhammā saddhammassa ṭhitiyā
asammosāya anantaradhānāya saṁvattantīti.

[156] Pañcime bhikkhave dhammā saddhammassa sammosāya
antaradhānāya saṁvattanti katame pañca idha bhikkhave bhikkhū duggahitaṁ
suttantaṁ pariyāpuṇanti dunnikkhittehi padabyañjanehi dunnikkhittassa
bhikkhave padabyañjanassa atthopi dunnayo hoti ayaṁ bhikkhave paṭhamo
dhammo saddhammassa sammosāya antaradhānāya saṁvattati. Puna caparaṁ
bhikkhave bhikkhū dubbacā honti dovacassakaraṇehi dhammehi samannāgatā
akkhamā apadakkhiṇaggāhino anusāsaniṁ ayaṁ bhikkhave dutiyo dhammo
saddhammassa sammosāya antaradhānāya saṁvattati. Puna caparaṁ bhikkhave
ye te bhikkhū bahussutā āgatāgamā dhammadharā vinayadharā mātikādharā
te na sakkaccaṁ suttantaṁ paraṁ 1 vācenti tesaṁ accayena chinnamūlako
suttanto hoti appaṭisaraṇo ayaṁ bhikkhave tatiyo dhammo saddhammassa
sammosāya antaradhānāya saṁvattati. Puna caparaṁ bhikkhave therā
bhikkhū bāhullikā honti sāthalikā okkamane pubbaṅgamā paviveke
1 Yu. paresaṁ.
Nikkhittadhurā na viriyaṁ ārabhanti appattassa pattiyā anadhigatassa
adhigamāya asacchikatassa sacchikiriyāya tesaṁ pacchimā janatā diṭṭhānugatiṁ
āpajjati sāpi hoti bāhullikā sāthalikā okkamane pubbaṅgamā
paviveke nikkhittadhurā na viriyaṁ ārabhati appattassa pattiyā
anadhigatassa adhigamāya asacchikatassa sacchikiriyāya ayaṁ bhikkhave catuttho
dhammo saddhammassa sammosāya antaradhānāya saṁvattati. Puna caparaṁ
bhikkhave saṅgho bhinno hoti saṅghe kho pana bhikkhave bhinne
aññamaññaṁ akkosā ca honti aññamaññaṁ paribhāsā ca honti
aññamaññaṁ parikkhepā ca honti aññamaññaṁ pariccajā 1 ca honti
tattha appasannā ceva nappasīdanti pasannānañca ekaccānaṁ
aññathattaṁ hoti ayaṁ bhikkhave pañcamo dhammo saddhammassa sammosāya
antaradhānāya saṁvattati. Ime kho bhikkhave pañca dhammā saddhammassa
sammosāya antaradhānāya saṁvattanti 2 . Pañcime bhikkhave dhammā
saddhammassa ṭhitiyā asammosāya anantaradhānāya saṁvattanti katame pañca
idha bhikkhave bhikkhū suggahitaṁ suttantaṁ pariyāpuṇanti sunikkhittehi
padabyañjanehi sunikkhittassa bhikkhave padabyañjanassa atthopi sunayo
hoti ayaṁ bhikkhave paṭhamo dhammo saddhammassa ṭhitiyā asammosāya
anantaradhānāya saṁvattati. Puna caparaṁ bhikkhave bhikkhū subacā honti
sovacassakaraṇehi dhammehi samannāgatā khamā padakkhiṇaggāhino anusāsaniṁ
ayaṁ bhikkhave dutiyo dhammo saddhammassa ṭhitiyā asammosāya
1 Po. Ma. pariccajanā. sabbatthavāresu īdisameva. 2 Po. saṁvattantīti.
Anantaradhānāya saṁvattati. Puna caparaṁ bhikkhave ye te bhikkhū bahussutā
āgatāgamā dhammadharā vinayadharā mātikādharā te sakkaccaṁ [1]- paraṁ vācenti
tesaṁ accayena na chinnamūlako suttanto hoti sappaṭisaraṇo ayaṁ
bhikkhave tatiyo dhammo saddhammassa ṭhitiyā asammosāya anantaradhānāya
saṁvattati. Puna caparaṁ bhikkhave therā bhikkhū na bāhullikā honti
na sāthalikā okkamane nikkhittadhurā paviveke pubbaṅgamā viriyaṁ ārabhanti
appattassa pattiyā anadhigatassa adhigamāya asacchikatassa
sacchikiriyāya tesaṁ pacchimā janatā diṭṭhānugatiṁ āpajjati sāpi hoti
na bāhullikā na sāthalikā okkamane nikkhittadhurā paviveke pubbaṅgamā
viriyaṁ ārabhati appattassa pattiyā anadhigatassa adhigamāya asacchikatassa
sacchikiriyāya ayaṁ bhikkhave catuttho dhammo saddhammassa ṭhitiyā
asammosāya anantaradhānāya saṁvattati. Puna caparaṁ bhikkhave saṅgho samaggo
sammodamāno avivadamāno ekuddeso phāsuṁ 2 viharati saṅghe kho pana
bhikkhave samagge na ceva aññamaññaṁ akkosā honti na ca aññamaññaṁ
paribhāsā honti na ca aññamaññaṁ parikkhepā honti na ca aññamaññaṁ
pariccajā honti tattha appasannā ceva pasīdanti pasannānañca
bhiyyobhāvo hoti ayaṁ bhikkhave pañcamo dhammo saddhammassa ṭhitiyā
asammosāya anantaradhānāya saṁvattati. Ime kho bhikkhave pañca dhammā
saddhammassa ṭhitiyā asammosāya anantaradhānāya saṁvattantīti.
1 Po. Ma. suttantaṁ. 2 Po. Ma. Yu. phāsu.

[157] Pañcannaṁ bhikkhave puggalānaṁ kathā dukkathā puggale 1
puggalaṁ upanidhāya katamesaṁ pañcannaṁ assaddhassa bhikkhave
saddhākathā dukkathā dussīlassa sīlakathā dukkathā appassutassa
bāhusaccakathā dukkathā maccharissa 2 cāgakathā dukkathā duppaññassa
paññākathā dukkathā. Kasmā ca bhikkhave assaddhassa saddhākathā
dukkathā assaddho bhikkhave saddhākathāya kacchamānāya abhisajjati kuppati
byāpajjati patitthīyati kopañca dosañca appaccayañca pātukaroti
taṁ kissa hetu tañhi so bhikkhave saddhāsampadaṁ attani na
samanupassati na ca labhati tatonidānaṁ pītipāmujjaṁ 3 tasmā assaddhassa
saddhākathā dukkathā. Kasmā ca bhikkhave dussīlassa sīlakathā dukkathā
dussīlo bhikkhave sīlakathāya kacchamānāya abhisajjati kuppati byāpajjati
patitthīyati kopañca dosañca appaccayañca pātukaroti taṁ kissa
hetu tañhi so bhikkhave sīlasampadaṁ attani na samanupassati na ca
labhati tatonidānaṁ pītipāmujjaṁ tasmā dussīlassa sīlakathā dukkathā.
Kasmā ca bhikkhave appassutassa bāhusaccakathā dukkathā appassuto
bhikkhave bāhusaccakathāya kacchamānāya abhisajjati kuppati byāpajjati
patitthīyati kopañca dosañca appaccayañca pātukaroti taṁ kissa
hetu tañhi so bhikkhave sutasampadaṁ attani na samanupassati na
ca labhati tatonidānaṁ pītipāmujjaṁ tasmā appassutassa bāhusaccakathā
1 Sī. Yu. puggalaṁ puggalaṁ. ito paraṁ īdīsameva. 2 Po. Yu. macchariyassa. ito
paraṁ evaṁ ñātabbaṁ. 3 Ma. pītipāmojjaṁ. sabbatthavāresu īdisameva.
Kathā dukkathā. Kasmā ca bhikkhave maccharissa cāgakathā dukkathā
maccharī bhikkhave cāgakathāya kacchamānāya abhisajjati kuppati byāpajjati
patitthīyati kopañca dosañca appaccayañca pātukaroti taṁ kissa
hetu tañhi so bhikkhave cāgasampadaṁ attani na samanupassati na
ca labhati tatonidānaṁ pītipāmujjaṁ tasmā maccharissa cāgakathā dukkathā.
Kasmā ca bhikkhave duppaññassa paññākathā dukkathā duppañño
bhikkhave paññākathāya kacchamānāya abhisajjati kuppati byāpajjati
patitthīyati kopañca dosañca appaccayañca pātukaroti taṁ kissa hetu
tañhi so bhikkhave paññāsampadaṁ attani na samanupassati na ca
labhati tatonidānaṁ pītipāmujjaṁ tasmā duppaññassa paññākathā
dukkathā. Imesaṁ kho bhikkhave pañcannaṁ puggalānaṁ kathā dukkathā puggale
puggalaṁ upanidhāya. Pañcannaṁ bhikkhave puggalānaṁ kathā sukathā puggale
puggalaṁ upanidhāya katamesaṁ pañcannaṁ saddhassa bhikkhave saddhākathā
sukathā sīlavato sīlakathā sukathā bahussutassa bāhusaccakathā sukathā
cāgavato cāgakathā sukathā paññavato paññākathā sukathā. Kasmā
ca bhikkhave saddhassa saddhākathā sukathā saddho bhikkhave saddhākathāya
kacchamānāya nābhisajjati na kuppati na byāpajjati na patittīyati na
kopañca dosañca appaccayañca pātukaroti taṁ kissa hetu tañhi
so bhikkhave saddhāsampadaṁ attani samanupassati labhati ca tatonidānaṁ
Pītipāmujjaṁ tasmā saddhassa saddhākathā sukathā. Kasmā ca bhikkhave
sīlavato sīlakathā sukathā sīlavā bhikkhave sīlakathāya kacchamānāya
nābhisajjati na kuppati na byāpajjati na patitthīyati na kopañca
dosañca appaccayañca pātukaroti taṁ kissa hetu tañhi so
bhikkhave sīlasampadaṁ attani samanupassati labhati ca tatonidānaṁ
pītipāmujjaṁ tasmā sīlavato sīlakathā sukathā. Kasmā ca bhikkhave
bahussutassa bāhusaccakathā sukathā bahussuto bhikkhave bāhusaccakathāya
kacchamānāya nābhisajjati na kuppati na byāpajjati na patitthīyati na kopañca
dosañca appaccayañca pātukaroti taṁ kissa hetu tañhi so
bhikkhave sutasampadaṁ attani samanupassati labhati ca tatonidānaṁ
pītipāmujjaṁ tasmā bahussutassa bāhusaccakathā sukathā. Kasmā ca
bhikkhave cāgavato cāgakathā sukathā cāgavā bhikkhave cāgakathāya kacchamānāya
nābhisajjati na kuppati na byāpajjati na patitthīyati na kopañca
dosañca appaccayañca pātukaroti taṁ kissa hetu tañhi so
bhikkhave cāgasampadaṁ attani samanupassati labhati ca tatonidānaṁ
pītipāmujjaṁ tasmā cāgavato cāgakathā sukathā. Kasmā ca bhikkhave
paññavato paññākathā sukathā paññavā bhikkhave paññākathāya
kacchamānāya nābhisajjati na kuppati na byāpajjati na patitthīyati na
kopañca dosañca appaccayañca pātukaroti taṁ kissa hetu tañhi
so bhikkhave paññāsampadaṁ attani samanupassati labhati ca
Tatonidānaṁ pītipāmujjaṁ tasmā paññavato paññākathā sukathā. Imesaṁ
kho bhikkhave pañcannaṁ puggalānaṁ kathā sukathā puggale puggalaṁ
upanidhāyāti.

[158] Pañcahi bhikkhave dhammehi samannāgato bhikkhu sārajjaṁ
okkanto 1 hoti katamehi pañcahi idha bhikkhave bhikkhu assaddho
hoti dussīlo hoti appassuto hoti kusīto hoti
duppañño hoti imehi kho bhikkhave pañcahi dhammehi samannāgato
bhikkhu sārajjaṁ okkanto hoti. Pañcahi bhikkhave dhammehi
samannāgato bhikkhu visārado hoti katamehi pañcahi idha bhikkhave bhikkhu
saddho hoti sīlavā hoti bahussuto hoti āraddhaviriyo hoti
paññavā hoti imehi kho bhikkhave pañcahi dhammehi samannāgato
bhikkhu visārado hotīti.

[159] [2]- Ekaṁ samayaṁ bhagavā kosambiyaṁ viharati ghositārāme.
Tena kho pana samayena āyasmā udāyi 3 mahatiyā gihiparisāya parivuto
dhammaṁ desento nisinno hoti. Addasā kho āyasmā ānando
āyasmantaṁ udāyiṁ mahatiyā gihiparisāya parivutaṁ dhammaṁ desentaṁ
nisinnaṁ disvāna yena bhagavā tenupasaṅkami upasaṅkamitvā
bhagavantaṁ abhivādetvā ekamantaṁ nisīdi ekamantaṁ nisinno kho
āyasmā ānando bhagavantaṁ etadavoca āyasmā bhante udāyi
mahatiyā gihiparisāya parivuto dhammaṁ desento nisinnoti 4 . Na kho
1 Po. okkamanto. 2 Po. Ma. evamme sutaṁ. 3 Po. Ma. udāyī.
4 Po. Ma. Yu. desetīti.
Ānanda sukaraṁ paresaṁ dhammaṁ desetuṁ paresaṁ ānanda dhammaṁ desentena
pañca dhamme ajjhattaṁ upaṭṭhāpetvā paresaṁ dhammo desetabbo
katame pañca anupubbikathaṁ kathessāmīti paresaṁ dhammo desetabbo
pariyāyadassāvī kathaṁ kathessāmīti paresaṁ dhammo desetabbo anudayataṁ
paṭicca kathaṁ kathessāmīti paresaṁ dhammo desetabbo na āmisantaro
kathaṁ kathessāmīti paresaṁ dhammo desetabbo attānañca parañca
anupahacca kathaṁ kathessāmīti paresaṁ dhammo desetabbo. Na kho ānanda
sukaraṁ paresaṁ dhammaṁ desetuṁ paresaṁ ānanda dhammaṁ desentena ime
pañca dhamme ajjhattaṁ upaṭṭhāpetvā paresaṁ dhammo desetabboti.

[160] Pañcime bhikkhave uppannā duppaṭivinodayā katame
pañca uppanno rāgo duppaṭivinodayo uppanno doso
duppaṭivinodayo uppanno moho duppaṭivinodayo uppannaṁ paṭibhāṇaṁ
duppaṭivinodayaṁ uppannaṁ gamikacittaṁ duppaṭivinodayaṁ ime kho
bhikkhave pañca uppannā duppaṭivinodayāti.
Saddhammavaggo paṭhamo.
Tassuddānaṁ
tayo saddhammaniyāmā 1 tayo saddhammasammosā
dukkathā ceva sārajjaṁ 2 udāyi dubbinodayāti.
------------
1 Ma. sammattaniyāmā. 2 Yu. sārajjaṁ ceva.
Āghātavaggo dutiyo

[161] Pañcime bhikkhave āghātapaṭivinayā yattha bhikkhuno
uppanno āghāto sabbaso paṭivinetabbo katame pañca yasmiṁ
bhikkhave puggale āghāto jāyetha mettā tasmiṁ puggale
bhāvetabbā evaṁ tasmiṁ puggale āghāto paṭivinetabbo yasmiṁ bhikkhave
puggale āghāto jāyetha karuṇā tasmiṁ puggale bhāvetabbā evaṁ
tasmiṁ puggale āghāto paṭivinetabbo yasmiṁ bhikkhave puggale
āghāto jāyetha upekkhā tasmiṁ puggale bhāvetabbā evaṁ tasmiṁ
puggale āghāto paṭivinetabbo yasmiṁ bhikkhave puggale āghāto
jāyetha asatiamanasikāro tasmiṁ puggale āpajjitabbo evaṁ tasmiṁ
puggale āghāto paṭivinetabbo yasmiṁ bhikkhave puggale āghāto
jāyetha kammassakatā tasmiṁ puggale adhiṭṭhātabbā kammassako
ayamāyasmā kammadāyādo kammayoni kammabandhu kammapaṭisaraṇo yaṁ
kammaṁ karissati kalyāṇaṁ vā pāpakaṁ vā tassa dāyādo bhavissatīti
evaṁ tasmiṁ puggale āghāto paṭivinetabbo ime kho bhikkhave
pañca āghātapaṭivinayā yattha bhikkhuno uppanno āghāto sabbaso
paṭivinetabboti.

[162] Tatra kho āyasmā sārīputto bhikkhū āmantesi
āvuso bhikkhavoti. Āvusoti kho te bhikkhū āyasmato sārīputtassa
paccassosuṁ. Āyasmā sārīputto etadavoca pañcime āvuso
Āghātapaṭivinayā yattha bhikkhuno uppanno āghāto sabbaso
paṭivinetabbo katame pañca idhāvuso ekacco puggalo aparisuddhakāyasamācāro
hoti parisuddhavacīsamācāro evarūpepi āvuso puggale
āghāto paṭivinetabbo idha panāvuso ekacco puggalo aparisuddhavacīsamācāro
hoti parisuddhakāyasamācāro evarūpepi āvuso puggale
āghāto paṭivinetabbo idha panāvuso ekacco puggalo
aparisuddhakāyasamācāro hoti aparisuddhavacīsamācāro labhati ca kālena kālaṁ
cetaso vivaraṁ cetaso pasādaṁ evarūpepi āvuso puggale āghāto
paṭivinetabbo idha panāvuso ekacco puggalo aparisuddhakāyasamācāro
hoti aparisuddhavacīsamācāro na ca labhati kālena kālaṁ cetaso vivaraṁ
cetaso pasādaṁ evarūpepi āvuso puggale āghāto paṭivinetabbo
idha panāvuso ekacco puggalo parisuddhakāyasamācāro hoti
parisuddhavacīsamācāro labhati ca kālena kālaṁ cetaso vivaraṁ cetaso pasādaṁ
evarūpepi āvuso puggale āghāto paṭivinetabbo. Tatrāvuso
yvāyaṁ puggalo aparisuddhakāyasamācāro parisuddhavacīsamācāro kathaṁ
tasmiṁ puggale āghāto paṭivinetabbo seyyathāpi āvuso bhikkhu
paṁsukūliko rathiyāya nantakaṁ disvā vāmena pādena niggahetvā 1
dakkhiṇena pādena pattharitvā 2 yo tattha sāro taṁ paripātetvā
ādāya pakkameyya evameva kho āvuso 3 yvāyaṁ puggalo
aparisuddhakāyasamācāro parisuddhavacīsamācāro yāssa aparisuddhakāyasamācāratā
1 Ma. niggaṇhitvā. 2 Yu. vitthāretvā. 3 Ma. khvāvuso.
Na sāssa tasmiṁ samaye manasikātabbā yā ca khvassa 1
parisuddhavacīsamācāratā sāssa tasmiṁ samaye manasikātabbā evaṁ tasmiṁ
puggale āghāto paṭivinetabbo. Tatrāvuso yvāyaṁ puggalo
aparisuddhavacīsamācāro parisuddhakāyasamācāro kathaṁ tasmiṁ puggale āghāto
paṭivinetabbo seyyathāpi āvuso pokkharaṇī sevālapaṇakapariyonaddhā
atha puriso āgaccheyya ghammābhitatto ghammapareto
kilanto tasito pipāsito so taṁ pokkharaṇiṁ ogāhetvā ubhohi
hatthehi [2]- sevālapaṇakaṁ apaviyūhitvā añjalinā pivitvā pakkameyya
evameva kho āvuso yvāyaṁ puggalo aparisuddhavacīsamācāro
parisuddhakāyasamācāro yāssa aparisuddhavacīsamācāratā na sāssa tasmiṁ samaye
manasikātabbā yā ca khvassa parisuddhakāyasamācāratā sāssa tasmiṁ
samaye manasikātabbā evaṁ tasmiṁ puggale āghāto paṭivinetabbo.
Tatrāvuso yvāyaṁ puggalo aparisuddhakāyasamācāro aparisuddhavacīsamācāro
labhati ca kālena kālaṁ cetaso vivaraṁ cetaso pasādaṁ kathaṁ tasmiṁ
puggale āghāto paṭivinetabbo seyyathāpi āvuso parittaṁ gopadake 3
udakaṁ atha puriso āgaccheyya ghammābhitatto ghammapareto kilanto
tasito pipāsito tassa evamassa idaṁ kho parittaṁ gopadake 3
udakaṁ sacāhaṁ añjalinā vā pivissāmi bhājanena vā khobhissāmipi 4
1 Ma. Yu. khavāssa. 2 Ma. Yu. itica iti cāti padāni. 3 Ma. Yu. gopade.
4 Ma. khobhessāmipi. Yu. khobhassāmi.
Taṁ loḷissāmipi 1 taṁ apeyyampi taṁ karissāmi yannūnāhaṁ catukuṇṭhiko 2
nipatitvā gopītakaṁ pivitvā pakkameyyanti so catukuṇṭhiko 2
nipatitvā gopītakaṁ pivitvā pakkameyya evameva kho āvuso yvāyaṁ
puggalo aparisuddhakāyasamācāro aparisuddhavacīsamācāro labhati ca kālena
kālaṁ cetaso vivaraṁ cetaso pasādaṁ yāssa aparisuddhakāyasamācāratā
na sāssa tasmiṁ samaye manasikātabbā yāpissa aparisuddhavacīsamācāratā
na sāpissa tasmiṁ samaye manasikātabbā yañca kho so
labhati kālena kālaṁ cetaso vivaraṁ cetaso pasādaṁ tadevassa 3 tasmiṁ
samaye manasikātabbaṁ evaṁ tasmiṁ puggale āghāto paṭivinetabbo.
Tatrāvuso yvāyaṁ puggalo aparisuddhakāyasamācāro aparisuddhavacīsamācāro
na labhati kālena kālaṁ cetaso vivaraṁ cetaso pasādaṁ kathaṁ tasmiṁ
puggale āghāto paṭivinetabbo seyyathāpi āvuso puriso ābādhiko
dukkhito bāḷhagilāno addhānamaggapaṭipanno tassa puratopissa dūre
gāmo pacchatopissa dūre gāmo so na labheyya sappāyāni bhojanāni
na labheyya sappāyāni bhesajjāni na labheyya paṭirūpaṁ upaṭṭhākaṁ
na labheyya gāmantanāyakaṁ tamenaṁ aññataro puriso passeyya
addhānamaggapaṭipanno so tasmiṁ purise kāruññaṁyeva upaṭṭhāpeyya
anudayaṁyeva upaṭṭhāpeyya anukampaṁyeva upaṭṭhāpeyya aho vatāyaṁ
puriso labheyya sappāyāni bhojanāni labheyya sappāyāni bhesajjāni
labheyya paṭirūpaṁ upaṭṭhākaṁ labheyya gāmantanāyakaṁ taṁ kissa hetu
1 Ma. Yu. loḷessāmipi. 2 Ma. Yu. catukkuṇḍiko. Yu. catukuṇḍiko.
3 Ma. tamevassa.
Māyaṁ puriso idheva anayabyasanaṁ āpajjīti 1 evameva kho āvuso
yvāyaṁ puggalo aparisuddhakāyasamācāro aparisuddhavacīsamācāro na ca
labhati kālena kālaṁ cetaso vivaraṁ cetaso pasādaṁ evarūpepi 2 āvuso
puggale kāruññaṁyeva upaṭṭhāpetabbaṁ anudayāyeva upaṭṭhāpetabbā
anukampāyeva upaṭṭhāpetabbā aho vata ayamāyasmā kāyaduccaritaṁ
pahāya kāyasucaritaṁ bhāveyya vacīduccaritaṁ pahāya vacīsucaritaṁ bhāveyya
manoduccaritaṁ pahāya manosucaritaṁ bhāveyya taṁ kissa hetu māyamāyasmā
kāyassa bhedā parammaraṇā apāyaṁ duggatiṁ vinipātaṁ nirayaṁ upapajjīti 3
evaṁ tasmiṁ puggale āghāto paṭivinetabbo. Tatrāvuso yvāyaṁ
puggalo parisuddhakāyasamācāro parisuddhavacīsamācāro labhati ca kālena
kālaṁ cetaso vivaraṁ cetaso pasādaṁ kathaṁ tasmiṁ puggale āghāto
paṭivinetabbo seyyathāpi āvuso pokkharaṇī acchodakā sātodakā
sītodakā setodakā 4 supatiṭṭhā rammaṇīyā nānārukkhehi sañchannā
atha puriso āgaccheyya ghammābhitatto ghammapareto kilanto tasito
pipāsito so taṁ pokkharaṇiṁ ogāhetvā nhātvā ca pivitvā ca
paccuttaritvā tattheva rukkhachāyāya nisīdeyya vā nipajjeyya vā
evameva kho āvuso yvāyaṁ puggalo parisuddhakāyasamācāro parisuddha-
vacīsamācāro labhati ca kālena kālaṁ cetaso vivaraṁ cetaso pasādaṁ
yāpissa parisuddhakāyasamācāratā sāpissa tasmiṁ samaye manasikātabbā
1 Po. āpajjati. Yu. āpajjatīti. 2 Yu. pisaddo natthi. 3 Yu. upapajjatīti.
4 Ma. setakā.
Yāpissa parisuddhavacīsamācāratā sāpissa tasmiṁ samaye manasikātabbā
yampi so 1 labhati kālena kālaṁ cetaso vivaraṁ cetaso pasādaṁ tampissa
tasmiṁ samaye manasikātabbaṁ evaṁ tasmiṁ puggale āghāto
paṭivinetabbo samantapāsādikaṁ āvuso puggalaṁ āgamma cittaṁ pasīdati.
Ime kho āvuso pañca āghātapaṭivinayā yattha bhikkhuno uppanno
āghāto sabbaso paṭivinetabboti.

[163] Tatra kho āyasmā sārīputto bhikkhū āmantesi .pe.
Pañcahāvuso dhammehi samannāgato bhikkhu alaṁsākaccho sabrahmacārīnaṁ
katamehi pañcahi idhāvuso bhikkhu attanā ca sīlasampanno
hoti sīlasampadākathāya ca āgataṁ pañhaṁ byākattā hoti
attanā ca samādhisampanno hoti samādhisampadākathāya ca āgataṁ pañhaṁ
byākattā hoti attanā ca paññāsampanno hoti paññāsampadākathāya
ca āgataṁ pañhaṁ byākattā hoti attanā ca vimuttisampanno
hoti vimuttisampadākathāya ca āgataṁ pañhaṁ byākattā hoti
attanā ca vimuttiñāṇadassanasampanno hoti vimuttiñāṇadassanasampadākathāya
ca āgataṁ pañhaṁ byākattā hoti imehi kho āvuso
pañcahi dhammehi samannāgato bhikkhu alaṁsākaccho sabrahmacārīnanti.

[164] Tatra kho āyasmā sārīputto bhikkhū āmantesi .pe.
Pañcahāvuso dhammehi samannāgato bhikkhu alaṁsājīvo sabrahamacārīnaṁ
katamehi pañcahi idhāvuso bhikkhu attanā ca sīlasampanno
1 Ma. ayaṁ pāṭho natthi.
Hoti sīlasampadākathāya ca kataṁ 1 pañhaṁ byākattā hoti attanā ca
samādhisampanno hoti samādhisampadākathāya ca kataṁ pañhaṁ byākattā
hoti attanā ca paññāsampanno hoti paññāsampadākathāya ca
kataṁ pañhaṁ byākattā hoti attanā ca vimuttisampanno hoti
vimuttisampadākathāya ca kataṁ pañhaṁ byākattā hoti attanā ca
vimuttiñāṇadassanasampanno hoti vimuttiñāṇadassanasampadākathāya ca
kataṁ pañhaṁ byākattā hoti imehi kho āvuso pañcahi dhammehi
samannāgato bhikkhu alaṁsājīvo sabrahmacārīnanti.