[782] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Aññātikā nāma mātito
Vā pitito vā yāva sattamā pitāmahayugā asambaddhā. Bhikkhunī
nāma ubhatosaṅghe upasampannā. Antaragharaṁ nāma rathiyā 1 byūhaṁ
siṅghāṭakaṁ gharaṁ. Khādanīyaṁ nāma pañca bhojanāni yāmakālikaṁ
sattāhakālikaṁ yāvajīvikaṁ ṭhapetvā avasesaṁ khādanīyaṁ nāma. Bhojanīyaṁ
nāma pañca bhojanāni odano kummāso sattu maccho maṁsaṁ.
Khādissāmi bhuñjissāmīti paṭiggaṇhāti āpatti dukkaṭassa.
Ajjhohāre ajjhohāre āpatti pāṭidesanīyassa. Aññātikāya
aññātikasaññī antaragharaṁ paviṭṭhāya hatthato khādanīyaṁ vā bhojanīyaṁ
vā sahatthā paṭiggahetvā khādati vā bhuñjati vā āpatti
pāṭidesanīyassa. Aññātikāya vematiko antaragharaṁ paviṭṭhāya
hatthato khādanīyaṁ vā bhojanīyaṁ vā sahatthā paṭiggahetvā khādati
vā bhuñjati vā āpatti pāṭidesanīyassa. Aññātikāya
ñātikasaññī antaragharaṁ paviṭṭhāya hatthato khādanīyaṁ vā bhojanīyaṁ
vā sahatthā paṭiggahetvā khādati vā bhuñjati vā āpatti
pāṭidesanīyassa. Yāmakālikaṁ sattāhakālikaṁ yāvajīvikaṁ āhāratthāya
paṭiggaṇhāti āpatti dukkaṭassa. Ajjhohāre ajjhohāre
āpatti dukkaṭassa. Ekato upasampannāya hatthato khādissāmi
bhuñjissāmīti paṭiggaṇhāti āpatti dukkaṭassa. Ajjhohāre
ajjhohāre āpatti dukkaṭassa. Ñātikāya aññātikasaññī
āpatti dukkaṭassa. Ñātikāya vematiko āpatti dukkaṭassa.
1 Ma. rathikā.
Ñātikāya ñātikasaññī anāpatti.

[783] Anāpatti ñātikāya dāpeti na deti upanikkhipitvā
deti antarārāme bhikkhunūpassaye titthiyaseyyāya paṭikkamane
gāmato nīharitvā deti yāmakālikaṁ sattāhakālikaṁ yāvajīvikaṁ sati
paccaye paribhuñjāti deti sikkhamānāya sāmaṇeriyā ummattakassa
ādikammikassāti.
Paṭhamasikkhāpadaṁ niṭṭhitaṁ.
-------
Dutiyasikkhāpadaṁ

[784] Tena samayena buddho bhagavā rājagahe viharati veḷuvane
kalandakanivāpe. Tena kho pana samayena bhikkhū kulesu nimantitā
bhuñjanti. Chabbaggiyā bhikkhuniyo chabbaggiyānaṁ bhikkhūnaṁ vosāsantiyo
ṭhitā honti idha sūpaṁ detha idha odanaṁ dethāti. Chabbaggiyā
bhikkhū yāvadatthaṁ bhuñjanti. Aññe bhikkhū na cittarūpaṁ bhuñjanti.
Ye te bhikkhū appicchā .pe. Te ujjhāyanti khīyanti vipācenti
kathaṁ hi nāma chabbaggiyā bhikkhū bhikkhuniyo vosāsantiyo na
nivāressantīti .pe. Saccaṁ kira tumhe bhikkhave bhikkhuniyo
vosāsantiyo na nivārethāti. Saccaṁ bhagavāti. Vigarahi buddho bhagavā
kathaṁ hi nāma tumhe moghapurisā bhikkhuniyo vosāsantiyo na nivāressatha
netaṁ moghapurisā appasannānaṁ vā pasādāya pasannānaṁ vā
bhiyyobhāvāya .pe. Evañca pana bhikkhave imaṁ sikkhāpadaṁ uddiseyyātha
bhikkhū paneva kulesu nimantitā bhuñjanti. Tatra ce [1]- bhikkhunī
vosāsamānarūpā ṭhitā hoti idha sūpaṁ detha idha odanaṁ dethāti.
Tehi bhikkhūhi sā bhikkhunī apasādetabbā apasakka tāva bhagini
yāva bhikkhū bhuñjantīti. Ekassapi ce 2 bhikkhuno nappaṭibhāseyya
taṁ bhikkhuniṁ apasādetuṁ apasakka tāva bhagini yāva bhikkhū bhuñjantīti
1 Ma. sā. 2 Ma. Yu. ekassa cepi. evamuparipi.
Paṭidesetabbaṁ tehi bhikkhūhi gārayhaṁ āvuso dhammaṁ āpajjimhā
asappāyaṁ pāṭidesanīyaṁ taṁ paṭidesemāti.

[785] Bhikkhū paneva kulesu nimantitā bhuñjantīti kulaṁ nāma
cattāri kulāni khattiyakulaṁ brāhmaṇakulaṁ vessakulaṁ suddakulaṁ.
Nimantitā bhuñjantīti pañcannaṁ bhojanānaṁ aññatarena bhojanena
nimantitā bhuñjanti. Bhikkhunī nāma ubhatosaṅghe upasampannā.
Vosāsantī nāma yathāmittatā yathāsandiṭṭhatā yathāsambhattatā
yathāsamānupajjhāyakatā yathāsamānācariyakatā idha sūpaṁ detha idha
odanaṁ dethāti ayaṁ 1 vosāsantī nāma. Tehi bhikkhūhīti bhuñjamānehi
bhikkhūhi. Sā bhikkhunīti yā sā vosāsantī bhikkhunī. Tehi bhikkhūhi
sā bhikkhunī apasādetabbā apasakka tāva bhagini yāva bhikkhū
bhuñjantīti. Ekassapi ce bhikkhuno anapasādite 2 khādissāmi
bhuñjissāmīti paṭiggaṇhāti āpatti dukkaṭassa. Ajjhohāre
ajjhohāre āpatti pāṭidesanīyassa.

[786] Upasampannāya upasampannasaññī vosāsantiyā na nivāreti
āpatti pāṭidesanīyassa. Upasampannāya vematiko vosāsantiyā na
nivāreti āpatti pāṭidesanīyassa. Upasampannāya anupasampannasaññī
vosāsantiyā na nivāreti āpatti pāṭidesanīyassa.
Ekatoupasampannāya vosāsantiyā na nivāreti āpatti dukkaṭassa.
Anupasampannāya upasampannasaññī āpatti dukkaṭassa.
1 Ma. esā. 2 Ma. Yu. anapasādito.
Anupasampannāya vematiko āpatti dukkaṭassa. Anupasampannāya
anupasampannasaññī anāpatti.

[787] Anāpatti attano bhattaṁ dāpeti na deti aññesaṁ
bhattaṁ deti na dāpeti yaṁ na dinnaṁ taṁ dāpeti yattha na
dinnaṁ tattha dāpeti sabbesaṁ samakaṁ dāpeti sikkhamānā vosāsati
sāmaṇerī vosāsati pañca bhojanāni ṭhapetvā sabbattha anāpatti
ummattakassa ādikammikassāti.
Dutiyasikkhāpadaṁ niṭṭhitaṁ.
---------
Tatiyasikkhāpadaṁ

[788] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena sāvatthiyaṁ
aññataraṁ kulaṁ ubhato pasannaṁ hoti saddhāya vaḍḍhati bhogena
hāyati. Yaṁ tasmiṁ kule uppajjati purebhattaṁ khādanīyaṁ vā bhojanīyaṁ vā
taṁ sabbaṁ bhikkhūnaṁ vissajjetvā appekadā anasitā acchanti.
Manussā ujjhāyanti khīyanti vipācenti kathaṁ hi nāma samaṇā
sakyaputtiyā na mattaṁ jānitvā paṭiggahessanti ime imesaṁ
datvā appekadā anasitā acchantīti. Assosuṁ kho bhikkhū
tesaṁ manussānaṁ ujjhāyantānaṁ khīyantānaṁ vipācentānaṁ. Athakho
te bhikkhū bhagavato etamatthaṁ ārocesuṁ. Athakho bhagavā etasmiṁ
nidāne etasmiṁ pakaraṇe dhammiṁ kathaṁ katvā bhikkhū āmantesi
anujānāmi bhikkhave yaṁ kulaṁ saddhāya vaḍḍhati bhogena hāyati
evarūpassa kulassa ñattidutiyena kammena sekkhasammatiṁ dātuṁ evañca
pana bhikkhave dātabbā. Byattena bhikkhunā paṭibalena saṅgho
ñāpetabbo suṇātu me bhante saṅgho itthannāmaṁ kulaṁ saddhāya
vaḍḍhati bhogena hāyati. Yadi saṅghassa pattakallaṁ saṅgho
itthannāmassa kulassa sekkhasammatiṁ dadeyya. Esā ñatti.
Suṇātu me bhante saṅgho itthannāmaṁ kulaṁ saddhāya vaḍḍhati
Bhogena hāyati. Saṅgho itthannāmassa kulassa sekkhasammatiṁ deti.
Yassāyasmato khamati itthannāmassa kulassa sekkhasammatiyā dānaṁ so
tuṇhassa yassa nakkhamati so bhāseyya. Dinnā saṅghena
itthannāmassa kulassa sekkhasammati. Khamati saṅghassa tasmā tuṇhī.
Evametaṁ dhārayāmīti. Evañca pana bhikkhave imaṁ sikkhāpadaṁ
uddiseyyātha yāni kho pana tāni sekkhasammatāni kulāni yo pana
bhikkhu tathārūpesu sekkhasammatesu kulesu khādanīyaṁ vā bhojanīyaṁ vā
sahatthā paṭiggahetvā khādeyya vā bhuñjeyya vā paṭidesetabbaṁ tena
bhikkhunā gārayhaṁ āvuso dhammaṁ āpajjiṁ asappāyaṁ pāṭidesanīyaṁ taṁ
paṭidesemīti. Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[789] Tena kho pana samayena sāvatthiyaṁ ussavo hoti.
Manussā bhikkhū nimantetvā bhojenti. Taṁpi kho kulaṁ bhikkhū
nimantesi. Bhikkhū kukkuccāyantā nādhivāsenti paṭikkhittaṁ bhagavatā
sekkhasammatesu kulesu khādanīyaṁ vā bhojanīyaṁ vā sahatthā paṭiggahetvā
khādituṁ bhuñjitunti. Te ujjhāyanti khīyanti vipācenti kinnu kho
nāma amhākaṁ jīvitena yaṁ ayyā amhākaṁ na paṭiggaṇhantīti.
Assosuṁ kho bhikkhū tesaṁ ujjhāyantānaṁ khīyantānaṁ vipācentānaṁ.
Athakho te bhikkhū bhagavato etamatthaṁ ārocesuṁ. Athakho bhagavā
etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi
anujānāmi bhikkhave nimantitena sekkhasammatesu kulesu khādanīyaṁ vā
Bhojanīyaṁ vā sahatthā paṭiggahetvā khādituṁ bhuñjituṁ evañca pana
bhikkhave imaṁ sikkhāpadaṁ uddiseyyātha yāni kho pana tāni
sekkhasammatāni kulāni yo pana bhikkhu tathārūpesu sekkhasammatesu
kulesu pubbe animantito khādanīyaṁ vā bhojanīyaṁ vā sahatthā paṭiggahetvā
khādeyya vā bhuñjeyya vā paṭidesetabbaṁ tena bhikkhunā gārayhaṁ
āvuso dhammaṁ āpajjiṁ asappāyaṁ pāṭidesanīyaṁ taṁ paṭidesemīti.
Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[790] Tena kho pana samayena aññataro bhikkhu tassa kulassa
kulupako hoti. Athakho so bhikkhu pubbaṇhasamayaṁ nivāsetvā
pattacīvaramādāya yena taṁ kulaṁ tenupasaṅkami upasaṅkamitvā
paññatte āsane nisīdi. Athakho so bhikkhu gilāno hoti.
Athakho te manussā taṁ bhikkhuṁ etadavocuṁ bhuñjatha bhanteti.
Athakho so bhikkhu bhagavatā paṭikkhittaṁ animantitena sekkhasammatesu
kulesu khādanīyaṁ vā bhojanīyaṁ vā sahatthā paṭiggahetvā khādituṁ
bhuñjitunti kukkuccāyanto na paṭiggahesi nāsakkhi piṇḍāya
carituṁ chinnabhatto ahosi. Athakho so bhikkhu ārāmaṁ gantvā
bhikkhūnaṁ etamatthaṁ ārocesi. Bhikkhū bhagavato etamatthaṁ ārocesuṁ.
Athakho bhagavā etasmiṁ nidāne etasmiṁ pakaraṇe dhammiṁ kathaṁ katvā
bhikkhū āmantesi anujānāmi bhikkhave gilānena bhikkhunā
sekkhasammatesu kulesu khādanīyaṁ vā bhojanīyaṁ vā sahatthā paṭiggahetvā
Khādituṁ bhuñjituṁ evañca pana bhikkhave imaṁ sikkhāpadaṁ uddiseyyātha
yāni kho pana tāni sekkhasammatāni kulāni yo pana bhikkhu
tathārūpesu sekkhasammatesu kulesu pubbe animantito agilāno
khādanīyaṁ vā bhojanīyaṁ vā sahatthā paṭiggahetvā khādeyya vā
bhuñjeyya vā paṭidesetabbaṁ tena bhikkhunā gārayhaṁ āvuso
dhammaṁ āpajjiṁ asappāyaṁ pāṭidesanīyaṁ taṁ paṭidesemīti.

[791] Yāni kho pana tāni sekkhasammatāni kulānīti
sekkhasammataṁ nāma kulaṁ yaṁ kulaṁ saddhāya vaḍḍhati bhogena hāyati
evarūpassa kulassa ñattidutiyena kammena sekkhasammati dinnā hoti.
Yo panāti yo yādiso .pe. Bhikkhūti .pe. Ayaṁ imasmiṁ atthe
adhippeto bhikkhūti. Tathārūpesu sekkhasammatesu kulesūti evarūpesu
sekkhasammatesu kulesu. Animantito nāma ajjatanāya vā svātanāya
vā animantito gharupacāraṁ okkamante nimantenti eso animantito
nāma. Nimantito nāma ajjatanāya vā svātanāya vā nimantito
gharupacāraṁ anokkamante nimantenti eso nimantito nāma. Agilāno
nāma sakkoti piṇḍāya carituṁ. Gilāno nāma na sakkoti piṇḍāya
carituṁ. Khādanīyaṁ nāma pañca bhojanāni yāmakālikaṁ sattāhakālikaṁ
yāvajīvikaṁ ṭhapetvā avasesaṁ khādanīyaṁ nāma. Bhojanīyaṁ nāma
pañca bhojanāni odano kummāso sattu maccho maṁsaṁ. Animantito
agilāno khādissāmi bhuñjissāmīti paṭiggaṇhāti āpatti
Dukkaṭassa. Ajjhohāre ajjhohāre āpatti pāṭidesanīyassa.