[762] Anāpatti āyoge kāyabandhanena aṁsabaddhake pattatthavikāya
parissāvane bimbohanaṁ karoti aññena kataṁ paṭilabhitvā
uddāletvā paribhuñjati ummattakassa ādikammikassāti.
Chaṭṭhasikkhāpadaṁ niṭṭhitaṁ.
-------
Sattamasikkhāpadaṁ

[763] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhagavatā
bhikkhūnaṁ nisīdanaṁ anuññātaṁ hoti. Chabbaggiyā bhikkhū bhagavatā
nisīdanaṁ anuññātanti appamāṇikāni nisīdanāni dhārenti mañcassapi
pīṭhassapi puratopi pacchatopi olambenti. Ye te bhikkhū appicchā
.pe. Te ujjhāyanti khīyanti vipācenti kathaṁ hi nāma chabbaggiyā
bhikkhū appamāṇikāni nisīdanāni dhāressantīti .pe. Saccaṁ kira tumhe
bhikkhave appamāṇikāni nisīdanāni dhārethāti. Saccaṁ bhagavāti.
Vigarahi buddho bhagavā kathaṁ hi nāma tumhe moghapurisā appamāṇikāni
nisīdanāni dhāressatha netaṁ moghapurisā appasannānaṁ vā pasādāya
pasannānaṁ vā bhiyyobhāvāya .pe. Evañca pana bhikkhave imaṁ
sikkhāpadaṁ uddiseyyātha nisīdanaṁ pana bhikkhunā kārayamānena pamāṇikaṁ
kāretabbaṁ. Tatridaṁ pamāṇaṁ dīghaso dve vidatthiyo sugatavidatthiyā
tiriyaṁ diyaḍḍhaṁ. Taṁ atikkāmayato chedanakaṁ pācittiyanti. Evañcidaṁ
bhagavatā bhikkhūnaṁ sikkhāpadaṁ paññattaṁ hoti.

[764] Tena kho pana samayena āyasmā udāyi mahākāyo
hoti. So bhagavato purato nisīdanaṁ paññāpetvā samantato
samañchamāno nisīdati. Athakho bhagavā āyasmantaṁ udāyiṁ etadavoca
Kissa tvaṁ udāyi nisīdanaṁ paññāpetvā samantato samañchasi
seyyathāpi purāṇasikoṭṭhoti. Tathā hi pana bhante bhagavatā bhikkhūnaṁ
atikhuddakaṁ nisīdanaṁ anuññātanti. Athakho bhagavā etasmiṁ nidāne
etasmiṁ pakaraṇe dhammiṁ kathaṁ katvā bhikkhū āmantesi anujānāmi
bhikkhave nisīdanassa dasā 1 vidatthiṁ evañca pana bhikkhave imaṁ sikkhāpadaṁ
uddiseyyātha nisīdanaṁ pana bhikkhunā kārayamānena pamāṇikaṁ kāretabbaṁ.
Tatrīdaṁ pamāṇaṁ dīghaso dve vidatthiyo sugatavidatthiyā tiriyaṁ
diyaḍḍhaṁ dasā vidatthi. Taṁ atikkāmayato chedanakaṁ pācittiyanti.

[765] Nisīdanaṁ nāma sadasaṁ vuccati. Kārayamānenāti karonto
vā kārāpento vā. Pamāṇikaṁ kāretabbaṁ. Tatridaṁ pamāṇaṁ
dīghaso dve vidatthiyo sugatavidatthiyā tiriyaṁ diyaḍḍhaṁ dasā vidatthi.
Taṁ atikkāmetvā karoti vā kārāpeti vā payoge dukkaṭaṁ paṭilābhena
chinditvā pācittiyaṁ desetabbaṁ.

[766] Attanā vippakataṁ attanā pariyosāpeti āpatti
pācittiyassa. Attanā vippakataṁ parehi pariyosāpeti āpatti
pācittiyassa. Parehi vippakataṁ attanā pariyosāpeti āpatti
pācittiyassa. Parehi vippakataṁ parehi pariyosāpeti āpatti
pācittiyassa. Aññassatthāya karoti vā kārāpeti vā āpatti
dukkaṭassa. Aññena kataṁ paṭilabhitvā paribhuñjati āpatti
dukkaṭassa.
1 Ma. dasaṁ.

[767] Anāpatti pamāṇikaṁ karoti ūnakaṁ karoti aññena
kataṁ pamāṇātikkantaṁ paṭilabhitvā chinditvā paribhuñjati vitānaṁ
vā bhummattharaṇaṁ vā sāṇipākāraṁ vā bhisiṁ vā bimbohanaṁ vā
karoti ummattakassa ādikammikassāti
sattamasikkhāpadaṁ niṭṭhitaṁ.
---------
Aṭṭhamasikkhāpadaṁ

[768] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhagavatā
bhikkhūnaṁ kaṇḍupaṭicchādī 1 anuññātā hoti. Chabbaggiyā bhikkhū
bhagavatā kaṇḍupaṭicchādī anuññātāti appamāṇikāyo kaṇḍupaṭicchādiyo
dhārenti puratopi pacchatopi ākaḍḍhantā āhiṇḍanti.
Ye te bhikkhū appicchā .pe. Te ujjhāyanti khīyanti vipācenti
kathaṁ hi nāma chabbaggiyā bhikkhū appamāṇikāyo kaṇḍupaṭicchādiyo
dhāressantīti .pe. Saccaṁ kira tumhe bhikkhave appamāṇikāyo kaṇḍupaṭicchādiyo
dhārethāti. Saccaṁ bhagavāti. Vigarahi buddho bhagavā kathaṁ hi
nāma tumhe moghapurisā appamāṇikāyo kaṇḍupaṭicchādiyo dhāressatha
netaṁ moghapurisā appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha
kaṇḍupaṭicchādiṁ pana bhikkhunā kārayamānena pamāṇikā kāretabbā.
Tatridaṁ pamāṇaṁ dīghaso catasso vidatthiyo sugatavidatthiyā tiriyaṁ
dve vidatthiyo. Taṁ atikkāmayato chedanakaṁ pācittiyanti.

[769] Kaṇḍupaṭicchādī nāma yassa adhonābhi ubbhajānumaṇḍalaṁ
kaṇḍu vā piḷakā vā assāvo vā thallukacchā 2 vā ābādho
tassa paṭicchādanatthāya. Kārayamānenāti karonto vā kārāpento
1 Ma. kañḍupaṭicchādi. evamuparipi. 2 Ma. thullakacchu.
Vā. Pamāṇikā kāretabbā. Tatridaṁ pamāṇaṁ dīghaso catasso
vidatthiyo sugatavidatthiyā tiriyaṁ dve vidatthiyo. Taṁ atikkāmetvā
karoti vā kārāpeti vā payoge dukkaṭaṁ paṭilābhena chinditvā
pācittiyaṁ desetabbaṁ.

[770] Attanā vippakataṁ attanā pariyosāpeti āpatti
pācittiyassa. Attanā vippakataṁ parehi pariyosāpeti āpatti
pācittiyassa. Parehi vippakataṁ attanā pariyosāpeti āpatti
pācittiyassa. Parehi vippakataṁ parehi pariyosāpeti āpatti
pācittiyassa. Aññassatthāya karoti vā kārāpeti vā āpatti
dukkaṭassa. Aññena kataṁ paṭilabhitvā paribhuñjati āpatti
dukkaṭassa.

[771] Anāpatti pamāṇikaṁ karoti ūnakaṁ karoti aññena
kataṁ pamāṇātikkantaṁ paṭilabhitvā chinditvā paribhuñjati vitānaṁ
vā bhummattharaṇaṁ vā sāṇipākāraṁ vā bhisiṁ vā bimbohanaṁ vā
karoti ummattakassa ādikammikassāti.
Aṭṭhamasikkhāpadaṁ niṭṭhitaṁ.
--------
Navamasikkhāpadaṁ