[752] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Aṭṭhi nāma yaṅkiñci aṭṭhi.
Danto nāma hatthidanto vuccati. Visāṇaṁ nāma yaṅkiñci
visāṇaṁ. Kārāpeyyāti karoti vā kārāpeti vā payoge
dukkaṭaṁ paṭilābhena bhinditvā pācittiyaṁ desetabbaṁ.

[753] Attanā vippakataṁ attanā pariyosāpeti āpatti
pācittiyassa. Attanā vippakataṁ parehi pariyosāpeti āpatti
pācittiyassa. Parehi vippakataṁ attanā pariyosāpeti āpatti
pācittiyassa. Parehi vippakataṁ parehi pariyosāpeti āpatti pācittiyassa.
Aññassatthāya karoti vā kārāpeti vā āpatti dukkaṭassa.
Aññena kataṁ paṭilabhitvā paribhuñjati āpatti dukkaṭassa.

[754] Anāpatti gaṇḍikāya 1 araṇike vīthe 2 añjaniyā
añjanīsalākāya vāsījaṭe udakapuñchaniyā ummattakassa ādikammikassāti.
Catutthasikkhāpadaṁ niṭṭhitaṁ.
----------
1 Ma. gaṇṭhikāya. 2 Ma. vidhe. Sī. viṭhe.
Pañcamasikkhāpadaṁ

[755] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā
upanando sakyaputto ucce mañce sayati. Athakho bhagavā
sambahulehi bhikkhūhi saddhiṁ senāsanacārikaṁ āhiṇḍanto yenāyasmato
upanandassa sakyaputtassa vihāro tenupasaṅkami. Addasā kho
āyasmā upanando sakyaputto bhagavantaṁ dūrato va āgacchantaṁ
disvāna bhagavantaṁ etadavoca āgacchatu me bhante bhagavā sayanaṁ
passatūti. Athakho bhagavā tato va paṭinivattitvā bhikkhū āmantesi
āsayato bhikkhave moghapuriso veditabboti. Athakho bhagavā āyasmantaṁ
upanandaṁ sakyaputtaṁ anekapariyāyena vigarahitvā dubbharatāya .pe.
Evañca pana bhikkhave imaṁ sikkhāpadaṁ uddiseyyātha navaṁ pana
bhikkhunā mañcaṁ vā pīṭhaṁ vā kārayamānena aṭṭhaṅgulapādakaṁ kāretabbaṁ
sugataṅgulena aññatra heṭṭhimāya aṭaniyā taṁ atikkāmayato
chedanakaṁ pācittiyanti.

[756] Navaṁ nāma karaṇaṁ upādāya vuccati. Mañco nāma
cattāro mañcā masārako bundikābaddho kuḷirapādako 1 āhaccapādako.
Pīṭhaṁ nāma cattāri pīṭhāni masārakaṁ bundikābaddhaṁ kuḷirapādakaṁ 1
āhaccapādakaṁ. Kārayamānenāti karonto vā kārāpento vā.
1 Ma. kuḷīra.... evamuparipi.
Aṭṭhaṅgulapādakaṁ kāretabbaṁ sugataṅgulena aññatra heṭṭhimāya aṭaniyāti
ṭhapetvā heṭṭhimaṁ aṭaniyaṁ 1 . Taṁ atikkāmetvā karoti vā kārāpeti
vā payoge dukkaṭaṁ paṭilābhena chinditvā pācittiyaṁ desetabbaṁ.

[757] Attanā vippakataṁ attanā pariyosāpeti āpatti
pācittiyassa. Attanā vippakataṁ parehi pariyosāpeti āpatti
pācittiyassa. Parehi vippakataṁ attanā pariyosāpeti āpatti
pācittiyassa. Parehi vippakataṁ parehi pariyosāpeti āpatti
pācittiyassa. Aññassatthāya karoti vā kārāpeti vā āpatti
dukkaṭassa. Aññena kataṁ paṭilabhitvā paribhuñjati āpatti
dukkaṭassa.

[758] Anāpatti pamāṇikaṁ karoti ūnakaṁ karoti aññena
kataṁ pamāṇātikkantaṁ paṭilabhitvā chinditvā paribhuñjati
ummattakassa ādikammikassāti.
Pañcamasikkhāpadaṁ niṭṭhitaṁ.
--------
1 Ma. aṭaniṁ.
Chaṭṭhasikkhāpadaṁ

[759] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū mañcaṁpi pīṭhaṁpi tūlonaddhaṁ kārāpenti. Manussā vihāracārikaṁ
āhiṇḍantā passitvā ujjhāyanti khīyanti vipācenti kathaṁ hi nāma
samaṇā sakyaputtiyā mañcaṁpi pīṭhaṁpi tūlonaddhaṁ kārāpessanti seyyathāpi
gihī kāmabhoginoti. Assosuṁ kho bhikkhū tesaṁ manussānaṁ ujjhāyantānaṁ
khīyantānaṁ vipācentānaṁ. Ye te bhikkhū appicchā .pe.
Te ujjhāyanti khīyanti vipācenti kathaṁ hi nāma chabbaggiyā bhikkhū
mañcaṁpi pīṭhaṁpi tūlonaddhaṁ kārāpessantīti .pe. Saccaṁ kira tumhe
bhikkhave mañcaṁpi pīṭhaṁpi tūlonaddhaṁ kārāpethāti. Saccaṁ bhagavāti.
Vigarahi buddho bhagavā kathaṁ hi nāma tumhe moghapurisā mañcaṁpi
pīṭhaṁpi tūlonaddhaṁ kārāpessatha netaṁ moghapurisā appasannānaṁ vā
pasādāya pasannānaṁ vā bhiyyobhāvāya .pe. Evañca pana bhikkhave
imaṁ sikkhāpadaṁ uddiseyyātha yo pana bhikkhu mañcaṁ vā pīṭhaṁ
vā tūlonaddhaṁ kārāpeyya uddālanakaṁ pācittiyanti.

[760] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Mañco nāma cattāro
mañcā masārako bundikābaddho kuḷirapādako āhaccapādako.
Pīṭhaṁ nāma cattāri pīṭhāni masārakaṁ bundikābaddhaṁ kuḷirapādakaṁ
āhaccapādakaṁ. Tūlaṁ nāma tīṇi tūlāni rukkhatūlaṁ latātūlaṁ
potakītūlaṁ. Kārāpeyyāti karoti vā kārāpeti vā payoge
dukkaṭaṁ paṭilābhena uddāletvā pācittiyaṁ desetabbaṁ.

[761] Attanā vippakataṁ attanā pariyosāpeti āpatti
pācittiyassa. Attanā vippakataṁ parehi pariyosāpeti āpatti
pācittiyassa. Parehi vippakataṁ attanā pariyosāpeti āpatti
pācittiyassa. Parehi vippakataṁ parehi pariyosāpeti āpatti
pācittiyassa. Aññassatthāya karoti vā kārāpeti vā āpatti
dukkaṭassa. Aññena kataṁ paṭilabhitvā paribhuñjati āpatti
dukkaṭassa.