[772] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhagavatā
bhikkhūnaṁ vassikasāṭikā anuññātā hoti. Chabbaggiyā bhikkhū
bhagavatā vassikasāṭikā anuññātāti appamāṇikāyo vassikasāṭikāyo
dhārenti puratopi pacchatopi ākaḍḍhantā āhiṇḍanti.
Ye te bhikkhū appicchā .pe. Te ujjhāyanti khīyanti vipācenti
kathaṁ hi nāma chabbaggiyā bhikkhū appamāṇikāyo vassikasāṭikāyo
dhāressantīti .pe. Saccaṁ kira tumhe bhikkhave appamāṇikāyo
vassikasāṭikāyo dhārethāti. Saccaṁ bhagavāti. Vigarahi buddho
bhagavā kathaṁ hi nāma tumhe moghapurisā appamāṇikāyo vassikasāṭikāyo
dhāressatha netaṁ moghapurisā appasannānaṁ vā pasādāya
pasannānaṁ vā bhiyyobhāvāya .pe. Evañca pana bhikkhave imaṁ
sikkhāpadaṁ uddiseyyātha vassikasāṭikaṁ pana bhikkhunā kārayamānena
pamāṇikā kāretabbā. Tatridaṁ pamāṇaṁ dīghaso cha vidatthiyo
sugatavidatthiyā tiriyaṁ aḍḍhateyyā. Taṁ atikkāmayato chedanakaṁ
pācittiyanti.

[773] Vassikasāṭikā nāma vassānassa cātumāsatthāya.
Kārayamānenāti karonto vā kārāpento vā. Pamāṇikā
Kāretabbā. Tatridaṁ pamāṇaṁ dīghaso cha vidatthiyo sugatavidatthiyā
tiriyaṁ aḍḍhateyyā. Taṁ atikkāmetvā karoti vā kārāpeti vā
payoge dukkaṭaṁ paṭilābhena chinditvā pācittiyaṁ desetabbaṁ.

[774] Attanā vippakataṁ attanā pariyosāpeti āpatti
pācittiyassa. Attanā vippakataṁ parehi pariyosāpeti āpatti
pācittiyassa. Parehi vippakataṁ attanā pariyosāpeti āpatti
pācittiyassa. Parehi vippakataṁ parehi pariyosāpeti āpatti
pācittiyassa. Aññassatthāya karoti vā kārāpeti vā āpatti
dukkaṭassa. Aññena kataṁ paṭilabhitvā paribhuñjati āpatti
dukkaṭassa.

[775] Anāpatti pamāṇikaṁ karoti ūnakaṁ karoti aññena
kataṁ pamāṇātikkantaṁ paṭilabhitvā chinditvā paribhuñjati vitānaṁ
vā bhummattharaṇaṁ vā sāṇipākāraṁ vā bhisiṁ vā bimbohanaṁ vā
karoti ummattakassa ādikammikassāti.
Navamasikkhāpadaṁ niṭṭhitaṁ.
-------
Dasamasikkhāpadaṁ

[776] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā
nando bhagavato mātucchāputto abhirūpo hoti dassanīyo pāsādiko
caturaṅgulomako bhagavatā. So sugatacīvarappamāṇaṁ cīvaraṁ dhāreti.
Addasaṁsu kho therā bhikkhū āyasmantaṁ nandaṁ dūrato va āgacchantaṁ
disvāna bhagavā āgacchatīti āsanā vuṭṭhahanti. Te upagataṁ
sañjānitvā 1 ujjhāyanti khīyanti vipācenti kathaṁ hi nāma āyasmā
nando sugatacīvarappamāṇaṁ cīvaraṁ dhāressatīti .pe. Saccaṁ kira tvaṁ
nanda sugatacīvarappamāṇaṁ cīvaraṁ dhāresīti. Saccaṁ bhagavāti. Vigarahi
buddho bhagavā kathaṁ hi nāma tvaṁ nanda sugatacīvarappamāṇaṁ cīvaraṁ
dhāressasi netaṁ nanda appasannānaṁ vā pasādāya pasannānaṁ vā
bhiyyobhāvāya .pe. Evañca pana bhikkhave imaṁ sikkhāpadaṁ
uddiseyyātha yo pana bhikkhu sugatacīvarappamāṇaṁ cīvaraṁ kārāpeyya
atirekaṁ vā chedanakaṁ pācittiyaṁ. Tatridaṁ sugatassa sugatacīvarappamāṇaṁ
dīghaso nava vidatthiyo sugatavidatthiyā tiriyaṁ cha vidatthiyo.
Idaṁ sugatassa sugatacīvarappamāṇanti.

[777] Yo panāti yo yādiso .pe. Bhikkhūti .pe. Ayaṁ
imasmiṁ atthe adhipapeto bhikkhūti. Sugatacīvarappamāṇaṁ nāma dīghaso
nava vidatthiyo sugatavidatthiyā tiriyaṁ cha vidatthiyo. Kārāpeyyāti
1 Ma. Yu. upagate jānitvā.
Karoti vā kārāpeti vā payoge dukkaṭaṁ paṭilābhena chinditvā
pācittiyaṁ desetabbaṁ.

[778] Attanā vippakataṁ attanā pariyosāpeti āpatti
pācittiyassa. Attanā vippakataṁ parehi pariyosāpeti āpatti
pācittiyassa. Parehi vippakataṁ attanā pariyosāpeti āpatti
pācittiyassa. Parehi vippakataṁ parehi pariyosāpeti āpatti
pācittiyassa. Aññassatthāya karoti vā kārāpeti vā āpatti
dukkaṭassa. Aññena kataṁ paṭilabhitvā paribhuñjati āpatti
dukkaṭassa.

[779] Anāpatti ūnakaṁ karoti aññena kataṁ paṭilabhitvā
chinditvā paribhuñjati vitānaṁ vā bhummattharaṇaṁ vā sāṇipākāraṁ
vā bhisiṁ vā bimbohanaṁ vā karoti ummattakassa
ādikammikassāti.
Dasamasikkhāpadaṁ niṭṭhitaṁ.
Ratanavaggo navamo.
---------
Tassuddānaṁ
rañño ca ratanaṁ santaṁ sūci mañcañca tūlikaṁ
nisīdanañca kaṇḍuñca vassikā sugatena cāti.
-------

[780] Uddiṭṭhā kho āyasmanto dvenavuti pācittiyā
dhammā. Tatthāyasmante pucchāmi kaccittha parisuddhā dutiyampi
pucchāmi kaccittha parisuddhā tatiyampi pucchāmi kaccittha
parisuddhā parisuddhetthāyasmanto tasmā tuṇhī. Evametaṁ
dhārayāmīti.
[1]-
Pācittiyakaṇḍaṁ niṭṭhitaṁ.
-------
1 Ma. khuddakaṁ samattaṁ.
Pāṭidesanīyakaṇḍaṁ
ime kho panāyasmanto cattāro pāṭidesanīyā dhammā uddesaṁ
āgacchanti.
Paṭhamasikkhāpadaṁ

[781] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarā
bhikkhunī sāvatthiyaṁ piṇḍāya caritvā paṭikkamanakāle aññataraṁ bhikkhuṁ
passitvā etadavoca handayya bhikkhaṁ paṭiggaṇhāti. Suṭṭhu bhaginīti
sabbe va aggahesi. Sā upakaṭṭhe kāle nāsakkhi piṇḍāya
carituṁ chinnabhattā ahosi. Athakho sā bhikkhunī dutiyampi divasaṁ .pe.
Tatiyampi divasaṁ sāvatthiyaṁ piṇḍāya caritvā paṭikkamanakāle taṁ
bhikkhuṁ passitvā etadavoca handayya bhikkhaṁ paṭiggaṇhāti.
Suṭṭhu bhaginīti sabbe va aggahesi. Sā upakaṭṭhe kāle nāsakkhi
piṇḍāya carituṁ chinnabhattā ahosi. Athakho sā bhikkhunī
catutthe divase rathiyāya pavedhantī 1 gacchati. Seṭṭhī gahapati rathena
paṭipathaṁ āgacchanto taṁ bhikkhuniṁ etadavoca apehayyeti. Sā
okkamantī tattheva paripati. Seṭṭhī gahapati taṁ bhikkhuniṁ khamāpesi
khamāhayye mayāsi pātitāti. Nāhaṁ gahapati tayā pātitā apica
ahameva dubbalāti. Kissa pana tvaṁ ayye dubbalāti. Athakho
1 Ma. rathikāya pavedhentī.
Sā bhikkhunī seṭṭhissa gahapatissa etamatthaṁ ārocesi. Seṭṭhī
gahapati taṁ bhikkhuniṁ gharaṁ netvā bhojetvā ujjhāyati khīyati vipāceti
kathaṁ hi nāma bhaddantā bhikkhuniyā hatthato āmisaṁ paṭiggahessanti
kicchalābho mātugāmoti. Assosuṁ kho bhikkhū seṭṭhissa gahapatissa
ujjhāyantassa khīyantassa vipācentassa. Ye te bhikkhū
appicchā .pe. Te ujjhāyanti khīyanti vipācenti kathaṁ hi
nāma bhikkhu bhikkhuniyā hatthato āmisaṁ paṭiggahessatīti .pe.
Saccaṁ kira tvaṁ bhikkhu bhikkhuniyā hatthato āmisaṁ paṭiggahesīti.
Saccaṁ bhagavāti. Ñātikā te bhikkhu aññātikāti. Aññātikā
bhagavāti. Aññātako moghapurisa aññātikāya na jānāti paṭirūpaṁ
vā appaṭirūpaṁ vā santaṁ vā asantaṁ vā kathaṁ hi nāma tvaṁ
moghapurisa aññātikāya bhikkhuniyā hatthato āmisaṁ paṭiggahessasi
netaṁ moghapurisa appasannānaṁ vā pasādāya pasannānaṁ vā
bhiyyobhāvāya .pe. Evañca pana bhikkhave imaṁ sikkhāpadaṁ uddiseyyātha
yo pana bhikkhu aññātikāya bhikkhuniyā antaragharaṁ paviṭṭhāya hatthato
khādanīyaṁ vā bhojanīyaṁ vā sahatthā paṭiggahetvā khādeyya vā
bhuñjeyya vā paṭidesetabbaṁ tena bhikkhunā gārayhaṁ āvuso dhammaṁ
āpajjiṁ asappāyaṁ pāṭidesanīyaṁ taṁ paṭidesemīti.