[792] Sekkhasammate sekkhasammatasaññī animantito agilāno
khādanīyaṁ vā bhojanīyaṁ vā sahatthā paṭiggahetvā khādati vā
bhuñjati vā āpatti pāṭidesanīyassa. Sekkhasammate vematiko
animantito agilāno khādanīyaṁ vā bhojanīyaṁ vā sahatthā paṭiggahetvā
khādati vā bhuñjati vā āpatti pāṭidesanīyassa. Sekkhasammate
asekkhasammatasaññī animantito agilāno khādanīyaṁ vā bhojanīyaṁ
vā sahatthā paṭiggahetvā khādati vā bhuñjati vā āpatti
pāṭidesanīyassa. Yāmakālikaṁ sattāhakālikaṁ yāvajīvikaṁ āhāratthāya
paṭiggaṇhāti āpatti dukkaṭassa. Ajjhohāre ajjhohāre
āpatti dukkaṭassa. Asekkhasammate sekkhasammatasaññī āpatti
dukkaṭassa. Asekkhasammate vematiko āpatti dukkaṭassa.
Asekkhasammate asekkhasammatasaññī anāpatti.

[793] Anāpatti nimantitassa gilānassa nimantitassa vā
gilānassa vā sesakaṁ bhuñjati aññesaṁ bhikkhā tattha paññattā
hoti gharato nīharitvā denti niccabhatte salākabhatte pakkhike
uposathike pāṭipadike yāmakālikaṁ sattāhakālikaṁ yāvajīvikaṁ sati
paccaye paribhuñjāti deti ummattakassa ādikammikassāti.
Tatiyasikkhāpadaṁ niṭṭhitaṁ.
---------
Catutthasikkhāpadaṁ

[794] Tena samayena buddho bhagavā sakkesu viharati kapilavatthusmiṁ
nigrodhārāme. Tena kho pana samayena sākiyadāsakā avaruddhā
honti. Sākiyānayo icchanti āraññakesu senāsanesu bhattaṁ kātuṁ.
Assosuṁ kho sākiyadāsakā sākiyāniyo kira āraññakesu senāsanesu
bhattaṁ kattukāmāti. Te magge pariyuṭṭhiṁsu. Sākiyāniyo paṇītaṁ
khādanīyaṁ bhojanīyaṁ ādāya āraññakaṁ senāsanaṁ agamaṁsu.
Sākiyadāsakā nikkhamitvā sākiyāniyo acchindiṁsu ca dūsesuñca. Sākiyā
nikkhamitvā te core sabhaṇḍe 1 gahetvā ujjhāyanti khīyanti vipācenti
kathaṁ hi nāma bhaddantā ārāme core paṭivasante nārocessantīti.
Assosuṁ kho bhikkhū sākiyānaṁ ujjhāyantānaṁ khīyantānaṁ vipācentānaṁ.
Athakho te bhikkhū bhagavato etamatthaṁ ārocesuṁ. Athakho bhagavā
etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi
tenahi bhikkhave bhikkhūnaṁ sikkhāpadaṁ paññāpessāmi dasa atthavase
paṭicca saṅghasuṭṭhutāya .pe. Saddhammaṭṭhitiyā vinayānuggahāya
evañca pana bhikkhave imaṁ sikkhāpadaṁ uddiseyyātha yāni kho
pana tāni āraññakāni senāsanāni sāsaṅkasammatāni sappaṭibhayāni
yo pana bhikkhu tathārūpesu senāsanesu viharanto 2 pubbe appaṭisaṁviditaṁ
1 Ma. Yu. saha bhaṇḍena. 2 Ma. Yu. ayaṁ pāṭho na hoti. evamuparipi.
Khādanīyaṁ vā bhojanīyaṁ vā ajjhārāme sahatthā paṭiggahetvā
khādeyya vā bhuñjeyya vā paṭidesetabbaṁ tena bhikkhunā gārayhaṁ
āvuso dhammaṁ āpajjiṁ asappāyaṁ pāṭidesanīyaṁ taṁ paṭidesemīti.
Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[795] Tena kho pana samayena aññataro bhikkhu āraññakesu
senāsanesu gilāno hoti. Manussā khādanīyaṁ bhojanīyaṁ ādāya
āraññakaṁ senāsanaṁ agamaṁsu. Athakho te manussā taṁ bhikkhuṁ etadavocuṁ
bhuñjatha bhanteti. Athakho so bhikkhu bhagavatā paṭikkhittaṁ āraññakesu
senāsanesu khādanīyaṁ vā bhojanīyaṁ vā sahatthā paṭiggahetvā khādituṁ
bhuñjitunti kukkuccāyanto na paṭiggahesi nāsakkhi piṇḍāya carituṁ
chinnabhatto ahosi. Athakho so bhikkhu bhikkhūnaṁ etamatthaṁ ārocesi.
Bhikkhū bhagavato etamatthaṁ ārocesuṁ. Athakho bhagavā etasmiṁ nidāne
etasmiṁ pakaraṇe dhammiṁ kathaṁ katvā bhikkhū āmantesi anujānāmi
bhikkhave gilānena bhikkhu āraññakesu senāsanesu khādanīyaṁ vā bhojanīyaṁ
vā sahatthā paṭiggahetvā khādituṁ bhuñjituṁ evañca pana bhikkhave
imaṁ sikkhāpadaṁ uddiseyyātha yāni kho pana tāni āraññakāni
senāsanāni sāsaṅkasammatāni sappaṭibhayāni yo pana bhikkhu tathārūpesu
senāsanesu viharanto pubbe appaṭisaṁviditaṁ khādanīyaṁ vā bhojanīyaṁ
vā ajjhārāme sahatthā paṭiggahetvā agilāno khādeyya vā
bhuñjeyya vā paṭidesetabbaṁ tena bhikkhunā gārayhaṁ āvuso
Dhammaṁ āpajjiṁ asappāyaṁ pāṭidesanīyaṁ taṁ paṭidesemīti.

[796] Yāni kho pana tāni āraññakāni senāsanānīti āraññakaṁ
nāma senāsanaṁ pañcadhanusatikaṁ pacchimaṁ. Sāsaṅkaṁ nāma ārāme
ārāmūpacāre corānaṁ niviṭṭhokāso dissati bhuttokāso dissati
ṭhitokāso dissati nisinnokāso dissati nipannokāso dissati.
Sappaṭibhayaṁ nāma ārāme ārāmūpacāre corehi manussā hatā
dissanti viluttā dissanti ākoṭitā dissanti. Yo panāti
yo yādiso .pe. Bhikkhūti .pe. Ayaṁ imasmiṁ atthe adhippeto
bhikkhūti. Tathārūpesu senāsanesūti evarūpesu senāsanesu.
Appaṭisaṁviditaṁ nāma pañcannaṁ paṭisaṁviditaṁ etaṁ appaṭisaṁviditaṁ nāma.
Ārāmaṁ ārāmūpacāraṁ ṭhapetvā paṭisaṁviditaṁ etaṁ appaṭisaṁviditaṁ
nāma. Paṭisaṁviditaṁ nāma yo koci itthī vā puriso vā ārāmaṁ
vā 1 ārāmupacāraṁ vā 2 āgantvā āroceti itthannāmassa bhante
khādanīyaṁ vā 3 bhojanīyaṁ vā 4 āhariyissatīti. Sace sāsaṅkaṁ hoti
sāsaṅkanti ācikkhitabbaṁ. Sace sappaṭibhayaṁ hoti sappaṭibhayanti
ācikkhitabbaṁ. Sace hotu bhante āhariyissatīti bhaṇati corā
vattabbā manussā idhūpacaranti apasakkathāti. Yāguyā
paṭisaṁvidite tassā parivāro āhariyati etaṁ paṭisaṁviditaṁ nāma.
Bhattena paṭisaṁvidite tassa parivāro āhariyati etaṁ paṭisaṁviditaṁ
1-2 Ma. Yu. vāsaddo natthi. 3-4 Yu. vāsaddo natthi.
Nāma. Khādanīyena paṭisaṁvidite tassa parivāro āhariyati etaṁ
paṭisaṁviditaṁ nāma. Kulena paṭisaṁvidite ye 1 tasmiṁ kule manussā 2
khādanīyaṁ vā bhojanīyaṁ vā āharanti 3 etaṁ paṭisaṁviditaṁ nāma. Gāmena
paṭisaṁvidite ye 1 tasmiṁ gāme manussā 2 khādanīyaṁ vā bhojanīyaṁ vā
āharanti 3 etaṁ paṭisaṁviditaṁ nāma. Pūgena paṭisaṁvidite ye 1 tasmiṁ
pūge manussā 2 khādanīyaṁ vā bhojanīyaṁ vā āharanti 3 etaṁ paṭisaṁviditaṁ
nāma. Khādanīyaṁ nāma pañca bhojanāni yāmakālikaṁ sattāhakālikaṁ
yāvajīvikaṁ ṭhapetvā avasesaṁ khādanīyaṁ nāma. Bhojanīyaṁ nāma pañca
bhojanāni odano kummāso sattu maccho maṁsaṁ. Ajjhārāmo
nāma parikkhittassa ārāmassa antoārāmo aparikkhittassa
upacāro. Agilāno nāma sakkoti piṇḍāya carituṁ. Gilāno nāma
na sakkoti piṇḍāya carituṁ. Appaṭisaṁviditaṁ agilāno khādissāmi
bhuñjissāmīti paṭiggaṇhāti āpatti dukkaṭassa. Ajjhohāre
ajjhohāre āpatti pāṭidesanīyassa.

[797] Appaṭisaṁvidite appaṭisaṁviditasaññī khādanīyaṁ vā bhojanīyaṁ vā
ajjhārāme sahatthā paṭiggahetvā agilāno khādati vā bhuñjati vā
āpatti pāṭidesanīyassa. Appaṭisaṁvidite vematiko khādanīyaṁ vā bhojanīyaṁ
vā ajjhārāme sahatthā paṭiggahetvā agilāno khādati vā bhuñjati
vā āpatti pāṭidesanīyassa. Appaṭisaṁvidite paṭisaṁviditasaññī
khādanīyaṁ vā bhojanīyaṁ vā ajjhārāme sahatthā paṭiggahetvā
1 Ma. Yu. yo. 2 Ma. Yu. manusso. 3 Ma. Yu. āharati.
Agilāno khādati vā bhuñjati vā āpatti pāṭidesanīyassa.
Yāmakālikaṁ sattāhakālikaṁ yāvajīvikaṁ āhāratthāya paṭiggaṇhāti
āpatti dukkaṭassa. Ajjhohāre ajjhohāre āpatti dukkaṭassa.
Paṭisaṁvidite appaṭisaṁviditasaññī āpatti dukkaṭassa. Paṭisaṁvidite
vematiko āpatti dukkaṭassa. Paṭisaṁvidite paṭisaṁviditasaññī
anāpatti.

[798] Anāpatti paṭisaṁvidite gilānassa paṭisaṁvidite vā
gilānassa vā sesakaṁ bhuñjati bahārāme paṭiggahetvā
antoārāme bhuñjati tattha jātakaṁ mūlaṁ vā tacaṁ vā pattaṁ vā
pupphaṁ vā phalaṁ vā bhuñjati yāmakālikaṁ sattāhakālikaṁ yāvajīvikaṁ
sati paccaye paribhuñjati ummattakassa ādikammikassāti.

[799] Uddiṭṭhā kho āyasmanto cattāro pāṭidesanīyā
dhammā. Tatthāyasmante pucchāmi kaccittha parisuddhā dutiyampi
pucchāmi kaccittha parisuddhā tatiyampi pucchāmi kaccittha parisuddhā
parisuddhetthāyasmanto tasmā tuṇhī. Evametaṁ dhārayāmīti.
Pāṭidesanīyakaṇḍaṁ niṭṭhitaṁ.
--------
Sekhiyakaṇḍaṁ
ime kho panāyasmanto sekhiyā dhammā uddesaṁ āgacchanti.
Parimaṇḍalavaggo
chabbīsati sāruppā

[800] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū puratopi pacchatopi olambentā nivāsenti. Manussā
ujjhāyanti khīyanti vipācenti kathaṁ hi nāma samaṇā sakyaputtiyā
puratopi pacchatopi olambentā nivāsessanti seyyathāpi gihī
kāmabhoginoti. Assosuṁ kho bhikkhū tesaṁ manussānaṁ ujjhāyantānaṁ
khīyantānaṁ vipācentānaṁ. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma chabbaggiyā bhikkhū
puratopi pacchatopi olambentā nivāsessantīti. Athakho te bhikkhū
bhagavato etamatthaṁ ārocesuṁ. Athakho bhagavā etasmiṁ nidāne
etasmiṁ pakaraṇe dhammiṁ kathaṁ katvā bhikkhusaṅghaṁ sannipātāpetvā
chabbaggiye bhikkhū paṭipucchi saccaṁ kira tumhe bhikkhave puratopi
pacchatopi olambentā nivāsethāti. Saccaṁ bhagavāti. Vigarahi
buddho bhagavā kathaṁ hi nāma tumhe moghapurisā puratopi pacchatopi
olambentā nivāsessatha netaṁ moghapurisā appasannānaṁ vā
Pasādāya pasannānaṁ vā bhiyyobhāvāya .pe. Evañca pana bhikkhave
imaṁ sikkhāpadaṁ uddiseyyātha parimaṇḍalaṁ nivāsessāmīti sikkhā
karaṇīyā 1 .
Parimaṇḍalaṁ nivāsetabbaṁ nābhimaṇḍalaṁ jānumaṇḍalaṁ
paṭicchādentena. Yo anādariyaṁ paṭicca purato vā pacchato vā
olambento nivāseti āpatti dukkaṭassa.
Anāpatti asañcicca asatiyā 2 ajānantassa gilānassa
āpadāsu ummattakassa ādikammikassāti. [3]-

[801] Sāvatthīnidānaṁ 4 . Tena kho pana samayena chabbaggiyā
bhikkhū puratopi pacchatopi olambentā pārupanti .pe. Parimaṇḍalaṁ
pārupissāmīti sikkhā karaṇīyā.
Parimaṇḍalaṁ pārupitabbaṁ ubho kaṇṇe samaṁ katvā. Yo
anādariyaṁ paṭicca puratopi pacchatopi olambento pārupati āpatti
dukkaṭassa.
Anāpatti asañcicca asatiyā ajānantassa gilānassa
āpadāsu ummattakassa ādikammikassāti.