[20] Catūhi bhikkhave dhammehi samannāgato bhattuddesako yathābhataṁ
nikkhitto evaṁ niraye katamehi catūhi chandāgatiṁ gacchati dosāgatiṁ
gacchati mohāgatiṁ gacchati bhayāgatiṁ gacchati imehi kho bhikkhave
catūhi dhammehi samannāgato bhattuddesako yathābhataṁ nikkhitto evaṁ
niraye. Catūhi bhikkhave dhammehi samannāgato bhattuddesako yathābhataṁ
nikkhitto evaṁ sagge katamehi catūhi na chandāgatiṁ gacchati na
dosāgatiṁ gacchati na mohāgatiṁ gacchati na bhayāgatiṁ gacchati
imehi kho bhikkhave catūhi dhammehi samannāgato bhattuddesako yathābhataṁ
nikkhitto evaṁ saggeti.
Yekeci kāmesu asaññatā janā
adhammikā honti adhammagāravā
chandā ca dosā ca bhayā ca gāmino
Parisakasaṭo 1 ca panesa vuccati
evaṁ hi vuttaṁ samaṇena jānatā
tasmā hi te sappurisā pasaṁsiyā
dhamme ṭhitā ye na karonti pāpakaṁ
na chandadosā na bhayā ca gāmino.
Parisāya maṇḍo ca panesa vuccati
evaṁ hi vuttaṁ samaṇena jānatāti.
Caravaggo dutiyo.
Tassuddānaṁ
cāraṁ sīlaṁ padhānāni saṁvaraṁ paññattipañcamaṁ
sokhummaṁ tayo agatī bhattuddesena te dasāti.
-----------
Uruvelavaggo tatiyo

[21] Ekaṁ samayaṁ bhagavā sāvatthiyaṁ viharati jetavane anāthapiṇḍikassa
ārāme. Tatra kho bhagavā bhikkhū āmantesi bhikkhavoti.
Bhadanteti te bhikkhū bhagavato paccassosuṁ. Bhagavā etadavoca ekamidāhaṁ
bhikkhave samayaṁ uruvelāyaṁ viharāmi najjā nerañjarāya tīre
ajapālanigrodhe paṭhamābhisambuddho tassa mayhaṁ bhikkhave rahogatassa
paṭisallīnassa evaṁ cetaso parivitakko udapādi dukkhaṁ kho agāravo
viharati appatisso kannukho ahaṁ samaṇaṁ vā brāhmaṇaṁ vā sakkatvā
1 Yu. parisakkasāvo.
Garuṁ katvā upanissāya vihareyyanti tassa mayhaṁ bhikkhave etadahosi
aparipūrassa kho me 1 sīlakkhandhassa pāripūriyā aññaṁ samaṇaṁ vā
brāhmaṇaṁ vā sakkatvā garuṁ katvā 2 upanissāya vihareyyaṁ na kho
panāhaṁ passāmi sadevake loke samārake sabrahmake sassamaṇabrāhmaṇiyā
pajāya sadevamanussāya aññaṁ samaṇaṁ vā brāhmaṇaṁ vā attanā
sīlasampannataraṁ yamahaṁ sakkatvā garuṁ katvā upanissāya vihareyyaṁ
aparipūrassa kho me 1 ... Samādhikkhandhassa ... Paññākkhandhassa ...
Vimuttikkhandhassa pāripūriyā aññaṁ samaṇaṁ vā brāhmaṇaṁ vā sakkatvā
garuṁ katvā upanissāya vihareyyaṁ na kho panāhaṁ passāmi sadevake
loke samārake sabrahmake sassamaṇabrāhmaṇiyā pajāya sadevamanussāya
aññaṁ samaṇaṁ vā brāhmaṇaṁ vā attanā vimuttisampannataraṁ yamahaṁ
sakkatvā garuṁ katvā upanissāya vihareyyanti tassa mayhaṁ bhikkhave
etadahosi yannūnāhaṁ yopāyaṁ dhammo mayā abhisambuddho tameva
dhammaṁ sakkatvā garuṁ katvā upanissāya vihareyyanti. Athakho bhikkhave
brahmā sahampati mama cetasā cetoparivitakkamaññāya seyyathāpi
nāma balavā puriso sammiñjitaṁ vā bāhaṁ pasāreyya pasāritaṁ vā
bāhaṁ sammiñjeyya evameva brahmaloke antarahito mama purato
pāturahosi. Athakho bhikkhave brahmā sahampati ekaṁsaṁ uttarāsaṅgaṁ
karitvā dakkhiṇajānumaṇḍalaṁ paṭhaviyaṁ nihantvā yenāhaṁ tenañjalimpaṇāmetvā
1 Ma. Yu. ahaṁ. 2 garukatvā. ito paraṁ īdisameva.
Maṁ etadavoca evametaṁ bhagavā evametaṁ sugata yepi
te bhante ahesuṁ atītamaddhānaṁ arahanto sammāsambuddhā tepi
bhagavanto dhammaṁyeva sakkatvā garuṁ katvā upanissāya vihariṁsu yepi
te bhante bhavissanti anāgatamaddhānaṁ arahanto sammāsambuddhā tepi
bhagavanto dhammaṁyeva sakkatvā garuṁ katvā upanissāya viharissanti
bhagavāpi bhante etarahi arahaṁ sammāsambuddho dhammaṁyeva sakkatvā garuṁ
katvā upanissāya viharatūti idamavoca brahmā sahampati idaṁ
vatvā athāparaṁ etadavoca
ye ca atītā 1 sambuddhā ye ca buddhā anāgatā
yo cetarahi sambuddho bahunnaṁ sokanāsano
sabbe saddhammagaruno vihariṁsu 2 vihāti ca
athāpi viharissanti esā buddhāna dhammatā
tasmā hi attakāmena mahattamabhikaṅkhatā
saddhammo garukātabbo saraṁ buddhāna sāsananti.
Idamavoca bhikkhave brahmā sahampati idaṁ vatvā maṁ abhivādetvā
detvā padakkhiṇaṁ katvā tatthevantaradhāyi. Idha 3 khvāhaṁ bhikkhave
brahmuno ajjhesanaṁ viditvā attano ca paṭirūpaṁ yopāyaṁ dhammo
mayā abhisambuddho tameva dhammaṁ sakkatvā garuṁ katvā upanissāya
vihāsiṁ yato ca kho bhikkhave saṅghopi mahattena samannāgato atha
1 Yu. yecabbhatītā. 2 Ma. Yu. vihaṁsu viharanti ca. 3 Po. Ma. Yu. atha.
Me saṅghepi gāravoti.

[22] Ekamidāhaṁ bhikkhave samayaṁ uruvelāyaṁ viharāmi najjā
nerañjarāya tīre ajapālanigrodhe paṭhamābhisambuddho. Athakho bhikkhave
sambahulā brāhmaṇā jiṇṇā vuḍḍhā mahallakā addhagatā vayoanuppattā
yenāhaṁ tenupasaṅkamiṁsu upasaṅkamitvā mayā saddhiṁ sammodiṁsu
sammodanīyaṁ kathaṁ sārāṇīyaṁ vītisāretvā ekamantaṁ nisīdiṁsu ekamantaṁ
nisinnā kho bhikkhave te brāhmaṇā maṁ etadavocuṁ sutaṁ metaṁ bho
gotama na samaṇo gotamo brāhmaṇe jiṇṇe vuḍḍhe mahallake
addhagate vayoanuppatte abhivādeti vā paccuṭṭheti vā āsanena vā
nimantetīti tayidaṁ bho gotama tatheva na hi bhavaṁ gotamo
brāhmaṇe jiṇṇe vuḍḍhe mahallake addhagate vayoanuppatte abhivādeti
vā paccuṭṭheti vā āsanena vā nimanteti tayidaṁ bho gotama
na sampannamevāti. Tassa mayhaṁ bhikkhave etadahosi nacayime
āyasmanto jānanti theraṁ vā therakaraṇe vā dhammeti 1 vuḍḍho cepi
bhikkhave hoti asītiko vā navutiko vā vassasatiko vā jātiyā
so ca hoti akālavādī abhūtavādī anatthavādī adhammavādī avinayavādī
anidhānavatiṁ vācaṁ bhāsitā akālena anapadesaṁ apariyantavatiṁ anatthasañhitaṁ
athakho so bālo therotveva saṅkhaṁ gacchati daharo cepi bhikkhave
hoti yuvā susū 2 kāḷakeso bhadrena yobbanena samannāgato paṭhamena
1 Yu. dhamme. 2 Ma. Yu. susu.
Vayasā so ca hoti kālavādī bhūtavādī atthavādī dhammavādī vinayavādī
nidhānavatiṁ vācaṁ bhāsitā kālena sāpadesaṁ pariyantavatiṁ atthasañhitaṁ
athakho so paṇḍito therotveva saṅkhaṁ gacchati. Cattārome bhikkhave
therakaraṇā dhammā katame cattāro idha bhikkhave bhikkhu sīlavā hoti
pātimokkhasaṁvarasaṁvuto viharati ācāragocarasampanno aṇumattesu vajjesu
bhayadassāvī samādāya sikkhati sikkhāpadesu bahussuto hoti sutadharo
sutasannicayo ye te dhammā ādikalyāṇā majjhekalyāṇā
pariyosānakalyāṇā sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ
abhivadanti tathārūpāssa dhammā bahussutā honti dhatā vacasā paricitā
manasānupekkhitā diṭṭhiyā suppaṭividdhā catunnaṁ jhānānaṁ ābhicetasikānaṁ
diṭṭhadhammasukhavihārānaṁ nikāmalābhī hoti akicchalābhī akasiralābhī
āsavānaṁ khayā anāsavaṁ cetovimuttiṁ paññāvimuttiṁ diṭṭheva dhamme sayaṁ
abhiññā sacchikatvā upasampajja viharati. Ime kho bhikkhave cattāro
therakaraṇā dhammāti.
Yo uddhatena cittena samphañca bahubhāsati
asamāhitasaṅkappo asaddhammarato mato 1
ārā so thāvareyyamhā pāpadiṭṭhi anādaro.
Yo ca sīlena sampanno sutavā paṭibhāṇavā
saṁyutto thiradhammesu 2 paññāyatthaṁ vipassati
1 Ma. Yu. mago. 2 Ma. Yu. saññato dhīro dhammesu.
Pāragū sabbadhammānaṁ akhilo paṭibhāṇavā
pahīnajātimaraṇo brahmacariyassa kevalī
tamahaṁ vadāmi theroti yassa no santi āsavā
āsavānaṁ khayā bhikkhu so 1 theroti pavuccatīti.

[23] Loko bhikkhave tathāgatena abhisambuddho lokasmā tathāgato
visaṁyutto lokasamudayo bhikkhave tathāgatena abhisambuddho lokasamudayo
tathāgatassa pahīno lokanirodho bhikkhave tathāgatena abhisambuddho
lokanirodho tathāgatassa sacchikato lokanirodhagāminī paṭipadā
bhikkhave tathāgatena abhisambuddhā lokanirodhagāminī paṭipadā tathāgatassa
bhāvitā. Yaṁ bhikkhave sadevakassa lokassa samārakassa sabrahmakassa
sassamaṇabrāhmaṇiyā pajāya sadevamanussāya diṭṭhaṁ sutaṁ mutaṁ viññātaṁ
pattaṁ pariyesitaṁ anuvicaritaṁ manasā sammā taṁ 2 tathāgatena abhisambuddhaṁ
tasmā tathāgatoti vuccati. Yañca bhikkhave rattiṁ tathāgato anuttaraṁ
sammāsambodhiṁ abhisambujjhati yañca rattiṁ anupādisesāya nibbānadhātuyā
parinibbāyati yaṁ etasmiṁ antare bhāsati lapati niddisati sabbantaṁ
tatheva hoti no aññathā tasmā tathāgatoti vuccati.
Yathāvādī bhikkhave tathāgato tathākārī yathākārī tathāvādī iti
yathāvādī tathākārī yathākārī tathāvādī tasmā tathāgatoti vuccati.
Sadevake bhikkhave loke samārake sabrahmake sassamaṇabrāhmaṇiyā pajāya
1 Yu. soti natthi. 2 Ma. Yu. sabbaṁ.
Sadevamanussāya tathāgato abhibhū anabhibhūto aññadatthudaso vasavatti
tasmā tathāgatoti vuccatīti.
Sabbalokaṁ abhiññāya sabbaloke yathātathaṁ 1
sabbalokavisaṁyutto sabbaloke anussayo
sa ve sabbābhibhū dhīro sabbaganthappamocano
phuṭṭhassa paramā santi nibbānaṁ akutobhayaṁ
esa khīṇāsavo buddho anīgho chinnasaṁsayo
sabbakammakkhayaṁ patto vimutto upadhisaṁkhaye.
Evaṁ so 2 bhagavā buddho esa sīho anuttaro
sadevakassa lokassa brahmacakkaṁ pavattayi.
Iti devā manussā ca ye buddhaṁ saraṇaṁ gatā
saṅgamma naṁ namassanti mahantaṁ vītasāradaṁ.
Danto damayataṁ seṭṭho santo samayataṁ isi
mutto mocayataṁ aggo tiṇṇo tārayataṁ varo
iti hetaṁ namassanti mahantaṁ vītasāradaṁ.
Sadevakasmiṁ lokasmiṁ natthi te 3 paṭipuggaloti.

[24] Ekaṁ samayaṁ bhagavā sākete viharati kāḷakārāme.
Tatra kho bhagavā bhikkhū āmantesi bhikkhavoti. Bhadanteti te bhikkhū
bhagavato paccassosuṁ. Bhagavā etadavoca yaṁ bhikkhave sadevakassa
1 Yu. yathā tathā. 2 Ma. Yu. esa. 3 Ma. me.
Lokassa samārakassa sabrahmakassa sassamaṇabrāhmaṇiyā pajāya
sadevamanussāya diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ manasā
tamahaṁ jānāmi yaṁ bhikkhave sadevakassa lokassa samārakassa
sabrahmakassa sassamaṇabrāhmaṇiyā pajāya sadevamanussāya diṭṭhaṁ sutaṁ mutaṁ
viññātaṁ pattaṁ pariyesitaṁ anuvicaritaṁ manasā tamahaṁ abbhaññāsiṁ
taṁ tathāgatassa viditaṁ taṁ tathāgate 1 na upaṭṭhāsi yaṁ bhikkhave
sadevakassa lokassa ... Diṭṭhaṁ sutaṁ mutaṁ viññātaṁ pattaṁ pariyesitaṁ anuvicaritaṁ
manasā tamahaṁ jānāmīti vadeyyaṁ taṁ mamassa musā ... Tamahaṁ
jānāmi ca na ca jānāmīti vadeyyaṁ taṁ pissa tādisameva ... Tamahaṁ neva
jānāmi na na jānāmīti vadeyyaṁ taṁ mamassa kali iti kho bhikkhave
tathāgato diṭṭhā daṭṭhabbaṁ diṭṭhaṁ na maññati adiṭṭhaṁ na maññati
daṭṭhabbaṁ na maññati diṭṭhānaṁ 2 na maññati sutā 3 sotabbaṁ sutaṁ
na maññati assutaṁ na maññati sotabbaṁ na maññati sutānaṁ 4
na maññati mutā 5 motabbaṁ mutaṁ na maññati amutaṁ na maññati
motabbaṁ na maññati mutānaṁ 6 na maññati viññātā 7 viññātabbaṁ
viññātaṁ na maññati aviññātaṁ na maññati viññātabbaṁ na
maññati viññātānaṁ 8 na maññati iti kho bhikkhave tathāgato diṭṭhasutamuta-
viññātabbesu dhammesu tādisova 9 tādī tamhā ca pana tādimhā
añño tādī uttaritaro vā paṇītataro vā natthīti vadāmīti.
1 Ma. Yu. tathāgato. 2 Ma. Yu. daṭṭhāraṁ. 3 Ma. Yu. stvā. 4 Ma. Yu. sotāraṁ.
5 Ma. Yu. mutvā. 6 Ma. Yu. motāraṁ. 7 Ma. Yu. viññatvā.
8 Ma. Yu. viññātāraṁ. 9 Ma. tādīyeva. Yu. tādiseyeva.
Yaṅkiñci diṭṭhaṁ ca 1 sutaṁ mutaṁ vā
ajjhositaṁ saccamutaṁ paresaṁ
na tesu tādī sayasaṁvutesu
saccaṁ musāvāpi paraṁ daheyya.
Etañca sallaṁ paṭikacca disvā
ajjhositā yattha pajā visattā
jānāmi passāmi tatheva etaṁ
ajjhositaṁ natthi tathāgatānanti.

[25] Nayidaṁ bhikkhave brahmacariyaṁ vussati janakuhanatthaṁ na janalapanatthaṁ
na lābhasakkārasilokānisaṁsatthaṁ na itivādappamokkhānisaṁsatthaṁ na
iti maṁ jano jānātūti athakho idaṁ bhikkhave brahmacariyaṁ vussati
saṁvaratthaṁ pahānatthaṁ virāgatthaṁ nirodhatthanti.
Saṁvaratthaṁ pahānatthaṁ brahmacariyaṁ anītihaṁ
adesayi so bhagavā nibbānogadhagāminaṁ
esa maggo mahantehi anuyāto mahesibhi.
Ye ca taṁ paṭipajjanti yathā buddhena desitaṁ
dukkhassantaṁ karissanti satthusāsanakārinoti.

[26] Ye te bhikkhave bhikkhū kuhā thaddhā lapā siṅgī unnaḷā
asamāhitā na me te bhikkhave bhikkhū māmakā apagatā ca te
1 Ma. va.
Bhikkhave bhikkhū imasmā dhammavinayā na ca te imasmiṁ dhammavinaye
vuḍḍhiṁ virūḷhiṁ vepullaṁ āpajjanti. Ye ca kho te bhikkhave bhikkhū
nikkuhā nillapā dhīrā atthaddhā susamāhitā te kho me bhikkhave
bhikkhū māmakā anapagatā ca te bhikkhave bhikkhū imasmā dhammavinayā
te ca imasmiṁ dhammavinaye vuḍḍhiṁ virūḷhiṁ vepullaṁ āpajjantīti.
Kuhā thaddhā lapā siṅgī unnaḷā cāsamāhitā
na te dhamme virūhanti sammāsambuddhadesite.
Nikkuhā nillapā dhīrā atthaddhā susamāhitā
te ve dhamme virūhanti sammāsambuddhadesiteti.

[27] Cattārīmāni bhikkhave appāni ca sulabhāni ca tāni
ca anavajjāni katamāni cattāri paṁsukūlaṁ bhikkhave cīvarānaṁ appañca
sulabhañca tañca anavajjaṁ piṇḍiyālopo bhikkhave bhojanānaṁ
appañca sulabhañca tañca anavajjaṁ rukkhamūlaṁ bhikkhave senāsanānaṁ
appañca sulabhañca tañca anavajjaṁ pūtimuttaṁ bhikkhave bhesajjānaṁ
appañca sulabhañca tañca anavajjaṁ imāni kho bhikkhave cattāri
appāni ca sulabhāni ca tāni ca anavajjāni yato kho bhikkhave
bhikkhu appena ca santuṭṭho hoti sulabhena ca idamassāhaṁ aññataraṁ
sāmaññaṅganti 1 vadāmīti.
Anavajjena tuṭṭhassa appena sulabhena ca
1 Yu. sāmañañanti.
Na senāsanamārabbha cīvaraṁ pānabhojanaṁ
vighāto hoti cittassa disā na paṭihaññati.
Ye cassa dhammā akkhātā sāmaññassānulomikā
adhiggahitā tuṭṭhassa appamattassa bhikkhunoti 1 .

[28] Cattārome bhikkhave ariyavaṁsā aggaññā rattaññā
vaṁsaññā porāṇā asaṁkiṇṇā asaṁkiṇṇapubbā na saṁkīyanti na
saṁkīyissanti appaṭikuṭṭhā samaṇehi brahmaṇehi viññūhi katame
cattāro idha bhikkhave bhikkhu santuṭṭho hoti itarītarena cīvarena
itarītaracīvarasantuṭṭhiyā ca vaṇṇavādī na ca cīvarahetu anesanaṁ appaṭirūpaṁ
āpajjati aladdhā ca cīvaraṁ na paritassati laddhā ca
cīvaraṁ agadhito amucchito anajjhāpanno 2 ādīnavadassāvī nissaraṇapañño
paribhuñjati tāya ca pana itarītaracīvarasantuṭṭhiyā nevattānukkaṁseti
no paraṁ vambheti yo hi tattha dakkho analaso sampajāno patissato
ayaṁ vuccati bhikkhave bhikkhu porāṇe aggaññe ariyavaṁse ṭhito.
Puna caparaṁ bhikkhave bhikkhu santuṭṭho hoti itarītarena piṇḍapātena
itarītarapiṇḍapātasantuṭṭhiyā ca vaṇṇavādī na ca piṇḍapātahetu
anesanaṁ appaṭirūpaṁ āpajjati aladdhā ca piṇḍapātaṁ na paritassati
laddhā ca piṇḍapātaṁ agadhito amucchito anajjhāpanno ādīnavadassāvī
nissaraṇapañño paribhuñjati tāya ca pana itarītarapiṇḍapātasantuṭṭhiyā
1 Ma. Yu. sikkhatoti. 2 Ma. Yu. anajjhopanno. ito paraṁ īdisameva.
Nevattānukkaṁseti no paraṁ vambheti yo hi tattha dakkho analaso
sampajāno patissato ayaṁ vuccati bhikkhave bhikkhu porāṇe aggaññe
ariyavaṁse ṭhito. Puna caparaṁ bhikkhave bhikkhu santuṭṭho hoti itarītarena
senāsanena itarītarasenāsanasantuṭṭhiyā ca vaṇṇavādī na ca
senāsanahetu anesanaṁ appaṭirūpaṁ āpajjati aladdhā ca senāsanaṁ
na paritassati laddhā ca senāsanaṁ agadhito amucchito anajjhāpanno
ādīnavadassāvī nissaraṇapañño paribhuñjati tāya ca pana itarītarasenāsanasantuṭṭhiyā
nevattānukkaṁseti no paraṁ vambheti yo hi tattha
dakkho analaso sampajāno patissato ayaṁ vuccati bhikkhave bhikkhu
porāṇe aggaññe ariyavaṁse ṭhito. Puna caparaṁ bhikkhave bhikkhu
bhāvanārāmo hoti bhāvanārato pahānārāmo hoti pahānarato tāya
ca pana bhāvanārāmatāya bhāvanāratiyā pahānārāmatāya pahānaratiyā
nevattānukkaṁseti no paraṁ vambheti yo hi tattha dakkho analaso
sampajāno patissato ayaṁ vuccati bhikkhave bhikkhu porāṇe aggaññe
ariyavaṁse ṭhito. Ime kho bhikkhave cattāro ariyavaṁsā aggaññā
rattaññā vaṁsaññā porāṇā asaṁkiṇṇā asaṁkiṇṇapubbā na
saṁkīyanti na saṁkīyissanti appaṭikuṭṭhā samaṇehi brāhmaṇehi
viññūhi. Imehi ca pana bhikkhave catūhi ariyavaṁsehi samannāgato bhikkhu
puratthimāya cepi disāya viharati sveva aratiṁ sahati na taṁ arati
sahati pacchimāya cepi disāya viharati ... Uttarāya cepi disāya
Viharati ... Dakkhiṇāya cepi disāya viharati sveva aratiṁ sahati na
taṁ arati sahati taṁ kissa hetu aratiratisaho hi bhikkhave
dhīroti.
Nāratī sahatī dhīraṁ nāratī dhīrasaṁhati 1
dhīro ca aratiṁ sahati dhīro hi aratiṁsaho 2 .
Sabbakammavihāyīnaṁ 3 panuṇṇaṁ ko nivāraye
nekkhaṁ jambonadasseva ko taṁ ninditumarahati
devāpi naṁ pasaṁsanti brahmunāpi pasaṁsitoti.

[29] Cattārīmāni bhikkhave dhammapadāni aggaññāni rattaññāni
vaṁsaññāni porāṇāni asaṁkiṇṇāni asaṁkiṇṇapubbāni na
saṁkīyanti na saṁkīyissanti appaṭikuṭṭhāni samaṇehi brāhmaṇehi
viññūhi katamāni cattāri anabhijjhā bhikkhave dhammapadaṁ aggaññaṁ
rattaññaṁ vaṁsaññaṁ porāṇaṁ asaṁkiṇṇaṁ asaṁkiṇṇapubbaṁ na saṁkīyati
na saṁkīyissati appaṭikuṭṭhaṁ samaṇehi brāhmaṇehi viññūhi abyāpādo
bhikkhave dhammapadaṁ ... Sammāsati bhikkhave dhammapadaṁ ... Sammāsamādhi
bhikkhave dhammapadaṁ aggaññaṁ rattaññaṁ vaṁsaññaṁ porāṇaṁ
asaṁkiṇṇaṁ asaṁkiṇṇapubbaṁ na saṁkīyati na saṁkīyissati appaṭikuṭṭhaṁ
samaṇehi brāhmaṇehi viññūhi imāni kho bhikkhave cattāri dhammapadāni
aggaññāni rattaññāni vaṁsaññāni porāṇāni asaṁkiṇṇāni
asaṁkiṇṇapubbāni na saṁkīyanti na saṁkīyissanti appaṭikuṭṭhāni
1 Ma. Yu. dhīraṁ sahati. 2 Ma. aratissaho. 3 Yu. sammākammaviyākataṁ.
Samaṇehi brāhmaṇehi viññūhīti.
Anabhijjhālu vihareyya abyāpannena cetasā
sato ekaggacittassa ajjhattaṁ susamāhitoti.