[550] 111 Athakho anāthapiṇḍiko gahapati yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi
ekamantaṁ nisinnaṁ kho anāthapiṇḍikaṁ gahapatiṁ bhagavā etadavoca citte
gahapati byāpanne kāyakammampi byāpannaṁ hoti vacīkammampi byāpannaṁ
hoti manokammampi byāpannaṁ hoti tassa byāpannakāyakammassa
byāpannavacīkammassa byāpannamanokammassa na bhaddakaṁ maraṇaṁ hoti
na bhaddikā kālakiriyā seyyathāpi gahapati kūṭāgāre ducchanne kūṭampi
byāpannaṁ hoti gopāṇasiyopi byāpannā honti bhittipi byāpannā
hoti evameva kho gahapati citte byāpanne .pe. Na bhaddakaṁ
maraṇaṁ hoti na bhaddikā kālakiriyā citte gahapati abyāpanne
kāyakammampi abyāpannaṁ hoti vacīkammampi abyāpannaṁ hoti
manokammampi abyāpannaṁ hoti tassa abyāpannakāyakammassa
abyāpannavacīkammassa abyāpannamanokammassa bhaddakaṁ maraṇaṁ hoti
Bhaddikā kālakiriyā seyyathāpi gahapati kūṭāgāre succhanne kūṭampi
abyāpannaṁ hoti gopāṇasiyopi abyāpannā honti bhittipi
abyāpannā hoti evameva kho gahapati citte abyāpanne .pe.
Bhaddakaṁ maraṇaṁ hoti bhaddikā kālakiriyāti.

[551] 112 Tīṇīmāni bhikkhave nidānāni kammānaṁ samudayāya
katamāni tīṇi lobho nidānaṁ kammānaṁ samudayāya doso nidānaṁ
kammānaṁ samudayāya moho nidānaṁ kammānaṁ samudayāya. Yaṁ bhikkhave
lobhapakataṁ kammaṁ lobhajaṁ lobhanidānaṁ lobhasamudayaṁ taṁ kammaṁ akusalaṁ
taṁ kammaṁ sāvajjaṁ taṁ kammaṁ dukkhavipākaṁ taṁ kammaṁ kammasamudayāya
saṁvattati na taṁ kammaṁ kammanirodhāya saṁvattati. Yaṁ bhikkhave dosapakataṁ
kammaṁ dosajaṁ dosanidānaṁ dosasamudayaṁ taṁ kammaṁ akusalaṁ taṁ kammaṁ
sāvajjaṁ taṁ kammaṁ dukkhavipākaṁ taṁ kammaṁ kammasamudayāya saṁvattati
na taṁ kammaṁ kammanirodhāya saṁvattati. Yaṁ bhikkhave mohapakataṁ kammaṁ
mohajaṁ mohanidānaṁ mohasamudayaṁ taṁ kammaṁ akusalaṁ taṁ kammaṁ sāvajjaṁ
taṁ kammaṁ dukkhavipākaṁ taṁ kammaṁ kammasamudayāya saṁvattati na taṁ
kammaṁ kammanirodhāya saṁvattati. Imāni kho bhikkhave tīṇi nidānāni
kammānaṁ samudayāya. Tīṇīmāni bhikkhave nidānāni kammānaṁ samudayāya
katamāni tīṇi alobho nidānaṁ kammānaṁ samudayāya adoso nidānaṁ
kammānaṁ samudayāya amoho nidānaṁ kammānaṁ samudayāya. Yaṁ bhikkhave
alobhapakataṁ kammaṁ alobhajaṁ alobhanidānaṁ alobhasamudayaṁ taṁ kammaṁ kusalaṁ
Taṁ kammaṁ anavajjaṁ taṁ kammaṁ sukhavipākaṁ taṁ kammaṁ kammanirodhāya
saṁvattati na taṁ kammaṁ kammasamudayāya saṁvattati. Yaṁ bhikkhave adosapakataṁ
kammaṁ adosajaṁ adosanidānaṁ adosasamudayaṁ taṁ kammaṁ kusalaṁ taṁ
kammaṁ anavajjaṁ taṁ kammaṁ sukhavipākaṁ taṁ kammaṁ kammanirodhāya
saṁvattati na taṁ kammaṁ kammasamudayāya saṁvattati. Yaṁ bhikkhave
amohapakataṁ kammaṁ amohajaṁ amohanidānaṁ amohasamudayaṁ taṁ kammaṁ kusalaṁ
taṁ kammaṁ anavajjaṁ taṁ kammaṁ sukhavipākaṁ taṁ kammaṁ kammanirodhāya
saṁvattati na taṁ kammaṁ kammasamudayāya saṁvattati. Imāni kho bhikkhave
tīṇi nidānāni kammānaṁ samudayāyāti.

[552] 113 Tīṇīmāni bhikkhave nidānāni kammānaṁ samudayāya
katamāni tīṇi atīte bhikkhave chandarāgaṭṭhāniye dhamme ārabbha chando
jāyati anāgate bhikkhave chandarāgaṭṭhāniye dhamme ārabbha chando
jāyati paccuppanne bhikkhave chandarāgaṭṭhāniye dhamme ārabbha chando
jāyati. Kathañca bhikkhave atīte chandarāgaṭṭhāniye dhamme ārabbha
chando jāyati atīte bhikkhave chandarāgaṭṭhāniye dhamme ārabbha
cetasā anuvitakketi anuvicāreti tassa atīte chandarāgaṭṭhāniye
dhamme ārabbha cetasā anuvitakkayato anuvicārayato chando jāyati
chandajāto tehi dhammehi saṁyutto hoti etāhaṁ 1 bhikkhave saññojanaṁ
vadāmi yo 2 cetaso sārāgo evaṁ kho bhikkhave atīte chandarāgaṭṭhāniye
dhamme ārabbha chando jāyati. Kathañca bhikkhave anāgate
1 Ma. etamahaṁ. ito paraṁ īdisameva. 2 Yu. so. ito paraṁ īdisameva.
Chandarāgaṭṭhāniye dhamme ārabbha chando jāyati anāgate bhikkhave
chandarāgaṭṭhāniye dhamme ārabbha cetasā anuvitakketi anuvicāreti
tassa anāgate chandarāgaṭṭhāniye dhamme ārabbha cetasā anuvitakkayato
anuvicārayato chando jāyati chandajāto tehi dhammehi saṁyutto hoti
etāhaṁ bhikkhave saññojanaṁ vadāmi yo cetaso sārāgo evaṁ
kho bhikkhave anāgate chandarāgaṭṭhāniye dhamme ārabbha chando jāyati.
Kathañca bhikkhave paccuppanne chandarāgaṭṭhāniye dhamme ārabbha chando
jāyati paccuppanne bhikkhave chandarāgaṭṭhāniye dhamme ārabbha
cetasā anuvitakketi anuvicāreti tassa paccuppanne chandarāgaṭṭhāniye
dhamme ārabbha cetasā anuvitakkayato anuvicārayato chando jāyati
chandajāto tehi dhammehi saṁyutto hoti etāhaṁ bhikkhave saññojanaṁ
vadāmi yo cetaso sārāgo evaṁ kho bhikkhave paccuppanne
chandarāgaṭṭhāniye dhamme ārabbha chando jāyati. Imāni kho bhikkhave
tīṇi nidānāni kammānaṁ samudayāya. Tīṇīmāni bhikkhave nidānāni
kammānaṁ samudayāya katamāni tīṇi atīte bhikkhave chandarāgaṭṭhāniye
dhamme ārabbha chando na jāyati anāgate bhikkhave chandarāgaṭṭhāniye
dhamme ārabbha chando na jāyati paccuppanne bhikkhave chandarāgaṭṭhāniye
dhamme ārabbha chando na jāyati. Kathañca bhikkhave atīte
chandarāgaṭṭhāniye dhamme ārabbha chando na jāyati atītānaṁ
bhikkhave chandarāgaṭṭhāniyānaṁ dhammānaṁ āyatiṁ vipākaṁ pajānāti āyatiṁ
Vipākaṁ viditvā tadabhinivajjeti 1 tadabhinivajjetvā 2 cetasā
abhivirājetvā 3 paññāya ativijjha passati evaṁ kho bhikkhave atīte
chandarāgaṭṭhāniye dhamme ārabbha chando na jāyati. Kathañca bhikkhave anāgate
chandarāgaṭṭhāniye dhamme ārabbha chando na jāyati anāgatānaṁ bhikkhave
chandarāgaṭṭhāniyānaṁ dhammānaṁ āyatiṁ vipākaṁ pajānāti āyatiṁ vipākaṁ
viditvā tadabhinivajjeti tadabhinivajjetvā cetasā abhivirājetvā
paññāya ativijjha passati evaṁ kho bhikkhave anāgate chandarāgaṭṭhāniye
dhamme ārabbha chando na jāyati. Kathañca bhikkhave paccuppanne
chandarāgaṭṭhāniye dhamme ārabbha chando na jāyati paccuppannānaṁ
bhikkhave chandarāgaṭṭhāniyānaṁ dhammānaṁ āyatiṁ vipākaṁ pajānāti
āyatiṁ vipākaṁ viditvā tadabhinivajjeti tadabhinivajjetvā cetasā
abhivirājetvā paññāya ativijjha passati evaṁ kho bhikkhave
paccuppanne chandarāgaṭṭhāniye dhamme ārabbha chando na jāyati.
Imāni kho bhikkhave nidānāni kammānaṁ samudayāyāti.
Sambodhivaggo paṭhamo.
Tassuddānaṁ
pubbe manusse assādo samaṇo roṇapañcamaṁ
atittā dve ca kūṭāni nidānā apare duveti.
------------
1 Ma. tadabhinivatteti. Yu. tadabhinivaddheti. 2 Ma. tadabhinivattetvā.
Yu. tadabhinivaddhetvā. 3 Ma. abhinivijjhitvā.
Āpāyikavaggo dutiyo

[553] 114 Tayome bhikkhave āpāyikā nerayikā idamappahāya
katame tayo yo ca abrahmacārī abrahmacāripaṭiñño yo ca suddhabrahmacāriṁ
suddhaṁ brahmacariyaṁ carantaṁ amūlakena brahmacariyena anuddhaṁseti yocāyaṁ
evaṁvādī evaṁdiṭṭhi natthi kāmesu dosoti so 1 kāmesu pātabyataṁ
āpajjati ime kho bhikkhave tayo āpāyikā nerayikā idamappahāyāti.

[554] 115 Tiṇṇaṁ bhikkhave pātubhāvo dullabho lokasmiṁ katamesaṁ
tiṇṇaṁ tathāgatassa bhikkhave arahato sammāsambuddhassa pātubhāvo
dullabho lokasmiṁ tathāgatappaveditassa dhammavinayassa desetā puggalo
dullabho lokasmiṁ kataññū katavedī puggalo dullabho lokasmiṁ
imesaṁ kho bhikkhave tiṇṇaṁ pātubhāvo dullabho lokasminti.

[555] 116 Tayome bhikkhave puggalā santo saṁvijjamānā lokasmiṁ
katame tayo suppameyyo duppameyyo appameyyo. Katamo ca
bhikkhave puggalo suppameyyo idha bhikkhave ekacco puggalo uddhato
hoti unnaḷo capalo mukharo vikiṇṇavāco muṭṭhassati asampajāno
asamāhito vibbhantacitto pākatindriyo ayaṁ vuccati bhikkhave puggalo
suppameyyo. Katamo ca bhikkhave puggalo duppameyyo idha bhikkhave
ekacco puggalo anuddhato hoti anunnaḷo acapalo amukharo avikiṇṇavāco
upaṭṭhitassati sampajāno samāhito ekaggacitto saṁvutindriyo
1 Ma. tāya.
Ayaṁ vuccati bhikkhave puggalo duppameyyo. Katamo ca bhikkhave puggalo
appameyyo idha bhikkhave bhikkhu arahaṁ hoti khīṇāsavo ayaṁ vuccati
bhikkhave puggalo appameyyo. Ime kho bhikkhave tayo puggalā
santo saṁvijjamānā lokasminti.

[556] 117 Tayome bhikkhave puggalā santo saṁvijjamānā lokasmiṁ
katame tayo idha bhikkhave ekacco puggalo sabbaso rūpasaññānaṁ
samatikkamā paṭighasaññānaṁ atthaṅgamā nānattasaññānaṁ amanasikārā
ananto ākāsoti ākāsānañcāyatanaṁ upasampajja viharati so tadassādeti
taṁ nikāmeti tena ca vittiṁ āpajjati tattha ṭhito tadadhimutto
tabbahulavihārī aparihīno kālaṁ kurumāno ākāsānañcāyatanūpagānaṁ devānaṁ
sahabyataṁ upapajjati ākāsānañcāyatanūpagānaṁ bhikkhave devānaṁ vīsati
kappasahassāni āyuppamāṇaṁ tattha puthujjano yāvatāyukaṁ ṭhatvā
yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi
gacchati tiracchānayonimpi gacchati pittivisayampi gacchati bhagavato pana
sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ
taṁ sabbaṁ khepetvā tasmiṁyeva bhave parinibbāyati ayaṁ kho bhikkhave
viseso ayaṁ adhippāyaso idaṁ nānākaraṇaṁ sutavato ariyasāvakassa assutavatā
puthujjanena yadidaṁ gatiyā upapattiyā sati. Puna ca paraṁ bhikkhave
idhekacco puggalo sabbaso ākāsānañcāyatanaṁ samatikkamma anantaṁ
viññāṇanti viññāṇañcāyatanaṁ upasampajja viharati so tadassādeti
Taṁ nikāmeti tena ca vittiṁ āpajjati tattha ṭhito tadadhimutto
tabbahulavihārī aparihīno kālaṁ kurumāno viññāṇañcāyatanūpagānaṁ devānaṁ
sahabyataṁ upapajjati viññāṇañcāyatanūpagānaṁ bhikkhave devānaṁ cattāḷīsa
kappasahassāni āyuppamāṇaṁ tattha puthujjano yāvatāyukaṁ ṭhatvā
yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi
gacchati tiracchānayonimpi gacchati pittivisayampi gacchati bhagavato pana
sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ
taṁ sabbaṁ khepetvā tasmiṁyeva bhave parinibbāyati ayaṁ kho bhikkhave
viseso ayaṁ adhippāyaso idaṁ nānākaraṇaṁ sutavato ariyasāvakassa assutavatā
puthujjanena yadidaṁ gatiyā upapattiyā sati. Puna ca paraṁ bhikkhave
idhekacco puggalo sabbaso viññāṇañcāyatanaṁ samatikkamma natthi
kiñcīti ākiñcaññāyatanaṁ upasampajja viharati so tadassādeti taṁ
nikāmeti tena ca vittiṁ āpajjati tattha ṭhito tadadhimutto tabbahulavihārī
aparihīno kālaṁ kurumāno ākiñcaññāyatanūpagānaṁ devānaṁ
sahabyataṁ upapajjati ākiñcaññāyatanūpagānaṁ bhikkhave devānaṁ
saṭṭhī kappasahassāni āyuppamāṇaṁ tattha puthujjano yāvatāyukaṁ ṭhatvā
yāvatakaṁ tesaṁ devānaṁ āyuppamāṇaṁ taṁ sabbaṁ khepetvā nirayampi
gacchati tiracchānayonimpi gacchati pittivisayampi gacchati bhagavato pana
sāvako tattha yāvatāyukaṁ ṭhatvā yāvatakaṁ tesaṁ devānaṁ āyuppamāṇaṁ
taṁ sabbaṁ khepetvā tasmiṁyeva bhave parinibbāyati ayaṁ kho bhikkhave
Viseso ayaṁ adhippāyaso idaṁ nānākaraṇaṁ sutavato ariyasāvakassa
assutavatā puthujjanena yadidaṁ gatiyā upapattiyā sati. Ime kho
bhikkhave tayo puggalā santo saṁvijjamānā lokasminti.

[557] 118 Tisso imā bhikkhave vipattiyo katamā tisso
sīlavipatti cittavipatti diṭṭhivipatti. Katamā ca bhikkhave sīlavipatti
idha bhikkhave ekacco pāṇātipātī hoti adinnādāyī hoti kāmesu
micchācārī hoti musāvādī hoti pisuṇavāco hoti pharusavāco
hoti samphappalāpī hoti ayaṁ vuccati bhikkhave sīlavipatti.
Katamā ca bhikkhave cittavipatti idha bhikkhave ekacco abhijjhālu
hoti byāpannacitto hoti ayaṁ vuccati bhikkhave cittavipatti.
Katamā ca bhikkhave diṭṭhivipatti idha bhikkhave ekacco micchādiṭṭhiko
hoti viparītadassano natthi dinnaṁ natthi yiṭṭhaṁ natthi hutaṁ
natthi sukaṭadukkaṭānaṁ kammānaṁ phalavipāko natthi ayaṁ loko natthi
paro loko natthi mātā natthi pitā natthi sattā opapātikā
natthi loke samaṇabrāhmaṇā sammaggatā sammāpaṭipannā ye imañca
lokaṁ parañca lokaṁ sayaṁ abhiññā sacchikatvā pavedentīti ayaṁ
vuccati bhikkhave diṭṭhivipatti. Sīlavipattihetu vā bhikkhave sattā
kāyassa bhedā parammaraṇā apāyaṁ duggatiṁ vinipātaṁ nirayaṁ upapajjanti
cittavipattihetu vā bhikkhave sattā kāyassa bhedā parammaraṇā apāyaṁ
duggatiṁ vinipātaṁ nirayaṁ upapajjanti diṭṭhivipattihetu vā bhikkhave
Sattā kāyassa bhedā parammaraṇā apāyaṁ duggatiṁ vinipātaṁ nirayaṁ
upapajjanti. Imā kho bhikkhave tisso vipattiyo. Tisso imā
bhikkhave sampadā katamā tisso sīlasampadā cittasampadā diṭṭhisampadā.
Katamā ca bhikkhave sīlasampadā idha bhikkhave ekacco
pāṇātipātā paṭivirato hoti adinnādānā paṭivirato hoti kāmesu
micchācārā paṭivirato hoti musāvādā paṭivirato hoti pisuṇāya
vācāya paṭivirato hoti pharusāya vācāya paṭivirato hoti samphappalāpā
paṭivirato hoti ayaṁ vuccati bhikkhave sīlasampadā. Katamā
ca bhikkhave cittasampadā idha bhikkhave ekacco anabhijjhālu hoti
abyāpannacitto hoti ayaṁ vuccati bhikkhave cittasampadā. Katamā
ca bhikkhave diṭṭhisampadā idha bhikkhave ekacco sammādiṭṭhiko hoti
aviparītadassano atthi dinnaṁ atthi yiṭṭhaṁ atthi hutaṁ atthi
sukaṭadukkaṭānaṁ kammānaṁ phalavipāko atthi ayaṁ loko atthi paro
loko atthi mātā atthi pitā atthi sattā opapātikā
atthi loke samaṇabrāhmaṇā sammaggatā sammāpaṭipannā ye imañca
lokaṁ parañca lokaṁ sayaṁ abhiññā sacchikatvā pavedentīti ayaṁ
vuccati bhikkhave diṭṭhisampadā. Sīlasampadāhetu vā bhikkhave sattā kāyassa
bhedā parammaraṇā sugatiṁ saggaṁ lokaṁ upapajjanti cittasampadāhetu vā
bhikkhave sattā kāyassa bhedā parammaraṇā sugatiṁ saggaṁ lokaṁ upapajjanti
diṭṭhisampadāhetu vā bhikkhave sattā kāyassa bhedā parammaraṇā sugatiṁ
Saggaṁ lokaṁ upapajjanti. Imā kho bhikkhave tisso sampadāti.

[558] 119 Tisso imā bhikkhave vipattiyo katamā tisso
sīlavipatti cittavipatti diṭṭhivipatti. Katamā ca bhikkhave sīlavipatti
idha bhikkhave ekacco pāṇātipātī hoti .pe. Samphappalāpī hoti
ayaṁ vuccati bhikkhave sīlavipatti. Katamā ca bhikkhave cittavipatti
idha bhikkhave ekacco abhijjhālu hoti byāpannacitto hoti ayaṁ
vuccati bhikkhave cittavipatti. Katamā ca bhikkhave diṭṭhivipatti idha
bhikkhave ekacco micchādiṭṭhiko hoti viparītadassano natthi dinnaṁ
natthi yiṭṭhaṁ .pe. Ye imañca lokaṁ parañca lokaṁ sayaṁ abhiññā
sacchikatvā pavedentīti ayaṁ vuccati bhikkhave diṭṭhivipatti. Sīlavipattihetu
vā bhikkhave sattā kāyassa bhedā parammaraṇā apāyaṁ duggatiṁ
vinipātaṁ nirayaṁ upapajjanti cittavipattihetu vā ... Diṭṭhivipattihetu
vā bhikkhave sattā kāyassa bhedā parammaraṇā apāyaṁ duggatiṁ vinipātaṁ
nirayaṁ upapajjanti. Seyyathāpi bhikkhave apaṇṇako maṇi uddhaṁkhitto
yena yeneva patiṭṭhāti supatiṭṭhitaṁyeva patiṭṭhāti evameva kho bhikkhave
sīlavipattihetu vā sattā kāyassa bhedā parammaraṇā apāyaṁ duggatiṁ
vinipātaṁ nirayaṁ upapajjanti cittavipattihetu vā ... Diṭṭhivipattihetu
vā sattā kāyassa bhedā parammaraṇā apāyaṁ duggatiṁ vinipātaṁ nirayaṁ
upapajjanti. Imā kho bhikkhave tisso vipattiyo 1 . Tisso imā
bhikkhave sampadā katamā tisso sīlasampadā cittasampadā diṭṭhisampadā.
1 Ma. vipattiyoti.
Katamā ca bhikkhave sīlasampadā idha bhikkhave ekacco
pāṇātipātā paṭivirato hoti .pe. Samphappalāpā paṭivirato hoti
ayaṁ vuccati bhikkhave sīlasampadā. Katamā ca bhikkhave cittasampadā
idha bhikkhave ekacco anabhijjhālu hoti abyāpannacitto hoti
ayaṁ vuccati bhikkhave cittasampadā. Katamā ca bhikkhave diṭṭhisampadā
idha bhikkhave ekacco sammādiṭṭhiko hoti aviparītadassano atthi
dinnaṁ atthi yiṭṭhaṁ .pe. Ye imañca lokaṁ parañca lokaṁ sayaṁ
abhiññā sacchikatvā pavedentīti ayaṁ vuccati bhikkhave diṭṭhisampadā.
Sīlasampadāhetu vā bhikkhave sattā kāyassa bhedā parammaraṇā sugatiṁ
saggaṁ lokaṁ upapajjanti cittasampadāhetu vā ... Diṭṭhisampadāhetu
vā bhikkhave sattā kāyassa bhedā parammaraṇā sugatiṁ saggaṁ lokaṁ
upapajjanti. Seyyathāpi bhikkhave apaṇṇako maṇi uddhaṁkhitto yena
yeneva patiṭṭhāti supatiṭṭhitaṁyeva patiṭṭhāti evameva kho bhikkhave
sīlasampadāhetu vā sattā kāyassa bhedā parammaraṇā sugatiṁ saggaṁ
lokaṁ upapajjanti cittasampadāhetu vā ... Diṭṭhisampadāhetu vā sattā
kāyassa bhedā parammaraṇā sugatiṁ saggaṁ lokaṁ upapajjanti. Imā
kho bhikkhave tisso sampadāti.

[559] 120 Tisso imā bhikkhave vipattiyo katamā tisso
kammantavipatti ājīvavipatti diṭṭhivipatti. Katamā ca bhikkhave kammantavipatti
idha bhikkhave ekacco pāṇātipātī hoti .pe. Samphappalāpī
Hoti ayaṁ vuccati bhikkhave kammantavipatti. Katamā ca bhikkhave
ājīvavipatti idha bhikkhave ekacco micchāājīvo hoti micchāājīvena
jīvitaṁ kappeti ayaṁ vuccati bhikkhave ājīvavipatti. Katamā ca
bhikkhave diṭṭhivipatti idha bhikkhave ekacco micchādiṭṭhiko hoti
viparītadassano natthi dinnaṁ natthi yiṭṭhaṁ .pe. Ye imañca lokaṁ
parañca lokaṁ sayaṁ abhiññā sacchikatvā pavedentīti ayaṁ vuccati
bhikkhave diṭṭhivipatti. Imā kho bhikkhave tisso vipattiyo. Tisso
imā bhikkhave sampadā katamā tisso kammantasampadā ājīvasampadā
diṭṭhisampadā. Katamā ca bhikkhave kammantasampadā idha bhikkhave
ekacco pāṇātipātā paṭivirato hoti .pe. Samphappalāpā paṭivirato
hoti ayaṁ vuccati bhikkhave kammantasampadā. Katamā ca bhikkhave
ājīvasampadā idha bhikkhave ekacco sammāājīvo hoti sammāājīvena
jīvitaṁ kappeti ayaṁ vuccati bhikkhave ājīvasampadā. Katamā ca
bhikkhave diṭṭhisampadā idha bhikkhave ekacco sammādiṭṭhiko hoti
aviparītadassano atthi dinnaṁ atthi yiṭṭhaṁ .pe. Ye imañca
lokaṁ parañca lokaṁ sayaṁ abhiññā sacchikatvā pavedentīti ayaṁ
vuccati bhikkhave diṭṭhisampadā. Imā kho bhikkhave tisso sampadāti.