[520] 81 Athakho āyasmā ānando yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi ekamantaṁ
nisinno kho āyasmā ānando bhagavantaṁ etadavoca sammukhā metaṁ
bhante bhagavato sutaṁ sammukhā paṭiggahitaṁ bhagavato ānanda sikhissa
abhibhū nāma sāvako brahmaloke ṭhito sahassīlokadhātuṁ sarena
viññāpesīti bhagavā pana bhante arahaṁ sammāsambuddho kīvatakaṁ pahoti
1 Yu. devatāpissa amanussā.
Sarena viññāpetunti. Sāvako so ānanda appameyyā tathāgatāti.
Dutiyampi kho āyasmā ānando bhagavantaṁ etadavoca sammukhā metaṁ
bhante bhagavato sutaṁ sammukhā paṭiggahitaṁ bhagavato ānanda sikhissa
abhibhū nāma sāvako brahmaloke ṭhito sahassīlokadhātuṁ sarena
viññāpesīti bhagavā pana bhante arahaṁ sammāsambuddho kīvatakaṁ pahoti
sarena viññāpetunti. Sāvako so ānanda appameyyā
tathāgatāti. Tatiyampi kho āyasmā ānando bhagavantaṁ etadavoca sammukhā
metaṁ bhante bhagavato sutaṁ sammukhā paṭiggahitaṁ bhagavato ānanda
sikhissa abhibhū nāma sāvako brahmaloke ṭhito sahassīlokadhātuṁ sarena
viññāpesīti bhagavā pana bhante arahaṁ sammāsambuddho kīvatakaṁ
pahoti sarena viññāpetunti. Sutā te ānanda sahassī cūḷanikā
lokadhātūti. Etassa bhagavā kālo etassa sugata kālo yaṁ
bhagavā bhāseyya bhagavato sutvā bhikkhū dhāressantīti. Tenahānanda
suṇāhi sādhukaṁ manasikarohi bhāsissāmīti. Evaṁ bhanteti kho
āyasmā ānando bhagavato paccassosi. Bhagavā etadavoca
yāvatānanda candimasuriyā pariharanti disā bhanti virocanā tāva
sahassadhā loko tasmiṁ 1 sahassaṁ candānaṁ sahassaṁ suriyānaṁ sahassaṁ
sinerupabbatarājānaṁ sahassaṁ jambūdīpānaṁ sahassaṁ aparagoyānaṁ 2 sahassaṁ
uttarakurūnaṁ sahassaṁ pubbavidehānaṁ cattāri mahāsamuddasahassāni
cattāri mahārājasahassāni sahassaṁ cātummahārājikānaṁ sahassaṁ
1 Po. Ma. tasmiṁ sahassadhā loke sahassaṁ candānaṁ. 2 Ma. Yu. aparagoyānānaṁ.
Tāvatiṁsānaṁ sahassaṁ yāmānaṁ sahassaṁ tusitānaṁ sahassaṁ nimmānaratīnaṁ sahassaṁ
paranimmitavasavattīnaṁ sahassaṁ brahmalokānaṁ ayaṁ vuccatānanda sahassī
cūḷanikā lokadhātu yāvatānanda sahassī cūḷanikā lokadhātu tāva
sahassadhā loko ayaṁ vuccatānanda dvisahassī majjhimikā lokadhātu
yāvatānanda dvisahassī majjhimikā lokadhātu tāva sahassadhā loko
ayaṁ vuccatānanda tisahassī mahāsahassī lokadhātu ākaṅkhamāno
ānanda tathāgato tisahassiṁ mahāsahassiṁ lokadhātuṁ sarena viññāpeyya
yāvatā vā 1 pana ākaṅkheyyāti. Yathākathaṁ pana bhante bhagavā
tisahassiṁ mahāsahassiṁ lokadhātuṁ sarena viññāpeyya yāvatā vā pana
ākaṅkheyyāti. Idhānanda tathāgato tisahassiṁ mahāsahassiṁ lokadhātuṁ
obhāsena phareyya yadā te sattā taṁ ālokaṁ sañjāneyyuṁ atha
tathāgato ghosaṁ kareyya saddamanussāveyya evaṁ kho ānanda tathāgato
tisahassiṁ mahāsahassiṁ lokadhātuṁ sarena viññāpeyya yāvatā vā pana
ākaṅkheyyāti. Evaṁ vutte āyasmā ānando āyasmantaṁ udāyiṁ
etadavoca lābhā vata me suladdhaṁ vata me yassa me satthā evaṁmahiddhiko
evaṁ mahānubhāvoti. Evaṁ vutte āyasmā udāyi āyasmantaṁ
ānandaṁ etadavoca kiṁ tuyhettha āvuso ānanda yadi te satthā
evaṁmahiddhiko evaṁmahānubhāvoti. Evaṁ vutte bhagavā āyasmantaṁ udāyiṁ
etadavoca māhevaṁ udāyi sacevaṁ udāyi ānando avītarāgo kālaṁ
kareyya tena cittappasādena sattakkhattuṁ devesu devarajjaṁ kareyya
1 Ma. Yu. vāsaddo natthi.
Sattakkhattuṁ imasmiṁyeva jambūdīpe mahārajjaṁ kāreyya apica udāyi
ānando diṭṭheva dhamme parinibbāyissatīti.
Ānandavaggo tatiyo.
Tassuddānaṁ
channo ājīvako sakko nigaṇṭhā samādapako
navāpi ca tathā bhavo sīlabbatā gandhā ca cūḷanīti.
---------
Samaṇavaggo catuttho

[521] 82 Tīṇīmāni bhikkhave samaṇassa [1]- samaṇakaraṇīyāni katamāni
tīṇi adhisīlasikkhāsamādānaṁ adhicittasikkhāsamādānaṁ adhipaññāsikkhāsamādānaṁ
imāni kho bhikkhave tīṇi samaṇassa [2]- samaṇakaraṇīyāni.
Tasmā tiha bhikkhave evaṁ sikkhitabbaṁ tibbo no chando bhavissati
adhisīlasikkhāsamādāne tibbo no chando bhavissati adhicittasikkhāsamādāne
tibbo no chando bhavissati adhipaññāsikkhāsamādāneti
evañhi vo bhikkhave sikkhitabbanti.

[522] 83 Seyyathāpi bhikkhave gadrabho gogaṇaṁ piṭṭhito piṭṭhito
anubaddho 3 hoti ahampi 4 amhā ahampi amhāti tassa na tādiso
vaṇṇo hoti seyyathāpi gunnaṁ na tādiso saro hoti seyyathāpi
gunnaṁ na tādisaṁ padaṁ hoti seyyathāpi gunnaṁ so gogaṇaṁyeva
piṭṭhito piṭṭhito anubaddho hoti ahampi amhā ahampi amhāti.
1-2 Ma. samaṇiyāni. 3 Po. Ma. anubandho. 4 Po. ahampi ammā ahampi
ammā. Ma. ahampi dammo ahampi dammo.
Evameva kho bhikkhave idhekacco bhikkhu bhikkhusaṅghaṁ piṭṭhito piṭṭhito
anubaddho hoti ahampi bhikkhu ahampi bhikkhūti tassa na tādiso
chando hoti adhisīlasikkhāsamādāne seyyathāpi aññesaṁ bhikkhūnaṁ na
tādiso chando hoti adhicittasikkhāsamādāne seyyathāpi aññesaṁ
bhikkhūnaṁ na tādiso chando hoti adhipaññāsikkhāsamādāne seyyathāpi
aññesaṁ bhikkhūnaṁ so bhikkhusaṅghaṁyeva piṭṭhito piṭṭhito anubaddho
hoti ahampi bhikkhu ahampi bhikkhūti. Tasmā tiha bhikkhave evaṁ
sikkhitabbaṁ tibbo no chando bhavissati adhisīlasikkhāsamādāne tibbo
no chando bhavissati adhicittasikkhāsamādāne tibbo no chando bhavissati
adhipaññāsikkhāsamādāneti evañhi vo bhikkhave sikkhitabbanti.

[523] 84 Tīṇīmāni bhikkhave kassakassa gahapatissa pubbe
karaṇīyāni katamāni tīṇi idha bhikkhave kassako gahapati paṭikacceva
khettaṁ sukaṭṭhaṁ karoti sumatikataṁ paṭikacceva khettaṁ sukaṭṭhaṁ karitvā
sumatikataṁ kālena bījāni patiṭṭhāpeti kālena bījāni patiṭṭhāpetvā
samayena udakaṁ abhinetipi apanetipi imāni kho bhikkhave tīṇi
kassakassa gahapatissa pubbe karaṇīyāni. Evameva kho bhikkhave tīṇīmāni
bhikkhussa pubbe karaṇīyāni katamāni tīṇi adhisīlasikkhāsamādānaṁ
adhicittasikkhāsamādānaṁ adhipaññāsikkhāsamādānaṁ imāni kho bhikkhave
tīṇi bhikkhussa pubbe karaṇīyāni. Tasmā tiha bhikkhave evaṁ
sikkhitabbaṁ tibbo no chando bhavissati adhisīlasikkhāsamādāne
Tibbo no chando bhavissati adhicittasikkhāsamādāne tibbo no
chando bhavissati adhipaññāsikkhāsamādāneti evañhi vo bhikkhave
sikkhitabbanti.

[524] 85 Ekaṁ samayaṁ bhagavā vesāliyaṁ viharati mahāvane
kūṭāgārasālāyaṁ. Athakho aññataro vajjiputtako bhikkhu yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi
ekamantaṁ nisinno kho so vajjiputtako bhikkhu bhagavantaṁ etadavoca
sādhikamidaṁ bhante diyaḍḍhasikkhāpadasataṁ anvaḍḍhamāsaṁ uddesaṁ āgacchati
nāhaṁ bhante ettha sakkomi 1 sikkhitunti. Sakkhasi 2 pana tvaṁ bhikkhu tīsu
sikkhāsu sikkhituṁ adhisīlasikkhāya adhicittasikkhāya adhipaññāsikkhāyāti.
Sakkomahaṁ bhante tīsu sikkhāsu sikkhituṁ adhisīlasikkhāya adhicittasikkhāya
adhipaññāsikkhāyāti. Tasmā tiha tvaṁ bhikkhu tīsu sikkhāsu sikkhassu
adhisīlasikkhāya adhicittasikkhāya adhipaññāsikkhāya yato kho tvaṁ bhikkhu
adhisīlampi sikkhissasi adhicittampi sikkhissasi adhipaññampi sikkhissasi
tassa 3 tuyhaṁ [4]- adhisīlampi sikkhato adhicittampi sikkhato adhipaññampi
sikkhato rāgo pahīyissati doso pahīyissati moho pahīyissati
so tvaṁ rāgassa pahānā dosassa pahānā mohassa pahānā yaṁ
akusalaṁ taṁ na karissasi yaṁ pāpaṁ taṁ 5 na sevissasīti. Athakho so
bhikkhu aparena samayena adhisīlampi sikkhi adhicittampi sikkhi
adhipaññampi sikkhi. Tassa adhisīlampi sikkhato adhicittampi sikkhato
1 Po. sakkhissāmi. 2 Po. Ma. sakkhissasi. 3 Yu. tasmā. 4 Po. Ma. Yu.
bhikkhu. 5 Yu. tvaṁ.
Adhipaññampi sikkhato rāgo pahīyi doso pahīyi moho pahīyi
so rāgassa pahānā dosassa pahānā mohassa pahānā yaṁ akusalaṁ
taṁ nākāsi yaṁ pāpaṁ taṁ na sevīti.

[525] 86 Athakho aññataro bhikkhu yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi ekamantaṁ
nisinno kho so bhikkhu bhagavantaṁ etadavoca sekho sekhoti bhante
vuccati kittāvatā nu kho bhante sekho hotīti. Sikkhatīti kho
bhikkhu tasmā sekhoti vuccati kiñca sikkhati. Adhisīlampi sikkhati
adhicittampi sikkhati adhipaññampi sikkhati sikkhatīti [1]- kho bhikkhu
tasmā sekhoti vuccatīti.
Sekhassa sikkhamānassa ujumaggānusārino
khayasmiṁ paṭhamaṁ ñāṇaṁ tato aññā anantarā
tato aññāvimuttassa 2 ñāṇaṁ ve hoti tādino
akuppā me vimuttīti bhavasaññojanakkhayeti.

[526] 87 Sādhikamidaṁ bhikkhave diyaḍḍhasikkhāpadasataṁ anvaḍḍhamāsaṁ
uddesaṁ āgacchati yattha atthakāmā kulaputtā sikkhanti. Tisso
imā bhikkhave sikkhā yatthetaṁ sabbaṁ samodhānaṁ gacchati katamā
tisso adhisīlasikkhā adhicittasikkhā adhipaññāsikkhā imā kho
bhikkhave tisso sikkhā yatthetaṁ sabbaṁ samodhānaṁ gacchati. Idha
bhikkhave bhikkhu sīlesu paripūrakārī hoti samādhismiṁ mattasokārī
1 Yu. so. 2 Po. aññaṁ vimuttassa.
Paññāya mattasokārī so yāni tāni khuddānukhuddakāni sikkhāpadāni
tāni āpajjatipi vuṭṭhātipi taṁ kissa hetu na hi mettha bhikkhave
abhabbatā vuttā yāni ca kho tāni sikkhāpadāni ādibrahmacariyakāni
brahmacariyasāruppāni tattha dhuvasīlo ca hoti ṭhitasīlo ca samādāya
sikkhati sikkhāpadesu so tiṇṇaṁ saññojanānaṁ parikkhayā sotāpanno
hoti avinipātadhammo niyato sambodhiparāyano. Idha pana bhikkhave
bhikkhu sīlesu paripūrakārī hoti samādhismiṁ mattasokārī paññāya
mattasokārī so yāni tāni khuddānukhuddakāni sikkhāpadāni tāni
āpajjatipi vuṭṭhātipi taṁ kissa hetu na hi mettha bhikkhave
abhabbatā vuttā yāni ca kho tāni sikkhāpadāni ādibrahmacariyakāni
brahmacariyasāruppāni tattha dhuvasīlo ca hoti ṭhitasīlo ca samādāya
sikkhati sikkhāpadesu so tiṇṇaṁ saññojanānaṁ parikkhayā rāgadosamohānaṁ
tanuttā sakadāgāmī hoti sakideva imaṁ lokaṁ āgantvā
dukkhassantaṁ karoti. Idha pana bhikkhave bhikkhu sīlesu paripūrakārī hoti
samādhismiṁ paripūrakārī paññāya mattasokārī so yāni tāni
khuddānukhuddakāni sikkhāpadāni tāni āpajjatipi vuṭṭhātipi taṁ kissa
hetu na hi mettha bhikkhave abhabbatā vuttā yāni ca kho tāni
sikkhāpadāni ādibrahmacariyakāni brahmacariyasāruppāni tattha dhuvasīlo
ca hoti ṭhitasīlo ca samādāya sikkhati sikkhāpadesu so pañcannaṁ
orambhāgiyānaṁ saññojanānaṁ parikkhayā opapātiko hoti tatthaparinibbāyī
Anāvattidhammo tasmā lokā. Idha pana bhikkhave bhikkhu sīlesu
paripūrakārī hoti samādhismiṁ paripūrakārī paññāya paripūrakārī so
yāni tāni khuddānukhuddakāni sikkhāpadāni tāni āpajjatipi vuṭṭhātipi
taṁ kissa hetu na hi mettha bhikkhave abhabbatā vuttā yāni
ca kho tāni sikkhāpadāni ādibrahmacariyakāni brahmacariyasāruppāni
tattha dhuvasīlo ca hoti ṭhitasīlo ca samādāya sikkhati sikkhāpadesu
so āsavānaṁ khayā anāsavaṁ cetovimuttiṁ paññāvimuttiṁ diṭṭheva
dhamme sayaṁ abhiññā sacchikatvā upasampajja viharati iti kho
bhikkhave padesaṁ padesakārī ārādheti paripūraṁ paripūrakārī
avañjhānitvevāhaṁ 1 bhikkhave sikkhāpadāni vadāmīti.

[527] 88 Sādhikamidaṁ bhikkhave diyaḍḍhasikkhāpadasataṁ anvaḍḍhamāsaṁ
uddesaṁ āgacchati yattha atthakāmā kulaputtā sikkhanti. Tisso
imā bhikkhave sikkhā yatthetaṁ sabbaṁ samodhānaṁ gacchati katamā
tisso adhisīlasikkhā adhicittasikkhā adhipaññāsikkhā imā kho
bhikkhave tisso sikkhā yatthetaṁ sabbaṁ samodhānaṁ gacchati. Idha
bhikkhave bhikkhu sīlesu paripūrakārī hoti samādhismiṁ mattasokārī paññāya
mattasokārī so yāni tāni khuddānukhuddakāni sikkhāpadāni tāni
āpajjatipi vuṭṭhātipi taṁ kissa hetu na hi mettha bhikkhave
abhabbatā vuttā yāni ca kho tāni sikkhāpadāni ādibrahmacariyakāni
brahmacariyasāruppāni tattha dhuvasīlo ca hoti ṭhitasīlo ca samādāya
1 Po. Yu. avajjhāni .... ito paraṁ īdisameva.
Sikkhati sikkhāpadesu so tiṇṇaṁ saññojanānaṁ parikkhayā
sattakkhattuparamo hoti sattakkhattuparamaṁ deve ca manusse ca sandhāvitvā
saṁsaritvā dukkhassantaṁ karoti so tiṇṇaṁ saññojanānaṁ parikkhayā
kolaṁkolo hoti dve vā tīṇi vā kulāni sandhāvitvā saṁsaritvā
dukkhassantaṁ karoti so tiṇṇaṁ saññojanānaṁ parikkhayā ekabījī
hoti ekaṁyeva mānusakaṁ bhavaṁ nibbattetvā dukkhassantaṁ karoti so
tiṇṇaṁ saññojanānaṁ parikkhayā rāgadosamohānaṁ tanuttā sakadāgāmī
hoti sakideva imaṁ lokaṁ āgantvā dukkhassantaṁ karoti. Idha pana
bhikkhave bhikkhu sīlesu paripūrakārī hoti samādhismiṁ paripūrakārī paññāya
mattasokārī so yāni tāni khuddānukhuddakāni sikkhāpadāni tāni
āpajjatipi vuṭṭhātipi taṁ kissa hetu na hi mettha bhikkhave
abhabbatā vuttā yāni ca kho tāni sikkhāpadāni ādibrahmacariyakāni
brahmacariyasāruppāni tattha dhuvasīlo ca hoti ṭhitasīlo ca samādāya
sikkhati sikkhāpadesu so pañcannaṁ orambhāgiyānaṁ saññojanānaṁ parikkhayā
uddhaṁsoto hoti akaniṭṭhagāmī so pañcannaṁ orambhāgiyānaṁ
saññojanānaṁ parikkhayā sasaṅkhāraparinibbāyī hoti so pañcannaṁ
orambhāgiyānaṁ saññojanānaṁ parikkhayā asaṅkhāraparinibbāyī hoti so
pañcannaṁ orambhāgiyānaṁ saññojanānaṁ parikkhayā upahaccaparinibbāyī hoti
so pañcannaṁ orambhāgiyānaṁ saññojanānaṁ parikkhayā antarāparinibbāyī
hoti. Idha pana bhikkhave bhikkhu sīlesu paripūrakārī hoti samādhismiṁ
Paripūrakārī paññāya paripūrakārī so yāni tāni khuddānukhuddakāni
sikkhāpadāni tāni āpajjatipi vuṭṭhātipi taṁ kissa hetu na hi
mettha bhikkhave abhabbatā vuttā yāni ca kho tāni sikkhāpadāni
ādibrahmacariyakāni brahmacariyasāruppāni tattha dhuvasīlo ca hoti
ṭhitasīlo ca samādāya sikkhati sikkhāpadesu so āsavānaṁ khayā
anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā
sacchikatvā upasampajja viharati iti kho bhikkhave padesaṁ padesakārī
ārādheti paripūraṁ paripūrakārī avañjhānitvevāhaṁ bhikkhave sikkhāpadāni
vadāmīti.

[528] 89 Sādhikamidaṁ bhikkhave diyaḍḍhasikkhāpadasataṁ anvaḍḍhamāsaṁ
uddesaṁ āgacchati yattha atthakāmā kulaputtā sikkhanti. Tisso
imā bhikkhave sikkhā yatthetaṁ sabbaṁ samodhānaṁ gacchati katamā
tisso adhisīlasikkhā adhicittasikkhā adhipaññāsikkhā imā kho
bhikkhave tisso sikkhā yatthetaṁ sabbaṁ samodhānaṁ gacchati. Idha
bhikkhave bhikkhu sīlesu paripūrakārī hoti samādhismiṁ paripūrakārī paññāya
paripūrakārī so yāni tāni khuddānukhuddakāni sikkhāpadāni tāni
āpajjatipi vuṭṭhātipi taṁ kissa hetu na hi mettha bhikkhave
abhabbatā vuttā yāni ca kho tāni sikkhāpadāni ādibrahmacariyakāni
brahmacariyasāruppāni tattha dhuvasīlo ca hoti ṭhitasīlo ca samādāya
sikkhati sikkhāpadesu so āsavānaṁ khayā anāsavaṁ cetovimuttiṁ
Paññāvimuttiṁ diṭṭheva dhamme sayaṁ abhiññā sacchikatvā upasampajja
viharati taṁ vā pana anabhisambhavaṁ appaṭivijjhaṁ pañcannaṁ orambhāgiyānaṁ
saññojanānaṁ parikkhayā antarāparinibbāyī hoti taṁ vā pana
anabhisambhavaṁ appaṭivijjhaṁ pañcannaṁ orambhāgiyānaṁ saññojanānaṁ parikkhayā
upahaccaparinibbāyī hoti taṁ vā pana anabhisambhavaṁ appaṭivijjhaṁ
pañcannaṁ orambhāgiyānaṁ saññojanānaṁ parikkhayā asaṅkhāraparinibbāyī
hoti. Taṁ vā pana anabhisambhavaṁ appaṭivijjhaṁ pañcannaṁ orambhāgiyānaṁ
saññojanānaṁ parikkhayā sasaṅkhāraparinibbāyī hoti taṁ vā pana
anabhisambhavaṁ appaṭivijjhaṁ pañcannaṁ orambhāgiyānaṁ saññojanānaṁ parikkhayā
uddhaṁsoto hoti akaniṭṭhagāmī taṁ vā pana anabhisambhavaṁ appaṭivijjhaṁ
tiṇṇaṁ saññojanānaṁ parikkhayā rāgadosamohānaṁ tanuttā sakadāgāmī
hoti sakideva imaṁ lokaṁ āgantvā dukkhassantaṁ karoti taṁ vā pana
anabhisambhavaṁ appaṭivijjhaṁ tiṇṇaṁ saññojanānaṁ parikkhayā ekabījī
hoti ekaṁyeva mānusakaṁ bhavaṁ nibbattetvā dukkhassantaṁ karoti taṁ
vā pana anabhisambhavaṁ appaṭivijjhaṁ tiṇṇaṁ saññojanānaṁ parikkhayā
kolaṁkolo hoti dve vā tīṇi vā kulāni sandhāvitvā saṁsaritvā
dukkhassantaṁ karoti taṁ vā pana anabhisambhavaṁ appaṭivijjhaṁ tiṇṇaṁ
saññojanānaṁ parikkhayā sattakkhattuparamo hoti sattakkhattuparamaṁ deve
ca mānuse ca sandhāvitvā saṁsaritvā dukkhassantaṁ karoti iti kho
bhikkhave paripūraṁ paripūrakārī ārādheti padesaṁ padesakārī avañjhānitvevāhaṁ
Bhikkhave sikkhāpadāni vadāmīti.

[529] 90 Tisso imā bhikkhave sikkhā katamā tisso adhisīlasikkhā
adhicittasikkhā adhipaññāsikkhā. Katamā ca bhikkhave adhisīlasikkhā
idha bhikkhave bhikkhu sīlavā hoti .pe. Samādāya sikkhati sikkhāpadesu
ayaṁ vuccati bhikkhave adhisīlasikkhā. Katamā ca bhikkhave
adhicittasikkhā idha bhikkhave bhikkhu vivicceva kāmehi .pe.
Catutthaṁ jhānaṁ upasampajja viharati ayaṁ vuccati bhikkhave adhicittasikkhā.
Katamā ca bhikkhave adhipaññāsikkhā idha bhikkhave bhikkhu idaṁ
dukkhanti yathābhūtaṁ pajānāti .pe. Ayaṁ dukkhanirodhagāminī paṭipadāti
yathābhūtaṁ pajānāti ayaṁ vuccati bhikkhave adhipaññāsikkhā. Imā kho
bhikkhave tisso sikkhāti.