[240] Amatantesaṁ bhikkhave pamuṭṭhaṁ yesaṁ kāyagatāsati pamuṭṭhā.
Amatantesaṁ bhikkhave appamuṭṭhaṁ yesaṁ kāyagatāsati appamuṭṭhāti.

[241] Amatantesaṁ bhikkhave anāsevitaṁ yesaṁ kāyagatāsati
anāsevitā. Amatantesaṁ bhikkhave āsevitaṁ yesaṁ kāyagatāsati
āsevitāti.

[242] Amatantesaṁ bhikkhave abhāvitaṁ yesaṁ kāyagatāsati
abhāvitā. Amatantesaṁ bhikkhave bhāvitaṁ yesaṁ kāyagatāsati bhāvitāti.

[243] Amatantesaṁ bhikkhave abahulīkataṁ yesaṁ kāyagatāsati
Abahulīkatā. Amatantesaṁ bhikkhave bahulīkataṁ yesaṁ kāyagatāsati
bahulīkatāti.

[244] Amatantesaṁ bhikkhave anabhiññātaṁ yesaṁ kāyagatāsati
anabhiññātā. Amatantesaṁ bhikkhave abhiññātaṁ yesaṁ kāyagatāsati
abhiññātāti.

[245] Amatantesaṁ bhikkhave apariññātaṁ yesaṁ kāyagatāsati
apariññātā. Amatantesaṁ bhikkhave pariññātaṁ yesaṁ kāyagatāsati
pariññātāti.

[246] Amatantesaṁ bhikkhave asacchikataṁ yesaṁ kāyagatāsati
asacchikatā. Amatantesaṁ bhikkhave sacchikataṁ yesaṁ kāyagatāsati
sacchikatāti. [1]- [2]-
--------------
Ekanipātassa suttasahassaṁ samattaṁ 3 .
1 Ma. idamavo ca bhagavā attamanā te bhikkhū bhagavato bhāsitaṁ abhinandunti.
2 Ma. amatavaggo. 3 Ma. ekakanipātapāli niṭṭhitā.
Suttantapiṭake aṅguttaranikāyassa
dukanipāto
-----
namo tassa bhagavato arahato sammāsambuddhassa.
Paṭhamapaṇṇāsako

[247] 1 Evamme sutaṁ. Ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Tatra kho bhagavā bhikkhū āmantesi
bhikkhavoti. Bhadanteti te bhikkhū bhagavato paccassosuṁ. Bhagavā
etadavoca dvemāni bhikkhave vajjāni katamāni dve diṭṭhadhammikañca
vajjaṁ samparāyikañca vajjaṁ. Katamañca bhikkhave diṭṭhadhammikaṁ vajjaṁ
idha bhikkhave ekacco passati coraṁ āgucāriṁ rājāno gahetvā vividhā
kammakaraṇā 1 karonte kasāhipi tāḷente vettehipi tāḷente
aḍḍhadaṇḍakehipi tāḷente hatthaṁpi chindante pādaṁpi chindante hatthapādaṁpi
chindante kaṇṇaṁpi chindante nāsaṁpi chindante kaṇṇanāsaṁpi chindante
bilaṅgathālikaṁpi karonte saṅkhamuṇḍikaṁpi karonte rāhumukhaṁpi karonte jotimālikaṁpi
karonte hatthappajjotikaṁpi karonte erakavaṭṭikaṁpi karonte
cīrakavāsikaṁpi karonte eṇeyyakaṁpi karonte baḷisamaṁsikaṁpi karonte
kahāpaṇakaṁpi 2 karonte khārāpaṭicchakaṁpi 3 karonte palighaparivattakaṁpi 4
karonte palālapīṭhakaṁpi karonte tattenapi telena osiñcante sunakhehipi
khādāpente jīvantaṁpi sūle uttāsente asināpi sīsaṁ chindante tassa
1 Ma. kammakāraṇā. Po. vividhāni kammakaraṇāni. 2 Ma. kahāpaṇikampi. 3 Ma. Yu.
khārāpaṭicchikampi. 4 Ma. Yu. palighaparivattikampi.
Evaṁ hoti yathārūpānaṁ kho pāpakānaṁ kammānaṁ hetu coraṁ āgucāriṁ
rājāno gahetvā vividhā kammakaraṇā karonti kasāhipi tāḷenti .pe.
Asināpi sīsaṁ chindanti ahañceva kho pana evarūpaṁ pāpakammaṁ kareyyaṁ
maṁpī rājāno gahetvā evarūpā vividhā kammakaraṇā kareyyuṁ kasāhipi
tāḷeyyuṁ .pe. Asināpi sīsaṁ chindeyyunti so diṭṭhadhammikassa vajjassa
bhīto na paresaṁ pābhataṁ palumpanto carati idaṁ vuccati bhikkhave
diṭṭhadhammikaṁ vajjaṁ. Katamañca bhikkhave samparāyikaṁ vajjaṁ idha bhikkhave
ekacco iti paṭisañcikkhati kāyaduccaritassa kho pāpako vipāko
abhisamparāyaṁ vacīduccaritassa kho pāpako vipāko abhisamparāyaṁ manoduccaritassa
kho pāpako vipāko abhisamparāyaṁ ahañceva kho pana
kāyena duccaritaṁ careyyaṁ vācāya duccaritaṁ careyyaṁ manasā duccaritaṁ
careyyaṁ kiñca taṁ yenāhaṁ kāyassa bhedā parammaraṇā apāyaṁ
duggatiṁ vinipātaṁ nirayaṁ upapajjeyyanti so samparāyikassa vajjassa
bhīto kāyaduccaritaṁ pahāya kāyasucaritaṁ bhāveti vacīduccaritaṁ pahāya
vacīsucaritaṁ bhāveti manoduccaritaṁ pahāya manosucaritaṁ bhāveti suddhaṁ
attānaṁ pariharati idaṁ vuccati bhikkhave samparāyikaṁ vajjaṁ. Imāni
kho bhikkhave dve vajjāni. Tasmā tiha bhikkhave evaṁ sikkhitabbaṁ
diṭṭhadhammikassa vajjassa bhāyissāma samparāyikassa vajjassa bhāyissāma
vajjabhīruno bhavissāma vajjabhayadassāvinoti evaṁ hi vo bhikkhave
sikkhitabbaṁ vajjabhīruno bhikkhave vajjabhayadassāvino etaṁ pāṭikaṅkhaṁ yaṁ
Parimuccissati sabbavajjehīti.

[248] 2 Dvemāni bhikkhave padhānāni durabhisambhavāni lokasmiṁ
katamāni dve yañca gihīnaṁ agāraṁ ajjhāvasataṁ cīvarapiṇḍapātasenāsana-
gilānapaccayabhesajjaparikkhārānuppādanatthaṁ padhānaṁ yañca agārasmā
anagāriyaṁ pabbajitānaṁ sabbūpadhipaṭinissaggatthaṁ padhānaṁ imāni kho
bhikkhave dve padhānāni durabhisambhavāni lokasmiṁ etadaggaṁ bhikkhave
imesaṁ dvinnaṁ padhānānaṁ yadidaṁ sabbūpadhipaṭinissaggatthaṁ padhānaṁ.
Tasmā tiha bhikkhava evaṁ sikkhitabbaṁ sabbūpadhipaṭinissaggatthaṁ padhānaṁ
padahissāmāti evaṁ hi vo bhikkhave sikkhitabbanti.

[249] 3 Dveme bhikkhave dhammā tapanīyā katame dve idha
bhikkhave ekaccassa kāyaduccaritaṁ kataṁ hoti akataṁ hoti kāyasucaritaṁ
vacīduccaritaṁ kataṁ hoti akataṁ hoti vacīsucaritaṁ manoduccaritaṁ kataṁ hoti
akataṁ hoti manosucaritaṁ so kāyaduccaritaṁ me katanti tappati akataṁ
me kāyasucaritanti tappati vacīduccaritaṁ me katanti tappati akataṁ
me vacīsucaritanti tappati manoduccaritaṁ me katanti tappati akataṁ
me manosucaritanti tappati ime kho bhikkhave dve dhammā tapanīyāti.