[632] Yo panāti yo yādiso .pe. Bhikkhūti .pe.
Ayaṁ imasmiṁ atthe adhippeto bhikkhūti. Sañciccāti jānanto
sañjānanto cecca abhivitaritvā vītikkamo. Pāṇo nāma tiracchānagatapāṇo
vuccati. Jīvitā voropeyyāti jīvitindriyaṁ upacchindati
1 Ma. vijjhitvā.
Uparodheti santatiṁ vikopeti āpatti pācittiyassa.

[633] Pāṇe pāṇasaññī jīvitā voropeti āpatti
pācittiyassa. Pāṇe vematiko jīvitā voropeti āpatti dukkaṭassa.
Pāṇe appāṇasaññī jīvitā voropeti anāpatti. Appāṇe
pāṇasaññī āpatti dukkaṭassa. Appāṇe vematiko āpatti
dukkaṭassa. Appāṇe appāṇasaññī anāpatti.

[634] Anāpatti asañcicca asatiyā ajānantassa
namaraṇādhippāyassa ummattakassa ādikammikassāti.
Paṭhamasikkhāpadaṁ niṭṭhitaṁ.
---------
1 Ma. assatiyā.
Dutiyasikkhāpadaṁ

[635] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū jānaṁ sappāṇakaṁ udakaṁ paribhuñjanti. Ye te bhikkhū
appicchā .pe. Te ujjhāyanti khīyanti vipācenti kathaṁ hi
nāma chabbaggiyā bhikkhū jānaṁ sappāṇakaṁ udakaṁ paribhuñjissantīti
.pe. Saccaṁ kira tumhe bhikkhave jānaṁ sappāṇakaṁ udakaṁ
paribhuñjathāti. Saccaṁ bhagavāti. Vigarahi buddho bhagavā kathaṁ hi
nāma tumhe moghapurisā jānaṁ sappāṇakaṁ udakaṁ paribhuñjissatha
netaṁ moghapurisā appasannānaṁ vā pasādāya pasannānaṁ vā
bhiyyobhāvāya .pe. Evañca pana bhikkhave imaṁ sikkhāpadaṁ uddiseyyātha
yo pana bhikkhu jānaṁ sappāṇakaṁ udakaṁ paribhuñjeyya pācittiyanti.

[636] Yo panāti yo yādiso .pe. Bhikkhūti .pe.
Ayaṁ imasmiṁ atthe adhippeto bhikkhūti. Jānāti nāma sāmaṁ
vā jānāti aññe vā tassa ārocenti. Sappāṇakanti
jānanto paribhogena marissantīti jānanto paribhuñjati āpatti
pācittiyassa.

[637] Sappāṇake sappāṇakasaññī paribhuñjati āpatti
pācittiyassa. Sappāṇake vematiko paribhuñjati āpatti
Dukkaṭassa. Sappāṇake appāṇakasaññī paribhuñjati anāpatti.
Appāṇake sappāṇakasaññī āpatti dukkaṭassa. Appāṇake
vematiko āpatti dukkaṭassa. Appāṇake appāṇakasaññī
anāpatti.

[638] Anāpatti sappāṇakanti ajānanto appāṇakanti
jānanto paribhogena na marissantīti jānanto paribhuñjati
ummattakassa ādikammikassāti.
Dutiyasikkhāpadaṁ niṭṭhitaṁ.
-------
Tatiyasikkhāpadaṁ

[639] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū jānaṁ yathādhammaṁ nīhatādhikaraṇaṁ punakammāya ukkoṭenti akataṁ
kammaṁ dukkaṭaṁ kammaṁ puna kātabbaṁ kammaṁ anīhataṁ dunnīhataṁ puna
nīhanitabbanti. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma chabbaggiyā bhikkhū jānaṁ yathādhammaṁ
nīhatādhikaraṇaṁ punakammāya ukkoṭessantīti .pe. Saccaṁ kira tumhe
bhikkhave jānaṁ yathādhammaṁ nīhatādhikaraṇaṁ punakammāya ukkoṭethāti.
Saccaṁ bhagavāti. Vigarahi buddho bhagavā kathaṁ hi nāma tumhe
moghapurisā jānaṁ yathādhammaṁ nīhatādhikaraṇaṁ punakammāya ukkoṭessatha
netaṁ moghapurisā appasannānaṁ vā pasādāya pasannānaṁ vā
bhiyyobhāvāya .pe. Evañca pana bhikkhave imaṁ sikkhāpadaṁ
uddiseyyātha yo pana bhikkhu jānaṁ yathādhammaṁ nīhatādhikaraṇaṁ
punakammāya ukkoṭeyya pācittiyanti.

[640] Yo panāti yo yādiso .pe. Bhikkhūti .pe.
Ayaṁ imasmiṁ atthe adhippeto bhikkhūti. Jānāti nāma sāmaṁ
vā jānāti aññe vā tassa ārocenti so vā āroceti.
Yathādhammaṁ nāma dhammena vinayena satthu sāsanena kataṁ etaṁ
yathādhammaṁ nāma.

[641] Adhikaraṇaṁ nāma cattāri adhikaraṇāni vivādādhikaraṇaṁ
anuvādādhikaraṇaṁ āpattādhikaraṇaṁ kiccādhikaraṇaṁ. Punakammāya
ukkoṭeyyāti akataṁ kammaṁ dukkaṭaṁ kammaṁ puna kātabbaṁ kammaṁ anīhataṁ
dunnīhataṁ puna nīhanitabbanti ukkoṭeti āpatti pācittiyassa.