[612] Tena kho pana samayena bhikkhū gilānā honti.
Gilānapucchakā bhikkhū gilāne bhikkhū etadavocuṁ kaccāvuso khamanīyaṁ
1 orenaddhamāsantipi pāṭhā.
Kacci yāpanīyanti. Pubbe mayaṁ āvuso orenaḍḍhamāsaṁ nhāyāma
tena no phāsu hoti idāni pana bhagavatā paṭikkhittanti
kukkuccāyantā na nhāyāma tena no na phāsu hotīti.
Bhagavato etamatthaṁ ārocesuṁ. Anujānāmi bhikkhave gilānena bhikkhunā
orenaḍḍhamāsaṁ nhāyituṁ evañca pana bhikkhave imaṁ sikkhāpadaṁ
uddiseyyātha yo pana bhikkhu orenaḍḍhamāsaṁ nhāyeyya aññatra
samayā pācittiyaṁ. Tatthāyaṁ samayo diyaḍḍho māso seso
gimhānanti vassānassa paṭhamo māso iccete aḍḍhateyyamāsā
uṇhasamayo pariḷāhasamayo gilānasamayo ayaṁ tattha samayoti.
Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[613] Tena kho pana samayena bhikkhū navakammaṁ katvā
kukkuccāyantā na nhāyanti [1]- sedagatena gattena sayanti. Cīvaraṁpi
senāsanaṁpi dussati. Bhagavato etamatthaṁ ārocesuṁ. Anujānāmi
bhikkhave kammasamaye orenaḍḍhamāsaṁ nhāyituṁ evañca pana bhikkhave
imaṁ sikkhāpadaṁ uddiseyyātha yo pana bhikkhu orenaḍḍhamāsaṁ
nhāyeyya aññatra samayā pācittiyaṁ. Tatthāyaṁ samayo diyaḍḍho
māso seso gimhānanti vassānassa paṭhamo māso iccete
aḍḍhateyyamāsā uṇhasamayo pariḷāhasamayo gilānasamayo kammasamayo
ayaṁ tattha samayoti. Evañcidaṁ bhagavatā bhikkhūnaṁ sikkhāpadaṁ
paññattaṁ hoti.
1 Ma. te.

[614] Tena kho pana samayena bhikkhū addhānamaggaṁ gantvā
kukkuccāyantā na nhāyanti [1]- sedagatena gattena sayanti. Cīvaraṁpi
senāsanaṁpi dussati. Bhagavato etamatthaṁ ārocesuṁ. Anujānāmi
bhikkhave addhānagamanasamaye orenaḍḍhamāsaṁ nhāyituṁ evañca pana
bhikkhave imaṁ sikkhāpadaṁ uddiseyyātha yo pana bhikkhu orenaḍḍhamāsaṁ
nhāyeyya aññatra samayā pācittiyaṁ. Tatthāyaṁ samayo
diyaḍḍho māso seso gimhānanti vassānassa paṭhamo māso
iccete aḍḍhateyyamāsā uṇhasamayo pariḷāhasamayo gilānasamayo
kammasamayo addhānagamanasamayo ayaṁ tattha samayoti. Evañcidaṁ
bhagavatā bhikkhūnaṁ sikkhāpadaṁ paññattaṁ hoti.

[615] Tena kho pana samayena sambahulā bhikkhū ajjhokāse
cīvarakammaṁ karontā sarajena vātena okiṇṇā honti devo ca
thokaṁ thokaṁ phussi 2 . Bhikkhū kukkuccāyantā na nhāyanti kilinnena
gattena sayanti. Cīvaraṁpi senāsanaṁpi dussati. Bhagavato etamatthaṁ
ārocesuṁ. Anujānāmi bhikkhave vātavuṭṭhisamaye orenaḍḍhamāsaṁ
nhāyituṁ evañca pana bhikkhave imaṁ sikkhāpadaṁ uddiseyyātha
yo pana bhikkhu orenaḍḍhamāsaṁ nhāyeyya aññatra samayā
pācittiyaṁ. Tatthāyaṁ samayo diyaḍḍho māso seso gimhānanti
vassānassa paṭhamo māso iccete aḍḍhateyyamāsā uṇhasamayo
pariḷāhasamayo gilānasamayo kammasamayo addhānagamanasamayo
1 Ma. te. 2 Ma. phusāyati.
Vātavuṭṭhisamayo ayaṁ tattha samayoti.

[616] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Orenaḍḍhamāsanti
ūnakaḍḍhamāsaṁ. Nhāyeyyāti cuṇṇena vā mattikāya vā nhāyati.
Payoge dukkaṭaṁ. Nhānapariyosāne āpatti pācittiyassa.
Aññatra samayāti ṭhapetvā samayaṁ. Uṇhasamayo nāma diyaḍḍho
māso seso gimhānaṁ. Pariḷāhasamayo nāma vassānassa paṭhamo
māso. Iccete aḍḍhateyyamāsā uṇhasamayo pariḷāhasamayoti
nhāyitabbaṁ. Gilānasamayo nāma yassa vinā nhānena na phāsu
hoti. Gilānasamayoti nhāyitabbaṁ. Kammasamayo nāma antamaso
pariveṇaṁpi sammaṭṭhaṁ hoti. Kammasamayoti nhāyitabbaṁ.
Addhānagamanasamayo nāma aḍḍhayojanaṁ gamissāmīti nhāyitabbaṁ
gacchantena nhāyitabbaṁ gatena nhāyitabbaṁ. Vātavuṭṭhisamayo nāma
bhikkhū sarajena vātena okiṇṇā honti dve vā tīṇi vā
udakaphusitāni kāye patitāni honti. Vātavuṭṭhisamayoti nhāyitabbaṁ.

[617] Ūnakaḍḍhamāse ūnakasaññī aññatra samayā nhāyati
āpatti pācittiyassa. Ūnakaḍḍhamāse vematiko aññatra samayā
nhāyati āpatti pācittiyassa. Ūnakaḍḍhamāse atirekasaññī
aññatra samayā nhāyati āpatti pācittiyassa. Atirekaḍḍhamāse
ūnakasaññī āpatti dukkaṭassa. Atirekaḍḍhamāse
Vematiko āpatti dukkaṭassa. Atirekaḍḍhamāse atirekasaññī
anāpatti.

[618] Anāpatti samaye aḍḍhamāsaṁ nhāyati atirekaḍḍhamāsaṁ
nhāyati pāraṁ gacchanto nhāyati sabbapaccantimesu janapadesu
āpadāsu ummattakassa ādikammikassāti.
Sattamasikkhāpadaṁ niṭṭhitaṁ.
---------
Aṭṭhamasikkhāpadaṁ

[619] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena sambahulā
bhikkhū ca paribbājakā ca sāketā sāvatthiṁ addhānamaggapaṭipannā
honti. Antarāmagge corā nikkhamitvā te acchindiṁsu.
Sāvatthiyā rājabhaṭā nikkhamitvā te core sabhaṇḍe gahetvā
bhikkhūnaṁ santike dūtaṁ pāhesuṁ āgacchantu bhaddantā sakaṁ sakaṁ
cīvaraṁ sañjānitvā gaṇhantūti. Bhikkhū cīvaraṁ 1 na sañjānanti.
Manussā 2 ujjhāyanti khīyanti vipācenti kathaṁ hi nāma bhaddantā
attano attano cīvaraṁ na sañjānissantīti. Assosuṁ kho
bhikkhū tesaṁ manussānaṁ ujjhāyantānaṁ khīyantānaṁ vipācentānaṁ.
Athakho te bhikkhū bhagavato etamatthaṁ ārocesuṁ. Athakho bhagavā
etasmiṁ nidāne etasmiṁ pakaraṇe bhikkhusaṅghaṁ sannipātāpetvā
bhikkhūnaṁ tadanucchavikaṁ tadanulomikaṁ dhammiṁ kathaṁ katvā bhikkhū āmantesi
tenahi bhikkhave bhikkhūnaṁ sikkhāpadaṁ paññāpessāmi dasa atthavase
paṭicca saṅghasuṭṭhutāya saṅghaphāsutāya .pe. Saddhammaṭṭhitiyā
vinayānuggahāya. Evañca pana bhikkhave imaṁ sikkhāpadaṁ uddiseyyātha navaṁ
pana bhikkhunā cīvaralābhena tiṇṇaṁ dubbaṇṇakaraṇānaṁ aññataraṁ
dubbaṇṇakaraṇaṁ ādātabbaṁ nīlaṁ vā kaddamaṁ vā kāḷasāmaṁ vā.
Anādā ce bhikkhu tiṇṇaṁ dubbaṇṇakaraṇānaṁ aññataraṁ dubbaṇṇakaraṇaṁ
1 Ma. ayaṁ pāṭho natthi. 2 Ma. te.
Navaṁ cīvaraṁ paribhuñjeyya pācittiyanti.

[620] Navaṁ nāma akatakappaṁ vuccati. Cīvaraṁ nāma channaṁ
cīvarānaṁ aññataraṁ cīvaraṁ. Tiṇṇaṁ dubbaṇṇakaraṇānaṁ aññataraṁ
dubbaṇṇakaraṇaṁ ādātabbanti antamaso kusaggenapi ādātabbaṁ.
Nīlaṁ nāma dve nīlāni kaṁsanīlaṁ palāsanīlaṁ. Kaddamo nāma odako
vuccati. Kāḷasāmaṁ nāma yaṅkiñci kāḷakaṁ 1 . Anādā ce bhikkhu
tiṇṇaṁ dubbaṇṇakaraṇānaṁ aññataraṁ dubbaṇṇakaraṇanti antamaso
kusaggenapi anādiyitvā tiṇṇaṁ dubbaṇṇakaraṇānaṁ aññataraṁ
dubbaṇṇakaraṇaṁ navaṁ cīvaraṁ paribhuñjati āpatti pācittiyassa.

[621] Anādinne anādinnasaññī paribhuñjati āpatti
pācittiyassa. Anādinne vematiko paribhuñjati āpatti pācittiyassa.
Anādinne ādinnasaññī paribhuñjati āpatti pācittiyassa.
Ādinne anādinnasaññī āpatti dukkaṭassa. Ādinne vematiko
āpatti dukkaṭassa. Ādinne ādinnasaññī anāpatti.