[592] Tena samayena buddho bhagavā kosambiyaṁ viharati
ghositārāme. Tena kho pana samayena āyasmā channo anācāraṁ
ācarati. Bhikkhū evamāhaṁsu mā āvuso channa evarūpaṁ akāsi
netaṁ kappatīti. So anādariyaṁ paṭicca karotiyeva. Ye te bhikkhū
appicchā .pe. Te ujjhāyanti khīyanti vipācenti kathaṁ hi
nāma āyasmā channo anādariyaṁ karissatīti .pe. Saccaṁ kira
tvaṁ channa anādariyaṁ karosīti. Saccaṁ bhagavāti. Vigarahi buddho
bhagavā kathaṁ hi nāma tvaṁ moghapurisa anādariyaṁ karissasi netaṁ
moghapurisa appasannānaṁ vā pasādāya pasannānaṁ vā bhiyyobhāvāya .pe.
Evañca pana bhikkhave imaṁ sikkhāpadaṁ uddiseyyātha anādariye
pācittiyanti.

[593] Anādariyaṁ nāma dve anādariyāni puggalānādariyañca
dhammānādariyañca. Puggalānādariyaṁ nāma upasampannena paññattena
vuccamāno ayaṁ ukkhitto 1 vā vambhito vā garahito vā imassa
vacanaṁ akataṁ bhavissatīti. Anādariyaṁ karoti āpatti pācittiyassa.
Dhammānādariyaṁ nāma upasampannena paññattena vuccamāno kathāyaṁ
nasseyya vā vinasseyya vā antaradhāyeyya vāti taṁ vā na
sikkhitukāmo anādariyaṁ karoti āpatti pācittiyassa.
1 Ma. ukkhittako.

[594] Upasampanne upasampannasaññī anādariyaṁ karoti
āpatti pācittiyassa. Upasampanne vematiko anādariyaṁ karoti
āpatti pācittiyassa. Upasampanne anupasampannasaññī anādariyaṁ
karoti āpatti pācittiyassa.

[595] Upasampannena 1 appaññattena vuccamāno idaṁ na
sallekhāya na dhūtattāya 2 na pāsādikatāya na apacayāya na
viriyārambhāya saṁvattatīti anādariyaṁ karoti āpatti dukkaṭassa.
Anupasampannena paññattena vā appaññattena vā vuccamāno
idaṁ na sallekhāya na dhūtattāya na pāsādikatāya na apacayāya na
viriyārambhāya saṁvattatīti anādariyaṁ karoti āpatti dukkaṭassa.

[596] Anupasampanne upasampannasaññī āpatti dukkaṭassa.
Anupasampanne vematiko āpatti dukkaṭassa. Anupasampanne
anupasampannasaññī āpatti dukkaṭassa.

[597] Anāpatti evaṁ amhākaṁ ācariyānaṁ uggaho
paripucchāti bhaṇati ummattakassa ādikammikassāti.
Catutthasikkhāpadaṁ niṭṭhitaṁ.
----------
1 Ma. ayaṁ pāṭho natthi. 2 Ma. dhutattāya. evamuparipi.
Pañcamasikkhāpadaṁ

[598] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū sattarasavaggiye bhikkhū bhiṁsāpenti. Te bhiṁsāpiyamānā rodanti.
Bhikkhū evamāhaṁsu kissa tumhe āvuso rodathāti. Ime āvuso
chabbaggiyā bhikkhū amhe bhiṁsāpentīti. Ye te bhikkhū appicchā .pe.
Te ujjhāyanti khīyanti vipācenti kathaṁ hi nāma chabbaggiyā
bhikkhū bhikkhū 1 bhiṁsāpessantīti .pe. Saccaṁ kira tumhe bhikkhave
bhikkhū 2 bhiṁsāpethāti. Saccaṁ bhagavāti. Vigarahi buddho bhagavā kathaṁ
hi nāma tumhe moghapurisā bhikkhū 3 bhiṁsāpessatha netaṁ moghapurisā
appasannānaṁ vā pasādāya pasannānaṁ vā bhiyyobhāvāya .pe.
Evañca pana bhikkhave imaṁ sikkhāpadaṁ uddiseyyātha yo pana
bhikkhu bhikkhuṁ bhiṁsāpeyya pācittiyanti.

[599] Yo panāti yo yādiso .pe. Bhikkhūti .pe.
Ayaṁ imasmiṁ atthe adhippeto bhikkhūti. Bhikkhunti aññaṁ bhikkhuṁ.
Bhiṁsāpeyyāti upasampanno upasampannaṁ bhiṁsāpetukāmo rūpaṁ vā
saddaṁ vā gandhaṁ vā rasaṁ vā phoṭṭhabbaṁ vā upasaṁharati bhāyeyya
vā so na vā bhāyeyya āpatti pācittiyassa. Corakantāraṁ
vā vāḷakantāraṁ vā pisācakantāraṁ vā ācikkhati bhāyeyya vā
1-2-3 Ma. bhikkhuṁ.
So na vā bhāyeyya āpatti pācittiyassa.

[600] Upasampanne upasampannasaññī bhiṁsāpeti āpatti
pācittiyassa. Upasampanne vematiko bhiṁsāpeti āpatti
pācittiyassa. Upasampanne anupasampannasaññī bhiṁsāpeti āpatti
pācittiyassa.

[601] Upasampanno 1 anupasampannaṁ bhiṁsāpetukāmo rūpaṁ vā
saddaṁ vā gandhaṁ vā rasaṁ vā phoṭṭhabbaṁ vā upasaṁharati bhāyeyya
vā so na vā bhāyeyya āpatti dukkaṭassa. Corakantāraṁ
vā vāḷakantāraṁ vā pisācakantāraṁ vā ācikkhati bhāyeyya vā
so na vā bhāyeyya āpatti dukkaṭassa.