[602] Anupasampanne upasampannasaññī āpatti dukkaṭassa.
Anupasampanne vematiko āpatti dukkaṭassa. Anupasampanne
anupasampannasaññī āpatti dukkaṭassa.

[603] Anāpatti na bhiṁsāpetukāmo rūpaṁ vā saddaṁ vā
gandhaṁ vā rasaṁ vā phoṭṭhabbaṁ vā upasaṁharati corakantāraṁ vā
vāḷakantāraṁ vā pisācakantāraṁ vā ācikkhati ummattakassa
ādikammikassāti.
Pañcamasikkhāpadaṁ niṭṭhitaṁ.
-------
1 Ma. ayaṁ pāṭho natthi.
Chaṭṭhasikkhāpadaṁ

[604] Tena samayena buddho bhagavā bhaggesu viharati susumāragire
bhesakalāvane migadāye. Tena kho pana samayena bhikkhū hemantike
māse aññataraṁ mahantaṁ susirakaṭṭhaṁ jotiṁ samādahitvā visibbesuṁ.
Tasmiṁ ca susire kaṇhasappo agginā santatto nikkhamitvā bhikkhū
paripātesi. Bhikkhū tahiṁ tahiṁ padhāviṁsu. Ye te bhikkhū
appicchā .pe. Te ujjhāyanti khīyanti vipācenti kathaṁ hi nāma
bhikkhū jotiṁ samādahitvā visibbessantīti .pe. Saccaṁ kira bhikkhave
bhikkhū jotiṁ samādahitvā visibbentīti. Saccaṁ bhagavāti. Vigarahi
buddho bhagavā kathaṁ hi nāma te bhikkhave moghapurisā jotiṁ
samādahitvā visibbessanti netaṁ bhikkhave appasannānaṁ vā
pasādāya pasannānaṁ vā bhiyyobhāvāya .pe. Evañca pana
bhikkhave imaṁ sikkhāpadaṁ uddiseyyātha yo pana bhikkhu
visīvanāpekkho 1 jotiṁ samādaheyya vā samādahāpeyya vā
pācittiyanti. Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[605] Tena kho pana samayena bhikkhū gilānā honti.
Gilānapucchakā bhikkhū gilāne bhikkhū etadavocuṁ kaccāvuso khamanīyaṁ
kacci yāpanīyanti. Pubbe mayaṁ āvuso jotiṁ samādahitvā visibbema
1 Ma. Yu. visibbanāpekkho. evamuparipi.
Tena no phāsu hoti idāni pana bhagavatā paṭikkhittanti
kukkuccāyantā na visibbema tena no na phāsu hotīti. Bhagavato
etamatthaṁ ārocesuṁ. Anujānāmi bhikkhave gilānena bhikkhunā jotiṁ
samādahitvā vā samādahāpetvā vā visibbetuṁ evañca pana bhikkhave
imaṁ sikkhāpadaṁ uddiseyyātha yo pana bhikkhu agilāno visīvanāpekkho
jotiṁ samādaheyya vā samādahāpeyya vā pācittiyanti.
Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[606] Tena kho pana samayena bhikkhū padīpepi jotikepi
jantāgharepi kukkuccāyanti 1 . Bhagavato etamatthaṁ ārocesuṁ.
Anujānāmi bhikkhave tathārūpapaccayā jotiṁ samādahituṁ samādahāpetuṁ
evañca pana bhikkhave imaṁ sikkhāpadaṁ uddiseyyātha yo pana bhikkhu
agilāno visīvanāpekkho jotiṁ samādaheyya vā samādahāpeyya vā
aññatra tathārūpapaccayā pācittiyanti.

[607] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Agilāno nāma yassa vinā
agginā phāsu hoti. Gilāno nāma yassa vinā agginā na
phāsu hoti. Visīvanāpekkhoti tappitukāmo. Joti nāma aggi
vuccati. Samādaheyyāti sayaṁ samādahati āpatti pācittiyassa.
1 Yu. tena kho pana samayena bhikkhū na padīpesuṁ jotikepi jantāgharepi kukkuccāyantā.
Samādahāpeyyāti aññaṁ āṇāpeti āpatti pācittiyassa.
Sakiṁ āṇatto bahukaṁpi samādahati āpatti pācittiyassa.
Aññatra tathārūpapaccayāti ṭhapetvā tathārūpapaccayaṁ.

[608] Agilāno agilānasaññī visīvanāpekkho jotiṁ samādahati
vā samādahāpeti vā aññatra tathārūpapaccayā āpatti
pācittiyassa. Agilāno vematiko visīvanāpekkho jotiṁ samādahati vā
samādahāpeti vā aññatra tathārūpapaccayā āpatti pācittiyassa.
Agilāno gilānasaññī visīvanāpekkho jotiṁ samādahati vā samādahāpeti
vā aññatra tathārūpapaccayā āpatti pācittiyassa. Paṭilātaṁ
ukkhipati āpatti dukkaṭassa. Gilāno agilānasaññī āpatti
dukkaṭassa. Gilāno vematiko āpatti dukkaṭassa. Gilāno
gilānasaññī anāpatti.

[609] Anāpatti gilānassa aññena kataṁ visibbeti
vītacchitaṅgāraṁ 1 visibbeti padīpepi 2 jotikepi 3 jantāgharepi 4
tathārūpapaccayā āpadāsu ummattakassa ādikammikassāti.
Chaṭṭhasikkhāpadaṁ niṭṭhitaṁ.
-------
1 Ma. vītaccitaṅgāraṁ. 2-3-4 Ma. pisaddo natthi.
Sattamasikkhāpadaṁ

[610] Tena samayena buddho bhagavā rājagahe viharati veḷuvane
kalandakanivāpe. Tena kho pana samayena bhikkhū tapode nhāyanti.
Athakho 1 rājā māgadho seniyo bimbisāro sīsaṁ nhāyissāmīti
tapodaṁ gantvā yāva ayyā nhāyantīti ekamantaṁ paṭimānesi.
Bhikkhū yāva samandhakārā nhāyiṁsu. Athakho rājā māgadho seniyo
bimbisāro vikāle sīsaṁ nhāyitvā nagaradvāre thakkite 2 bahinagare
vasitvā kālasseva asambhinnena vilepanena yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinnaṁ kho rājānaṁ māgadhaṁ seniyaṁ bimbisāraṁ bhagavā
etadavoca kissa tvaṁ mahārāja kālasseva āgato asambhinnena
vilepanenāti. Athakho rājā māgadho seniyo bimbisāro bhagavato
etamatthaṁ ārocesi. Athakho bhagavā rājānaṁ māgadhaṁ seniyaṁ bimbisāraṁ
dhammiyā kathāya sandassesi samādapesi samuttejesi sampahaṁsesi.
Athakho rājā māgadho seniyo bimbisāro bhagavatā dhammiyā kathāya
sandassito samādapito samuttejito sampahaṁsito uṭṭhāyāsanā
bhagavantaṁ abhivādetvā padakkhiṇaṁ katvā pakkāmi. Athakho bhagavā
etasmiṁ nidāne etasmiṁ pakaraṇe bhikkhusaṅghaṁ sannipātāpetvā
bhikkhū paṭipucchi saccaṁ kira bhikkhave bhikkhū rājānaṁpi passitvā na
1 Ma. Yu. tena kho pana samayena. 2 Ma. thakite.
Mattaṁ jānitvā nhāyantīti. Saccaṁ bhagavāti. Vigarahi buddho
bhagavā kathaṁ hi nāma te bhikkhave moghapurisā rājānaṁpi passitvā
na mattaṁ jānitvā nhāyissanti netaṁ bhikkhave appasannānaṁ vā
pasādāya pasannānaṁ vā bhiyyobhāvāya .pe. Evañca pana
bhikkhave imaṁ sikkhāpadaṁ uddiseyyātha yo pana bhikkhu orenaḍḍhamāsaṁ 1
nhāyeyya pācittiyanti. Evañcidaṁ bhagavatā bhikkhūnaṁ sikkhāpadaṁ
paññattaṁ hoti.

[611] Tena kho pana samayena bhikkhū uṇhasamaye pariḷāhasamaye
kukkuccāyantā na nhāyanti sedagatena gattena sayanti. Cīvaraṁpi
senāsanaṁpi dussati. Bhagavato etamatthaṁ ārocesuṁ. Anujānāmi
bhikkhave uṇhasamaye pariḷāhasamaye orenaḍḍhamāsaṁ nhāyituṁ evañca
pana bhikkhave imaṁ sikkhāpadaṁ uddiseyyātha yo pana bhikkhu
orenaḍḍhamāsaṁ nhāyeyya aññatra samayā pācittiyaṁ. Tatthāyaṁ
samayo diyaḍḍho māso seso gimhānanti vassānassa paṭhamo
māso iccete aḍḍhateyyamāsā uṇhasamayo pariḷāhasamayo
ayaṁ tattha samayoti. Evañcidaṁ bhagavatā bhikkhūnaṁ sikkhāpadaṁ
paññattaṁ hoti.