[622] Anāpatti ādiyitvā paribhuñjati kappo naṭṭho hoti
kappakatokāso jiṇṇo hoti kappakatena akappakataṁ saṁsibbitaṁ hoti
aggaḷe anuvāte paribhaṇḍe ummattakassa ādikammikassāti.
Aṭṭhamasikkhāpadaṁ niṭṭhitaṁ.
--------
1 Ma. Yu. kāḷasāmakaṁ.
Navamasikkhāpadaṁ
[623] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā
upanando sakyaputto bhātuno saddhivihārikassa bhikkhuno sāmaṁ
cīvaraṁ vikappetvā apaccuddhārakaṁ 1 paribhuñjati. Athakho so bhikkhu
bhikkhūnaṁ etamatthaṁ ārocesi ayaṁ āvuso āyasmā upanando
sakyaputto mayhaṁ sāmaṁ cīvaraṁ vikappetvā apaccuddhārakaṁ
paribhuñjatīti. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma āyasmā upanando sakyaputto
bhikkhussa sāmaṁ cīvaraṁ vikappetvā apaccuddhārakaṁ paribhuñjissatīti
.pe. Saccaṁ kira tvaṁ upananda bhikkhussa sāmaṁ cīvaraṁ vikappetvā
apaccuddhārakaṁ paribhuñjasīti. Saccaṁ bhagavāti. Vigarahi buddho
bhagavā kathaṁ hi nāma tvaṁ moghapurisa bhikkhussa sāmaṁ cīvaraṁ
vikappetvā apaccuddhārakaṁ paribhuñjissasi netaṁ moghapurisa
appasannānaṁ vā pasādāya pasannānaṁ vā bhiyyobhāvāya .pe.
Evañca pana bhikkhave imaṁ sikkhāpadaṁ uddiseyyātha yo pana
bhikkhu bhikkhussa vā bhikkhuniyā vā sikkhamānāya vā sāmaṇerassa
vā sāmaṇeriyā vā sāmaṁ cīvaraṁ vikappetvā apaccuddhārakaṁ
paribhuñjeyya pācittiyanti.
1 Ma. Yu. apaccuddhāraṇaṁ. evamuparipi.
[624] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Bhikkhussāti aññassa bhikkhussa.
Bhikkhunī nāma ubhatosaṅghe upasampannā. Sikkhamānā nāma dve
vassāni chasu dhammesu sikkhitasikkhā. Sāmaṇero nāma
dasasikkhāpadiko. Sāmaṇerī nāma dasasikkhāpadikā. Sāmanti sayaṁ
vikappetvā. Cīvaraṁ nāma channaṁ cīvarānaṁ aññataraṁ cīvaraṁ vikappanupagaṁ
pacchimaṁ. Vikappanaṁ nāma dve vikappanā sammukhāvikappanā ca
parammukhāvikappanā ca. Sammukhāvikappanā nāma imaṁ cīvaraṁ tuyhaṁ
vikappemi itthannāmassa vāti. Parammukhāvikappanā nāma imaṁ
cīvaraṁ vikappanatthāya tuyhaṁ dammīti. Tena vattabbo ko te
mitto vā sandiṭṭho vāti. Itthannāmo ca itthannāmo cāti.
Tena vattabbo ahaṁ tesaṁ dammi tesaṁ santakaṁ paribhuñja vā
vissajjehi vā yathāpaccayaṁ vā karohīti. Apaccuddhārakaṁ nāma
tassa vā adinnaṁ tassa vā avissāsento 1 paribhuñjati āpatti
pācittiyassa.
[625] Apaccuddhārake apaccuddhārakasaññī paribhuñjati āpatti
pācittiyassa. Apaccuddhārake vematiko paribhuñjati āpatti
pācittiyassa. Apaccuddhārake paccuddhārakasaññī paribhuñjati
āpatti pācittiyassa. Adhiṭṭheti vā vissajjeti vā āpatti
dukkaṭassa. Paccuddhārake apaccuddhārakasaññī āpatti
1 Ma. avissasanto.
Dukkaṭassa. Paccuddhārake vematiko āpatti dukkaṭassa.
Paccuddhārake paccuddhārakasaññī anāpatti.
[626] Anāpatti so vā deti tassa vā vissāsento 1
paribhuñjati ummattakassa ādikammikassāti.
Navamasikkhāpadaṁ niṭṭhitaṁ.
-------
1 Ma. vissasanto.
Dasamasikkhāpadaṁ
[627] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena sattarasavaggiyā
bhikkhū asannihitaparikkhārā honti. Chabbaggiyā bhikkhū sattarasavaggiyānaṁ
bhikkhūnaṁ pattaṁpi cīvaraṁpi apanidhenti. Sattarasavaggiyā
bhikkhū chabbaggiye bhikkhū etadavocuṁ dethāvuso amhākaṁ pattaṁpi
cīvaraṁpīti. Chabbaggiyā bhikkhū hasanti. Te rodanti. Bhikkhū
evamāhaṁsu kissa tumhe āvuso rodathāti. Ime āvuso
chabbaggiyā bhikkhū amhākaṁ pattaṁpi cīvaraṁpi apanidhentīti. Ye te
bhikkhū appicchā .pe. Te ujjhāyanti khīyanti vipācenti kathaṁ
hi nāma chabbaggiyā bhikkhū bhikkhūnaṁ pattaṁpi cīvaraṁpi apanidhessantīti
.pe. Saccaṁ kira tumhe bhikkhave bhikkhūnaṁ pattaṁpi cīvaraṁpi apanidhethāti.
Saccaṁ bhagavāti. Vigarahi buddho bhagavā kathaṁ hi nāma
tumhe moghapurisā bhikkhūnaṁ pattaṁpi cīvaraṁpi apanidhessatha netaṁ
moghapurisā appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha yo
pana bhikkhu bhikkhussa pattaṁ vā cīvaraṁ vā nisīdanaṁ vā sūcigharaṁ vā
kāyabandhanaṁ vā apanidheyya vā apanidhāpeyya vā antamaso
hassāpekkhopi 1 pācittiyanti.
1 Ma. hasāpekkhopi. Yu. hāsāpekkhopi. evamuparipi.
[628] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Bhikkhussāti aññassa bhikkhussa.
Patto nāma dve pattā ayopatto mattikāpatto. Cīvaraṁ
nāma channaṁ cīvarānaṁ aññataraṁ cīvaraṁ vikappanupagaṁ pacchimaṁ.
Nisīdanaṁ nāma sadasaṁ vuccati. Sūcigharaṁ nāma sasūcikaṁ vā asūcikaṁ
vā. Kāyabandhanaṁ nāma dve kāyabandhanāni paṭṭikaṁ 1 sūkarantakaṁ.
Apanidheyyāti sayaṁ apanidheti āpatti pācittiyassa. Apanidhāpeyyāti
aññaṁ āṇāpeti āpatti pācittiyassa. Sakiṁ āṇatto
bahukaṁpi apanidheti āpatti pācittiyassa. Antamaso
hassāpekkhopīti kīḷādhippāyo.
[629] Upasampanne upasampannasaññī pattaṁ vā cīvaraṁ vā
nisīdanaṁ vā sūcigharaṁ vā kāyabandhanaṁ vā apanidheti vā apanidhāpeti vā
antamaso hassāpekkhopi āpatti pācittiyassa. Upasampanne
vematiko pattaṁ vā cīvaraṁ vā nisīdanaṁ vā sūcigharaṁ vā kāyabandhanaṁ
vā apanidheti vā apanidhāpeti vā antamaso hassāpekkhopi
āpatti pācittiyassa. Upasampanne anupasampannasaññī pattaṁ
vā cīvaraṁ vā nisīdanaṁ vā sūcigharaṁ vā kāyabandhanaṁ vā apanidheti
vā apanidhāpeti vā antamaso hassāpekkhopi āpatti
pācittiyassa. Aññaṁ parikkhāraṁ apanidheti vā apanidhāpeti vā antamaso
hassāpekkhopi āpatti dukkaṭassa. Anupasampannassa pattaṁ vā
1 Ma. paṭṭikā.
Cīvaraṁ vā aññaṁ vā parikkhāraṁ apanidheti vā apanidhāpeti vā
antamaso hassāpekkhopi āpatti dukkaṭassa. Anupasampanne
upasampannasaññī āpatti dukkaṭassa. Anupasampanne vematiko
āpatti dukkaṭassa. Anupasampanne anupasampannasaññī āpatti
dukkaṭassa.
[630] Anāpatti na hassādhippāyo dunnikkhittaṁ paṭisāmeti
dhammiṁ kathaṁ katvā dassāmīti paṭisāmeti ummattakassa
ādikammikassāti.
Dasamasikkhāpadaṁ niṭṭhitaṁ.
Surāpānavaggo chaṭṭho.
---------
Tassuddānaṁ
surā aṅguli hāso ca 1 anādariyañca bhiṁsanā 2
joti nhānadubbaṇṇaṁ sāmaṁ apanidhena cāti.
---------
1 toyañca. itipi pāṭho. 2 Ma. bhiṁsanaṁ.
Sappāṇakavaggassa paṭhamasikkhāpadaṁ
[631] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā
udāyi issāso hoti. Kākā cassa amanāpā honti. So
kāke vijjhitvā [1]- sīsaṁ chinditvā sūle paṭipāṭiyā ṭhapesi. Bhikkhū
evamāhaṁsu kenime āvuso kākā jīvitā voropitāti. Mayā
āvuso amanāpā me kākāti. Ye te bhikkhū appicchā
.pe. Te ujjhāyanti khīyanti vipācenti kathaṁ hi nāma āyasmā
udāyi sañcicca pāṇaṁ jīvitā voropessatīti .pe. Saccaṁ kira
tvaṁ udāyi sañcicca pāṇaṁ jīvitā voropesīti. Saccaṁ bhagavāti.
Vigarahi buddho bhagavā kathaṁ hi nāma tvaṁ moghapurisa sañcicca
pāṇaṁ jīvitā voropessasi netaṁ moghapurisa appasannānaṁ vā
pasādāya pasannānaṁ vā bhiyyobhāvāya .pe. Evañca pana
bhikkhave imaṁ sikkhāpadaṁ uddiseyyātha yo pana bhikkhu sañcicca
pāṇaṁ jīvitā voropeyya pācittiyanti.