[652] Ūnavīsativasse ūnavīsativassasaññī upasampādeti āpatti
pācittiyassa. Ūnavīsativasse vematiko upasampādeti āpatti
dukkaṭassa. Ūnavīsativasse paripuṇṇavīsativassasaññī upasampādeti
anāpatti. Paripuṇṇavīsativasse ūnavīsativassasaññī āpatti
dukkaṭassa. Puripuṇṇavīsativasse vematiko āpatti dukkaṭassa.
Paripuṇṇavīsativasse paripuṇṇavīsativassasaññī anāpatti.
[653] Anāpatti ūnavīsativassaṁ puggalaṁ paripuṇṇavīsativassasaññī
upasampādeti paripuṇṇavīsativassaṁ paripuṇṇavīsativassasaññī
upasampādeti ummattakassa ādikammikassāti.
Pañcamasikkhāpadaṁ niṭṭhitaṁ
---------
Chaṭṭhasikkhāpadaṁ
[654] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññataro
sattho rājagahā paṭiyālokaṁ gantukāmo hoti. Aññataro bhikkhu
te manusse etadavoca ahaṁpi āyasmantehi saddhiṁ gamissāmīti.
Mayaṁ kho bhante suṅkaṁ pariharissāmāti. Pajānāthāvusoti. Assosuṁ
kho kammikā sattho kira suṅkaṁ pariharissatīti te magge
pariyuṭṭhiṁsu. Athakho te kammikā taṁ satthaṁ gahetvā acchinditvā
taṁ bhikkhuṁ etadavocuṁ kissa tvaṁ bhante jānaṁ theyyasatthena saddhiṁ
gacchasīti palibuddhitvā 1 muñciṁsu. Athakho so bhikkhu sāvatthiṁ
gantvā bhikkhūnaṁ etamatthaṁ ārocesi. Ye te bhikkhū appicchā
.pe. Te ujjhāyanti khīyanti vipācenti kathaṁ hi nāma bhikkhu
jānaṁ theyyasatthena saddhiṁ saṁvidhāya ekaddhānamaggaṁ paṭipajjissatīti
.pe. Saccaṁ kira tvaṁ bhikkhu jānaṁ theyyasatthena saddhiṁ saṁvidhāya
ekaddhānamaggaṁ paṭipajjasīti. Saccaṁ bhagavāti. Vigarahi buddho
bhagavā kathaṁ hi nāma tvaṁ moghapurisa jānaṁ theyyasatthena saddhiṁ
saṁvidhāya ekaddhānamaggaṁ paṭipajjissasi netaṁ moghapurisa appasannānaṁ
vā pasādāya pasannānaṁ vā bhiyyobhāvāya .pe. Evañca pana
bhikkhave imaṁ sikkhāpadaṁ uddiseyyātha yo pana bhikkhu jānaṁ
1 Ma. palibundhetvā.
Theyyasatthena saddhiṁ saṁvidhāya ekaddhānamaggaṁ paṭipajjeyya antamaso
gāmantarampi pācittiyanti.
[655] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Jānāti nāma sāmaṁ vā
jānāti aññe vā tassa ārocenti so vā āroceti.
Theyyasattho nāma corā katakammā vā honti akatakammā vā
rājānaṁ vā theyyaṁ gacchanti suṅkaṁ vā pariharanti. Saddhinti
ekato. Saṁvidhāyāti gacchāmāvuso gacchāma bhante gacchāma
bhante gacchāmāvuso ajja vā hiyyo vā pare vā gacchāmāti
saṁvidahati āpatti dukkaṭassa. Antamaso gāmantarampīti
kukkuṭasampāte gāme gāmantare gāmantare āpatti pācittiyassa.
Agāmake araññe aḍḍhayojane aḍḍhayojane āpatti pācittiyassa.
[656] Theyyasatthe theyyasatthasaññī saṁvidhāya ekaddhānamaggaṁ
paṭipajjati antamaso gāmantarampi āpatti pācittiyassa.
Theyyasatthe vematiko saṁvidhāya ekaddhānamaggaṁ paṭipajjati antamaso
gāmantarampi āpatti dukkaṭassa. Theyyasatthe atheyyasatthasaññī
saṁvidhāya ekaddhānamaggaṁ paṭipajjati antamaso gāmantarampi
anāpatti. Bhikkhu saṁvidahati manussā na saṁvidahanti āpatti
dukkaṭassa. Atheyyasatthe theyyasatthasaññī āpatti dukkaṭassa.
Atheyyasatthe vematiko āpatti dukkaṭassa. Atheyyasatthe
Atheyyasatthasaññī anāpatti.
[657] Anāpatti asaṁvidahitvā gacchati manussā saṁvidahanuti
bhikkhu na saṁvidahati visaṅketena gacchati āpadāsu ummattakassa
ādikammikassāti.
Chaṭṭhasikkhāpadaṁ niṭṭhitaṁ.
--------
Sattamasikkhāpadaṁ
[658] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññataro bhikkhu
kosalesu janapadesu sāvatthiṁ gacchanto aññatarena gāmadvārena
atikkamati. Aññatarā itthī sāmikena saha bhaṇḍitvā gāmato
nikkhamitvā taṁ bhikkhuṁ passitvā etadavoca kahaṁ bhante ayyo
gamissatīti. Sāvatthiṁ kho ahaṁ bhagini gamissāmīti. Ahaṁ ayyena
saddhiṁ gamissāmīti. Eyyāsi bhaginīti. Athakho tassā itthiyā
sāmiko gāmato nikkhamitvā manusse pucchi apayyā evarūpaṁ 1
itthiṁ passeyyāthāti. Esayya 2 pabbajitena saha gacchatīti. Athakho
so puriso anubandhitvā taṁ bhikkhuṁ gahetvā ākoṭetvā muñci.
Athakho so bhikkhu aññatarasmiṁ rukkhamūle padhūpento nisīdi.
Athakho sā itthī taṁ purisaṁ etadavoca nāyya so bhikkhu maṁ
nippādesi apica ahameva tena bhikkhunā saddhiṁ gacchāmi akārako
so bhikkhu gaccha naṁ khamāpehīti. Athakho so puriso taṁ bhikkhuṁ
khamāpesi. Athakho so bhikkhu sāvatthiṁ gantvā bhikkhūnaṁ etamatthaṁ
ārocesi. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma bhikkhu mātugāmena saddhiṁ saṁvidhāya
ekaddhānamaggaṁ paṭipajjissatīti .pe. Saccaṁ kira tvaṁ bhikkhu
1 Ma. apāyyo evarūpiṁ. 2 Ma. esāyyo. evamīdisesu padesu.
Mātugāmena saddhiṁ saṁvidhāya ekaddhānamaggaṁ paṭipajjasīti. Saccaṁ
bhagavāti. Vigarahi buddho bhagavā kathaṁ hi nāma tvaṁ moghapurisa
mātugāmena saddhiṁ saṁvidhāya ekaddhānamaggaṁ paṭipajjissasi netaṁ
moghapurisa appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha yo
pana bhikkhu mātugāmena saddhiṁ saṁvidhāya ekaddhānamaggaṁ paṭipajjeyya
antamaso gāmantarampi pācittiyanti.
[659] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Mātugāmo nāma manussitthī
na yakkhī na petī na tiracchānagatā viññū paṭibalā subhāsitadubbhāsitaṁ
duṭṭhullāduṭṭhullaṁ ājānituṁ. Saddhinti ekato. Saṁvidhāyāti
gacchāma bhagini gacchāma ayya gacchāma ayya gacchāma bhagini
ajja vā hiyyo vā pare vā gacchāmāti saṁvidahati āpatti
dukkaṭassa. Antamaso gāmantarampīti kukkuṭasampāte gāme
gāmantare gāmantare āpatti pācittiyassa. Agāmake araññe
aḍḍhayojane aḍḍhayojane āpatti pācittiyassa.
[660] Mātugāme mātugāmasaññī saṁvidhāya ekaddhānamaggaṁ
paṭipajjati antamaso gāmantarampi āpatti pācittiyassa.
Mātugāme vematiko saṁvidhāya ekaddhānamaggaṁ paṭipajjati antamaso
gāmantarampi āpatti pācittiyassa. Mātugāme amātugāmasaññī
Saṁvidhāya ekaddhānamaggaṁ paṭipajjati antamaso gāmantarampi āpatti
pācittiyassa. Bhikkhu saṁvidahati mātugāmo na saṁvidahati āpatti
dukkaṭassa. Yakkhiyā vā petiyā vā paṇḍakena vā
tiracchānagatamanussaviggahitthiyā vā saddhiṁ saṁvidhāya ekaddhānamaggaṁ
paṭipajjati antamaso gāmantarampi āpatti dukkaṭassa. Amātugāme
mātugāmasaññī āpatti dukkaṭassa. Amātugāme vematiko
āpatti dukkaṭassa. Amātugāme amātugāmasaññī anāpatti.
[661] Anāpatti asaṁvidahitvā gacchati mātugāmo saṁvidahati
bhikkhu na saṁvidahati visaṅketena gacchati āpadāsu ummattakassa
ādikammikassāti.
Sattamasikkhāpadaṁ niṭṭhitaṁ.
---------
Aṭṭhamasikkhāpadaṁ