[672] Anāpatti anukkhittoti jānāti ukkhitto osāritoti
jānāti ukkhitto 1 taṁ diṭṭhiṁ paṭinissaṭṭhoti jānāti ummattakassa
ādikammikassāti.
Navamasikkhāpadaṁ niṭṭhitaṁ.
-------
1 Ma. ayaṁ pāṭho natthi.
Dasamasikkhāpadaṁ

[673] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena kaṇḍakassa 1
nāma samaṇuddesassa evarūpaṁ pāpakaṁ diṭṭhigataṁ uppannaṁ hoti
tathāhaṁ bhagavatā dhammaṁ desitaṁ ājānāmi yathā yeme antarāyikā
dhammā vuttā bhagavatā te paṭisevato nālaṁ antarāyāyāti.
Assosuṁ kho sambahulā bhikkhū kaṇḍakassa nāma kira samaṇuddesassa
evarūpaṁ pāpakaṁ diṭṭhigataṁ uppannaṁ tathāhaṁ bhagavatā dhammaṁ desitaṁ
ājānāmi yathā yeme antarāyikā dhammā vuttā bhagavatā te
paṭisevato nālaṁ antarāyāyāti. Athakho te bhikkhū yena kaṇḍako
samaṇuddeso tenupasaṅkamiṁsu upasaṅkamitvā kaṇḍakaṁ samaṇuddesaṁ
etadavocuṁ saccaṁ kira te āvuso kaṇḍaka evarūpaṁ pāpakaṁ
diṭṭhigataṁ uppannaṁ tathāhaṁ bhagavatā dhammaṁ desitaṁ ājānāmi
yathā yeme antarāyikā dhammā vuttā bhagavatā te paṭisevato
nālaṁ antarāyāyāti. Evaṁ byā kho ahaṁ bhante bhagavatā dhammaṁ
desitaṁ ājānāmi yathā yeme antarāyikā dhammā vuttā bhagavatā
te paṭisevato nālaṁ antarāyāyāti. Mā āvuso kaṇḍaka evaṁ
avaca mā bhagavantaṁ abbhācikkhi na hi sādhu bhagavato abbhakkhānaṁ
na hi bhagavā evaṁ vadeyya anekapariyāyena āvuso kaṇḍaka
1 Ma. kaṇṭakassa. evamuparipi.
Antarāyikā dhammā vuttā bhagavatā alañca pana te paṭisevato
antarāyāya appassādā kāmā vuttā bhagavatā bahudukkhā
bahūpāyāsā ādīnavo ettha bhiyyo aṭṭhikaṅkalūpamā kāmā
vuttā bhagavatā .pe. Maṁsapesūpamā kāmā vuttā bhagavatā .pe.
Tiṇukkūpamā kāmā vuttā bhagavatā .pe. Aṅgārakāsūpamā
kāmā vuttā bhagavatā .pe. Supinakūpamā kāmā vuttā bhagavatā .pe.
Yācitakūpamā kāmā vuttā bhagavatā .pe. Rukkhaphalūpamā kāmā
vuttā bhagavatā .pe. Asisūnūpamā kāmā vuttā bhagavatā .pe.
Sattisūlūpamā kāmā vuttā bhagavatā .pe. Sappasirūpamā
kāmā vuttā bhagavatā bahudukkhā bahūpāyāsā ādīnavo ettha
bhiyyoti. Evaṁpi kho kaṇḍako samaṇuddeso tehi bhikkhūhi
vuccamāno tatheva taṁ pāpakaṁ diṭṭhigataṁ thāmasā parāmāsā abhinivissa
voharati evaṁ byā kho ahaṁ bhante bhagavatā dhammaṁ desitaṁ
ājānāmi yathā yeme antarāyikā dhammā vuttā bhagavatā te
paṭisevato nālaṁ antarāyāyāti. Yato [1]- kho te bhikkhū nāsakkhiṁsu
kaṇḍakaṁ samaṇuddesaṁ etasmā pāpakā diṭṭhigatā vivecetuṁ athakho
te bhikkhū yena bhagavā tenupasaṅkamiṁsu upasaṅkamitvā bhagavato
etamatthaṁ ārocesuṁ. Athakho bhagavā etasmiṁ nidāne etasmiṁ
pakaraṇe bhikkhusaṅghaṁ sannipātāpetvā kaṇḍakaṁ samaṇuddesaṁ paṭipucchi
saccaṁ kira te kaṇḍaka evarūpaṁ pāpakaṁ diṭṭhigataṁ uppannaṁ tathāhaṁ
1 Ma. ca.
Bhagavatā dhammaṁ desitaṁ ājānāmi yathā yeme antarāyikā dhammā
vuttā bhagavatā te paṭisevato nālaṁ antarāyāyāti. Evaṁ byā
kho ahaṁ bhante bhagavatā dhammaṁ desitaṁ ājānāmi yathā yeme
antarāyikā dhammā vuttā bhagavatā te paṭisevato nālaṁ
antarāyāyāti. Kassa nu kho nāma tvaṁ moghapurisa mayā evaṁ dhammaṁ
desitaṁ ājānāsi nanu mayā moghapurisa anekapariyāyena antarāyikā
dhammā vuttā alañca pana te paṭisevato antarāyāya appassādā
kāmā vuttā mayā bahudukkhā bahūpāyāsā ādīnavo
ettha bhiyyo aṭṭhikaṅkalūpamā kāmā vuttā mayā .pe.
Maṁsapesūpamā kāmā vuttā mayā .pe. Tiṇukkūpamā kāmā
vuttā mayā .pe. Aṅgārakāsūpamā kāmā vuttā mayā .pe.
Supinakūpamā kāmā vuttā mayā .pe. Yācitakūpamā kāmā vuttā
mayā .pe. Rukkhaphalūpamā kāmā vuttā mayā .pe. Asisūnūpamā
kāmā vuttā mayā .pe. Sattisūlūpamā kāmā vuttā mayā .pe.
Sappasirūpamā kāmā vuttā mayā bahudukkhā bahūpāyāsā
ādīnavo ettha bhiyyo atha ca pana tvaṁ moghapurisa attanā
duggahitena diṭṭhigatena amhe ceva abbhācikkhasi attānañca khanasi
bahuñca apuññaṁ pasavasi taṁ hi te moghapurisa bhavissati dīgharattaṁ
ahitāya dukkhāya netaṁ moghapurisa appasannānaṁ vā pasādāya
pasannānaṁ vā bhiyyobhāvāya athakhvetaṁ moghapurisa appasannānañceva
Appasādāya pasannānañca ekaccānaṁ aññathattāyāti.
Vigarahitvā dhammiṁ kathaṁ katvā bhikkhū āmantesi tenahi bhikkhave
saṅgho kaṇḍakaṁ samaṇuddesaṁ nāsetu evañca pana bhikkhave
nāsetabbo ajjatagge te āvuso kaṇḍaka na ceva so
bhagavā satthā apadisitabbo yampicaññe samaṇuddesā labhanti
bhikkhūhi saddhiṁ dvirattatirattaṁ sahaseyyaṁ sāpi te natthi cara
pire 1 vinassāti. Athakho saṅgho kaṇḍakaṁ samaṇuddesaṁ
nāsesi.

[674] Tena kho pana samayena chabbaggiyā bhikkhū jānaṁ tathānāsitaṁ
kaṇḍakaṁ samaṇuddesaṁ upalāpentipi upaṭṭhāpentipi sambhuñjantipi
sahāpi seyyaṁ kappenti. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma chabbaggiyā bhikkhū
jānaṁ tathānāsitaṁ kaṇḍakaṁ samaṇuddesaṁ upalāpessantipi
upaṭṭhāpessantipi sambhuñjissantipi sahāpi seyyaṁ kappessantīti .pe.
Saccaṁ kira tumhe bhikkhave jānaṁ tathānāsitaṁ kaṇḍakaṁ samaṇuddesaṁ
upalāpethāpi upaṭṭhāpethāpi sambhuñjathāpi sahāpi seyyaṁ
kappethāti. Saccaṁ bhagavāti. Vigarahi buddho bhagavā kathaṁ hi nāma
tumhe moghapurisā jānaṁ tathānāsitaṁ kaṇḍakaṁ samaṇuddesaṁ
upalāpessathāpi upaṭṭhāpessathāpi sambhuñjissathāpi sahāpi seyyaṁ
1 pireti para amāmakāti tabbaṇṇanā.
Kappessatha netaṁ moghapurisā appasannānaṁ vā pasādāya pasannānaṁ
vā bhiyyobhāvāya .pe. Evañca pana bhikkhave imaṁ sikkhāpadaṁ
uddiseyyātha samaṇuddesopi ce evaṁ vadeyya tathāhaṁ bhagavatā
dhammaṁ desitaṁ ājānāmi yathā yeme antarāyikā dhammā vuttā
bhagavatā te paṭisevato nālaṁ antarāyāyāti. So samaṇuddeso
bhikkhūhi evamassa vacanīyo mā āvuso samaṇuddesa evaṁ avaca
mā bhagavantaṁ abbhācikkhi na hi sādhu bhagavato abbhakkhānaṁ na
hi bhagavā evaṁ vadeyya anekapariyāyena āvuso samaṇuddesa
antarāyikā dhammā vuttā bhagavatā alañca pana te paṭisevato
antarāyāyāti. Evañca so samaṇuddeso bhikkhūhi vuccamāno
tatheva paggaṇheyya so samaṇuddeso bhikkhūhi evamassa vacanīyo
ajjatagge te āvuso samaṇuddesa na ceva so bhagavā satthā
apadisitabbo yampicaññe samaṇuddesā labhanti bhikkhūhi saddhiṁ
dvirattatirattaṁ sahaseyyaṁ sāpi te natthi cara pire vinassāti.
Yo pana bhikkhu jānaṁ tathānāsitaṁ samaṇuddesaṁ upalāpeyya vā
upaṭṭhāpeyya vā sambhuñjeyya vā saha vā seyyaṁ kappeyya
pācittiyanti.

[675] Samaṇuddeso nāma sāmaṇero vuccati. Evaṁ vadeyyāti
tathāhaṁ bhagavatā dhammaṁ desitaṁ ājānāmi yathā yeme antarāyikā
dhammā vuttā bhagavatā te paṭisevato nālaṁ antarāyāyāti.

[676] So samaṇuddesoti yo so evaṁvādī samaṇuddeso.
Bhikkhūhīti aññehi bhikkhūhi. Ye passanti ye suṇanti tehi
vattabbo mā āvuso samaṇuddesa evaṁ avaca mā bhagavantaṁ
abbhācikkhi na hi sādhu bhagavato abbhakkhānaṁ na hi bhagavā
evaṁ vadeyya anekapariyāyena āvuso samaṇuddesa antarāyikā
dhammā vuttā bhagavatā alañca pana te paṭisevato
antarāyāyāti. Dutiyampi vattabbo tatiyampi vattabbo. Sace
paṭinissajjati iccetaṁ kusalaṁ no ce paṭinissajjati so
samaṇuddeso bhikkhūhi evamassa vacanīyo ajjatagge te āvuso
samaṇuddesa na ceva so bhagavā satthā apadisitabbo yampicaññe
samaṇuddesā labhanti bhikkhūhi saddhiṁ dvirattatirattaṁ sahaseyyaṁ sāpi
te natthi cara pire vinassāti.

[677] Yo panāti yo yādiso .pe. Bhikkhūti .pe.
Ayaṁ imasmiṁ atthe adhippeto bhikkhūti. Jānāti nāma sāmaṁ
vā jānāti aññe vā tassa ārocenti so vā āroceti.
Tathānāsitanti evaṁ nāsitaṁ. Samaṇuddeso nāma sāmaṇero vuccati.
Upalāpeyya vāti tassa pattaṁ vā cīvaraṁ vā uddesaṁ vā
paripucchaṁ vā dassāmīti upalāpeti āpatti pācittiyassa.
Upaṭṭhāpeyya vāti tassa cuṇṇaṁ vā mattikaṁ vā dantakaṭṭhaṁ vā
mukhodakaṁ vā sādiyati āpatti pācittiyassa. Sambhuñjeyya
Vāti sambhogo nāma dve sambhogā āmisasambhogo ca dhammasambhogo
ca. Āmisasambhogo nāma āmisaṁ deti vā paṭiggaṇhāti
vā āpatti pācittiyassa. Dhammasambhogo nāma uddisati vā
uddisāpeti vā. Padena uddisati vā uddisāpeti vā pade
pade āpatti pācittiyassa. Akkharāya uddisati vā uddisāpeti
vā akkharakkharāya āpatti pācittiyassa. Saha vā seyyaṁ
kappeyyāti ekacchanne nāsitake samaṇuddese nipanne bhikkhu
nipajjati āpatti pācittiyassa. Bhikkhu nipanne nāsitako
samaṇuddeso nipajjati āpatti pācittiyassa. Ubho vā
nipajjanti āpatti pācittiyassa. Uṭṭhahitvā punappunaṁ nipajjanti
āpatti pācittiyassa.

[678] Nāsitake nāsitakasaññī upalāpeti vā upaṭṭhāpeti
vā sambhuñjati vā saha vā seyyaṁ kappeti āpatti pācittiyassa.
Nāsitake vematiko upalāpeti vā upaṭṭhāpeti vā sambhuñjati
vā saha vā seyyaṁ kappeti āpatti dukkaṭassa. Nāsitake
anāsitakasaññī upalāpeti vā upaṭṭhāpeti vā sambhuñjati vā
saha vā seyyaṁ kappeti anāpatti. Anāsitake nāsitakasaññī
āpatti dukkaṭassa. Anāsitake vematiko āpatti dukkaṭassa.
Anāsitake anāsitakasaññī anāpatti.

[679] Anāpatti anāsitakoti jānāti taṁ diṭṭhiṁ
paṭinissaṭṭhoti jānāti ummattakassa ādikammikassāti.
Dasamasikkhāpadaṁ niṭṭhitaṁ.
Sappāṇakavaggo sattamo.
----------
Tassuddānaṁ
sañciccavadhasappāṇaṁ ukkoduṭṭhullachādanaṁ 1
ūnavīsati satthañca saṁvidhānāriṭṭhakaṁ 2
ukkhittakaṇḍakañceva 3 dasa sikkhāpadā imeti.
--------
1 Ma. ukkoṭaṁ .... 2 Ma. saṁvidhānaṁ .... 3 Ma. ukkhittaṁ ....
Sahadhammikavaggassa paṭhamasikkhāpadaṁ

[680] Tena samayena buddho bhagavā kosambiyaṁ viharati
ghositārāme. Tena kho pana samayena āyasmā channo anācāraṁ
ācarati. Bhikkhū evamāhaṁsu mā āvuso channa evarūpaṁ akāsi
netaṁ kappatīti. So evaṁ vadeti na tāvāhaṁ āvuso etasmiṁ
sikkhāpade sikkhissāmi yāva naññaṁ bhikkhuṁ byattaṁ vinayadharaṁ
paripucchāmīti. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma āyasmā channo bhikkhūhi
sahadhammikaṁ vuccamāno evaṁ vakkhati na tāvāhaṁ āvuso etasmiṁ
sikkhāpade sikkhissāmi yāva naññaṁ bhikkhuṁ byattaṁ vinayadharaṁ
paripucchāmīti .pe. Saccaṁ kira tvaṁ channa bhikkhūhi sahadhammikaṁ vuccamāno
evaṁ vadesi na tāvāhaṁ āvuso etasmiṁ sikkhāpade sikkhissāmi
yāva naññaṁ bhikkhuṁ byattaṁ vinayadharaṁ paripucchāmīti. Saccaṁ bhagavāti.
Vigarahi buddho bhagavā kathaṁ hi nāma tvaṁ moghapurisa bhikkhūhi
sahadhammikaṁ vuccamāno evaṁ vakkhasi na tāvāhaṁ āvuso etasmiṁ
sikkhāpade sikkhissāmi yāva naññaṁ bhikkhuṁ byattaṁ vinayadharaṁ
paripucchāmīti netaṁ moghapurisa appasannānaṁ vā pasādāya pasannānaṁ
vā bhiyyobhāvāya .pe. Evañca pana bhikkhave imaṁ sikkhāpadaṁ
uddiseyyātha yo pana bhikkhu bhikkhūhi sahadhammikaṁ vuccamāno evaṁ
Vadeyya na tāvāhaṁ āvuso etasmiṁ sikkhāpade sikkhissāmi
yāva naññaṁ bhikkhuṁ byattaṁ vinayadharaṁ paripucchāmīti pācittiyaṁ.
Sikkhamānena bhikkhave bhikkhunā aññātabbaṁ paripucchitabbaṁ
paripañhitabbaṁ. Ayaṁ tattha sāmīcīti.

[681] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Bhikkhūhīti aññehi bhikkhūhi.
Sahadhammikaṁ nāma yaṁ bhagavatā paññattaṁ sikkhāpadaṁ etaṁ sahadhammikaṁ
nāma. Tena vuccamāno evaṁ vadeti 1 na tāvāhaṁ āvuso
etasmiṁ sikkhāpade sikkhissāmi yāva naññaṁ bhikkhuṁ byattaṁ vinayadharaṁ
paṇḍitaṁ medhāviṁ bahussutaṁ dhammakathikaṁ paripucchāmīti bhaṇati āpatti
pācittiyassa.