[682] Upasampanne upasampannasaññī evaṁ vadeti āpatti
pācittiyassa. Upasampanne vematiko evaṁ vadeti āpatti
pācittiyassa. Upasampanne anupasampannasaññī evaṁ vadeti
āpatti pācittiyassa. Appaññattena vuccamāno idaṁ na
sallekhāya na dhūtattāya na pāsādikatāya na apacayāya na
viriyārambhāya saṁvattatīti evaṁ vadeti na tāvāhaṁ āvuso etasmiṁ
sikkhāpade sikkhissāmi yāva naññaṁ bhikkhuṁ byattaṁ vinayadharaṁ
paṇḍitaṁ medhāviṁ bahussutaṁ dhammakathikaṁ paripucchāmīti bhaṇati āpatti
dukkaṭassa. Anupasampannena paññattena vā appaññattena vā
1 Ma. Yu. vadeyya.
Vuccamāno idaṁ na sallekhāya na dhūtattāya na pāsādikatāya na
apacayāya na viriyārambhāya saṁvattatīti evaṁ vadeti na tāvāhaṁ
āvuso etasmiṁ sikkhāpade sikkhissāmi yāva naññaṁ bhikkhuṁ byattaṁ
vinayadharaṁ paṇḍitaṁ medhāviṁ bahussutaṁ dhammakathikaṁ paripucchāmīti bhaṇati
āpatti dukkaṭassa. Anupasampanne upasampannasaññī āpatti
dukkaṭassa. Anupasampanne vematiko āpatti dukkaṭassa.
Anupasampanne anupasampannasaññī āpatti dukkaṭassa.

[683] Sikkhamānenāti sikkhitukāmena. Aññātabbanti
jānitabbaṁ. Paripucchitabbanti idaṁ bhante kathaṁ imassa ko
atthoti 1 . Paripañhitabbanti cintetabbaṁ tulayitabbaṁ. Ayaṁ tattha
sāmīcīti ayaṁ tattha anudhammatā.

[684] Anāpatti jānissāmi sikkhissāmīti bhaṇati
ummattakassa ādikammikassāti.
Paṭhamasikkhāpadaṁ niṭṭhitaṁ.
-------
1 Ma. kvatthoti.
Dutiyasikkhāpadaṁ

[685] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena bhagavā
bhikkhūnaṁ anekapariyāyena vinayakathaṁ katheti vinayassa vaṇṇaṁ bhāsati
vinayapariyattiyā vaṇṇaṁ bhāsati ādissa ādissa āyasmato upālissa
vaṇṇaṁ bhāsati. Bhikkhū bhagavā kho anekapariyāyena vinayakathaṁ
katheti vinayassa vaṇṇaṁ bhāsati vinayapariyattiyā vaṇṇaṁ bhāsati
ādissa ādissa āyasmato upālissa vaṇṇaṁ bhāsati handa
mayaṁ āvuso āyasmato upālissa santike vinayaṁ pariyāpuṇāmāti.
Te ca bahū bhikkhū therā ca navā ca majjhimā ca āyasmato
upālissa santike vinayaṁ pariyāpuṇanti. Athakho chabbaggiyānaṁ
bhikkhūnaṁ etadahosi etarahi kho āvuso bahū bhikkhū therā ca
navā ca majjhimā ca āyasmato upālissa santike vinayaṁ
pariyāpuṇanti sace ime vinaye pakataññuno bhavissanti amhe
[1]- Yathicchakaṁ [2]- ākaḍḍhissanti parikaḍḍhissanti handa mayaṁ āvuso
vinayaṁ vivaṇṇemāti. Athakho chabbaggiyā bhikkhū bhikkhū upasaṅkamitvā
evaṁ vadenti 3 kiṁ panimehi khuddānukhuddakehi sikkhāpadehi uddiṭṭhehi
yāvadeva kukkuccāya vihesāya vilekhāya saṁvattantīti. Ye te
bhikkhū appicchā .pe. Te ujjhāyanti khīyanti vipācenti kathaṁ
1 Ma. yenicchakaṁ. 2 Ma. yāvadicchakaṁ. 3 Ma. Yu. vadanti.
Hi nāma chabbaggiyā bhikkhū vinayaṁ vivaṇṇessantīti .pe. Saccaṁ
kira tumhe bhikkhave vinayaṁ vivaṇṇethāti. Saccaṁ bhagavāti. Vigarahi
buddho bhagavā kathaṁ hi nāma tumhe moghapurisā vinayaṁ vivaṇṇessatha
netaṁ moghapurisā appasannānaṁ vā pasādāya pasannānaṁ vā
bhiyyobhāvāya .pe. Evañca pana bhikkhave imaṁ sikkhāpadaṁ uddiseyyātha
yo pana bhikkhu pātimokkhe uddissamāne evaṁ vadeyya kiṁ panimehi
khuddānukhuddakehi sikkhāpadehi uddiṭṭhehi yāvadeva kukkuccāya
vihesāya vilekhāya saṁvattantīti sikkhāpadavivaṇṇanake 1 pācittiyanti.

[686] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Pātimokkhe uddissamāneti
uddissante 2 vā uddisāpente vā sajjhāyaṁ vā karonte. Evaṁ
vadeyyāti kiṁ panimehi khuddānukhuddakehi sikkhāpadehi uddiṭṭhehi
yāvadeva kukkuccāya vihesāya vilekhāya saṁvattanti ye imaṁ
pariyāpuṇanti tesaṁ kukkuccaṁ hoti vihesā hoti vilekhā hoti ye
imaṁ na pariyāpuṇanti tesaṁ kukkuccaṁ na hoti vihesā na hoti
vilekhā na hoti anuddiṭṭhaṁ idaṁ varaṁ anuggahitaṁ idaṁ varaṁ
apariyāputaṁ 3 idaṁ varaṁ adhāritaṁ idaṁ varaṁ vinayo vā antaradhāyatu
ime vā bhikkhū apakataññuno hontūti upasampannassa vinayaṁ
vivaṇṇeti āpatti pācittiyassa.

[687] Upasampanne upasampannasaññī vinayaṁ vivaṇṇeti āpatti
1 Ma. sikkhāpadavivaṇṇake. 2 Ma. uddisante vā. 3 Ma. apariyāpuṭaṁ.
Pācittiyassa. Upasampanne vematiko vinayaṁ vivaṇṇeti āpatti
pācittiyassa. Upasampanne anupasampannasaññī vinayaṁ vivaṇṇeti
āpatti pācittiyassa. Aññaṁ dhammaṁ vivaṇṇeti āpatti
dukkaṭassa. Anupasampannassa vinayaṁ vā aññaṁ vā dhammaṁ
vivaṇṇeti āpatti dukkaṭassa. Anupasampanne upasampannasaññī
āpatti dukkaṭassa. Anupasampanne vematiko āpatti dukkaṭassa.
Anupasampanne anupasampannasaññī āpatti dukkaṭassa.

[688] Anāpatti na vivaṇṇetukāmo iṅgha tāva suttante
vā gāthāyo vā abhidhammaṁ vā pariyāpuṇassu pacchā vinayaṁ
pariyāpuṇissasīti bhaṇati ummattakassa ādikammikassāti.
Dutiyasikkhāpadaṁ niṭṭhitaṁ.
--------
Tatiyasikkhāpadaṁ

[689] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū anācāraṁ ācaritvā aññāṇakena āpannāti jānantūti
pātimokkhe uddissamāne evaṁ vadenti 1 idāneva kho mayaṁ jānāma
ayampi kira dhammo suttāgato suttapariyāpanno anvaḍḍhamāsaṁ
uddesaṁ āgacchatīti. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma chabbaggiyā bhikkhū
pātimokkhe uddissamāne evaṁ vakkhanti idāneva kho mayaṁ jānāma
ayampi kira dhammo suttāgato suttapariyāpanno anvaḍḍhamāsaṁ
uddesaṁ āgacchatīti .pe. Saccaṁ kira tumhe bhikkhave pātimokkhe
uddissamāne evaṁ vadetha idāneva kho mayaṁ jānāma ayampi
kira dhammo suttāgato suttapariyāpanno anvaḍḍhamāsaṁ uddesaṁ
āgacchatīti. Saccaṁ bhagavāti. Vigarahi buddho bhagavā kathaṁ hi
nāma tumhe moghapurisā pātimokkhe uddissamāne evaṁ vakkhatha
idāneva kho mayaṁ jānāma ayampi kira dhammo suttāgato
suttapariyāpanno anvaḍḍhamāsaṁ uddesaṁ āgacchatīti netaṁ moghapurisā
appasannānaṁ vā pasādāya pasannānaṁ vā bhiyyobhāvāya .pe.
Evañca pana bhikkhave imaṁ sikkhāpadaṁ uddiseyyātha yo pana bhikkhu
1 Ma. Yu. vadanti. evamuparipi.
Anvaḍḍhamāsaṁ pātimokkhe uddissamāne evaṁ vadeyya idāneva
kho ahaṁ jānāmi ayampi kira dhammo suttāgato suttapariyāpanno
anvaḍḍhamāsaṁ uddesaṁ āgacchatīti. Tañce bhikkhuṁ aññe bhikkhū
jāneyyuṁ nisinnapubbaṁ iminā bhikkhunā dvittikkhattuṁ pātimokkhe
uddissamāne ko pana vādo bhiyyoti na ca tassa bhikkhuno
aññāṇakena mutti atthi yañca tattha āpattiṁ āpanno
tañca yathādhammo kāretabbo uttariñcassa 1 moho āropetabbo
tassa te āvuso alābhā tassa te dulladdhaṁ yaṁ tvaṁ pātimokkhe
uddissamāne na sādhukaṁ aṭṭhikatvā manasikarosīti. Idaṁ tasmiṁ
mohanake pācittiyanti.

[690] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Anvaḍḍhamāsanti anūposathikaṁ.
Pātimokkhe uddissamāneti uddissante. Evaṁ vadeyyāti anācāraṁ
ācaritvā aññāṇakena āpannoti jānantūti pātimokkhe
uddissamāne evaṁ vadeti idāneva kho ahaṁ jānāmi ayampi
kira dhammo suttāgato suttapariyāpanno anvaḍḍhamāsaṁ uddesaṁ
āgacchatīti āpatti dukkaṭassa.

[691] Tañceti 2 mohetukāmaṁ bhikkhuṁ aññe bhikkhū jāneyyuṁ
nisinnapubbaṁ iminā bhikkhunā dvittikkhattuṁ pātimokkhe uddissamāne
1 Ma. Yu. uttari cassa. evamuparipi. 2 Ma. itisaddo natthi.
Ko pana vādo bhiyyoti na ca tassa bhikkhuno aññāṇakena
mutti atthi yañca tattha āpattiṁ āpanno tañca yathādhammo
kāretabbo uttariñcassa moho āropetabbo. Evañca
pana bhikkhave āropetabbo. Byattena bhikkhunā paṭibalena saṅgho
ñāpetabbo suṇātu me bhante saṅgho ayaṁ itthannāmo
bhikkhu pātimokkhe uddissamāne na sādhukaṁ aṭṭhikatvā 1 manasikaroti.
Yadi saṅghassa pattakallaṁ saṅgho itthannāmassa bhikkhuno mohaṁ
āropeyya. Esā ñatti. Suṇātu me bhante saṅgho ayaṁ
itthannāmo bhikkhu pātimokkhe uddissamāne na sādhukaṁ aṭṭhikatvā
manasikaroti. Saṅgho itthannāmassa bhikkhuno mohaṁ āropeti.
Yassāyasmato khamati itthannāmassa bhikkhuno mohassa āropanā
so tuṇhassa yassa nakkhamati so bhāseyya. Āropito
saṅghena itthannāmassa bhikkhuno moho. Khamati saṅghassa tasmā
tuṇhī. Evametaṁ dhārayāmīti.