[702] Anāpatti kenaci viheṭhiyamāno mokkhādhippāyo talasattikaṁ
uggirati ummattakassa ādikammikassāti.
Pañcamasikkhāpadaṁ niṭṭhitaṁ.
--------
Chaṭṭhasikkhāpadaṁ

[703] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū bhikkhuṁ amūlakena saṅghādisesena anuddhaṁsenti. Ye te bhikkhū
appicchā .pe. Te ujjhāyanti khīyanti vipācenti kathaṁ
hi nāma chabbaggiyā bhikkhū bhikkhuṁ amūlakena saṅghādisesena
anuddhaṁsessantīti .pe. Saccaṁ kira tumhe bhikkhave bhikkhuṁ amūlakena
saṅghādisesena anuddhaṁsethāti. Saccaṁ bhagavāti. Vigarahi buddho
bhagavā kathaṁ hi nāma tumhe moghapurisā bhikkhuṁ amūlakena
saṅghādisesena anuddhaṁsessatha netaṁ moghapurisā appasannānaṁ vā
pasādāya pasannānaṁ vā bhiyyobhāvāya .pe. Evañca pana bhikkhave
imaṁ sikkhāpadaṁ uddiseyyātha yo pana bhikkhu bhikkhuṁ amūlakena
saṅghādisesena anuddhaṁseyya pācittiyanti.

[704] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Bhikkhunti aññaṁ bhikkhuṁ.
Amūlakaṁ nāma adiṭṭhaṁ assutaṁ aparisaṅkitaṁ. Saṅghādisesenāti terasannaṁ
aññatarena. Anuddhaṁseyyāti codeti vā codāpeti vā āpatti
pācittiyassa.

[705] Upasampanne upasampannasaññī amūlakena saṅghādisesena
Anuddhaṁseti āpatti pācittiyassa. Upasampanne vematiko
amūlakena saṅghādisesena anuddhaṁseti āpatti pācittiyassa.
Upasampanne anupasampannasaññī amūlakena saṅghādisesena anuddhaṁseti
āpatti pācittiyassa. Ācāravipattiyā vā diṭṭhivipattiyā vā
anuddhaṁseti āpatti dukkaṭassa. Anupasampannaṁ anuddhaṁseti āpatti
dukkaṭassa. Anupasampanne upasampannasaññī āpatti dukkaṭassa.
Anupasampanne vematiko āpatti dukkaṭassa. Anupasampanne
anupasampannasaññī āpatti dukkaṭassa.

[706] Anāpatti tathāsaññī codeti vā codāpeti vā
ummattakassa ādikammikassāti.
Chaṭṭhasikkhāpadaṁ niṭṭhitaṁ.
-------
Sattamasikkhāpadaṁ

[707] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū sattarasavaggiyānaṁ bhikkhūnaṁ sañcicca kukkuccaṁ upadahanti
bhagavatā āvuso sikkhāpadaṁ paññattaṁ na ūnavīsativasso puggalo
upasampādetabboti tumhe ca ūnavīsativassā upasampannā kacci
no tumhe anupasampannāti. Te rodanti. Bhikkhū evamāhaṁsu
kissa tumhe āvuso rodathāti. Ime āvuso chabbaggiyā bhikkhū
amhākaṁ sañcicca kukkuccaṁ upadahantīti. Ye te bhikkhū appicchā
.pe. Te ujjhāyanti khīyanti vipācenti kathaṁ hi nāma chabbaggiyā
bhikkhū bhikkhūnaṁ sañcicca kukkuccaṁ upadahissantīti .pe. Saccaṁ kira
tumhe bhikkhave bhikkhūnaṁ sañcicca kukkuccaṁ upadahathāti. Saccaṁ
bhagavāti. Vigarahi buddho bhagavā kathaṁ hi nāma tumhe moghapurisā
bhikkhūnaṁ sañcicca kukkuccaṁ upadahissatha netaṁ moghapurisā appasannānaṁ
vā pasādāya pasannānaṁ vā bhiyyobhāvāya .pe. Evañca pana
bhikkhave imaṁ sikkhāpadaṁ uddiseyyātha yo pana bhikkhu bhikkhussa
sañcicca kukkuccaṁ upadaheyya itissa muhuttampi aphāsu bhavissatīti
etadeva paccayaṁ karitvā anaññaṁ pācittiyanti.

[708] Yo panāti yo yādiso .pe. Bhikkhūti .pe. Ayaṁ
Imasmiṁ atthe adhippeto bhikkhūti. Bhikkhussāti aññassa bhikkhussa.
Sañciccāti jānanto sañjānanto cecca abhivitaritvā vītikkamo.
Kukkuccaṁ upadaheyyāti ūnavīsativasso maññe tvaṁ upasampanno
vikāle maññe tayā bhuttaṁ majjaṁ maññe tayā pītaṁ mātugāmena
saddhiṁ raho maññe tayā nisinnanti kukkuccaṁ upadahati āpatti
pācittiyassa. Etadeva paccayaṁ karitvā anaññanti na añño
koci paccayo hoti kukkuccaṁ upadahituṁ.

[709] Upasampanne upasampannasaññī sañcicca kukkuccaṁ upadahati
āpatti pācittiyassa. Upasampanne vematiko sañcicca kukkuccaṁ
upadahati āpatti pācittiyassa. Upasampanne anupasampannasaññī
sañcicca kukkuccaṁ upadahati āpatti pācittiyassa. Anupasampannassa
sañcicca kukkuccaṁ upadahati āpatti dukkaṭassa. Anupasampanne
upasampannasaññī āpatti dukkaṭassa. Anupasampanne vematiko āpatti
dukkaṭassa. Anupasampanne anupasampannasaññī āpatti dukkaṭassa.

[710] Anāpatti kukkuccaṁ upadahitukāmo ūnavīsativasso maññe
tvaṁ upasampanno vikāle maññe tayā bhuttaṁ majjaṁ maññe tayā pītaṁ
mātugāmena saddhiṁ raho maññe tayā nisinnaṁ iṅgha jānāhi mā te
pacchā kukkuccaṁ ahosīti bhaṇati ummattakassa ādikammikassāti.
Sattamasikkhāpadaṁ niṭṭhitaṁ.
---------
Aṭṭhamasikkhāpadaṁ

[711] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū pesalehi bhikkhūhi saddhiṁ bhaṇḍanti. Pesalā bhikkhū evaṁ
vadenti alajjino ime āvuso chabbaggiyā bhikkhū na sakkā
imehi saha bhaṇḍitunti. Chabbaggiyā bhikkhū evaṁ vadenti kissa
tumhe āvuso amhe alajjivādena pāpethāti. Kahaṁ pana tumhe
āvuso assutthāti. Mayaṁ āyasmantānaṁ upassutiṁ tiṭṭhamhāti.
Ye te bhikkhū appicchā .pe. Te ujjhāyanti khīyanti vipācenti
kathaṁ hi nāma chabbaggiyā bhikkhū bhikkhūnaṁ bhaṇḍanajātānaṁ kalahajātānaṁ
vivādāpannānaṁ upassutiṁ tiṭṭhissantīti .pe. Saccaṁ kira tumhe
bhikkhave bhikkhūnaṁ bhaṇḍanajātānaṁ kalahajātānaṁ vivādāpannānaṁ upassutiṁ
tiṭṭhathāti. Saccaṁ bhagavāti. Vigarahi buddho bhagavā kathaṁ hi
nāma tumhe moghapurisā bhikkhūnaṁ bhaṇḍanajātānaṁ kalahajātānaṁ vivādāpannānaṁ
upassutiṁ tiṭṭhissatha netaṁ moghapurisā appasannānaṁ vā
pasādāya pasannānaṁ vā bhiyyobhāvāya .pe. Evañca pana bhikkhave
imaṁ sikkhāpadaṁ uddiseyyātha yo pana bhikkhu bhikkhūnaṁ bhaṇḍanajātānaṁ
kalahajātānaṁ vivādāpannānaṁ upassutiṁ tiṭṭheyya yaṁ ime bhaṇissanti
taṁ sossāmīti etadeva paccayaṁ karitvā anaññaṁ pācittiyanti.