[712] Yo panāti yo yādiso .pe. Bhikkhūti .pe.
Ayaṁ imasmiṁ atthe adhippeto bhikkhūti. Bhikkhūnanti aññesaṁ
bhikkhūnaṁ. Bhaṇḍanajātānaṁ kalahajātānaṁ vivādāpannānanti adhikaraṇajātānaṁ.
Upassutiṁ tiṭṭheyyāti imesaṁ sutvā codessāmi
sāressāmi paṭicodessāmi paṭisāressāmi maṅkuṁ 1 karissāmīti gacchati
āpatti dukkaṭassa. Yattha ṭhito suṇāti āpatti pācittiyassa.
Pacchato gacchanto turito gacchati sossāmīti āpatti dukkaṭassa.
Yattha ṭhito suṇāti āpatti pācittiyassa. Purato gacchanto
ohīyati sossāmīti āpatti dukkaṭassa. Yattha ṭhito suṇāti
āpatti pācittiyassa. Bhikkhussa ṭhitokāsaṁ vā nisinnokāsaṁ vā
nipannokāsaṁ vā āgantvā mantentaṁ ukkāsitabbaṁ vijānāpetabbaṁ.
No ce ukkāseyya vā vijānāpeyya vā āpatti pācittiyassa.
Etadeva paccayaṁ karitvā anaññanti na añño koci paccayo
hoti upassutiṁ tiṭṭhituṁ.

[713] Upasampanne upasampannasaññī upassutiṁ tiṭṭhati
āpatti pācittiyassa. Upasampanne vematiko upassutiṁ tiṭṭhati
āpatti pācittiyassa. Upasampanne anupasampannasaññī upassutiṁ
tiṭṭhati āpatti pācittiyassa. Anupasampannassa upassutiṁ tiṭṭhati
āpatti dukkaṭassa. Anupasampanne upasampannasaññī āpatti
dukkaṭassa. Anupasampanne vematiko āpatti dukkaṭassa.
1 Ma. maṅkū.
Anupasampanne anupasampannasaññī āpatti dukkaṭassa.

[714] Anāpatti imesaṁ sutvā oramissāmi viramissāmi
vūpasamissāmi 1 attānaṁ parimocessāmīti gacchati ummattakassa
ādikammikassāti.
Aṭṭhamasikkhāpadaṁ niṭṭhitaṁ.
--------
1 Sī. vūpasamessāmi.
Navamasikkhāpadaṁ

[715] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū anācāraṁ ācaritvā ekamekassa kamme kayiramāne paṭikkosanti.
Tena kho pana samayena saṅgho sannipatito hoti kenacideva
karaṇīyena. Chabbaggiyā bhikkhū cīvarakammaṁ karontā ekassa chandaṁ
adaṁsu. Athakho saṅgho ayaṁ āvuso chabbaggiyo bhikkhu ekako
āgato handassa mayaṁ kammaṁ karomāti tassa kammaṁ akāsi.
Athakho so bhikkhu yena chabbaggiyā bhikkhū tenupasaṅkami.
Chabbaggiyā bhikkhū taṁ bhikkhuṁ etadavocuṁ kiṁ āvuso saṅgho akāsīti.
Saṅgho me āvuso kammaṁ akāsīti. Na mayaṁ āvuso etadatthāya
chandaṁ adamhā tuyhaṁ kammaṁ karissatīti sace [1]- mayaṁ jāneyyāma
tuyhaṁ kammaṁ karissatīti na mayaṁ chandaṁ dadeyyāmāti. Ye te
bhikkhū appicchā .pe. Te ujjhāyanti khīyanti vipācenti kathaṁ
hi nāma chabbaggiyā bhikkhū dhammikānaṁ kammānaṁ chandaṁ datvā
pacchā khīyanadhammaṁ āpajjissantīti .pe. Saccaṁ kira tumhe
bhikkhave dhammikānaṁ kammānaṁ chandaṁ datvā pacchā khīyanadhammaṁ
āpajjathāti. Saccaṁ bhagavāti. Vigarahi buddho bhagavā kathaṁ hi
nāma tumhe moghapurisā dhammikānaṁ kammānaṁ chandaṁ datvā pacchā
1 Ma. ca.
Khīyanadhammaṁ āpajjissatha netaṁ moghapurisā appasannānaṁ vā pasādāya
pasannānaṁ vā bhiyyobhāvāya .pe. Evañca pana bhikkhave imaṁ
sikkhāpadaṁ uddiseyyātha yo pana bhikkhu dhammikānaṁ kammānaṁ chandaṁ
datvā pacchā khīyanadhammaṁ āpajjeyya pācittiyanti.

[716] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Dhammikaṁ nāma kammaṁ apalokanakammaṁ
ñattikammaṁ ñattidutiyakammaṁ ñatticatutthakammaṁ dhammena vinayena
satthu sāsanena kataṁ etaṁ dhammikaṁ nāma kammaṁ. Chandaṁ datvā
khīyati āpatti pācittiyassa.

[717] Dhammakamme dhammakammasaññī chandaṁ datvā khīyati
āpatti pācittiyassa. Dhammakamme vematiko chandaṁ datvā khīyati
āpatti dukkaṭassa. Dhammakamme adhammakammasaññī chandaṁ datvā
khīyati anāpatti. Adhammakamme dhammakammasaññī āpatti
dukkaṭassa. Adhammakamme vematiko āpatti dukkaṭassa.
Adhammakamme adhammakammasaññī anāpatti.

[718] Anāpatti adhammena vā vaggena vā na kammārahassa
vā kammaṁ katanti jānanto khīyati ummattakassa ādikammikassāti.
Navamasikkhāpadaṁ niṭṭhitaṁ.
-------
Dasamasikkhāpadaṁ

[719] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena saṅgho sannipatito
hoti kenacideva karaṇīyena. Chabbaggiyā bhikkhū cīvarakammaṁ
karontā ekassa chandaṁ adaṁsu. Athakho saṅgho yassatthāya
sannipatito taṁ kammaṁ karissāmāti ñattiṁ ṭhapesi. Athakho so
bhikkhu evamevime ekamekassa kammaṁ karonti kassa tumhe
kammaṁ karissathāti chandaṁ adatvā uṭṭhāyāsanā pakkāmi. Ye
te bhikkhū appicchā .pe. Te ujjhāyanti khīyanti vipācenti
kathaṁ hi nāma bhikkhu saṅghe vinicchayakathāya vattamānāya chandaṁ
adatvā uṭṭhāyāsanā pakkamissatīti .pe. Saccaṁ kira tvaṁ bhikkhu
saṅghe vinicchayakathāya vattamānāya chandaṁ adatvā uṭṭhāyāsanā
pakkamasīti. Saccaṁ bhagavāti. Vigarahi buddho bhagavā kathaṁ hi
nāma tvaṁ moghapurisa saṅghe vinicchayakathāya vattamānāya chandaṁ
adatvā uṭṭhāyāsanā pakkamissasi netaṁ moghapurisa appasannānaṁ
vā pasādāya pasannānaṁ vā bhiyyobhāvāya .pe. Evañca pana
bhikkhave imaṁ sikkhāpadaṁ uddiseyyātha yo pana bhikkhu saṅghe
vinicchayakathāya vattamānāya chandaṁ adatvā uṭṭhāyāsanā pakkameyya
pācittiyanti.

[720] Yo panāti yo yādiso .pe. Bhikkhūti .pe.
Ayaṁ imasmiṁ atthe adhippeto bhikkhūti. Saṅghe vinicchayakathā
nāma vatthu vā ārocitaṁ hoti avinicchitaṁ ñatti vā ṭhapitā
hoti kammavācā vā vippakatā hoti. Chandaṁ adatvā
uṭṭhāyāsanā pakkameyyāti kathaṁ idaṁ kammaṁ kuppaṁ assa vaggaṁ
assa na kareyyāti gacchati āpatti dukkaṭassa. Parisāya
hatthapāsaṁ vijahantassa āpatti dukkaṭassa. Vijahite āpatti
pācittiyassa.

[721] Dhammakamme dhammakammasaññī chandaṁ adatvā
uṭṭhāyāsanā pakkamati āpatti pācittiyassa. Dhammakamme vematiko
chandaṁ adatvā uṭṭhāyāsanā pakkamati āpatti dukkaṭassa.
Dhammakamme adhammakammasaññī chandaṁ adatvā uṭṭhāyāsanā pakkamati
anāpatti. Adhammakamme dhammakammasaññī āpatti dukkaṭassa.
Adhammakamme vematiko āpatti dukkaṭassa. Adhammakamme
adhammakammasaññī anāpatti.