[1064] Pañcimāni bhikkhave indriyāni bhāvitāni bahulīkatāni
anusayasamugghātāya saṁvattanti. Katamāni pañca. Saddhindriyaṁ
.pe. Paññindriyaṁ. Imāni kho bhikkhave pañcindriyāni bhāvitāni
bahulīkatāni anusayasamugghātāya saṁvattantīti.

[1065] Pañcimāni bhikkhave indriyāni bhāvitāni bahulīkatāni
addhānapariññāya saṁvattanti. Katamāni pañca. Saddhindriyaṁ
.pe. Paññindriyaṁ. Imāni kho bhikkhave pañcindriyāni bhāvitāni
bahulīkatāni addhānapariññāya saṁvattantīti.

[1066] Pañcimāni bhikkhave indriyāni bhāvitāni bahulīkatāni
āsavānaṁ khayāya saṁvattanti. Katamāni pañca. Saddhindriyaṁ
.pe. Paññindriyaṁ. Imāni kho bhikkhave pañcindriyāni
bhāvitāni bahulīkatāni āsavānaṁ khayāya saṁvattantīti.

[1067] Pañcimāni bhikkhave indriyāni bhāvitāni bahulīkatāni
saññojanānaṁ pahānāya saṁvattanti anusayasamugghātāya saṁvattanti
1 Ma. saṁñojanappahānāya. evamupari.
Addhānapariññāya saṁvattanti āsavānaṁ khayāya saṁvattanti.
Katamāni pañca. Saddhindriyaṁ .pe. Paññindriyaṁ. Imāni
kho bhikkhave pañcindriyāni bhāvitāni bahulīkatāni saññojanānaṁ
pahānāya saṁvattanti anusayasamugghātāya saṁvattanti addhānapariññāya
saṁvattanti āsavānaṁ khayāya saṁvattantīti.

[1068] Pañcimāni bhikkhave indriyāni. Katamāni pañca.
Saddhindriyaṁ .pe. Paññindriyaṁ. Imāni kho bhikkhave
pañcindriyāni. Imesaṁ kho bhikkhave pañcannaṁ indriyānaṁ bhāvitattā
bahulīkatattā dvinnaṁ phalānaṁ aññataraṁ phalaṁ pāṭikaṅkhaṁ diṭṭheva
dhamme aññā sati vā upādisese anāgāmitāti.

[1069] Pañcimāni bhikkhave indriyāni. Katamāni pañca.
Saddhindriyaṁ .pe. Paññindriyaṁ. Imāni kho bhikkhave
pañcindriyāni. Imesaṁ kho bhikkhave pañcannaṁ indriyānaṁ bhāvitattā
bahulīkatattā satta phalā sattānisaṁsā pāṭikaṅkhā. Katame satta
phalā sattānisaṁsā. Diṭṭheva dhamme paṭikacca aññaṁ ārādheti no
ce diṭṭheva dhamme paṭikacca aññaṁ ārādheti atha maraṇakāle
aññaṁ ārādheti no ce diṭṭheva dhamme paṭikacca aññaṁ
ārādheti no ce maraṇakāle aññaṁ ārādheti. Atha pañcannaṁ
orambhāgiyānaṁ saññojanānaṁ parikkhayāya antarāparinibbāyī hoti
upahaccaparinibbāyī hoti asaṅkhāraparinibbāyī hoti sasaṅkhāraparinibbāyī
Hoti uddhaṁsoto hoti akaniṭṭhagāmī. Imesaṁ kho
bhikkhave pañcannaṁ indriyānaṁ bhāvitattā bahulīkatattā ime satta
phalā sattānisaṁsā pāṭikaṅkhāti.

[1070] Seyyathāpi bhikkhave ye keci jambudīpakā rukkhā jambū
tesaṁ aggamakkhāyati. Evameva kho bhikkhave ye keci bodhipakkhiyā
dhammā paññindriyaṁ tesaṁ aggamakkhāyati yadidaṁ bodhāya.

[1071] Katame ca bhikkhave bodhipakkhiyā dhammā. Saddhindriyaṁ
bhikkhave bodhipakkhiyo dhammo taṁ bodhāya saṁvattati. Viriyindriyaṁ
satindriyaṁ samādhindriyaṁ paññindriyaṁ bodhipakkhiyo dhammo taṁ
bodhāya saṁvattati.

[1072] Seyyathāpi bhikkhave ye keci jambudīpakā rukkhā jambū
tesaṁ aggamakkhāyati. Evameva kho bhikkhave ye keci bodhipakkhiyā
dhammā paññindriyaṁ tesaṁ aggamakkhāyati yadidaṁ bodhāyāti.

[1073] Seyyathāpi bhikkhave ye keci devānaṁ tāvatiṁsānaṁ rukkhā
pāricchattako tesaṁ aggamakkhāyati. Evameva kho bhikkhave
ye keci bodhipakkhiyā dhammā paññindriyaṁ tesaṁ aggamakkhāyati yadidaṁ
bodhāya.