[1044] Ekadhamme patiṭṭhitassa bhikkhave bhikkhuno pañcindriyāni
bhāvitāni honti subhāvitāni. Katamasmiṁ ekadhamme. Appamāde.

[1045] Katamo ca bhikkhave appamādo. Idha bhikkhave bhikkhu
cittaṁ rakkhati āsavesu ca sāsavesu ca dhammesu. Tassa cittaṁ
rakkhato āsavesu ca sāsavesu ca dhammesu saddhindriyaṁpi bhāvanāpāripūriṁ
gacchati viriyindriyaṁpi bhāvanāpāripūriṁ gacchati satindriyaṁpi
bhāvanāpāripūriṁ gacchati samādhindriyaṁpi bhāvanāpāripūriṁ gacchati
paññindriyaṁpi bhāvanāpāripūriṁ gacchati.

[1046] Evaṁpi kho bhikkhave ekadhamme patiṭṭhitassa bhikkhuno
pañcindriyāni bhāvitāni honti subhāvitānīti.

[1047] Evamme sutaṁ ekaṁ samayaṁ bhagavā uruvelāyaṁ viharati
najjā nerañjarāya tīre ajapālanigrodhe paṭhamābhisambuddho. Atha
Kho bhagavato rahogatassa paṭisallīnassa evaṁ cetaso parivitakko
udapādi pañcindriyāni bhāvitāni bahulīkatāni amatogadhāni honti
amataparāyanāni amatapariyosānāni. Katamāni pañca. Saddhindriyaṁ
bhāvitaṁ bahulīkataṁ amatogadhaṁ hoti amataparāyanaṁ amatapariyosānaṁ.
Viriyindriyaṁ satindriyaṁ samādhindriyaṁ paññindriyaṁ bhāvitaṁ bahulīkataṁ
amatogadhaṁ hoti amataparāyanaṁ amatapariyosānaṁ. Imāni
pañcindriyāni bhāvitāni bahulīkatāni amatogadhāni honti amataparāyanāni
amatapariyosānānīti.

[1048] Atha kho brahmā sahampati bhagavato cetasā
cetoparivitakkamaññāya seyyathāpi nāma balavā puriso sammiñjitaṁ vā
bāhaṁ pasāreyya pasāritaṁ vā bāhaṁ sammiñjeyya evameva
brahmaloke antarahito bhagavato purato pāturahosi.

[1049] Atha kho brahmā sahampati ekaṁsaṁ uttarāsaṅgaṁ karitvā
yena bhagavā tenañjalimpaṇāmetvā bhagavantaṁ etadavoca evametaṁ
bhagavā evametaṁ sugata pañcindriyāni bhāvitāni bahulīkatāni
amatogadhāni honti amataparāyanāni amatapariyosānāni. Katamāni
pañca. Saddhindriyaṁ bhāvitaṁ bahulīkataṁ amatogadhaṁ hoti amataparāyanaṁ
amatapariyosānaṁ .pe. Paññindriyaṁ bhāvitaṁ bahulīkataṁ amatogadhaṁ hoti
amataparāyanaṁ amatapariyosānaṁ. Imāni pañcindriyāni bhāvitāni
bahulīkatāni amatogadhāni honti amataparāyanāni amatapariyosānāni.

[1050] Bhūtapubbāhaṁ bhante kassape sammāsambuddhe brahmacariyaṁ
acariṁ tatrapi maṁ evaṁ jānanti sahako bhikkhu sahako bhikkhūti.
So khvāhaṁ bhante imesaṁyeva pañcannaṁ indriyānaṁ bhāvitattā
bahulīkatattā kāmesu kāmacchandaṁ virājetvā kāyassa bhedā paraṁ
maraṇā sugatiṁ brahmalokaṁ upapanno tatrapi maṁ evaṁ jānanti
brahmā sahampati brahmā sahampatīti.

[1051] Evametaṁ bhagavā evametaṁ sugata ahametaṁ jānāmi
ahametaṁ passāmi yathā imāni pañcindriyāni bhāvitāni bahulīkatāni
amatogadhāni honti amataparāyanāni amatapariyosānānīti.

[1052] Ekaṁ samayaṁ bhagavā rājagahe viharati gijjhakūṭe pabbate
sūkarakhātāyaṁ. Tatra kho bhagavā āyasmantaṁ sārīputtaṁ āmantesi kiṁ
nu kho sārīputta atthavasaṁ sampassamāno khīṇāsavo bhikkhu tathāgate
vā tathāgatasāsane vā paramanipaccakāraṁ pavattamāno pavattatīti 1 .

[1053] Anuttaraṁ hi bhante yogakkhemaṁ sampassamāno khīṇāsavo
bhikkhu tathāgate vā tathāgatasāsane vā paramanipaccakāraṁ pavattamāno
pavattatīti.