[1024] Seyyathāpi bhikkhave ye keci tiracchānagatā pāṇā
sīho migarājā tesaṁ aggamakkhāyati yadidaṁ thāmena javena sūriyena 2 .
Evameva kho bhikkhave ye keci bodhipakkhiyā dhammā paññindriyaṁ
tesaṁ aggamakkhāyati yadidaṁ bodhāya.

[1025] Katame ca bhikkhave bodhipakkhiyā dhammā. Saddhindriyaṁ
bhikkhave bodhipakkhiyo dhammo taṁ bodhāya saṁvattati. Viriyindriyaṁ
bodhipakkhiyo dhammo taṁ bodhāya saṁvattati. Satindriyaṁ bodhipakkhiyo
dhammo taṁ bodhāya saṁvattati. Samādhindriyaṁ bodhipakkhiyo
dhammo taṁ bodhāya saṁvattati. Paññindriyaṁ bodhipakkhiyo dhammo taṁ
bodhāya saṁvattati.

[1026] Seyyathāpi bhikkhave ye keci tiracchānagatā pāṇā
sīho migarājā tesaṁ aggamakkhāyati yadidaṁ thāmena javena sūriyena.
Evameva kho bhikkhave ye keci bodhipakkhiyā dhammā paññindriyaṁ
tesaṁ aggamakkhāyati yadidaṁ bodhāyāti.

[1027] Evamme sutaṁ ekaṁ samayaṁ bhagavā mallakesu 3 viharati
1 Ma. sālāya. Yu. sālāyaṁ. 2 Ma. Yu. sūrena. evamupari. 3 Ma. Yu. mallikesu.
Uruvelakappaṁ nāma mallakānaṁ 1 nigamo. Tatra kho bhagavā bhikkhū
āmantesi

[1028] Yāvakīvañca bhikkhave ariyasāvakassa ariyañāṇaṁ na
uppannaṁ hoti neva tāva catunnaṁ indriyānaṁ saṇṭhiti hoti neva
tāva catunnaṁ indriyānaṁ avaṭṭhiti hoti. Yato ca kho bhikkhave
ariyasāvakassa ariyañāṇaṁ uppannaṁ hoti atha catunnaṁ indriyānaṁ
saṇṭhiti hoti atha catunnaṁ indriyānaṁ avaṭṭhiti hoti.

[1029] Seyyathāpi bhikkhave yāvakīvañca kūṭāgārassa kūṭaṁ na
ussitaṁ hoti neva tāva gopānasīnaṁ saṇṭhiti hoti neva tāva
gopānasīnaṁ avaṭṭhiti hoti. Yato ca kho bhikkhave kūṭāgārassa
kūṭaṁ ussitaṁ hoti atha kho 2 gopānasīnaṁ saṇṭhiti hoti atha kho
gopānasīnaṁ avaṭṭhiti hoti. Evameva kho bhikkhave yāvakīvañca
ariyasāvakassa ariyañāṇaṁ na uppannaṁ hoti neva tāva catunnaṁ
indriyānaṁ saṇṭhiti hoti neva tāva catunnaṁ indriyānaṁ avaṭṭhiti
hoti. Yato ca kho bhikkhave ariyasāvakassa ariyañāṇaṁ uppannaṁ hoti
atha catunnaṁ indriyānaṁ .pe. Avaṭṭhiti hoti. Katamesaṁ catunnaṁ.
Saddhindriyassa viriyindriyassa satindriyassa samādhindriyassa.

[1030] Paññavato bhikkhave ariyasāvakassa tadanvayā saddhā
saṇṭhāti tadanvayaṁ viriyaṁ saṇṭhāti tadanvayā sati saṇṭhāti
tadanvayo samādhi saṇṭhātīti.
1 Ma. Yu. mallikānaṁ. 2 Ma. khosaddo natthi. evamupari.

[1031] Evamme sutaṁ ekaṁ samayaṁ bhagavā kosambiyaṁ viharati
ghositārāme. Tatra kho bhagavā bhikkhū āmantesi atthi nu
kho bhikkhave pariyāyo yaṁ pariyāyaṁ āgamma sekkho bhikkhu
sekkhabhūmiyaṁ saṇṭhito 1 sekkhosmīti pajāneyya asekkho bhikkhu
asekkhabhūmiyaṁ saṇṭhito asekkhosmīti pajāneyyāti. Bhagavaṁmūlakā
no bhante dhammā .pe.

[1032] Atthi bhikkhave pariyāyo yaṁ pariyāyaṁ āgamma sekkho
bhikkhu sekkhabhūmiyaṁ saṇṭhito sekkhosmīti pajāneyya asekkho bhikkhu
asekkhabhūmiyaṁ saṇṭhito asekkhosmīti pajāneyya.

[1033] Katamo ca bhikkhave pariyāyo yaṁ pariyāyaṁ āgamma
sekkho bhikkhu sekkhabhūmiyaṁ saṇṭhito sekkhosmīti pajānāti. Idha
bhikkhave sekkho bhikkhu idaṁ dukkhanti yathābhūtaṁ pajānāti ayaṁ
dukkhasamudayoti yathābhūtaṁ pajānāti ayaṁ dukkhanirodhoti yathābhūtaṁ
pajānāti ayaṁ dukkhanirodhagāminī paṭipadāti yathābhūtaṁ pajānāti.
Ayaṁpi kho bhikkhave pariyāyo yaṁ pariyāyaṁ āgamma sekkho bhikkhu
sekkhabhūmiyaṁ saṇṭhito sekkhosmīti pajānāti.