[1004] Atha kho sambahulā bhikkhū yena bhagavā tenupasaṅkamiṁsu
upasaṅkamitvā bhagavantaṁ abhivādetvā ekamantaṁ nisīdiṁsu. Ekamantaṁ
nisinnā kho te bhikkhū bhagavantaṁ etadavocuṁ āyasmatā bhante
piṇḍolabhāradvājena aññā byākatā khīṇā jāti vusitaṁ brahmacariyaṁ
kataṁ karaṇīyaṁ nāparaṁ itthattāyāti pajānāmīti.

[1005] Kiṁ nu kho bhante atthavasaṁ sampassamānena āyasmatā
piṇḍolabhāradvājena aññā byākatā khīṇā jāti vusitaṁ brahmacariyaṁ
kataṁ karaṇīyaṁ nāparaṁ itthattāyāti pajānāmīti.

[1006] Tiṇṇaṁ kho [1]- bhikkhave indriyānaṁ bhāvitattā bahulīkatattā
piṇḍolabhāradvājena bhikkhunā aññā byākatā khīṇā jāti
vusitaṁ brahmacariyaṁ kataṁ karaṇīyaṁ nāparaṁ itthattāyāti pajānāmīti.

[1007] Katamesaṁ tiṇṇaṁ. Satindriyassa samādhindriyassa
paññindriyassa.
1 Ma. Yu. pana.

[1008] Imesaṁ kho bhikkhave tiṇṇaṁ indriyānaṁ bhāvitattā bahulīkatattā
piṇḍolabhāradvājena bhikkhunā aññā byākatā khīṇā jāti
vusitaṁ brahmacariyaṁ kataṁ karaṇīyaṁ nāparaṁ itthattāyāti pajānāmīti.

[1009] Imāni ca bhikkhave tīṇi indriyāni kimantāni.
Khayantāni. Kissa khayantāni. Jātijarāmaraṇassa. Jātijarāmaraṇakkhayanti
kho bhikkhave sampassamānena piṇḍolabhāradvājena
bhikkhunā aññā byākatā khīṇā jāti vusitaṁ brahmacariyaṁ kataṁ
karaṇīyaṁ nāparaṁ itthattāyāti pajānāmīti.

[1010] Evamme sutaṁ ekaṁ samayaṁ bhagavā aṅgesu viharati
āpaṇannāma aṅgānaṁ nigamo. Tatra kho bhagavā āyasmantaṁ
sārīputtaṁ āmantesi yo so sārīputta ariyasāvako tathāgate
ekantagato abhippasanno na 1 so tathāgate vā tathāgatasāsane
vā kaṅkheyya vā vicikiccheyya vāti.

[1011] Yo so bhante ariyasāvako tathāgate ekantagato
abhippasanno na so tathāgate vā tathāgatasāsane vā kaṅkheyya
vā vicikiccheyya vā. Saddhassa hi bhante ariyasāvakassa etaṁ
pāṭikaṅkhaṁ yaṁ āraddhaviriyo viharissati akusalānaṁ dhammānaṁ pahānāya
kusalānaṁ dhammānaṁ upasampadāya thāmavā daḷhaparakkamo anikkhittadhuro
kusalesu dhammesu.

[1012] Yañhissa bhante viriyaṁ tadassa viriyindriyaṁ. Saddhassa
1 Yu. apinu so.
Hi bhante ariyasāvakassa āraddhaviriyassa etaṁ pāṭikaṅkhaṁ yaṁ satimā
bhavissati paramena satinepakkena samannāgato cirakatampi cirabhāsitampi
saritā anussaritā.

[1013] Yā hissa bhante sati tadassa satindriyaṁ. Saddhassa
hi bhante ariyasāvakassa āraddhaviriyassa upaṭṭhitassatino etaṁ pāṭikaṅkhaṁ
yaṁ vossaggārammaṇaṁ karitvā labhissati samādhiṁ labhissati
cittassa ekaggataṁ.