[1034] Puna caparaṁ bhikkhave sekkho bhikkhu iti paṭisañcikkhati
atthi nu kho ito bahiddhā añño samaṇo vā brāhmaṇo
vā yo evaṁ bhūtaṁ tacchaṁ tathaṁ dhammaṁ deseti yathā bhagavāti.
So evaṁ pajānāti natthi nu kho ito bahiddhā añño samaṇo
1 Ma. Yu. ṭhito. evamupari.
Vā brāhmaṇo vā yo evaṁ bhūtaṁ tacchaṁ tathaṁ dhammaṁ deseti
yathā bhagavāti. Ayaṁpi kho bhikkhave pariyāyo yaṁ pariyāyaṁ āgamma
sekkho bhikkhu sekkhabhūmiyaṁ saṇṭhito sekkhosmīti pajānāti.

[1035] Puna caparaṁ bhikkhave sekkho bhikkhu pañcindriyāni
pajānāti saddhindriyaṁ viriyindriyaṁ satindriyaṁ samādhindriyaṁ
paññindriyaṁ. Yaṁgatikāni yaṁparamāni yaṁphalāni yaṁpariyosānāni na heva kho
kāyena phusitvā viharati paññāya ca ativijjha passati. Ayaṁpi
kho bhikkhave pariyāyo yaṁ pariyāyaṁ āgamma sekkho bhikkhu sekkhabhūmiyaṁ
saṇṭhito sekkhosmīti pajānāti.

[1036] Katamo ca bhikkhave pariyāyo yaṁ pariyāyaṁ āgamma
asekkho bhikkhu asekkhabhūmiyaṁ saṇṭhito asekkhosmīti pajānāti.
Idha bhikkhave asekkho bhikkhu pañcindriyāni pajānāti. Saddhindriyaṁ
viriyindriyaṁ satindriyaṁ samādhindriyaṁ paññindriyaṁ. Yaṁgatikāni yaṁparamāni
yaṁphalāni yaṁpariyosānāni kāyena ca phusitvā viharati paññāya ca
ativijjha passati. Ayaṁpi kho bhikkhave pariyāyo yaṁ pariyāyaṁ
āgamma asekkho bhikkhu asekkhabhūmiyaṁ saṇṭhito asekkhosmīti
pajānāti.

[1037] Puna caparaṁ bhikkhave asekkho bhikkhu cha indriyāni
pajānāti cakkhundriyaṁ sotindriyaṁ ghānindriyaṁ jivhindriyaṁ kāyindriyaṁ
manindriyaṁ. Imāni kho cha indriyāni sabbena sabbaṁ sabbathā
Sabbaṁ aparisesā nirujjhissanti aññāni ca cha indriyāni na
kuhiñci kismiñci uppajjissantīti pajānāti. Ayaṁpi kho bhikkhave
pariyāyo yaṁ pariyāyaṁ āgamma asekkho bhikkhu asekkhabhūmiyaṁ
saṇṭhito asekkhosmīti pajānātīti.

[1038] Seyyathāpi bhikkhave yāni kānici jaṅgalānaṁ pāṇānaṁ
padajātāni sabbāni tāni hatthipade samodhānaṁ gacchanti hatthipadaṁ
tesaṁ aggamakkhāyati yadidaṁ mahantattena. Evameva kho bhikkhave
yāni kānici padāni bodhāya saṁvattanti paññindriyaṁ padaṁ tesaṁ
aggamakkhāyati yadidaṁ bodhāya.

[1039] Katamāni ca bhikkhave padāni bodhāya saṁvattanti.
Saddhindriyaṁ bhikkhave padaṁ taṁ bodhāya saṁvattati. Viriyindriyaṁ padaṁ taṁ
bodhāya saṁvattati. Satindriyaṁ padaṁ taṁ bodhāya saṁvattati. Samādhindriyaṁ
padaṁ taṁ bodhāya saṁvattati. Paññindriyaṁ padaṁ taṁ bodhāya saṁvattati.

[1040] Seyyathāpi bhikkhave yāni kānici jaṅgalānaṁ pāṇānaṁ
padajātāni sabbāni tāni hatthipade samodhānaṁ gacchanti hatthipadaṁ
tesaṁ aggamakkhāyati yadidaṁ mahantattena. Evameva kho bhikkhave
yāni kānici padāni bodhāya saṁvattanti paññindriyaṁ padaṁ tesaṁ
aggamakkhāyati yadidaṁ bodhāyāti.

[1041] Seyyathāpi bhikkhave ye keci sāragandhā lohitacandanaṁ
tesaṁ aggamakkhāyati. Evameva kho bhikkhave ye keci bodhipakkhiyā
Dhammā paññindriyaṁ tesaṁ aggamakkhāyati yadidaṁ bodhāya.

[1042] Katame ca bhikkhave bodhipakkhiyā dhammā. Saddhindriyaṁ
bhikkhave bodhipakkhiyo dhammo taṁ bodhāya saṁvattati. Viriyindriyaṁ
satindriyaṁ samādhindriyaṁ paññindriyaṁ bodhipakkhiyo dhammo taṁ
bodhāya saṁvattati.

[1043] Seyyathāpi bhikkhave ye keci sāragandhā lohitacandanaṁ
tesaṁ aggamakkhāyati. Evameva kho bhikkhave ye keci bodhipakkhiyā
dhammā paññindriyaṁ tesaṁ aggamakkhāyati yadidaṁ bodhāyāti.