[1054] Sādhu sādhu sārīputta anuttarañhi sārīputta yogakkhemaṁ
sampassamāno khīṇāsavo bhikkhu tathāgate vā tathāgatasāsane vā
paramanipaccakāraṁ pavattamāno pavattati.

[1055] Katamo ca sārīputta anuttaro yogakkhemo yaṁ
1 Po. Yu. pavattetīti. evamupari.
Sampassamāno khīṇāsavo bhikkhu tathāgate vā tathāgatasāsane vā
paramanipaccakāraṁ pavattamāno pavattatīti.

[1056] Idha bhante khīṇāsavo bhikkhu saddhindriyaṁ bhāveti upasamagāmiṁ
sambodhagāmiṁ viriyindriyaṁ bhāveti. Satindriyaṁ bhāveti.
Samādhindriyaṁ bhāveti. Paññindriyaṁ bhāveti upasamagāmiṁ sambodhagāmiṁ.
Ayaṁ kho bhante anuttaro yogakkhemo yaṁ sampassamāno
khīṇāsavo bhikkhu tathāgate vā tathāgatasāsane vā paramanipaccakāraṁ
pavattamāno pavattatīti.

[1057] Sādhu sādhu sārīputta eso hi sārīputta anuttaro
yogakkhemo yaṁ sampassamāno khīṇāsavo bhikkhu tathāgate vā
tathāgatasāsane vā paramanipaccakāraṁ pavattamāno pavattati.

[1058] Katamo ca sārīputta paramanipaccakāro yaṁ khīṇāsavo
bhikkhu tathāgate vā tathāgatasāsane vā paramanipaccakāraṁ pavattamāno
pavattatīti.

[1059] Idha bhante khīṇāsavo bhikkhu satthari sagāravo viharati
sappaṭisso dhamme sagāravo viharati sappaṭisso saṅghe sagāravo
viharati sappaṭisso sikkhāya sagāravo viharati sappaṭisso samādhismiṁ
sagāravo viharati sappaṭisso. Ayaṁ kho bhante paramanipaccakāro yaṁ
khīṇāsavo bhikkhu tathāgate vā tathāgatasāsane vā paramanipaccakāraṁ
pavattamāno pavattatīti.

[1060] Sādhu sādhu sārīputta eso hi sārīputta paramanipaccakāro
yaṁ khīṇāsavo bhikkhu tathāgate vā tathāgatasāsane vā
paramanipaccakāraṁ pavattamāno pavattatīti.

[1061] Sāvatthīnidānaṁ. Pañcimāni bhikkhave indriyāni bhāvitāni
bahulīkatāni anuppannāni uppajjanti nāññatra tathāgatassa pātubhāvā
arahato sammāsambuddhassa. Katamāni pañca. Saddhindriyaṁ viriyindriyaṁ
satindriyaṁ samādhindriyaṁ paññindriyaṁ. Imāni kho bhikkhave
pañcindriyāni bhāvitāni bahulīkatāni anuppannāni uppajjanti
nāññatra tathāgatassa pātubhāvā arahato sammāsambuddhassāti.

[1062] Pañcimāni bhikkhave indriyāni bhāvitāni bahulīkatāni
anuppannāni uppajjanti nāññatra sugatavinayā. Katamāni pañca.
Saddhindriyaṁ viriyindriyaṁ satindriyaṁ samādhindriyaṁ paññindriyaṁ.
Imāni kho bhikkhave pañcindriyāni bhāvitāni bahulīkatāni anuppannāni
uppajjanti nāññatra sugatavinayāti.
Vaggo chaṭṭho.
Tassuddānaṁ
sālaṁ mallakaṁ sekkho ca pade sāre patiṭṭhito
brahmasūkarakhātāyo uppāde apare duveti.
---------
Bodhipakkhiyavaggo sattamo

[1063] Sāvatthīnidānaṁ. Pañcimāni bhikkhave indriyāni bhāvitāni
bahulīkatāni saññojanānaṁ pahānāya 1 saṁvattanti. Katamāni pañca.
Saddhindriyaṁ .pe. Paññindriyaṁ. Imāni kho bhikkhave pañcindriyāni
bhāvitāni bahulīkatāni saññojanānaṁ pahānāya saṁvattantīti.