[1084] Pañcimāni bhikkhave uddhambhāgiyāni saññojanāni.
Katamāni pañca. Rūparāgo arūpāgo māno uddhaccaṁ avijjā.
Imāni kho bhikkhave pañcuddhambhāgiyāni saññojanāni.

[1085] Imesaṁ kho bhikkhave pañcannaṁ uddhambhāgiyānaṁ
saññojanānaṁ abhiññāya pariññāya parikkhayāya pahānāya pañcindriyāni
bhāvetabbāni. Katamāni pañca. Idha bhikkhave bhikkhu saddhindriyaṁ
Bhāveti vivekanissitaṁ virāganissitaṁ nirodhanissitaṁ vossaggapariṇāmiṁ
.pe. Paññindriyaṁ bhāveti vivekanissitaṁ virāganissitaṁ nirodhanissitaṁ
vossaggapariṇāmiṁ. Imesaṁ kho bhikkhave pañcannaṁ uddhambhāgiyānaṁ
saññojanānaṁ abhiññāya pariññāya parikkhayāya pahānāya imāni
pañcindriyāni bhāvetabbānīti. (yathā maggasaṁyuttaṁ vitthāritaṁ tathā
vitthāretabbaṁ vivekanissitaṁ).

[1086] Seyyathāpi bhikkhave gaṅgā nadī pācīnaninnā pācīnapoṇā
pācīnapabbhārā. Evameva kho bhikkhave bhikkhu pañcindriyāni bhāvento
pañcindriyāni bahulīkaronto nibbānaninno hoti nibbānapoṇo
nibbānapabbhāro.

[1087] Kathañca bhikkhave bhikkhu pañcindriyāni bhāvento
pañcindriyāni bahulīkaronto nibbānaninno hoti nibbānapoṇo
nibbānapabbhāro. Idha bhikkhave bhikkhu saddhindriyaṁ bhāveti
rāgavinayapariyosānaṁ dosavinayapariyosānaṁ mohavinayapariyosānaṁ .pe.
Paññindriyaṁ bhāveti rāgavinayapariyosānaṁ dosavinayapariyosānaṁ
mohavinayapariyosānaṁ. Evaṁ kho bhikkhave bhikkhu pañcindriyāni bhāvento
pañcindriyāni bahulīkaronto nibbānaninno hoti nibbānapoṇo
nibbānapabbhāroti.

[1088] Pañcimāni bhikkhave uddhambhāgiyāni saññojanāni.
Katamāni pañca. Rūparāgo arūparāgo māno uddhaccaṁ avijjā.
Imāni kho bhikkhave pañca uddhambhāgiyāni saññojanāni.

[1089] Imesaṁ kho bhikkhave pañcannaṁ uddhambhāgiyānaṁ
saññojanānaṁ abhiññāya pariññāya parikkhayāya pahānāya pañcindriyāni
bhāvetabbāni. Katamāni pañca. Idha bhikkhave bhikkhu saddhindriyaṁ
bhāveti rāgavinayapariyosāna dosavinayapariyosānaṁ mohavinayapariyosānaṁ
viriyindriyaṁ satindriyaṁ samādhindriyaṁ paññindriyaṁ bhāveti rāgavinayapariyosānaṁ
dosavinayapariyosānaṁ mohavinayapariyosānaṁ. Imesaṁ kho
bhikkhave pañcannaṁ uddhambhāgiyānaṁ saññojanānaṁ abhiññāya pariññāya
parikkhāya pahānāya imāni pañcindriyāni bhāvetabbānīti. (yathā
maggasaṁyutte evaṁ bhavati indriyasaṁyuttaṁ).
Tassuddānaṁ
saññojanā anusayā addhānaṁ āsavakkhayā
dve phalā sattānisaṁsā caturukkhā vaggo tena pavuccatīti.
Indriyasaṁyuttaṁ niṭṭhitaṁ.
------
Sammappadhānasaṁyuttaṁ

[1090] Sāvatthī. Tatra kho bhagavā .pe. Etadavoca
cattārome bhikkhave sammappadhānā. Katame cattāro. Idha
bhikkhave bhikkhu anuppannānaṁ pāpakānaṁ akusalānaṁ dhammānaṁ anuppādāya
chandaṁ janeti vāyamati viriyaṁ ārabhati cittaṁ paggaṇhāti
padahati. Uppannānaṁ pāpakānaṁ akusalānaṁ dhammānaṁ pahānāya chandaṁ
janeti vāyamati viriyaṁ ārabhati cittaṁ paggaṇhāti padahati. Anuppannānaṁ
kusalānaṁ dhammānaṁ uppādāya chandaṁ janeti vāyamati viriyaṁ
ārabhati cittaṁ paggaṇhāti padahati. Uppannānaṁ kusalānaṁ dhammānaṁ
ṭhitiyā asammosāya bhiyyobhāvāya vepullāya bhāvanāya pāripūriyā
chandaṁ janeti vāyamati viriyaṁ ārabhati cittaṁ paggaṇhāti padahati.
Ime kho bhikkhave cattāro sammappadhānāti.

[1091] Seyyathāpi bhikkhave gaṅgā nadī pācīnaninnā pācīnapoṇā
pācīnapabbhārā. Evameva kho bhikkhave bhikkhu cattāro
sammappadhāne bhāvento cattāro sammappadhāne bahulīkaronto
nibbānaninno hoti nibbānapoṇo nibbānapabbhāro.

[1092] Kathañca bhikkhave bhikkhu cattāro sammappadhāne bhāvento
cattāro sammappadhāne bahulīkaronto nibbānaninno hoti nibbānapoṇo
nibbānapabbhāro. Idha bhikkhave bhikkhu anuppannānaṁ pāpakānaṁ
Akusalānaṁ dhammānaṁ anuppādāya chandaṁ janeti vāyamati viriyaṁ ārabhati
cittaṁ paggaṇhāti padahati. Uppannānaṁ pāpakānaṁ akusalānaṁ dhammānaṁ
pahānāya chandaṁ janeti vāyamati viriyaṁ ārabhati cittaṁ paggaṇhāti
padahati. Anuppannānaṁ kusalānaṁ dhammānaṁ uppādāya chandaṁ janeti
vāyamati viriyaṁ ārabhati cittaṁ paggaṇhāti padahati. Uppannānaṁ
kusalānaṁ dhammānaṁ ṭhitiyā asammosāya bhiyyobhāvāya vepullāya
bhāvanāya pāripūriyā chandaṁ janeti vāyamati viriyaṁ ārabhati cittaṁ
paggaṇhāti padahati. Evaṁ kho bhikkhave bhikkhu cattāro sammappadhāne
bhāvento cattāro sammappadhāne bahulīkaronto nibbānaninno
hoti nibbānapoṇo nibbānapabbhāroti.
Cha pācīnato ninnā cha ninnā ca samuddato
ete dve cha dvādasa honti vaggo tena pavuccatīti.
(sammappadhānasaṁyuttassa gaṅgāpeyyāli sammappadhānavasena
vitthāretabbā). Vaggo.
Tathāgataṁ padaṁ kūṭaṁ mūlaṁ sārena vassikaṁ
rājā candimasuriyā vatthena dasamaṁ padaṁ.
(appamādavaggo sammappadhānavasena vitthāretabbo). Vaggo.

[1093] Seyyathāpi bhikkhave ye keci balakaraṇīyā kammantā
kayiranti 1 sabbe te paṭhaviṁ nissāya paṭhaviyaṁ patiṭṭhāya evamete
balakaraṇīyā kammantā kayiranti. Evameva kho bhikkhave bhikkhu
1 Ma. karīyanti. evamuparipi.
Sīlaṁ nissāya sīle patiṭṭhāya cattāro sammappadhāne bhāveti
cattāro sammappadhāne bahulīkaroti.