[1104] Seyyathāpi bhikkhave gaṅgā nadī pācīnaninnā pācīnapoṇā
pācīnapabbhārā. Evameva kho bhikkhave bhikkhu pañca balāni
bhāvento pañca balāni bahulīkaronto nibbānaninno hoti
nibbānapoṇo nibbānapabbhāro.

[1105] Kathañca bhikkhave bhikkhu pañca balāni bhāvento
pañca balāni bahulīkaronto nibbānaninno hoti nibbānapoṇo
nibbānapabbhāro. Idha bhikkhave bhikkhu saddhābalaṁ bhāveti
rāgavinayapariyosānaṁ dosavinayapariyosānaṁ mohavinayapariyosānaṁ .pe.
Evaṁ kho bhikkhave bhikkhu pañca balāni bhāvento pañca balāni
bahulīkaronto nibbānaninno hoti nibbānapoṇo nibbānapabbhāroti.
(evaṁ esanā pāli vitthāretabbā rāgavinayapariyosānaṁ dosavinayapariyosānaṁ
mohavinayapariyosānaṁ).

[1106] Pañcimāni bhikkhave uddhambhāgiyāni saññojanāni.
Katamāni pañca. Rūparāgo arūparāgo māno uddhaccaṁ avijjā.
Imāni kho bhikkhave pañcuddhambhāgiyāni saññojanāni.

[1107] Imesaṁ kho bhikkhave pañcannaṁ uddhambhāgiyānaṁ
saññojanānaṁ abhiññāya pariññāya parikkhayāya pahānāya pañca
balāni bhāvetabbāni. Katamāni pañca. Idha bhikkhave bhikkhu
saddhābalaṁ bhāveti rāgavinayapariyosānaṁ dosavinayapariyosānaṁ mohavinayapariyosānaṁ
.pe. Paññābalaṁ bhāveti rāgavinayapariyosānaṁ dosavinayapariyosānaṁ
mohavinayapariyosānaṁ. Imesaṁ kho bhikkhave pañcannaṁ
uddhambhāgiyānaṁ saññojanānaṁ abhiññāya pariññāya parikkhayāya
pahānāya imāni pañca balāni bhāvetabbānīti.
Balasaṁyuttaṁ niṭṭhitaṁ.
------
Iddhipādasaṁyuttaṁ
-------
pāvālavaggo paṭhamo

[1108] Cattārome bhikkhave iddhipādā bhāvitā bahulīkatā
apārā pāraṁ gamanāya saṁvattanti. Katame cattāro. Idha bhikkhave
bhikkhu chandasamādhipadhānasaṅkhārasamannāgataṁ iddhipādaṁ bhāveti.
Viriyasamādhipadhānasaṅkhārasamannāgataṁ iddhipādaṁ bhāveti. Cattasamādhipadhāna-
saṅkhārasamannāgataṁ iddhipādaṁ bhāveti. Vīmaṁsāsamādhipadhānasaṅkhārasamannāgataṁ
iddhipādaṁ bhāveti. Ime kho bhikkhave cattāro
iddhipādā bhāvitā bahulīkatā apārā pāraṁ gamanāya saṁvattantīti.

[1109] Yesaṁ kesañci bhikkhave cattāro iddhipādā viraddhā
viraddho tesaṁ ariyo maggo sammādukkhakkhayagāmī. Yesaṁ kesañci
bhikkhave cattāro iddhipādā āraddhā āraddho tesaṁ ariyo
maggo sammādukkhakkhayagāmī. Katame cattāro. Idha bhikkhave
bhikkhu chandasamādhipadhānasaṅkhārasamannāgataṁ iddhipādaṁ bhāveti. Viriyasamādhi
cittasamādhi vīmaṁsāsamādhipadhānasaṅkhārasamannāgataṁ iddhipādaṁ
bhāveti. Yesaṁ kesañci bhikkhave ime cattāro iddhipādā viraddhā
viraddho tesaṁ ariyo maggo sammādukkhakkhayagāmī. Yesaṁ kesañci
bhikkhave ime cattāro iddhipādā āraddhā āraddho tesaṁ
Ariyo maggo sammādukkhakkhayagāmīti.

[1110] Cattārome bhikkhave iddhipādā bhāvitā bahulīkatā
ariyā niyyānikā niyyanti takkarassa sammādukkhakkhayāya. Katame
cattāro. Idha bhikkhave bhikkhu chandasamādhipadhānasaṅkhārasamannāgataṁ
iddhipādaṁ bhāveti. Viriyasamādhi cittasamādhi vīmaṁsāsamādhipadhānasaṅkhārasamannāgataṁ
iddhipādaṁ bhāveti. Ime kho bhikkhave cattāro
iddhipādā bhāvitā bahulīkatā ariyā niyyānikā niyyanti takkarassa
sammādukkhakkhayāyāti.

[1111] Cattārome bhikkhave iddhipādā bhāvitā bahulīkatā
ekantanibbidāya virāgāya nirodhāya upasamāya abhiññāya sambodhāya
nibbānāya saṁvattanti. Katame cattāro. Idha bhikkhave bhikkhu
chandasamādhipadhānasaṅkhārasamannāgataṁ iddhipādaṁ bhāveti. Viriyasamādhi
cittasamādhi vīmaṁsāsamādhipadhānasaṅkhārasamannāgataṁ iddhipādaṁ bhāveti.
Ime kho bhikkhave cattāro iddhipādā bhāvitā bahulīkatā ekantanibbidāya
virāgāya nirodhāya upasamāya abhiññāya sambodhāya
nibbānāya saṁvattantīti.

[1112] Ye hi keci bhikkhave atītamaddhānaṁ samaṇā vā brāhmaṇā
vā iddhippadesaṁ abhinipphādesuṁ sabbe te catunnaṁ iddhipādānaṁ
bhāvitattā bahulīkatattā. Ye hi keci bhikkhave anāgatamaddhānaṁ
samaṇā vā brāhmaṇā vā iddhippadesaṁ abhinipphādessanti sabbe
Te catunnaṁ iddhipādānaṁ bhāvitattā bahulīkatattā. Ye hi keci
bhikkhave etarahi samaṇā vā brāhmaṇā vā iddhippadesaṁ
abhinipphādenti sabbe te catunnaṁ iddhipādānaṁ bhāvitattā
bahulīkatattā. Katamesaṁ catunnaṁ. Idha bhikkhave bhikkhu
chandasamādhipadhānasaṅkhārasamannāgataṁ iddhipādaṁ bhāveti. Viriyasamādhi
cittasamādhi vīmaṁsāsamādhipadhānasaṅkhārasamannāgataṁ iddhipādaṁ bhāveti.

[1113] Ye hi keci bhikkhave atītamaddhānaṁ samaṇā vā brāhmaṇā
vā iddhippadesaṁ abhinipphādesuṁ sabbe te imesaṁyeva catunnaṁ
iddhipādānaṁ bhāvitattā bahulīkatattā. Ye hi keci bhikkhave
anāgatamaddhānaṁ samaṇā vā brāhmaṇā vā iddhippadesaṁ
abhinipphādessanti sabbe te imesaṁyeva catunnaṁ iddhipādānaṁ
bhāvitattā bahulīkatattā. Ye hi keci bhikkhave etarahi samaṇā
vā brāhmaṇā vā iddhippadesaṁ abhinipphādenti sabbe te
imesaṁyeva catunnaṁ iddhipādānaṁ bhāvitattā bahulīkatattāti.