[1114] Ye hi keci bhikkhave atītamaddhānaṁ samaṇā vā brāhmaṇā
vā samattaṁ iddhiṁ abhinipphādesuṁ sabbe te catunnaṁ iddhipādānaṁ
bhāvitattā bahulīkatattā. Ye hi keci bhikkhave anāgatamaddhānaṁ
samaṇā vā brāhmaṇā vā samattaṁ iddhiṁ abhinipphādessanti sabbe
te catunnaṁ iddhipādānaṁ bhāvitattā bahulīkatattā. Ye hi keci
bhikkhave etarahi samaṇā vā brāhmaṇā vā samattaṁ iddhiṁ
Abhinipphādenti sabbe te catunnaṁ iddhipādānaṁ bhāvitattā bahulīkatattā.
Katamesaṁ catunnaṁ. Idha bhikkhave bhikkhu chandasamādhipadhānasaṅkhārasamannāgataṁ
iddhipādaṁ bhāveti. Viriyasamādhi cittasamādhi
vīmaṁsāsamādhipadhānasaṅkhārasamannāgataṁ iddhipādaṁ bhāveti.

[1115] Ye hi keci bhikkhave atītamaddhānaṁ samaṇā vā brāhmaṇā
vā samattaṁ iddhiṁ abhinipphādesuṁ sabbe te imesaṁyeva catunnaṁ
iddhipādānaṁ bhāvitattā bahulīkatattā. Ye hi keci bhikkhave
anāgatamaddhānaṁ samaṇā vā brāhmaṇā vā samattaṁ iddhiṁ
abhinipphādessanti sabbe te imesaṁyeva catunnaṁ iddhipādānaṁ
bhāvitattā bahulīkatattā. Ye hi keci bhikkhave etarahi samaṇā
vā brāhmaṇā vā samattaṁ iddhiṁ abhinipphādenti sabbe te
imesaṁyeva catunnaṁ iddhipādānaṁ bhāvitattā bahulīkatattāti.

[1116] Ye hi keci bhikkhave atītamaddhānaṁ bhikkhū āsavānaṁ khayā
anāsavaṁ cetovimuttiṁ paññāvimuttiṁ diṭṭheva dhamme sayaṁ abhiññā
sacchikatvā upasampajja vihariṁsu sabbe te catunnaṁ iddhipādānaṁ
bhāvitattā bahulīkatattā. Ye hi keci bhikkhave anāgatamaddhānaṁ
bhikkhū āsavānaṁ khayā anāsavaṁ cetovimuttiṁ paññāvimuttiṁ diṭṭheva
dhamme sayaṁ abhiññā sacchikatvā upasampajja viharissanti sabbe
te catunnaṁ iddhipādānaṁ bhāvitattā bahulīkatattā. Ye hi keci
bhikkhave etarahi bhikkhū āsavānaṁ khayā anāsavaṁ cetovimuttiṁ paññāvimuttiṁ
Diṭṭheva dhamme sayaṁ abhiññā sacchikatvā upasampajja
viharanti sabbe te catunnaṁ iddhipādānaṁ bhāvitattā bahulīkatattā.
Katamesaṁ catunnaṁ. Idha bhikkhave bhikkhu chandasamādhipadhānasaṅkhārasamannāgataṁ
iddhipādaṁ bhāveti. Viriyasamādhi cittasamādhi vīmaṁsāsamādhipadhānasaṅkhārasamannāgataṁ
iddhipādaṁ bhāveti.

[1117] Ye hi keci bhikkhave atītamaddhānaṁ bhikkhū āsavānaṁ
khayā anāsavaṁ cetovimuttiṁ paññāvimuttiṁ diṭṭheva dhamme sayaṁ
abhiññā sacchikatvā upasampajja vihariṁsu sabbe te imesaṁyeva
catunnaṁ iddhipādānaṁ bhāvitattā bahulīkatattā. Ye hi keci
bhikkhave anāgatamaddhānaṁ bhikkhū āsavānaṁ khayā anāsavaṁ cetovimuttiṁ
paññāvimuttiṁ diṭṭheva dhamme sayaṁ abhiññā sacchikatvā upasampajja
viharissanti sabbe te imesaṁyeva catunnaṁ iddhipādānaṁ bhāvitattā
bahulīkatattā. Ye hi keci bhikkhave etarahi bhikkhū āsavānaṁ
khayā anāsavaṁ cetovimuttiṁ paññāvimuttiṁ diṭṭheva dhamme sayaṁ
abhiññā sacchikatvā upasampajja viharanti sabbe te imesaṁyeva
catunnaṁ iddhipādānaṁ bhāvitattā bahulīkatattāti.

[1118] Cattārome bhikkhave iddhipādā. Katame cattāro.
Idha bhikkhave bhikkhu chandasamādhipadhānasaṅkhārasamannāgataṁ iddhipādaṁ
bhāveti. Viriyasamādhi cittasamādhi vīmaṁsāsamādhipadhānasaṅkhārasamannāgataṁ
iddhipādaṁ bhāveti. Ime kho bhikkhave cattāro iddhipādā.
Imesaṁ kho bhikkhave catunnaṁ iddhipādānaṁ bhāvitattā bahulīkatattā
tathāgato arahaṁ sammāsambuddhoti vuccatīti.

[1119] Ayaṁ chandasamādhipadhānasaṅkhārasamannāgato iddhipādoti
me bhikkhave pubbe ananussutesu dhammesu cakkhuṁ udapādi ñāṇaṁ
udapādi paññā udapādi vijjā udapādi āloko udapādi.
So kho panāyaṁ chandasamādhipadhānasaṅkhārasamannāgato iddhipādo
bhāvetabboti me bhikkhave. Bhāvitoti me bhikkhave pubbe
ananussutesu dhammesu cakkhuṁ udapādi ñāṇaṁ udapādi paññā
udapādi vijjā udapādi āloko udapādi.

[1120] Ayaṁ viriyasamādhipadhānasaṅkhārasamannāgato iddhipādoti
me bhikkhave pubbe ananussutesu dhammesu cakkhuṁ udapādi ñāṇaṁ
udapādi paññā udapādi vijjā udapādi āloko udapādi.
So kho panāyaṁ viriyasamādhipadhānasaṅkhārasamannāgato iddhipādo
bhāvetabboti me bhikkhave. Bhāvitoti me bhikkhave pubbe
ananussutesu dhammesu cakkhuṁ udapādi ñāṇaṁ udapādi paññā
udapādi vijjā udapādi āloko udapādi.

[1121] Ayaṁ cittasamādhipadhānasaṅkhārasamannāgato iddhipādoti
me bhikkhave pubbe ananussutesu dhammesu 1 cakkhuṁ udapādi ñāṇaṁ
udapādi paññā udapādi vijjā udapādi āloko udapādi.
So kho panāyaṁ cittasamādhipadhānasaṅkhārasamannāgato iddhipādo
1 Yu. ayaṁ pāṭho natthi.
Bhāvetabboti me bhikkhave. Bhāvitoti me bhikkhave pubbe
ananussutesu dhammesu cakkhuṁ udapādi ñāṇaṁ udapādi paññā
udapādi vijjā udapādi āloko udapādi.

[1122] Ayaṁ vīmaṁsāsamādhipadhānasaṅkhārasamannāgato iddhipādoti
me bhikkhave pubbe ananussutesu dhammesu cakkhuṁ udapādi ñāṇaṁ
udapādi paññā udapādi vijjā udapādi āloko udapādi.
So kho panāyaṁ vīmaṁsāsamādhipadhānasaṅkhārasamannāgato iddhipādo
bhāvetabboti me bhikkhave. Bhāvitoti me bhikkhave pubbe
ananussutesu dhammesu cakkhuṁ udapādi ñāṇaṁ udapādi paññā
udapādi vijjā udapādi āloko udapādīti

[1123] Evamme sutaṁ ekaṁ samayaṁ bhagavā vesāliyaṁ viharati
mahāvane kūṭāgārasālāyaṁ. Atha kho bhagavā pubbaṇhasamayaṁ
nivāsetvā pattacīvaramādāya vesāliṁ piṇḍāya pāvisi vesāliyaṁ
piṇḍāya caritvā pacchābhattaṁ piṇḍapātapaṭikkanto āyasmantaṁ
ānandaṁ āmantesi gaṇhāhi ānanda nisīdanaṁ yena pāvālacetiyaṁ 1
tenupasaṅkamissāma divāvihārāyāti. Evaṁ bhanteti kho āyasmā
ānando bhagavato paṭissutvā nisīdanaṁ ādāya bhagavantaṁ piṭṭhito
piṭṭhito anubandhi.