[562] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena rājā pasenadi
kosalo senāya abbhuyyāto hoti. Chabbaggiyā bhikkhū uyyuttaṁ
senaṁ dassanāya agamaṁsu. Addasā kho rājā pasenadi kosalo
chabbaggiye bhikkhū dūrato va āgacchante disvāna pakkosāpetvā
etadavoca kissa tumhe bhante āgatatthāti. Mahārājānaṁ mayaṁ
daṭṭhukāmāti. Kiṁ bhante maṁ diṭṭhena yuddhābhinandinaṁ nanu bhagavā
passitabboti. Manussā ujjhāyanti khīyanti vipācenti kathaṁ hi
nāma samaṇā sakyaputtiyā uyyuttaṁ senaṁ dassanāya āgacchissanti
amhākampi alābhā amhākampi dulladdhaṁ ye mayaṁ ājīvassa
hetu puttadārassa kāraṇā senāya āgacchāmāti. Assosuṁ
kho bhikkhū tesaṁ manussānaṁ ujjhāyantānaṁ khīyantānaṁ vipācentānaṁ.
Ye te bhikkhū appicchā .pe. Te ujjhāyanti khīyanti
vipācenti kathaṁ hi nāma chabbaggiyā bhikkhū uyyuttaṁ senaṁ dassanāya
gacchissantīti .pe. Saccaṁ kira tumhe bhikkhave uyyuttaṁ senaṁ
dassanāya gacchathāti. Saccaṁ bhagavāti. Vigarahi buddho bhagavā kathaṁ
hi nāma tumhe moghapurisā uyyuttaṁ senaṁ dassanāya gacchissatha
netaṁ moghapurisā appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha
yo pana bhikkhu uyyuttaṁ senaṁ dassanāya gaccheyya pācittiyanti.
Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[563] Tena kho pana samayena aññatarassa bhikkhuno mātulo
senāya gilāno hoti. So tassa bhikkhuno santike dūtaṁ pāhesi
ahaṁ hi senāya gilāno āgacchatu bhaddanto icchāmi bhaddantassa
āgatanti. Athakho tassa bhikkhuno etadahosi bhagavā bhikkhūnaṁ
sikkhāpadaṁ paññattaṁ na uyyuttaṁ senaṁ dassāya gantabbanti
ayañca me mātulo senāya gilāno kathaṁ nu kho mayā paṭipajjitabbanti.
Bhagavato etamatthaṁ ārocesuṁ. Athakho bhagavā
etasmiṁ nidāne etasmiṁ pakaraṇe dhammiṁ kathaṁ katvā bhikkhū āmantesi
anujānāmi bhikkhave tathārūpapaccayā senaṁ gantuṁ evañca pana
bhikkhave imaṁ sikkhāpadaṁ uddiseyyātha yo pana bhikkhu uyyuttaṁ
senaṁ dassanāya gaccheyya aññatra tathārūpapaccayā pācittiyanti.

[564] Yo panāti yo yādiso .pe. Bhikkhūti .pe.
Ayaṁ imasmiṁ atthe adhippeto bhikkhūti. Uyyuttā nāma senā
gāmato nikkhamitvā niviṭṭhā vā hoti payātā vā. Senā
nāma hatthī assā rathā patti 1 . Dvādasapuriso hatthī. Tipuriso
asso. Catupuriso ratho. Cattāro purisā sarahatthā patti.
Dassanāya gacchati āpatti dukkaṭassa. Yattha ṭhito passati
1 Ma. pattī.
Āpatti pācittiyassa. Dassanūpacāraṁ vijahitvā punappunaṁ passati
āpatti pācittiyassa. Aññatra tathārūpapaccayāti ṭhapetvā
tathārūpapaccayaṁ.

[565] Uyyutte uyyuttasaññī dassanāya gacchati aññatra
tathārūpapaccayā āpatti pācittiyassa. Uyyutte vematiko
dassanāya gacchati aññatra tathārūpapaccayā āpatti
pācittiyassa. Uyyutte anuyyuttasaññī dassanāya gacchati aññatra
tathārūpapaccayā āpatti pācittiyassa. Ekamekaṁ dassanāya gacchati
āpatti dukkaṭassa. Yattha ṭhito passati āpatti dukkaṭassa.
Dassanūpacāraṁ vijahitvā punappunaṁ passati āpatti dukkaṭassa.
Anuyyutte uyyuttasaññī āpatti dukkaṭassa. Anuyyutte
vematiko āpatti dukkaṭassa. Anuyyutte anuyyuttasaññī
anāpatti.

[566] Anāpatti ārāme ṭhito passati bhikkhussa ṭhitokāsaṁ
vā nisinnokāsaṁ vā nipannokāsaṁ vā āgacchati paṭipathaṁ gacchanto
passati tathārūpapaccayā āpadāsu ummattakassa ādikammikassāti.
Aṭṭhamasikkhāpadaṁ niṭṭhitaṁ.
Navamasikkhāpadaṁ

[567] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū sati karaṇīye senaṁ gantvā atirekatirattaṁ senāya vasanti.
Manussā ujjhāyanti khīyanti vipācenti kathaṁ hi nāma samaṇā
sakyaputtiyā senāya vasissanti amhākampi alābhā amhākampi
dulladdhaṁ ye mayaṁ ājīvassa hetu puttadārassa kāraṇā senāya
paṭivasāmāti. Assosuṁ kho bhikkhū tesaṁ manussānaṁ ujjhāyantānaṁ
khīyantānaṁ vipācentānaṁ. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma chabbaggiyā bhikkhū
atirekatirattaṁ senāya vasissantīti .pe. Saccaṁ kira tumhe
bhikkhave atirekatirattaṁ senāya vasathāti. Saccaṁ bhagavāti. Vigarahi
buddho bhagavā kathaṁ hi nāma tumhe moghapurisā atirekatirattaṁ
senāya vasissatha netaṁ moghapurisā appasannānaṁ vā pasādāya
pasannānaṁ vā bhiyyobhāvāya .pe. Evañca pana bhikkhave imaṁ
sikkhāpadaṁ uddiseyyātha siyā ca tassa bhikkhuno kocideva paccayo
senaṁ gamanāya dvirattatirattaṁ tena bhikkhunā senāya vasitabbaṁ.
Tato ce uttariṁ vaseyya pācittiyanti.

[568] Siyā ca tassa bhikkhuno kocideva paccayo senaṁ
Gamanāyāti siyā paccayo siyā karaṇīyaṁ. Dvirattatirattaṁ tena bhikkhunā
senāya vasitabbanti dve tisso rattiyo vasitabbaṁ. Tato ce
uttariṁ vaseyyāti catutthe divase atthaṅgate suriye senāya vasati
āpatti pācittiyassa.

[569] Atirekatiratte atirekasaññī senāya vasati āpatti
pācittiyassa. Atirekatiratte vematiko senāya vasati āpatti
pācittiyassa. Atirekatiratte ūnakasaññī senāya vasati āpatti
pācittiyassa. Ūnakatiratte atirekasaññī āpatti dukkaṭassa.
Ūnakatiratte vematiko āpatti dukkaṭassa. Ūnakatiratte ūnakasaññī
anāpatti.

[570] Anāpatti dve tisso rattiyo vasati ūnakadvetisso
rattiyo vasati dve rattiyo vasitvā tatiyāya rattiyā purāruṇā
nikkhamitvā puna vasati gilāno vasati gilānassa karaṇīyena
vasati senā paṭisenāya ruddhā hoti kenaci palibuddho hoti
āpadāsu ummattakassa ādikammikassāti.
Navamasikkhāpadaṁ niṭṭhitaṁ.
--------
Dasamasikkhāpadaṁ

[571] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū dvirattatirattaṁ 1 senāya vasamānā uyyodhikaṁpi balaggaṁpi senābyūhaṁpi
anīkadassanaṁpi gacchanti. Aññataropi chabbaggiyo bhikkhu
uyyodhikaṁ gantvā kaṇḍena paṭividdho hoti. Manussā taṁ bhikkhuṁ
upphaṇḍesuṁ kacci bhante suyuddhaṁ ahosi kati te lakkhāni
laddhānīti. So bhikkhu tehi manussehi upphaṇḍiyamāno maṅku
ahosi. Manussā ujjhāyanti khīyanti vipācenti kathaṁ hi nāma
samaṇā sakyaputtiyā uyyodhikaṁ dassanāya āgacchissanti amhākampi
alābhā amhākampi dulladdhaṁ ye mayaṁ ājīvassa hetu
puttadārassa kāraṇā uyyodhikaṁ āgacchāmāti. Assosuṁ kho
bhikkhū tesaṁ manussānaṁ ujjhāyantānaṁ khīyantānaṁ vipācentānaṁ.
Ye te bhikkhū appicchā .pe. Te ujjhāyanti khīyanti vipācenti
kathaṁ hi nāma chabbaggiyā bhikkhū uyyodhikaṁ dassanāya gacchissantīti
.pe. Saccaṁ kira tumhe bhikkhave uyyodhikaṁ dassanāya gacchathāti.
Saccaṁ bhagavāti. Vigarahi buddho bhagavā kathaṁ hi nāma tumhe moghapurisā
uyyodhikaṁ dassanāya gacchissatha netaṁ moghapurisā appasannānaṁ
vā pasādāya pasannānaṁ vā bhiyyobhāvāya .pe. Evañca pana
1 Ma. dirattatirattaṁ. evamuparipi.
Bhikkhave imaṁ sikkhāpadaṁ uddiseyyātha dvirattatirattañce bhikkhu
senāya vasamāno uyyodhakaṁ vā balaggaṁ vā senābyūhaṁ vā anīkadassanaṁ
vā gaccheyya pācittiyanti.