[552] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Nimantito nāma pañcannaṁ
bhojanānaṁ aññatarena bhojanena nimantito. Sabhatto nāma yena
Nimantito tena sabhatto. Santaṁ nāma bhikkhuṁ sakkā hoti
āpucchā pavisituṁ. Asantaṁ nāma bhikkhuṁ na sakkā hoti āpucchā
pavisituṁ. Purebhattaṁ nāma yena nimantito taṁ abhuttāvī.
Pacchābhattaṁ nāma yena nimantito antamaso kusaggenapi bhuttaṁ
hoti. Kulaṁ nāma cattāri kulāni khattiyakulaṁ brāhmaṇakulaṁ
vessakulaṁ suddakulaṁ. Kulesu cārittaṁ āpajjeyyāti aññassa
gharupacāraṁ okkamantassa āpatti dukkaṭassa. Paṭhamaṁ pādaṁ ummāraṁ
atikkāmeti āpatti dukkaṭassa. Dutiyaṁ pādaṁ atikkāmeti āpatti
pācittiyassa. Aññatra samayāti ṭhapetvā samayaṁ. Cīvaradānasamayo
nāma anatthate kaṭhine vassānassa pacchimo māso atthate
kaṭhine pañca māsā. Cīvarakārasamayo nāma cīvare kayiramāne.

[553] Nimantite nimantitasaññī santaṁ bhikkhuṁ anāpucchā
purebhattaṁ vā pacchābhattaṁ vā kulesu cārittaṁ āpajjati aññatra
samayā āpatti pācittiyassa. Nimantite vematiko santaṁ bhikkhuṁ
anāpucchā purebhattaṁ vā pacchābhattaṁ vā kulesu cārittaṁ āpajjati
aññatra samayā āpatti pācittiyassa. Nimantite animantitasaññī
santaṁ bhikkhuṁ anāpucchā purebhattaṁ vā pacchābhattaṁ vā kulesu cārittaṁ
āpajjati aññatra samayā āpatti pācittiyassa. Animantite
nimantitasaññī āpatti dukkaṭassa. Animantite vematiko
āpatti dukkaṭassa. Animantite animantitasaññī anāpatti.

[554] Anāpatti samaye santaṁ bhikkhuṁ āpucchā pavisati
asantaṁ bhikkhuṁ anāpucchā pavisati aññassa gharena maggo hoti
gharūpacārena maggo hoti antarārāmaṁ gacchati bhikkhunūpassayaṁ
gacchati titthiyaseyyaṁ gacchati paṭikkamanaṁ gacchati bhattiyagharaṁ
gacchati āpadāsu ummattakassa ādikammikassāti.
Chaṭṭhasikkhāpadaṁ niṭṭhitaṁ.
-------
Sattamasikkhāpadaṁ

[555] Tena samayena buddho bhagavā sakkesu viharati kapilavatthusmiṁ
nigrodhārāme. Tena kho pana samayena mahānāmassa sakkassa
bhesajjaṁ ussannaṁ hoti. Athakho mahānāmo sakko yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinno kho mahānāmo sakko bhagavantaṁ etadavoca
icchāmahaṁ bhante saṅghaṁ cātumāsaṁ bhesajjena pavāretunti. Sādhu
sādhu mahānāma tenahi tvaṁ mahānāma saṅghaṁ cātumāsaṁ bhesajjena
pavārehīti. Bhikkhū kukkuccāyantā nādhivāsenti. Bhagavato etamatthaṁ
ārocesuṁ. Anujānāmi bhikkhave cātumāsapaccayapavāraṇaṁ sāditunti.
Tena kho pana samayena bhikkhū mahānāmaṁ sakkaṁ parittaṁyeva bhesajjaṁ
viññāpenti. Tatheva mahānāmassa sakkassa bhesajjaṁ ussannaṁ
hoti. Dutiyampi kho mahānāmo sakko yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinno kho mahānāmo sakko bhagavantaṁ etadavoca
icchāmahaṁ bhante saṅghaṁ aparaṁpi cātumāsaṁ bhesajjena pavāretunti.
Sādhu sādhu mahānāma tenahi tvaṁ mahānāma saṅghaṁ aparaṁpi cātumāsaṁ
bhesajjena pavārehīti. Bhikkhū kukkuccāyantā nādhivāsenti. Bhagavato
etamatthaṁ ārocesuṁ. Anujānāmi bhikkhave puna pavāraṇaṁpi sāditunti.
Tena kho pana samayena bhikkhū mahānāmaṁ sakkaṁ parittaṁyeva bhesajjaṁ
viññāpenti. Tatheva mahānāmassa sakkassa bhesajjaṁ ussannaṁ
hoti. Tatiyampi kho mahānāmo sakko yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinno kho mahānāmo sakko bhagavantaṁ etadavoca
icchāmahaṁ bhante saṅghaṁ yāvajīvaṁ bhesajjena pavāretunti. Sādhu sādhu
mahānāma tenahi tvaṁ mahānāma saṅghaṁ yāvajīvaṁ bhesajjena
pavārehīti. Bhikkhū kukkuccāyantā nādhivāsenti. Bhagavato etamatthaṁ
ārocesuṁ. Anujānāmi bhikkhave niccapavāraṇaṁpi sāditunti.

[556] Tena kho pana samayena chabbaggiyā bhikkhū dunnivatthā
honti duppārutā anākappasampannā mahānāmena sakkena vuttā
honti 1 kissa tumhe bhante dunnivatthā duppārutā anākappasampannā
nanu nāma pabbajitena sunivatthena bhavitabbaṁ supārutena
ākappasampannenāti. Chabbaggiyā bhikkhū mahānāme sakke upanandhiṁsu.
Athakho chabbaggiyānaṁ bhikkhūnaṁ etadahosi kena nu kho
mayaṁ upāyena mahānāmaṁ sakkaṁ maṅkuṁ kareyyāmāti. Athakho
chabbaggiyānaṁ bhikkhūnaṁ etadahosi mahānāmena [2]- āvuso sakkena
saṅgho bhesajjena pavārito handa mayaṁ āvuso mahānāmaṁ sakkaṁ
1 Ma. Yu. mahānāmo sakko vattā hoti. 2 Ma. Yu. kho.
Sappiṁ viññāpemāti. Athakho chabbaggiyā bhikkhū yena mahānāmo
sakko tenupasaṅkamiṁsu upasaṅkamitvā mahānāmaṁ sakkaṁ etadavocuṁ
doṇena āvuso sappinā atthoti. Ajjuṇho bhante āgametha
manussā vajaṁ gatā sappiṁ āharituṁ kāle harissathāti 1 . Dutiyampi
kho .pe. Tatiyampi kho chabbaggiyā bhikkhū mahānāmaṁ sakkaṁ
etadavocuṁ doṇena āvuso sappinā atthoti. Ajjuṇho bhante
āgametha manussā vajaṁ gatā sappiṁ āharituṁ kāle harissathāti.
Kiṁ pana tayā āvuso adātukāmena pavāritena yaṁ tvaṁ pavāretvā
na desīti. Athakho mahānāmo sakko ujjhāyati khīyati vipāceti
kathaṁ hi nāma bhaddantā ajjuṇho bhante āgamethāti vuccamānā
nāgamessantīti. Assosuṁ kho bhikkhū mahānāmassa sakkassa
ujjhāyantassa khīyantassa vipācentassa. Ye te bhikkhū appicchā
.pe. Te ujjhāyanti khīyanti vipācenti kathaṁ hi nāma chabbaggiyā
bhikkhū mahānāmena sakkena ajjuṇho bhante āgamethāti
vuccamānā nāgamessantīti .pe. Saccaṁ kira tumhe bhikkhave mahānāmena
sakkena ajjuṇho bhante āgamethāti vuccamānā nāgamethāti.
Saccaṁ bhagavāti. Vigarahi buddho bhagavā kathaṁ hi nāma tumhe
moghapurisā mahānāmena sakkena ajjuṇho bhante āgamethāti
vuccamānā nāgamessatha netaṁ moghapurisā appasannānaṁ vā pasādāya
pasannānaṁ vā bhiyyobhāvāya .pe. Evañca pana bhikkhave imaṁ
1 Ma. kālaṁ āharissathāti. evamuparipi.
Sikkhāpadaṁ uddiseyyātha agilānena bhikkhunā cātumāsapaccayapavāraṇā
sāditabbā aññatra punapavāraṇāya aññatra niccapavāraṇāya
tato ce uttariṁ 1 sādiyeyya pācittiyanti.

[557] Agilānena bhikkhunā cātumāsapaccayapavāraṇā sāditabbāti
gilānapaccayapavāraṇā sāditabbā punapavāraṇāpi sāditabbā [2]- yadā
gilāno bhavissāmi tadā viññāpessāmīti niccapavāraṇāpi
sāditabbā [3]- yadā gilāno bhavissāmi tadā viññāpessāmīti.

[558] Tato ce uttariṁ sādiyeyyāti atthi pavāraṇā bhesajjapariyantā
na rattipariyantā atthi pavāraṇā rattipariyantā na
bhesajjapariyantā atthi pavāraṇā bhesajjapariyantā ca rattipariyantā
ca atthi pavāraṇā neva bhesajjapariyantā na rattipariyantā.
Bhesajjapariyantā nāma bhesajjāni pariggahitāni honti ettakehi
bhesajjehi pavāremīti. Rattipariyantā nāma rattiyo pariggahitāyo
honti ettakāsu rattīsu pavāremīti. Bhesajjapariyantā ca rattipariyantā
ca nāma bhesajjāni ca pariggahitāni honti rattiyo ca
pariggahitāyo honti ettakehi bhesajjehi ettakāsu rattīsu
pavāremīti. Neva bhesajjapariyantā na rattipariyantā nāma
bhesajjāni ca apariggahitāni honti rattiyo ca apariggahitāyo
honti ettakehi bhesajjehi ettakāsu rattīsu pavāremīti.
1 Ma. Yu. uttari. 2-3 Ma. itisaddo dissati.

[559] Bhesajjapariyante yehi bhesajjehi pavārito hoti tāni
bhesajjāni ṭhapetvā aññāni bhesajjāni viññāpeti āpatti
pācittiyassa. Rattipariyante yāsu rattīsu pavārito hoti
tā rattiyo ṭhapetvā aññāsu rattīsu viññāpeti āpatti
pācittiyassa. Bhesajjapariyante ca rattipariyante ca yehi
bhesajjehi pavārito hoti tāni bhesajjāni ṭhapetvā yāsu
rattīsu pavārito hoti tā rattiyo ṭhapetvā aññāni bhesajjāni
aññāsu rattīsu viññāpeti āpatti pācittiyassa. Neva
bhesajjapariyante na rattipariyante anāpatti.

[560] Nabhesajjena karaṇīye 1 bhesajjaṁ viññāpeti āpatti
pācittiyassa. Aññena bhesajjena karaṇīye 2 aññaṁ bhesajjaṁ
viññāpeti āpatti pācittiyassa. Taduttari 3 taduttarisaññī bhesajjaṁ
viññāpeti āpatti pācittiyassa. Taduttari vematiko bhesajjaṁ
viññāpeti āpatti pācittiyassa. Taduttari nataduttarisaññī
bhesajjaṁ viññāpeti āpatti pācittiyassa. Nataduttari taduttarisaññī
āpatti dukkaṭassa. Nataduttari vematiko āpatti
dukkaṭassa. Nataduttari nataduttarisaññī anāpatti.

[561] Anāpatti yehi bhesajjehi pavārito hoti tāni
bhesajjāni viññāpeti yāsu rattīsu pavārito hoti tāsu rattīsu
1-2 Ma. Yu. karaṇīyena. 3 tatuttari. evamuparipi.
Viññāpeti imehi tayā bhesajjehi pavāritamhā amhākañca
iminā ca iminā ca bhesajjena atthoti ācikkhitvā viññāpeti
yāsu tayā rattīsu pavāritamhā tāyo ca rattiyo vītivattā
amhākañca bhesajjena atthoti ācikkhitvā viññāpeti ñātakānaṁ
pavāritānaṁ aññassatthāya attano dhanena ummattakassa
ādikammikassāti.
Sattamasikkhāpadaṁ niṭṭhitaṁ.
---------
Aṭṭhamasikkhāpadaṁ