[44] Kathañca bhikkhave bhikkhu sammāpaṇihitāya diṭṭhiyā sammāpaṇihitāya
maggabhāvanāya avijjaṁ bhindissati vijjaṁ uppādessati
nibbānaṁ sacchikarissati. Idha bhikkhave bhikkhu sammādiṭṭhiṁ bhāveti
vivekanissitaṁ virāganissitaṁ nirodhanissitaṁ vossaggapariṇāmiṁ .pe.
Sammāsamādhiṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.
Evaṁ kho bhikkhave bhikkhu sammāpaṇihitāya diṭṭhiyā
sammāpaṇihitāya maggabhāvanāya avijjaṁ bhindissati vijjaṁ
uppādessati nibbānaṁ sacchikarissatīti.

[45] Sāvatthīnidānaṁ. Atha kho nandiyo paribbājako yena bhagavā
tenupasaṅkami upasaṅkamitvā bhagavatā saddhiṁ sammodi sammodanīyaṁ
kathaṁ sārāṇīyaṁ vītisāretvā ekamantaṁ nisīdi. Ekamantaṁ nisinno
kho nandiyo paribbājako bhagavantaṁ etadavoca kati nu kho bho
gotama dhammā bhāvitā bahulīkatā nibbānagamā honti nibbānaparāyanā
nibbānapariyosānāti. Aṭṭhime kho nandiya dhammā
bhāvitā bahulīkatā nibbānagamā honti nibbānaparāyanā nibbānapariyosānā.
Katame aṭṭha. Seyyathīdaṁ. Sammādiṭṭhi .pe.
Sammāsamādhi. Ime kho nandiya aṭṭha dhammā bhāvitā bahulīkatā
nibbānagamā honti nibbānaparāyanā nibbānapariyosānāti.

[46] Evaṁ vutte nandiyo paribbājako bhagavantaṁ etadavoca
abhikkantaṁ bho gotama abhikkantaṁ bho gotama seyyathāpi bho
gotama nikkujjitaṁ vā ukkujjeyya paṭicchannaṁ vā vivareyya
mūḷhassa vā maggaṁ ācikkheyya andhakāre vā telappajjotaṁ
dhāreyya cakkhumanto rūpāni dakkhantīti. Evameva bhotā gotamena
anekapariyāyena dhammo pakāsito esāhaṁ bhavantaṁ gotamaṁ saraṇaṁ
Gacchāmi dhammañca bhikkhusaṅghañca upāsakaṁ maṁ bhavaṁ gotamo dhāretu
ajjatagge pāṇupetaṁ saraṇaṅgatanti.
Avijjāvaggo paṭhamo.
Tassuddānaṁ
avijjañca 1 upaḍḍhaṁ ca sārīputto ca brāhmaṇo
kimatthiyaṁ 2 ca dve bhikkhū vibhaṅgo sukanandiyāti 3 .
-----------
1 Yu. avijjā ca. 2 Ma. Yu. kimatthiyo. 3 Yu. sūkanandiyoti.
Vihāravaggo dutiyo

[47] Sāvatthīnidānaṁ. Icchāmahaṁ bhikkhave aḍḍhamāsaṁ paṭisallīyituṁ
namhi kenaci upasaṅkamitabbo aññatra ekena piṇḍapātanīhārakenāti.
Evaṁ bhanteti kho te bhikkhū bhagavato paṭissutvā.
Nāssudha koci bhagavantaṁ upasaṅkamati aññatra ekena piṇḍapātanīhārakena.

[48] Atha kho bhagavā tassa aḍḍhamāsassa accayena paṭisallānā
vuṭṭhito bhikkhū āmantesi yena svāhaṁ bhikkhave vihārena paṭhamābhisambuddho
viharāmi tassa padesena vihāsiṁ so evaṁ pajānāmi
micchādiṭṭhipaccayāpi vedayitaṁ sammādiṭṭhipaccayāpi vedayitaṁ .pe.
Micchāsamādhipaccayāpi vedayitaṁ sammāsamādhipaccayāpi vedayitaṁ chandapaccayāpi
vedayitaṁ vitakkapaccayāpi vedayitaṁ saññāpaccayāpi
vedayitaṁ chando ca avūpasanto hoti vitakkā 1 ca avūpasantā honti
saññā ca avūpasantā hoti tappaccayāpi vedayitaṁ chando ca
vūpasanto hoti vitakkā 2 ca vūpasantā honti saññā ca
vūpasantā hoti tappaccayāpi vedayitaṁ appattassa pattiyā atthi
vāyāmaṁ 3 tasmiṁpi ṭhāne anuppatte tappaccayāpi vedayitanti.

[49] Sāvatthīnidānaṁ. Icchāmahaṁ bhikkhave temāsaṁ paṭisallīyituṁ
namhi kenaci upasaṅkamitabbo aññatra ekena piṇḍapātanīhārakenāti.
1 Ma. Yu. vitakko ca avūpasanto hoti. 2 Ma. vūpasanto. evamupari. 3 Ma. Yu.
āyāmaṁ. evamupari.
Evaṁ bhanteti kho te bhikkhū bhagavato paṭissutvā.
Nāssudha koci bhagavantaṁ upasaṅkamati aññatra ekena piṇḍapātanīhārakena.

[50] Atha kho bhagavā tassa temāsassa accayena paṭisallānā
vuṭṭhito bhikkhū āmantesi yena svāhaṁ bhikkhave vihārena paṭhamābhisambuddho
viharāmi tassa padesena vihāsiṁ so evaṁ pajānāmi
micchādiṭṭhipaccayāpi vedayitaṁ micchādiṭṭhivūpasamapaccayāpi vedayitaṁ
sammādiṭṭhipaccayāpi vedayitaṁ sammādiṭṭhivūpasamapaccayāpi vedayitaṁ
.pe. Micchāsamādhipaccayāpi vedayitaṁ micchāsamādhivūpasamapaccayāpi
vedayitaṁ sammāsamādhipaccayāpi vedayitaṁ sammāsamādhivūpasamapaccayāpi
vedayitaṁ chandapaccayāpi vedayitaṁ chandavūpasamapaccayāpi vedayitaṁ
vitakkapaccayāpi vedayitaṁ vitakkavūpasamapaccayāpi vedayitaṁ saññāpaccayāpi
vedayitaṁ saññāvūpasamapaccayāpi vedayitaṁ chando ca
avūpasanto hoti vitakkā ca avūpasantā honti saññā ca
avūpasantā hoti tappaccayāpi vedayitaṁ chando ca vūpasanto
hoti vitakkā ca vūpasantā honti saññā ca vūpasantā
hoti tappaccayāpi vedayitaṁ appattassa pattiyā atthi vāyāmaṁ
tasmiṁpi ṭhāne anuppatte tappaccayāpi vedayitanti.

[51] Sāvatthīnidānaṁ. Atha kho aññataro bhikkhu yena bhagavā
tenupasaṅkami .pe. Ekamantaṁ nisinno kho so bhikkhu bhagavantaṁ
Etadavoca sekkho 1 sekkhoti bhante vuccati kittāvatā nu kho
bhante sekkho hotīti. Idha bhikkhu sekkhāya sammādiṭṭhiyā
samannāgato hoti .pe. Sekkhena sammāsamādhinā samannāgato
hoti. Ettāvatā kho bhikkhu sekkho hotīti.

[52] Sāvatthīnidānaṁ. Aṭṭhime bhikkhave dhammā bhāvitā bahulīkatā
anuppannā uppajjanti nāññatra tathāgatassa pātubhāvā
arahato sammāsambuddhassa. Katame aṭṭha. Seyyathīdaṁ. Sammādiṭṭhi
.pe. Sammāsamādhi. Ime kho bhikkhave aṭṭha dhammā bhāvitā
bahulīkatā anuppannā uppajjanti nāññatra tathāgatassa pātubhāvā
arahato sammāsambuddhassāti.

[53] Sāvatthīnidānaṁ. Aṭṭhime bhikkhave dhammā bhāvitā bahulīkatā
anuppannā uppajjanti nāññatra sugatavinayā. Katame
aṭṭha. Seyyathīdaṁ. Sammādiṭṭhi .pe. Sammāsamādhi. Ime kho
bhikkhave aṭṭha dhammā bhāvitā bahulīkatā anuppannā uppajjanti
nāññatra sugatavinayāti.