[34] Katamā ca bhikkhave sammādiṭṭhi. Yaṁ kho bhikkhave
dukkhe ñāṇaṁ dukkhasamudaye ñāṇaṁ dukkhanirodhe ñāṇaṁ dukkhanirodhagāminiyā
paṭipadāya ñāṇaṁ. Ayaṁ vuccati bhikkhave sammādiṭṭhi.

[35] Katamo ca bhikkhave sammāsaṅkappo. Yo kho bhikkhave
Nekkhammasaṅkappo abyāpādasaṅkappo avihiṁsāsaṅkappo. Ayaṁ
vuccati bhikkhave sammāsaṅkappo.

[36] Katamā ca bhikkhave sammāvācā. Yā kho bhikkhave
musāvādā veramaṇī pisuṇāya vācāya veramaṇī pharusāya vācāya veramaṇī
samphappalāpā veramaṇī. Ayaṁ vuccati bhikkhave sammāvācā.

[37] Katamo ca bhikkhave sammākammanto. Yā kho bhikkhave
pāṇātipātā veramaṇī adinnādānā veramaṇī abrahmacariyā
veramaṇī. Ayaṁ vuccati bhikkhave sammākammanto.

[38] Katamo ca bhikkhave sammāājīvo. Idha bhikkhave ariyasāvako
micchāājīvaṁ pahāya sammāājīvena jīvikaṁ kappeti. Ayaṁ
vuccati bhikkhave sammāājīvo.

[39] Katamo ca bhikkhave sammāvāyāmo. Idha bhikkhave bhikkhu
anuppannānaṁ pāpakānaṁ akusalānaṁ dhammānaṁ anuppādāya chandaṁ
janeti vāyamati viriyaṁ ārabhati cittaṁ paggaṇhāti padahati
uppannānaṁ pāpakānaṁ akusalānaṁ dhammānaṁ pahānāya chandaṁ janeti
vāyamati viriyaṁ ārabhati cittaṁ paggaṇhāti padahati anuppannānaṁ
kusalānaṁ dhammaṁ uppādāya chandaṁ janeti vāyamati viriyaṁ ārabhati
cittaṁ paggaṇhāti padahati uppannānaṁ kusalānaṁ dhammānaṁ ṭhitiyā
asammosāya bhiyyobhāvāya vepullāya bhāvanāya pāripūriyā chandaṁ
janeti vāyamati viriyaṁ ārabhati cittaṁ paggaṇhāti padahati.
Ayaṁ vuccati bhikkhave sammāvāyāmo.

[40] Katamā ca bhikkhave sammāsati. Idha bhikkhave bhikkhu
kāye kāyānupassī viharati ātāpī sampajāno satimā vineyya
loke abhijjhādomanassaṁ vedanāsu vedanānupassī viharati ātāpī
sampajāno satimā vineyya loke abhijjhādomanassaṁ citte cittānupassī
viharati ātāpī sampajāno satimā vineyya loke abhijjhādomanassaṁ
dhammesu dhammānupassī viharati ātāpī sampajāno
satimā vineyya loke abhijjhādomanassaṁ. Ayaṁ vuccati bhikkhave
sammāsati.

[41] Katamo ca bhikkhave sammāsamādhi. Idha bhikkhave bhikkhu
vivicceva kāmehi vivicca akusalehi dhammehi savitakkaṁ savicāraṁ
vivekajaṁ pītisukhaṁ paṭhamaṁ jhānaṁ upasampajja viharati vitakkavicārānaṁ
vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ
samādhijaṁ pītisukhaṁ dutiyaṁ jhānaṁ upasampajja viharati pītiyā ca
virāgā upekkhako ca viharati sato ca sampajāno sukhañca
kāyena paṭisaṁvedeti yantaṁ ariyā ācikkhanti upekkhako satimā
sukhavihārīti tatiyaṁ jhānaṁ upasampajja viharati sukhassa ca pahānā
dukkhassa ca pahānā pubbeva somanassadomanassānaṁ atthaṅgamā
adukkhamasukhaṁ upekkhāsatipārisuddhiṁ catutthaṁ jhānaṁ upasampajja viharati.
Ayaṁ vuccati bhikkhave sammāsamādhīti.

[42] Sāvatthīnidānaṁ. Seyyathāpi bhikkhave sālisukaṁ vā yavasukaṁ
vā micchāpaṇihitaṁ hatthena vā pādena vā akkantaṁ hatthaṁ vā
pādaṁ vā bhindissati lohitaṁ vā uppādessatīti netaṁ ṭhānaṁ vijjati.
Taṁ kissa hetu. Micchāpaṇihitattā bhikkhave sukassa. Evameva
kho bhikkhave so vata bhikkhu micchāpaṇihitāya diṭṭhiyā micchāpaṇihitāya
maggabhāvanāya avijjaṁ bhindissati vijjaṁ uppādessati
nibbānaṁ sacchikarissatīti netaṁ ṭhānaṁ vijjati. Taṁ kissa hetu.
Micchāpaṇihitattā bhikkhave diṭṭhiyā.

[43] Seyyathāpi bhikkhave sālisukaṁ vā yavasukaṁ vā sammāpaṇihitaṁ
hatthena vā pādena vā akkantaṁ hatthaṁ vā pādaṁ vā
bhindissati lohitaṁ vā uppādessatīti ṭhānametaṁ vijjati. Taṁ
kissa hetu. Sammāpaṇihitattā bhikkhave sukassa. Evameva kho
bhikkhave so vata bhikkhu sammāpaṇihitāya diṭṭhiyā sammāpaṇihitāya
maggabhāvanāya avijjaṁ bhindissati vijjaṁ uppādessati nibbānaṁ
sacchikarissatīti ṭhānametaṁ vijjati. Taṁ kissa hetu. Sammāpaṇihitattā
bhikkhave diṭṭhiyā.