[24] Yassa saddhā ca paññā ca dhammā yuggā 1 saddhā dhuraṁ
hiri īsā mano yottaṁ sati ārakkhasārathi.
Ratho sīlaparikkhāro jhānakkho cakkavīriyo
upekkhā dhurasamādhi anicchā parivāraṇaṁ.
Abyāpādo avihiṁsā viveko yassa āvudhaṁ
tītikkhā dhammasannāho 2 yogakkhemāya vattati.
1 Po. yuttā saddhā dhuraṁ. Ma. Yu. yuttā sadā dhuraṁ. 2 Ma. cammasannāho.
Etadattani 1 sambhūtaṁ brahmayānaṁ anuttaraṁ
niyyanti dhīrā lokamhā aññadatthu jayaṁ jayanti.

[25] Sāvatthīnidānaṁ. Atha kho sambahulā bhikkhū yena bhagavā
tenupasaṅkamiṁsu upasaṅkamitvā bhagavantaṁ abhivādetvā ekamantaṁ
nisīdiṁsu. Ekamantaṁ nisinnā kho te bhikkhū bhagavantaṁ etadavocuṁ
idha no bhante aññatitthiyā paribbājakā amhe evaṁ pucchanti
kimatthiyaṁ āvuso samaṇe gotame brahmacariyaṁ vussatīti. Evaṁ
puṭṭhā mayaṁ bhante tesaṁ aññatitthiyānaṁ paribbājakānaṁ evaṁ
byākaroma dukkhassa kho āvuso pariññatthaṁ bhagavati brahmacariyaṁ
vussatīti. Kacci mayaṁ bhante evaṁ puṭṭhā evaṁ byākaramānā
vuttavādino ceva bhagavato homa na ca bhagavantaṁ abhūtena
abbhācikkhāma dhammassa cānudhammaṁ byākaroma na ca koci
sahadhammiko vādānuvādo gārayhaṁ ṭhānaṁ āgacchatīti.

[26] Taggha tumhe bhikkhave evaṁ puṭṭhā evaṁ byākaramānā
vuttavādino ceva me hotha na ca maṁ abhūtena abbhācikkhatha
dhammassa cānudhammaṁ byākarotha na ca koci sahadhammiko vādānuvādo
gārayhaṁ ṭhānaṁ āgacchati dukkhassa hi pariññatthaṁ mayi brahmacariyaṁ
vussati.

[27] Sace vo bhikkhave aññatitthiyā paribbājakā evaṁ
puccheyyuṁ atthi panāvuso maggo atthi paṭipadā etassa
1 Yu. etadattaniyaṁ bhūtaṁ.
Dukkhassa pariññāyāti. Evaṁ puṭṭhā tumhe bhikkhave tesaṁ
aññatitthiyānaṁ paribbājakānaṁ evaṁ byākareyyātha atthi kho
āvuso maggo atthi paṭipadā etassa dukkhassa pariññāyāti.

[28] Katamo ca bhikkhave maggo katamā paṭipadā etassa
dukkhassa pariññāyāti. Ayameva ariyo aṭṭhaṅgiko maggo.
Seyyathīdaṁ. Sammādiṭṭhi .pe. Sammāsamādhi. Ayaṁ bhikkhave
maggo ayaṁ paṭipadā etassa dukkhassa pariññāyāti. Evaṁ
puṭṭhā tumhe bhikkhave tesaṁ aññatitthiyānaṁ paribbājakānaṁ evaṁ
byākareyyāthāti.

[29] Sāvatthīnidānaṁ. Atha kho aññataro bhikkhu yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinno kho so bhikkhu bhagavantaṁ etadavoca brahmacariyaṁ
brahmacariyanti bhante vuccati. Katamaṁ nu kho bhante brahmacariyaṁ.
Katamaṁ brahmacariyapariyosānanti.

[30] Ayameva kho bhikkhu ariyo aṭṭhaṅgiko maggo brahmacariyaṁ.
Seyyathīdaṁ. Sammādiṭṭhi .pe. Sammāsamādhi. Yo
kho bhikkhu rāgakkhayo dosakkhayo mohakkhayo idaṁ brahmacariyapariyosānanti.

[31] Sāvatthīnidānaṁ. Atha kho aññataro bhikkhu yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinno kho so bhikkhu bhagavantaṁ etadavoca rāgavinayo
dosavinayo mohavinayoti bhante vuccati. Kissa nu kho etaṁ bhante
adhivacanaṁ rāgavinayo dosavinayo mohavinayoti. Nibbānadhātuyā
kho etaṁ bhikkhu adhivacanaṁ rāgavinayo dosavinayo mohavinayoti.
Āsavānaṁ khayo tena vuccatīti.

[32] Evaṁ vutte so bhikkhu bhagavantaṁ etadavoca amataṁ
amatanti bhante vuccati. Katamaṁ nu kho bhante amataṁ katamo
amatagāmimaggoti. Yo kho bhikkhu rāgakkhayo dosakkhayo mohakkhayo
idaṁ vuccati amataṁ. Ayamevāriyo aṭṭhaṅgiko maggo amatagāmimaggo.
Seyyathīdaṁ. Sammādiṭṭhi .pe. Sammāsamādhīti.

[33] Sāvatthīnidānaṁ. Ariyaṁ vo bhikkhave aṭṭhaṅgikaṁ maggaṁ
desessāmi vibhajissāmi taṁ suṇātha sādhukaṁ manasikarotha bhāsissāmīti.
Evambhanteti kho te bhikkhū bhagavato paccassosuṁ.
Bhagavā etadavoca katamo ca bhikkhave ariyo aṭṭhaṅgiko maggo.
Seyyathīdaṁ. Sammādiṭṭhi .pe. Sammāsamādhi.