[4] Evamme sutaṁ ekaṁ samayaṁ bhagavā sakyesu viharati
sakkaraṁ nāma sakyānaṁ nigamo. Atha kho āyasmā ānando
yena bhagavā tenupasaṅkami upasaṅkamitvā bhagavantaṁ abhivādetvā
ekamantaṁ nisīdi. Ekamantaṁ nisinno kho āyasmā ānando
bhagavantaṁ etadavoca upaḍḍhamidaṁ bhante brahmacarayassa 1 yadidaṁ
kalyāṇamittatā kalyāṇasahāyatā kalyāṇasampavaṅkatāti.

[5] Mā hevaṁ ānanda avaca 2 mā hevaṁ ānanda avaca 3
sakalameva 4 hidaṁ ānanda brahmacariyaṁ yadidaṁ kalyāṇamittatā kalyāṇasahāyatā
kalyāṇasampavaṅkatā. Kalyāṇamittassetaṁ ānanda bhikkhuno
pāṭikaṅkhaṁ kalyāṇasahāyakassa kalyāṇasampavaṅkassa ariyaṁ aṭṭhaṅgikaṁ
maggaṁ bhāvessati ariyaṁ aṭṭhaṅgikaṁ maggaṁ bahulīkarissatīti.

[6] Kathañcānanda bhikkhu kalyāṇamitto kalyāṇasahāyo kalyāṇasampavaṅko
ariyaṁ aṭṭhaṅgikaṁ maggaṁ bhāveti ariyaṁ aṭṭhaṅgikaṁ maggaṁ
bahulīkaroti. Idhānanda bhikkhu sammādiṭṭhiṁ bhāveti vivekanissitaṁ
virāganissitaṁ nirodhanissitaṁ vossaggapariṇāmiṁ sammāsaṅkappaṁ bhāveti
1 Ma. brahmacariyaṁ. 2-3 Ma. Yu. ayaṁ pāṭho natthi. 4 Ma. sakamevidaṁ ānanda ....
Vivekanissitaṁ .pe. Sammāvācaṁ bhāveti .pe. Sammākammantaṁ
bhāveti .pe. Sammāājīvaṁ bhāveti .pe. Sammāvāyāmaṁ bhāveti
.pe. Sammāsatiṁ bhāveti .pe. Sammāsamādhiṁ bhāveti vivekanissitaṁ
virāganissitaṁ nirodhanissitaṁ vossaggapariṇāmiṁ. Evaṁ kho ānanda
bhikkhu kalyāṇamitto kalyāṇasahāyo kalyāṇasampavaṅko ariyaṁ
aṭṭhaṅgikaṁ maggaṁ bhāveti ariyaṁ aṭṭhaṅgikaṁ maggaṁ bahulīkaroti.

[7] Tadimināpetaṁ 1 ānanda pariyāyena veditabbaṁ yathā sakalamevidaṁ
brahmacariyaṁ yadidaṁ kalyāṇamittatā kalyāṇasahāyatā
kalyāṇasampavaṅkatāti. Mamañhi ānanda kalyāṇamittaṁ āgamma
jātidhammā sattā jātiyā parimuccanti jarādhammā sattā jarāya
parimuccanti maraṇadhammā sattā maraṇena parimuccanti
sokaparidevadukkhadomanassupāyāsadhammā sattā sokaparidevadukkha-
domanassupāyāsehi parimuccanti. Iminā kho etaṁ ānanda pariyāyena
veditabbaṁ yathā sakalamevidaṁ brahmacariyaṁ yadidaṁ kalyāṇamittatā
kalyāṇasahāyatā kalyāṇasampavaṅkatāti.

[8] Sāvatthīnidānaṁ. Atha kho āyasmā sārīputto yena
bhagavā tenupasaṅkami upasaṅkamitvā bhagavantaṁ abhivādetvā ekamantaṁ
nisīdi. Ekamantaṁ nisinno kho āyasmā sārīputto bhagavantaṁ
etadavoca sakalamidaṁ bhante brahmacariyaṁ yadidaṁ kalyāṇamittatā
kalyāṇasahāyatā kalyāṇasampavaṅkatāti.
1 Ma. Yu. tadamināpetaṁ.

[9] Sādhu sādhu sārīputta sakalamidaṁ sārīputta brahmacariyaṁ
yadidaṁ kalyāṇamittatā kalyāṇasahāyatā kalyāṇasampavaṅkatā.
Kalyāṇamittassetaṁ sārīputta bhikkhuno pāṭikaṅkhaṁ kalyāṇasahāyassa
kalyāṇasampavaṅkassa ariyaṁ aṭṭhaṅgikaṁ maggaṁ bhāvessati ariyaṁ
aṭṭhaṅgikaṁ maggaṁ bahulīkarissatīti.

[10] Kathañca sārīputta bhikkhu kalyāṇamitto kalyāṇasahāyo
kalyāṇasampavaṅko ariyaṁ aṭṭhaṅgikaṁ maggaṁ bhāveti ariyaṁ aṭṭhaṅgikaṁ
maggaṁ bahulīkaroti. Idha sārīputta bhikkhu sammādiṭṭhiṁ bhāveti
vivekanissitaṁ virāganissitaṁ nirodhanissitaṁ vossaggapariṇāmiṁ .pe.
Sammāsamādhiṁ bhāveti vivekanissitaṁ virāganissitaṁ nirodhanissitaṁ vossaggapariṇāmiṁ.
Evaṁ kho sārīputta bhikkhu kalyāṇamitto kalyāṇasahāyo
kalyāṇasampavaṅko ariyaṁ aṭṭhaṅgikaṁ maggaṁ bhāveti ariyaṁ
aṭṭhaṅgikaṁ maggaṁ bahulīkaroti.

[11] Tadimināpetaṁ sārīputta pariyāyena veditabbaṁ yathā
sakalamidaṁ brahmacariyaṁ yadidaṁ kalyāṇamittatā kalyāṇasahāyatā
kalyāṇasampavaṅkatāti. Mamañhi sārīputta kalyāṇamittaṁ āgamma
jātidhammā sattā jātiyā parimuccanti jarādhammā sattā jarāya
parimuccanti maraṇadhammā sattā maraṇena parimuccanti
sokaparidevadukkhadomanassupāyāsadhammā sattā sokaparidevadukkha-
domanassupāyāsehi parimuccanti. Iminā kho etaṁ sārīputta pariyāyena
Veditabbaṁ yathā sakalamidaṁ brahmacariyaṁ yadidaṁ kalyāṇamittatā kalyāṇasahāyatā
kalyāṇasampavaṅkatāti.

[12] Sāvatthīnidānaṁ. Atha kho āyasmā ānando pubbaṇhasamayaṁ
nivāsetvā pattacīvaramādāya sāvatthiṁ piṇḍāya pāvisi.
Addasā kho āyasmā ānando jāṇussoṇiṁ brāhmaṇaṁ sabbasetena
vaḷavābhirathena sāvatthiyā niyyāyantaṁ setā sudaṁ assā
yuttā honti setālaṅkārā seto ratho setaparivāro setā
rasmiyo setā patodalaṭṭhi setaṁ chattaṁ setaṁ uṇhīsaṁ setāni
vatthāni setā upāhanā setāya sudaṁ vālavījaniyā 1 vījiyyati.
Tamenaṁ jano disvā evamāha brahmaṁ vata bho yānaṁ brahmayānarūpaṁ
vata bhoti.

[13] Atha kho āyasmā ānando sāvatthiyaṁ piṇḍāya caritvā
pacchābhattaṁ piṇḍapātapaṭikkanto yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinno kho āyasmā ānando bhagavantaṁ etadavoca idhāhaṁ
bhante pubbaṇhasamayaṁ nivāsetvā pattacīvaramādāya sāvatthiṁ piṇḍāya
pāvisiṁ addasaṁ khvāhaṁ bhante jāṇussoṇiṁ brāhmaṇaṁ sabbasetena
vaḷavābhirathena sāvatthiyā niyyāyantaṁ setā sudaṁ assā yuttā honti
setālaṅkārā seto ratho setaparivāro setā rasmiyo setā
patodalaṭṭhi setaṁ chattaṁ setaṁ uṇhīsaṁ setāni vatthāni
1 Ma. vālabījaniyā bījiyyati. evamupari.
Setā upāhanā setāya sudaṁ vālavījaniyā vījiyyati. Tamenaṁ
jano disvā evamāha brahmaṁ vata bho yānaṁ brahmayānarūpaṁ
vata bhoti. Sakkā nu kho bhante imasmiṁ dhammavinaye brahmayānaṁ
paññapetunti.