[54] Sāvatthīnidānaṁ. Aṭṭhime bhikkhave dhammā parisuddhā
pariyodātā anaṅgaṇā vigatūpakkilesā anuppannā uppajjanti
nāññatra tathāgatassa pātubhāvā arahato sammāsambuddhassa.
Katame aṭṭha. Seyyathīdaṁ. Sammādiṭṭhi .pe. Sammāsamādhi. Ime
kho bhikkhave aṭṭha dhammā parisuddhā pariyodātā anaṅgaṇā
1 Yu. sekho sekhoti. evamupari.
Vigatūpakkilesā anuppannā uppajjanti nāññatra tathāgatassa
pātubhāvā arahato sammāsambuddhassāti.

[55] Sāvatthīnidānaṁ. Aṭṭhime bhikkhave dhammā parisuddhā
pariyodātā anaṅgaṇā vigatūpakkilesā anuppannā uppajjanti
nāññatra sugatavinayā. Katame aṭṭha. Seyyathīdaṁ. Sammādiṭṭhi
.pe. Sammāsamādhi. Ime kho bhikkhave aṭṭha dhammā parisuddhā
pariyodātā anaṅgaṇā vigatūpakkilesā anuppannā uppajjanti
nāññatra sugatavinayāti.

[56] Sāvatthīnidānaṁ. Evamme sutaṁ ekaṁ samayaṁ āyasmā ca
ānando āyasmā ca bhaddo pāṭaliputte viharanti kukkuṭārāme.
Atha kho āyasmā bhaddo sāyaṇhasamayaṁ paṭisallānā vuṭṭhito
yenāyasmā ānando tenupasaṅkami upasaṅkamitvā āyasmatā
ānandena saddhiṁ sammodi sammodanīyaṁ kathaṁ sārāṇīyaṁ vītisāretvā
ekamantaṁ nisīdi. Ekamantaṁ nisinno kho āyasmā bhaddo
āyasmantaṁ ānandaṁ etadavoca abrahmacariyaṁ abrahmacariyanti āvuso
ānanda vuccati katamaṁ nu kho āvuso abrahmacariyanti. Sādhu
sādhu āvuso bhadda bhaddako kho te āvuso bhadda ummaṅgo 1
bhaddakaṁ paṭibhāṇaṁ kalyāṇī paripucchā evaṁ hi tvaṁ āvuso bhadda
pucchasi abrahmacariyaṁ abrahmacariyanti āvuso ānanda vuccati
katamaṁ nu kho āvuso abrahmacariyanti. Evamāvusoti. Ayameva
1 Yu. ummaggo. evamupari.
Kho āvuso aṭṭhaṅgiko micchāmaggo abrahmacariyaṁ. Seyyathīdaṁ.
Micchādiṭṭhi .pe. Micchāsamādhīti.

[57] Pāṭaliputtanidānaṁ .pe. Brahmacariyaṁ brahmacariyanti
āvuso ānanda vuccati katamaṁ nu kho āvuso brahmacariyaṁ
katamaṁ brahmacariyapariyosānanti. Sādhu sādhu kho 1 āvuso bhadda
bhaddako kho te āvuso bhadda ummaṅgo bhaddakaṁ paṭibhāṇaṁ
kalyāṇī paripucchā evaṁ hi tvaṁ āvuso bhadda pucchasi brahmacariyaṁ
brahmacariyanti āvuso ānanda vuccati katamaṁ nu kho āvuso
brahmacariyaṁ katamaṁ brahmacariyapariyosānanti. Evamāvusoti.
Ayameva kho āvuso ariyo aṭṭhaṅgiko maggo brahmacariyaṁ.
Seyyathīdaṁ. Sammādiṭṭhi .pe. Sammāsamādhi. Yo kho āvuso
rāgakkhayo dosakkhayo mohakkhayo idaṁ brahmacariyapariyosānanti.

[58] Pāṭaliputtanidānaṁ. Brahmacariyaṁ brahmacariyanti āvuso
ānanda vuccati katamaṁ nu kho āvuso brahmacariyaṁ katamo
brahmacārī katamaṁ brahmacariyapariyosānanti. Sādhu sādhu āvuso
bhadda bhaddako kho te āvuso bhadda ummaṅgo bhaddakaṁ
paṭibhāṇaṁ kalyāṇī paripucchā evaṁ hi tvaṁ āvuso bhadda pucchasi
brahmacariyaṁ brahmacariyanti āvuso ānanda vuccati katamaṁ nu kho
āvuso brahmacariyaṁ katamo brahmacārī katamaṁ brahmacariyapariyosānanti.
Evamāvusoti. Ayameva kho āvuso ariyo
1 Ma. khosaddo natthi.
Aṭṭhaṅgiko maggo brahmacariyaṁ. Seyyathīdaṁ. Sammādiṭṭhi .pe.
Sammāsamādhi. Yo kho āvuso iminā ariyena aṭṭhaṅgikena
maggena samannāgato ayaṁ vuccati brahmacārī. Yo kho āvuso
rāgakkhayo dosakkhayo mohakkhayo idaṁ brahmacariyapariyosānanti.
Suttattayaṁ 1 ekanidānaṁ.
Vihāravaggo dutiyo.
Tassuddānaṁ
dve vihārā ca sekho ca uppāde 2 apare duve
parisuddhena dve vuttā kukkuṭārāmena tayoti.
---------
1 Ma. tīṇi suttantāni ekanidānāni. Yu. imesaṁ tiṇṇaṁ suttantānaṁ ekanidānaṁ.
2 Ma. uppādā ....
Micchattavaggo tatiyo

[59] Sāvatthīnidānaṁ. Micchattañca vo bhikkhave desessāmi
sammattañca taṁ suṇātha.

[60] Katamañca bhikkhave micchattaṁ. Seyyathīdaṁ. Micchādiṭṭhi
.pe. Micchāsamādhi. Idaṁ vuccati bhikkhave micchattaṁ.

[61] Katamañca bhikkhave sammattaṁ. Seyyathīdaṁ. Sammādiṭṭhi
.pe. Sammāsamādhi. Idaṁ vuccati bhikkhave sammattanti.

[62] Sāvatthīnidānaṁ. Akusale ca vo bhikkhave dhamme desissāmi
kusale ca dhamme taṁ suṇātha.

[63] Katame ca bhikkhave akusalā dhammā. Seyyathīdaṁ.
Micchādiṭṭhi .pe. Micchāsamādhi. Ime vuccanti bhikkhave akusalā
dhammā.