[64] Katame ca bhikkhave kusalā dhammā. Seyyathīdaṁ.
Sammādiṭṭhi .pe. Sammāsamādhi. Ime vuccanti bhikkhave kusalā
dhammāti.

[65] Sāvatthīnidānaṁ. Micchāpaṭipadañca vo bhikkhave desessāmi
sammāpaṭipadañca taṁ suṇātha.

[66] Katamā ca bhikkhave micchāpaṭipadā. Seyyathīdaṁ. Micchādiṭṭhi
.pe. Micchāsamādhi. Ayaṁ vuccati bhikkhave micchāpaṭipadā.

[67] Katamā ca bhikkhave sammāpaṭipadā. Seyyathīdaṁ.
Sammādiṭṭhi .pe. Sammāsamādhi. Ayaṁ vuccati bhikkhave sammāpaṭipadāti.

[68] Sāvatthīnidānaṁ. Gihino vāhaṁ bhikkhave pabbajitassa vā
micchāpaṭipadaṁ na vaṇṇemi. Gihī vā bhikkhave pabbajito vā
micchāpaṭipanno micchāpaṭipattādhikaraṇahetu nārādhako hoti ñāyaṁ
dhammaṁ kusalaṁ. Katamā ca bhikkhave micchāpaṭipadā. Seyyathīdaṁ.
Micchādiṭṭhi .pe. Micchāsamādhi. Ayaṁ vuccati bhikkhave micchāpaṭipadā.
Gihino vāhaṁ bhikkhave pabbajitassa vā micchāpaṭipadaṁ
na vaṇṇemi. Gihī vā bhikkhave pabbajito vā micchāpaṭipanno
micchāpaṭipattādhikaraṇahetu nārādhako hoti ñāyaṁ dhammaṁ kusalaṁ.

[69] Gihino vāhaṁ bhikkhave pabbajitassa vā sammāpaṭipadaṁ
vaṇṇemi. Gihī vā bhikkhave pabbajito vā sammāpaṭipanno
sammāpaṭipattādhikaraṇahetu ārādhako hoti ñāyaṁ dhammaṁ kusalaṁ.
Katamā ca bhikkhave sammāpaṭipadā. Seyyathīdaṁ. Sammādiṭṭhi .pe.
Sammāsamādhi. Ayaṁ vuccati bhikkhave sammāpaṭipadā. Gihino
vāhaṁ bhikkhave pabbajitassa vā sammāpaṭipadaṁ vaṇṇemi. Gihī vā
bhikkhave pabbajito vā sammāpaṭipanno sammāpaṭipattādhikaraṇahetu
ārādhako hoti ñāyaṁ dhammaṁ kusalanti.

[70] Sāvatthīnidānaṁ. Asappurisañca vo bhikkhave desissāmi
Sappurisañca taṁ suṇātha.

[71] Katamo ca bhikkhave asappuriso. Idha bhikkhave ekacco
micchādiṭṭhiko hoti micchāsaṅkappo micchāvāco micchākammanto
micchāājīvo micchāvāyāmo micchāsati micchāsamādhi. Ayaṁ
vuccati bhikkhave asappuriso.

[72] Katamo ca bhikkhave sappuriso. Idha bhikkhave ekacco
sammādiṭṭhiko hoti sammāsaṅkappo sammāvāco sammākammanto
sammāājīvo sammāvāyāmo sammāsati sammāsamādhi. Ayaṁ
vuccati bhikkhave sappurisoti.

[73] Sāvatthīnidānaṁ. Asappurisañca vo bhikkhave desessāmi
asappurisena asappurisatarañca. Sappurisañca vo bhikkhave desissāmi
sappurisena sappurisatarañca taṁ suṇātha.