[598] Ekaṁ samayaṁ bhagavā nāḷandāyaṁ viharati pāvārikambavane.
Atha kho asibandhakaputto gāmaṇī yena bhagavā tenupasaṅkami upasaṅkamitvā
bhagavantaṁ abhivādetvā ekamantaṁ nisīdi. Ekamantaṁ nisinno
kho asibandhakaputto gāmaṇī bhagavantaṁ etadavoca brāhmaṇā
bhante pacchābhūmakā kāmaṇḍalukā sevālamālikā udakorohakā
aggiparicārakā te mataṁ kālakataṁ uyyāpenti nāma saññāpenti
nāma saggaṁ nāma okkāpenti. Bhagavā pana bhante arahaṁ
sammāsambuddho pahoti tathā kātuṁ yathā sabbo loko kāyassa
bhedā paraṁ maraṇā sugatiṁ saggaṁ lokaṁ upapajjeyyāti. Tenahi
gāmaṇi taññevettha paṭipucchissāmi. Yathā te khameyya tathā
naṁ byākareyyāsīti. Taṁ kiṁ maññasi gāmaṇi idhassa puriso
pāṇātipātī adinnādāyī kāmesu micchācārī musāvādī pisuṇavāco
pharusavāco samphappalāpī abhijjhālu byāpannacitto micchādiṭṭhiko
tamenaṁ mahājanakāyo saṅgamma samāgamma āyāceyya
thomeyya pañjaliko anuparisakkeyya ayaṁ puriso kāyassa bhedā
paraṁ maraṇā sugatiṁ saggaṁ lokaṁ upapajjatūti. Taṁ kiṁ maññasi
Gāmaṇi api nu so puriso mahato janakāyassa āyācanahetu vā
thomanahetu vā pañjalikāanuparisakkanahetu vā kāyassa bhedā paraṁ
maraṇā sugatiṁ saggaṁ lokaṁ upapajjeyyāti. No hetaṁ bhante.

[599] Seyyathāpi gāmaṇi puriso mahantaṁ 1 puthusilaṁ gambhīre
udakarahade pakkhipeyya tamenaṁ mahājanakāyo saṅgamma samāgamma
āyāceyya thomeyya pañjaliko anuparisakkeyya ummujja bho
puthusile uplava bho puthusile thalamuplava bho puthusileti.
Taṁ kiṁ maññasi gāmaṇi api nu sā puthusilā mahato janakāyassa
āyācanahetu vā thomanahetu vā pañjalikāanuparisakkanahetu vā
ummujjeyya vā uplaveyya vā thalaṁ vā uplaveyyāti. No
hetaṁ bhante. Evameva kho gāmaṇi yo so puriso pāṇātipātī
adinnādāyī kāmesu micchācārī musāvādī pisuṇavāco pharusavāco
samphappalāpī abhijjhālu byāpannacitto micchādiṭṭhiko. Kiñcāpi
taṁ mahājanakāyo saṅgamma samāgamma āyāceyya thomeyya pañjaliko
anuparisakkeyya ayaṁ puriso kāyassa bhedā paraṁ maraṇā sugatiṁ
saggaṁ lokaṁ upapajjatūti. Atha kho so puriso kāyassa bhedā
paraṁ maraṇā apāyaṁ duggatiṁ vinipātaṁ nirayaṁ upapajjeyya.

[600] Taṁ kiṁ maññasi gāmaṇi idhassa puriso pāṇātipātā
paṭivirato adinnādānā paṭivirato kāmesu micchācārā paṭivirato
musāvādā paṭivirato pisuṇāya vācāya paṭivirato pharusāya vācāya
1 Ma. Yu. mahatiṁ.
Paṭivirato samphappalāpā paṭivirato anabhijjhālu abyāpannacitto
sammādiṭṭhiko tamenaṁ mahājanakāyo saṅgamma samāgamma āyāceyya
thomeyya pañjaliko anuparisakkeyya ayaṁ puriso kāyassa bhedā
paraṁ maraṇā apāyaṁ duggatiṁ vinipātaṁ nirayaṁ upapajjatūti. Taṁ kiṁ
maññasi gāmaṇi api nu so puriso mahato janakāyassa āyācanahetu
vā thomanahetu vā pañjalikāanuparisakkanahetu vā kāyassa bhedā
paraṁ maraṇā apāyaṁ duggatiṁ vinipātaṁ nirayaṁ upapajjeyyāti. No
hetaṁ bhante.

[601] Seyyathāpi gāmaṇi puriso sappikumbhaṁ vā telakumbhaṁ
vā gambhīraṁ udakarahadaṁ 1 ogāhitvā 2 bhindeyya tatra yassa 3 sakkharā
vā kaṭhalā vā sā adhogāmī assa yañca khvassa tatra sappi
vā telaṁ vā taṁ uddhaṅgāmi assa tamenaṁ mahājanakāyo saṅgamma
samāgamma āyāceyya thomeyya pañjaliko anuparisakkeyya osīda
bho sappitela saṁsīda bho sappitela adho gaccha bho sappitelāti.
Taṁ kiṁ maññasi gāmaṇi api nu taṁ sappitelaṁ mahato janakāyassa
āyācanahetu vā thomanahetu vā pañjalikāanuparisakkanahetu vā
osīdeyya vā saṁsīdeyya vā adho vā gaccheyyāti. No hetaṁ
bhante. Evameva kho gāmaṇi yo so puriso pāṇātipātā
paṭivirato adinnādānā paṭivirato kāmesu micchācārā paṭivirato
musāvādā paṭivirato pisuṇāya vācāya paṭivirato pharusāya vācāya
1 Ma. udakarahade. 2 Ma. Yu. ogāhetvā. 3 Ma. tatra yāssa. Yu.
tatrassa yā.
Paṭivirato samphappalāpā paṭivirato anabhijjhālu abyāpannacitto
sammādiṭṭhiko kiñcāpi taṁ mahājanakāyo saṅgamma samāgamma
āyāceyya thomeyya pañjaliko anuparisakkeyya ayaṁ puriso kāyassa
bhedā paraṁ maraṇā apāyaṁ duggatiṁ vinipātaṁ nirayaṁ upapajjatūti.
Atha kho so puriso kāyassa bhedā paraṁ maraṇā sugatiṁ saggaṁ
lokaṁ upapajjeyyāti.

[602] Evaṁ vutte asibandhakaputto gāmaṇī bhagavantaṁ etadavoca
abhikkantaṁ bhante .pe. Ajjatagge pāṇupetaṁ saraṇaṅgatanti.
Chaṭṭhaṁ.

[603] Ekaṁ samayaṁ bhagavā nāḷandāyaṁ viharati pāvārikambavane.
Atha kho asibandhakaputto gāmaṇī yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi. Ekamantaṁ
nisinno kho asibandhakaputto gāmaṇī bhagavantaṁ etadavoca nanu
bhante bhagavā sabbapāṇabhūtahitānukampī viharatīti. Evaṁ gāmaṇi
tathāgato sabbapāṇabhūtahitānukampī viharatīti. Atha kiñcarahi bhante
bhagavā ekaccānaṁ sakkaccaṁ dhammaṁ deseti ekaccānaṁ no tathā
sakkaccaṁ dhammaṁ desetīti. Tenahi gāmaṇi taññevettha
paṭipucchissāmi. Yathā te khameyya tathā naṁ byākareyyāsi. Taṁ
kiṁ maññasi gāmaṇi idha kassakassa gahapatino tīṇi khettāni
ekaṁ khettaṁ aggaṁ ekaṁ khettaṁ majjhimaṁ ekaṁ khettaṁ hīnaṁ jaṅgalaṁ
Osaraṁ 1 pāpabhūmi. Taṁ kiṁ maññasi gāmaṇi asu kassako gahapati
vījāni patiṭṭhapetukāmo kattha paṭhamaṁ patiṭṭhapeyya yaṁ vā aduṁ
khettaṁ aggaṁ yaṁ vā aduṁ khettaṁ majjhimaṁ yaṁ vā aduṁ khettaṁ hīnaṁ
jaṅgalaṁ osaraṁ pāpabhūminti. Asu bhante kassako gahapati bījāni
patiṭṭhapetukāmo yaṁ aduṁ khettaṁ aggaṁ tattha patiṭṭhapeyya tattha
patiṭṭhapetvā yaṁ aduṁ khettaṁ majjhimaṁ tattha patiṭṭhapeyya tattha
patiṭṭhapetvā yaṁ aduṁ khettaṁ hīnaṁ jaṅgalaṁ osaraṁ pāpabhūmi tattha
patiṭṭhapeyyapi nopi patiṭṭhapeyya. Taṁ kissa hetu. Antamaso
gobhattaṁpi bhavissatīti.

[604] Seyyathāpi gāmaṇi yaṁ aduṁ khettaṁ aggaṁ evameva
mayhaṁ bhikkhu bhikkhuniyo tesāhaṁ dhammaṁ desemi ādikalyāṇaṁ majjhekalyāṇaṁ
pariyosānakalyāṇaṁ sātthaṁ sabyañjanaṁ kevalaparipuṇṇaṁ
parisuddhaṁ brahmacariyaṁ pakāsemi. Taṁ kissa hetu. Ete hi
gāmaṇi maṁdīpā maṁleṇā maṁtāṇā maṁsaraṇā viharanti. Seyyathāpi
gāmaṇi yaṁ aduṁ khettaṁ majjhimaṁ evameva mayhaṁ upāsakā upāsikāyo 2
tesāhaṁ 3 dhammaṁ desemi ādikalyāṇaṁ majjhekalyāṇaṁ pariyosānakalyāṇaṁ
sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ
pakāsemi. Taṁ kissa hetu. Ete hi gāmaṇi maṁdīpā maṁleṇā
maṁtāṇā maṁsaraṇā viharanti. Seyyathāpi gāmaṇi yaṁ aduṁ khettaṁ
hīnaṁ jaṅgalaṁ osaraṁ pāpabhūmi evameva mayhaṁ aññatitthiyā
1 Ma. Yu. ūsaraṁ. 2 Ma. upāsakaupāsikāyo. 3 Ma. Yu. tesaṁ pāhaṁ. evamuparipi.
Samaṇabrāhmaṇaparibbājakā nesaṁ cāhaṁ dhammaṁ desemi ādikalyāṇaṁ
majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ
parisuddhaṁ brahmacariyaṁ pakāsemi.

[605] Taṁ kissa hetu. Appevanāma ekapadampi ājāneyyuṁ
taṁ nesaṁ assa dīgharattaṁ hitāya sukhāya 1 . Seyyathāpi gāmaṇi
purisassa tayo udakamaṇikā eko udakamaṇiko acchiddo ahāriaparihārī 2
eko udakamaṇiko acchiddo hāriparihārī 3 eko
udakamaṇiko chiddo hāriparihārī. Taṁ kiṁ maññasi gāmaṇi
asu puriso udakaṁ nikkhipitukāmo tattha paṭhamaṁ nikkhipeyya yo vā
so udakamaṇiko acchiddo ahāriaparihārī yo vā so udakamaṇiko
acchiddo hāriparihārī yo vā so udakamaṇiko chiddo
hāriparihārī. Asu bhante puriso udakaṁ nikkhipitukāmo yo so
udakamaṇiko acchiddo ahāriaparihārī tattha nikkhipeyya tattha
nikkhipitvā yo so udakamaṇiko acchiddo hāriparihārī tattha
nikkhipeyya tattha nikkhipitvā yo so udakamaṇiko chiddo
hāriparihārī tattha nikkhipeyyapi nopi nikkhipeyya. Taṁ kissa hetu.
Antamaso bhaṇḍadhovanaṁpi bhavissatīti.

[606] Seyyathāpi gāmaṇi yo so udakamaṇiko acchiddo
ahāriaparihārī evameva mayhaṁ bhikkhu bhikkhuniyo tesāhaṁ dhammaṁ
desemi ādikalyāṇaṁ majjhekalyāṇaṁ pariyosānakalyāṇaṁ sātthaṁ
1 Ma. Yu. sukhāyāti. 2 Ma. Yu. ahārī aparihārī. evamuparipi. 3 Ma. Yu. hārī
parihārī. evamuparipi. 4 Ma. Yu. kattha. evamuparipi.
Sabyañjanaṁ kevalaparipuṇṇaṁ parisuddhaṁ brahmacariyaṁ pakāsemi. Taṁ
kissa hetu. Ete hi gāmaṇi maṁdīpā maṁleṇā maṁtāṇā maṁsaraṇā
viharanti. Seyyathāpi gāmaṇi yo so udakamaṇiko acchiddo
hāriparihārī evameva mayhaṁ upāsakā upāsikāyo tesaṁ ahaṁ
dhammaṁ desemi ādikalyāṇaṁ majjhekalyāṇaṁ pariyosānakalyāṇaṁ
sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ pakāsemi.
Taṁ kissa hetu. Ete hi gāmaṇi maṁdīpā maṁleṇā maṁtāṇā
maṁsaraṇā viharanti. Seyyathāpi gāmaṇi yo so udakamaṇiko
chiddo hāriparihārī evameva mayhaṁ aññatitthiyā samaṇabrāhmaṇaparibbājakā
tesaṁ ahaṁ dhammaṁ desemi ādikalyāṇaṁ majjhekalyāṇaṁ
pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ
brahmacariyaṁ pakāsemi. Taṁ kissa hetu. Appevanāma ekapadampi
ājāneyyuṁ taṁ nesaṁ assa dīgharattaṁ hitāya sukhāyāti.

[607] Evaṁ vutte asibandhakaputto gāmaṇī bhagavantaṁ etadavoca
abhikkantaṁ bhante .pe. Upāsakaṁ maṁ bhagavā dhāretu ajjatagge
pāṇupetaṁ saraṇaṅgatanti. Sattamaṁ.