[608] Ekaṁ samayaṁ bhagavā nāḷandāyaṁ viharati pāvārikambavane.
Atha kho asibandhakaputto gāmaṇī nigaṇṭhasāvako yena bhagavā
tenupasaṅkami upasaṅkamitvā .pe. Ekamantaṁ nisinnaṁ kho
asibandhakaputtaṁ gāmaṇiṁ bhagavā etadavoca kathaṁ nu kho gāmaṇi nigaṇṭho
Nāṭaputto sāvakānaṁ dhammaṁ desetīti. Evaṁ kho bhante nigaṇṭho
nāṭaputto sāvakānaṁ dhammaṁ deseti yokoci pāṇaṁ atimāpeti 1
sabbo so āpāyiko nerayiko yokoci adinnaṁ ādiyati
sabbo so āpāyiko nerayiko yokoci kāmesu micchācarati
sabbo so āpāyiko nerayiko yokoci musā bhaṇati sabbo
so āpāyiko nerayiko yaṁ bahulaṁ yaṁ bahulaṁ viharati tena tena
niyyatīti. Evaṁ kho bhante nigaṇṭho nāṭaputto sāvakānaṁ dhammaṁ
desetīti.

[609] Yaṁ bahulaṁ yaṁ bahulaṁ ca gāmaṇi viharati tena tena
niyyatīti. Evaṁ sante na koci āpāyiko nerayiko bhavissati
yathā nigaṇṭhassa nāṭaputtassa vacanaṁ. Taṁ kiṁ maññasi gāmaṇi
yo so puriso pāṇātipātī rattiyā vā divasassa vā samayāsamayaṁ
upādāya katamo bahutaro samayo yaṁ 2 so pāṇaṁ atimāpeti yaṁ
vā so pāṇaṁ nātimāpetīti. Yo so bhante puriso pāṇātipātī
rattiyā vā divasassa vā samayāsamayaṁ upādāya appataro so
samayo yaṁ so pāṇaṁ atimāpeti. Atha kho sveva bahutaro
samayo yaṁ so pāṇaṁ nātimāpetīti. Yaṁ bahulaṁ yaṁ bahulaṁ ca
gāmaṇi viharati tena tena niyyatīti. Evaṁ sante na koci
āpāyiko nerayiko bhavissati yathā nigaṇṭhassa nāṭaputtassa vacanaṁ.

[610] Taṁ kiṁ maññasi gāmaṇi yo so puriso adinnādāyī
1 Ma. atipāteti. evamuparipi. 2 Ma. Yu. yaṁ vā. evamuparipi.
Rattiyā vā divasassa vā samayāsamayaṁ upādāya katamo bahutaro
samayo yaṁ so adinnaṁ ādiyati yaṁ vā so adinnaṁ nādiyatīti.
Yo so bhante puriso adinnādāyī rattiyā vā divasassa vā
samayāsamayaṁ upādāya appataro so samayo yaṁ so adinnaṁ
ādiyati. Atha kho sveva bahutaro samayo yaṁ so adinnaṁ
nādiyatīti. Yaṁ bahulaṁ yaṁ bahulaṁ ca gāmaṇi viharati tena tena
niyyatīti. Evaṁ sante na koci āpāyiko nerayiko bhavissati
yathā nigaṇṭhassa nāṭaputtassa vacanaṁ.

[611] Taṁ kiṁ maññasi gāmaṇi yo so puriso kāmesu micchācārī
rattiyā vā divasassa vā samayāsamayaṁ upadāya katamo bahutaro
samayo yaṁ so kāmesu micchācarati yaṁ vā so kāmesu micchā
na caratīti. Yo so bhante puriso kāmesu micchācārī rattiyā
vā divasassa vā samayāsamayaṁ upādāya appataro so samayo yaṁ
so kāmesu micchācarati. Atha kho sveva bahutaro samayo yaṁ
so kāmesu micchā na caratīti. Yaṁ bahulaṁ yaṁ bahulaṁ ca gāmaṇi
viharati tena tena niyyatīti. Evaṁ sante na koci āpāyiko
nerayiko bhavissati yathā nigaṇṭhassa nāṭaputtassa vacanaṁ.

[612] Taṁ kiṁ maññasi gāmaṇi yo so puriso musāvādī
rattiyā vā divasassa vā samayāsamayaṁ upādāya katamo bahutaro samayo
yaṁ so musā bhaṇati yaṁ vā so musā na bhaṇatīti. Yo so
Bhante puriso musāvādī rattiyā vā divasassa vā samayāsamayaṁ
upādāya appataro so samayo yaṁ so musā bhaṇati. Atha kho
sveva bahutaro samayo yaṁ so musā na bhaṇatīti. Yaṁ bahulaṁ yaṁ
bahulaṁ ca gāmaṇi viharati tena tena niyyatīti. Evaṁ sante na koci
āpāyiko nerayiko bhavissati yathā nigaṇṭhassa nāṭaputtassa vacanaṁ.

[613] Idha gāmaṇi ekacco satthā evaṁvādī hoti evaṁdiṭṭhi
yo koci pāṇamatimāpeti sabbo so āpāyiko nerayiko yo
koci adinnaṁ ādiyati sabbo so āpāyiko nerayiko yo koci
kāmesu micchācarati sabbo so āpāyiko nerayiko yo koci
musā bhaṇati sabbo so āpāyiko nerayikoti.

[614] Tasmiṁ kho pana gāmaṇi satthari sāvako abhippasanno
hoti tassa evaṁ hoti mayhaṁ kho satthā evaṁvādī evaṁdiṭṭhi
yo koci pāṇamatimāpeti sabbo so āpāyiko nerayikoti.
Atthi kho pana mayā pāṇo atimāpito 1 ahaṁpamhi āpāyiko
nerayikoti diṭṭhiṁ paṭilabhati taṁ gāmaṇi vācaṁ appahāya taṁ cittaṁ
appahāya taṁ diṭṭhiṁ appaṭinissajjitvā yathābhataṁ 2 nikkhitto evaṁ
niraye. Mayhaṁ kho satthā evaṁvādī evaṁdiṭṭhi yo koci adinnaṁ
ādiyati sabbo so āpāyiko nerayikoti. Atthi kho pana
mayā adinnaṁ ādinnaṁ ahaṁpamhi āpāyiko nerayikoti diṭṭhiṁ
paṭilabhati taṁ gāmaṇi vācaṁ appahāya taṁ cittaṁ appahāya taṁ
1 Ma. atipāpito. 2 Yu. yathāhataṁ.
Diṭṭhiṁ appaṭinissajjitvā yathābhataṁ nikkhitto evaṁ niraye. Mayhaṁ
kho satthā evaṁvādī evaṁdiṭṭhi yo koci kāmesu micchācarati
sabbo so āpāyiko nerayikoti. Atthi kho pana mayā kāmesu
micchācārā ciṇṇā ahaṁpamhi 1 āpāyiko nerayikoti diṭṭhiṁ
paṭilabhati taṁ gāmaṇi vācaṁ appahāya taṁ cittaṁ appahāya taṁ diṭṭhiṁ
appaṭinissajjitvā yathābhataṁ nikkhitto evaṁ niraye. Mayhaṁ kho
satthā evaṁvādī evaṁdiṭṭhi yo koci musā bhaṇati sabbo so
āpāyiko nerayikoti. Atthi kho pana mayā musā bhaṇitaṁ ahaṁpamhi
āpāyiko nerayikoti diṭṭhiṁ paṭilabhati taṁ gāmaṇi vācaṁ appahāya
taṁ cittaṁ appahāya taṁ diṭṭhiṁ appaṭinissajjitvā yathābhataṁ nikkhitto
evaṁ niraye.

[615] Idha pana gāmaṇi tathāgato loke uppajjati arahaṁ
sammāsambuddho vijjācaraṇasampanno sugato lokavidū anuttaro
purisadammasārathi satthā devamanussānaṁ buddho bhagavā. So anekapariyāyena
pāṇātipātaṁ garahati vigarahati pāṇātipātā viramathāti
cāha 2 adinnādānaṁ garahati vigarahati adinnādānā viramathāti cāha
kāmesu micchācāraṁ garahati vigarahati kāmesu micchācārā viramathāti
cāha musāvādaṁ garahati vigarahati musāvādā viramathāti cāha.
Tasmiṁ kho pana gāmaṇi satthari sāvako abhippasanno hoti.
So iti paṭisañcikkhati bhagavā kho anekapariyāyena pāṇātipātaṁ
1 Ma. micchā ciṇṇaṁ ahampamhi. Yu. micchā ciṇṇamāhampamhi. 2 Yu. āha.
Garahati vigarahati pāṇātipātā viramathāti cāha. Atthi kho pana
mayā pāṇo atimāpito yāvatako vā tāvatako vā yo kho
pana mayā pāṇo atimāpito yāvatako vā tāvatako vā taṁ
na suṭṭhu taṁ na sādhu ahañceva kho pana tappaccayā vippaṭisārī
assaṁ na me taṁ pāpakammaṁ akataṁ bhavissatīti. So iti paṭisaṅkhāya
tañceva pāṇātipātaṁ pajahati āyatiñca pāṇātipātā paṭivirato
hoti evametassa pāpassa kammassa pahānaṁ hoti evametassa
pāpassa kammassa samatikkamo hoti.

[616] Bhagavā kho anekapariyāyena adinnādānaṁ garahati vigarahati
adinnādānā viramathāti cāha. Atthi kho pana mayā adinnaṁ
ādinnaṁ yāvatakaṁ vā tāvatakaṁ vā yaṁ kho pana mayā adinnaṁ
ādinnaṁ yāvatakaṁ vā tāvatakaṁ vā taṁ na suṭṭhu taṁ na sādhu
ahañceva kho pana tappaccayā vippaṭisārī assaṁ na me taṁ
pāpakammaṁ akataṁ bhavissatīti. So iti paṭisaṅkhāya tañceva
adinnādānaṁ pajahati āyatiñca adinnādānā paṭivirato hoti
evametassa pāpassa kammassa pahānaṁ hoti evametassa pāpassa
kammassa samatikkamo hoti.

[617] Bhagavā kho anekapariyāyena kāmesu micchācāraṁ garahati
vigarahati kāmesu micchācārā viramathāti cāha. Atthi kho pana
mayā kāmesu micchā ciṇṇaṁ yāvatakaṁ vā tāvatakaṁ vā yaṁ kho
Pana mayā kāmesu micchā ciṇṇaṁ yāvatakaṁ vā tāvatakaṁ vā taṁ
na suṭṭhu taṁ na sādhu ahañceva kho pana tappaccayā vippaṭisārī
assaṁ na me taṁ pāpakammaṁ akataṁ bhavissatīti. So iti paṭisaṅkhāya
tañceva kāmesu micchācāraṁ pajahati āyatiñca kāmesu micchācārā
paṭivirato hoti. Evametassa pāpassa kammassa pahānaṁ hoti
evametassa pāpassa kammassa samatikkamo hoti.