[442] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññataro
bhikkhu sāvatthiyaṁ aññatarissā visikhāya piṇḍāya carati. Aññatarāpi
bhikkhunī tassā visikhāya piṇḍāya carati. Athakho so bhikkhu taṁ
bhikkhuniṁ etadavoca gaccha bhagini amukasmiṁ okāse bhikkhā
dīyatīti. Sāpi [1]- evamāha gaccha ayya 2 amukasmiṁ okāse
bhikkhā dīyatīti. Te abhiṇhadassanena sandiṭṭhā ahesuṁ. Tena
kho pana samayena saṅghassa cīvaraṁ bhājiyati 3 . Athakho sā bhikkhunī
ovādaṁ gantvā yena so bhikkhu tenupasaṅkami upasaṅkamitvā
taṁ bhikkhuṁ abhivādetvā ekamantaṁ aṭṭhāsi. Ekamantaṁ ṭhitaṁ kho
taṁ bhikkhuniṁ so bhikkhu etadavoca ayaṁ me bhagini cīvarapaṭiviso 4
sādiyissasīti. Āma ayya dubbalacīvaramhīti. Athakho so bhikkhu
tassā bhikkhuniyā cīvaraṁ adāsi. Sopi kho bhikkhu dubbalacīvaro
hoti. Bhikkhū taṁ bhikkhuṁ etadavocuṁ karohidāni te āvuso
cīvaranti. Athakho so bhikkhu bhikkhūnaṁ etamatthaṁ ārocesi. Ye
te bhikkhū appicchā .pe. Te ujjhāyanti khīyanti vipācenti
kathaṁ hi nāma bhikkhu bhikkhuniyā cīvaraṁ dassatīti .pe. Saccaṁ kira
tvaṁ bhikkhu bhikkhuniyā cīvaraṁ adāsīti. Saccaṁ bhagavāti. Ñātikā
1 Ma. kho. 2 Ma. gacchāyya. 3 Ma. bhājīyati. 4 Ma. cīvarapaṭivīso.
Sī. cīvarapaṭiviṁso.
Te bhikkhu aññātikāti. Aññātikā bhagavāti. Aññātako
moghapurisa aññātikāya na jānāti paṭirūpaṁ vā appaṭirūpaṁ vā
santaṁ vā asantaṁ vā kathaṁ hi nāma tvaṁ moghapurisa aññātikāya
bhikkhuniyā cīvaraṁ dassasi netaṁ moghapurisa appasannānaṁ vā
pasādāya .pe. Evañca pana bhikkhave imaṁ sikkhāpadaṁ uddiseyyātha
yo pana bhikkhu aññātikāya bhikkhuniyā cīvaraṁ dadeyya pācittiyanti.
Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[443] Tena kho pana samayena bhikkhū kukkuccāyantā bhikkhunīnaṁ
pārivaṭṭakaṁ cīvaraṁ na denti. Bhikkhuniyo ujjhāyanti khīyanti
vipācenti kathaṁ hi nāma ayyā amhākaṁ pārivaṭṭakaṁ cīvaraṁ na
dassantīti. Assosuṁ kho bhikkhū tāsaṁ bhikkhunīnaṁ ujjhāyantīnaṁ khīyantīnaṁ
vipācentīnaṁ. Athakho te bhikkhū bhagavato etamatthaṁ ārocesuṁ.
Athakho bhagavā etasmiṁ nidāne etasmiṁ pakaraṇe dhammiṁ kathaṁ katvā
bhikkhū āmantesi anujānāmi bhikkhave pañcannaṁ pārivaṭṭakaṁ dātuṁ
bhikkhussa bhikkhuniyā sikkhamānāya sāmaṇerassa sāmaṇeriyā anujānāmi
bhikkhave imesaṁ pañcannaṁ pārivaṭṭakaṁ dātuṁ evañca pana bhikkhave imaṁ
sikkhāpadaṁ uddiseyyātha yo pana bhikkhu aññātikāya bhikkhuniyā
cīvaraṁ dadeyya aññatra pārivaṭṭakā pācittiyanti.

[444] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Aññātikā nāma mātito
Vā pitito vā yāva sattamā pitāmahayugā asambaddhā. Bhikkhunī
nāma ubhatosaṅghe upasampannā. Cīvaraṁ nāma channaṁ cīvarānaṁ
aññataraṁ cīvaraṁ vikappanupagaṁ pacchimaṁ 1 . Aññatra pārivaṭṭakāti
ṭhapetvā pārivaṭṭakaṁ deti āpatti pācittiyassa.

[445] Aññātikāya aññātikasaññī cīvaraṁ deti aññatra
pārivaṭṭakā āpatti pācittiyassa. Aññātikāya vematiko
cīvaraṁ deti aññatra pārivaṭṭakā āpatti pācittiyassa.
Aññātikāya ñātikasaññī cīvaraṁ deti aññatra pārivaṭṭakā
āpatti pācittiyassa. Ekato upasampannāya cīvaraṁ deti
aññatra pārivaṭṭakā āpatti dukkaṭassa. Ñātikāya aññātikasaññī
āpatti dukkaṭassa. Ñātikāya vematiko āpatti
dukkaṭassa. Ñātikāya ñātikasaññī anāpatti.

[446] Anāpatti ñātikāya pārivaṭṭakaṁ parittena vā
vipulaṁ vipulena vā parittaṁ bhikkhunī vissāsaṁ gaṇhāti tāvakālikaṁ
gaṇhāti cīvaraṁ ṭhapetvā aññaṁ parikkhāraṁ deti sikkhamānāya
sāmaṇeriyā ummattakassa ādikammikassāti.
Pañcamasikkhāpadaṁ niṭṭhitaṁ.
-------
1 Sī. Yu. vikappanupagapacchimaṁ.
Chaṭṭhasikkhāpadaṁ

[447] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā udāyi
paṭṭho hoti cīvarakammaṁ kātuṁ. Aññatarā bhikkhunī yenāyasmā
udāyi tenupasaṅkami upasaṅkamitvā āyasmantaṁ udāyiṁ etadavoca
sādhu me bhante ayyo cīvaraṁ sibbetūti. Athakho āyasmā udāyi
tassā bhikkhuniyā cīvaraṁ sibbetvā surattaṁ suparikammakataṁ katvā
majjhe paṭibhāṇacittaṁ vuṭṭhāpetvā saṁharitvā nikkhipi. Athakho
sā bhikkhunī yenāyasmā udāyi tenupasaṅkami upasaṅkamitvā
āyasmantaṁ udāyiṁ etadavoca kahaṁ taṁ bhante cīvaranti. Handa bhagini
imaṁ cīvaraṁ yathāsaṁhaṭaṁ haritvā nikkhipitvā yadā bhikkhunīsaṅgho ovādaṁ
āgacchati tadā imaṁ cīvaraṁ pārupitvā bhikkhunīsaṅghassa piṭṭhito
piṭṭhito āgacchāti. Athakho sā bhikkhunī taṁ cīvaraṁ yathāsaṁhaṭaṁ
haritvā nikkhipitvā yadā bhikkhunīsaṅgho ovādaṁ āgacchati tadā
taṁ cīvaraṁ pārupitvā bhikkhunīsaṅghassa piṭṭhito piṭṭhito āgacchati.
Manussā ujjhāyanti khīyanti vipācenti yāvacchinnikā imā
bhikkhuniyo dhuttikā ahirikāyo yatra hi nāma cīvare paṭibhāṇacittaṁ
vuṭṭhāpessantīti. Bhikkhuniyo evamāhaṁsu kassidaṁ kammanti.
Ayyassa udāyissāti. Yepi te chinnakā dhuttakā ahirikā tesaṁpi
Evarūpaṁ na sobheyya kiṁ pana ayyassa udāyissāti. Athakho
tā bhikkhuniyo bhikkhūnaṁ etamatthaṁ ārocesuṁ. Ye te bhikkhū appicchā
.pe. Te ujjhāyanti khīyanti vipācenti kathaṁ hi nāma āyasmā
udāyi bhikkhuniyā cīvaraṁ sibbessatīti 1 .pe. Saccaṁ kira tvaṁ udāyi
bhikkhuniyā cīvaraṁ sibbesīti. Saccaṁ bhagavāti. Ñātikā te udāyi
aññātikāti. Aññātikā bhagavāti. Aññātako moghapurisa
aññātikāya na jānāti paṭirūpaṁ vā appaṭirūpaṁ vā pāsādikaṁ vā
apāsādikaṁ vā kathaṁ hi nāma tvaṁ moghapurisa aññātikāya bhikkhuniyā
cīvaraṁ sibbessasi netaṁ moghapurisa appasannānaṁ vā pasādāya .pe.
Evañca pana bhikkhave imaṁ sikkhāpadaṁ uddiseyyātha yo pana bhikkhu
aññātikāya bhikkhuniyā cīvaraṁ sibbeyya vā sibbāpeyya vā
pācittiyanti.

[448] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Aññātikā nāma mātito
vā pitito vā yāva sattamā pitāmahayugā asambaddhā. Bhikkhunī
nāma ubhatosaṅghe upasampannā. Cīvaraṁ nāma channaṁ cīvarānaṁ
aññataraṁ cīvaraṁ vikappanupagaṁ pacchimaṁ. Sibbeyyāti sayaṁ sibbeti
ārāpathe ārāpathe āpatti pācittiyassa. Sibbāpeyyāti
aññaṁ āṇāpeti āpatti pācittiyassa. Sakiṁ āṇatto
bahukaṁpi sibbeti āpatti pācittiyassa.
1 Ma. sibbissatīti. 2 Ma. sibbasīti. evamuparipi.

[449] Aññātikāya aññātikasaññī cīvaraṁ sibbeti vā
sibbāpeti vā āpatti pācittiyassa. Aññātikāya vematiko
cīvaraṁ sibbeti vā sibbāpeti vā āpatti pācittiyassa.
Aññātikāya ñātikasaññī cīvaraṁ sibbeti vā sibbāpeti vā
āpatti pācittiyassa. Ekato upasampannāya cīvaraṁ sibbeti
vā sibbāpeti vā āpatti dukkaṭassa. Ñātikāya aññātikasaññī
āpatti dukkaṭassa. Ñātikāya vematiko āpatti
dukkaṭassa. Ñātikāya ñātikasaññī anāpatti.

[450] Anāpatti ñātikāya cīvaraṁ ṭhapetvā aññaṁ parikkhāraṁ
sabbeti vā sibbāpeti vā sikkhamānāya sāmaṇeriyā
ummattakassa ādikammikassāti.
Chaṭṭhasikkhāpadaṁ niṭṭhitaṁ
-------
Sattamasikkhāpadaṁ

[451] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū bhikkhunīhi saddhiṁ saṁvidhāya ekaddhānamaggaṁ paṭipajjanti. Manussā
ujjhāyanti khīyanti vipācenti yatheva mayaṁ sappajāpatikā āhiṇḍāma
evamevime samaṇā sakyaputtiyā bhikkhunīhi saddhiṁ āhiṇḍantīti.
Assosuṁ kho bhikkhū tesaṁ manussānaṁ ujjhāyantānaṁ khīyantānaṁ
vipācentānaṁ. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma chabbaggiyā bhikkhū bhikkhunīhi
saddhiṁ saṁvidhāya ekaddhānamaggaṁ paṭipajjissantīti .pe. Saccaṁ kira
tumhe bhikkhave bhikkhunīhi saddhiṁ saṁvidhāya ekaddhānamaggaṁ paṭipajjathāti.
Saccaṁ bhagavāti. Vigarahi buddho bhagavā kathaṁ hi nāma tumhe
moghapurisā bhikkhunīhi saddhiṁ saṁvidhāya ekaddhānamaggaṁ paṭipajjissatha
netaṁ moghapurisā appasannānaṁ vā pasādāya .pe. Evañca
pana bhikkhave imaṁ sikkhāpadaṁ uddiseyyātha yo pana bhikkhu
bhikkhuniyā saddhiṁ saṁvidhāya ekaddhānamaggaṁ paṭipajjeyya antamaso
gāmantarampi pācittiyanti. Evañcidaṁ bhagavatā bhikkhūnaṁ sikkhāpadaṁ
paññattaṁ hoti.