[432] Upasampannāya upasampannasaññī bhikkhunūpassayaṁ
upasaṅkamitvā aññatra samayā ovadati āpatti pācittiyassa.
Upasampannāya vematiko bhikkhunūpassayaṁ upasaṅkamitvā aññatra samayā
ovadati āpatti pācittiyassa. Upasampannāya anupasampannasaññī
bhikkhunūpassayaṁ upasaṅkamitvā aññatra samayā ovadati āpatti
pācittiyassa. Aññena dhammena ovadati āpatti dukkaṭassa.
Ekato upasampannaṁ ovadati āpatti dukkaṭassa. Anupasampannāya
upasampannasaññī āpatti dukkaṭassa. Anupasampannāya
vematiko āpatti dukkaṭassa. Anupasampannāya anupasampannasaññī
anāpatti.

[433] Anāpatti samaye uddesaṁ dento paripucchaṁ dento
Osārehi ayyāti vuccamāno osāreti pañhaṁ pucchati pañhaṁ
puṭṭho katheti aññassatthāya bhaṇantaṁ bhikkhuniyo suṇanti
sikkhamānāya sāmaṇeriyā ummattakassa ādikammikassāti.
Tatiyasikkhāpadaṁ niṭṭhitaṁ.
-------
Catutthasikkhāpadaṁ

[434] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena therā bhikkhū bhikkhuniyo
ovadantā lābhino honti cīvarapiṇḍapātasenāsanagilānapaccaya-
bhesajjaparikkhārānaṁ. Chabbaggiyā bhikkhū evaṁ vadenti 1 na
bahukatā therā bhikkhū bhikkhuniyo ovadituṁ āmisahetu therā bhikkhū
bhikkhuniyo ovadantīti. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma chabbaggiyā bhikkhū
evaṁ vakkhanti na bahukatā therā bhikkhū bhikkhuniyo ovadituṁ
āmisahetu therā bhikkhū bhikkhuniyo ovadantīti .pe. Saccaṁ kira
tumhe bhikkhave evaṁ vadetha na bahukatā therā bhikkhū bhikkhuniyo
ovadituṁ āmisahetu therā bhikkhū bhikkhuniyo ovadantīti. Saccaṁ
bhagavāti. Vigarahi buddho bhagavā kathaṁ nāma tumhe moghapurisā
evaṁ vakkhatha na bahukatā therā bhikkhū bhikkhuniyo ovadituṁ āmisahetu
therā bhikkhū bhikkhuniyo ovadantīti netaṁ moghapurisā appasannānaṁ
vā pasādāya .pe. Evañca pana bhikkhave imaṁ sikkhāpadaṁ
uddiseyyātha yo pana bhikkhu evaṁ vadeyya āmisahetu [2]- bhikkhū
bhikkhuniyo ovadantīti pācittiyanti.
1 Ma. Yu. vadanti. 2 Ma. therā.

[435] Yo panāti yo yādiso .pe. Bhikkhūti .pe.
Ayaṁ imasmiṁ atthe adhippeto bhikkhūti. Āmisahetūti cīvarahetu
piṇḍapātahetu senāsanahetu gilānapaccayabhesajjaparikkhārahetu
sakkārahetu garukārahetu mānanahetu vandanahetu pūjanahetu.

[436] Evaṁ vadeyyāti upasampannaṁ saṅghena sammataṁ bhikkhunovādakaṁ
avaṇṇaṁ kattukāmo ayasaṁ kattukāmo maṅkukattukāmo evaṁ
vadeti cīvarahetu piṇḍapātahetu senāsanahetu gilānapaccayabhesajjaparikkhārahetu
sakkārahetu garukārahetu mānanahetu vandanahetu
pūjanahetu ovadatīti bhaṇati āpatti pācittiyassa.

[437] Dhammakamme dhammakammasaññī evaṁ vadeti āpatti
pācittiyassa. Dhammakamme vematiko evaṁ vadeti āpatti
pācittiyassa. Dhammakamme adhammakammasaññī evaṁ vadeti āpatti
pācittiyassa.

[438] Upasampannaṁ saṅghena asammataṁ bhikkhunovādakaṁ avaṇṇaṁ
kattukāmo ayasaṁ kattukāmo maṅkukattukāmo evaṁ vadeti cīvarahetu
piṇḍapātahetu senāsanahetu gilānapaccayabhesajjaparikkhārahetu
sakkārahetu garukārahetu mānanahetu vandanahetu pūjanahetu ovadatīti
bhaṇati āpatti dukkaṭassa.

[439] Anupasampannaṁ saṅghena sammataṁ vā asammataṁ vā
bhikkhunovādakaṁ avaṇṇaṁ kattukāmo ayasaṁ kattukāmo maṅkukattukāmo evaṁ
Vadeti cīvarahetu piṇḍapātahetu senāsanahetu gilānapaccayabhesajjaparikkhārahetu
sakkārahetu garukārahetu mānanahetu vandanahetu pūjanahetu
ovadatīti bhaṇati āpatti dukkaṭassa.

[440] Adhammakamme dhammakammasaññī āpatti dukkaṭassa.
Adhammakamme vematiko āpatti dukkaṭassa. Adhammakamme
adhammakammasaññī āpatti dukkaṭassa.

[441] Anāpatti pakatiyā cīvarahetu piṇḍapātahetu senāsanahetu
gilānapaccayabhesajjaparikkhārahetu sakkārahetu garukārahetu mānanahetu
vandanahetu pūjanahetu ovadantaṁ bhaṇati ummattakassa
ādikammikassāti.
Catutthasikkhāpadaṁ niṭṭhitaṁ.
-------
Pañcamasikkhāpadaṁ