[422] Dhammakamme dhammakammasaññī samaggaṁ bhikkhunīsaṅghaṁ
vaggasaññī ovadati āpatti dukkaṭassa. Dhammakamme dhammakammasaññī
samaggaṁ bhikkhunīsaṅghaṁ vematiko ovadati āpatti dukkaṭassa.
Dhammakamme dhammakammasaññī samaggaṁ bhikkhunīsaṅghaṁ samaggasaññī ovadati
anāpatti.

[423] Anāpatti uddesaṁ dento paripucchaṁ dento osārehi
ayyāti vuccamāno osāreti pañhaṁ pucchati pañhaṁ puṭṭho
katheti aññassatthāya bhaṇantaṁ bhikkhuniyo suṇanti sikkhamānāya
sāmaṇeriyā ummattakassa ādikammikassāti.
Paṭhamasikkhāpadaṁ niṭṭhitaṁ.
-------
Dutiyasikkhāpadaṁ

[424] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena therā bhikkhū
bhikkhuniyo ovadanti pariyāyena. Tena kho pana samayena āyasmato
cūḷapanthakassa pariyāyo hoti bhikkhuniyo ovadituṁ. Bhikkhuniyo
evamāhaṁsu nadāni ajja ovādo iddho bhavissati taññevadāni
udānaṁ ayyo cūḷapanthako punappunaṁ bhaṇissatīti. Athakho tā
bhikkhuniyo yenāyasmā cūḷapanthako tenupasaṅkamiṁsu upasaṅkamitvā
āyasmantaṁ cūḷapanthakaṁ abhivādetvā ekamantaṁ nisīdiṁsu. Ekamantaṁ
nisinnā kho tā bhikkhuniyo āyasmā cūḷapanthako etadavoca
samaggattha bhaginiyoti. Samaggamhāyyāti. Vattanti bhaginiyo aṭṭha
garudhammāti. Vattanti ayyāti. Eso bhaginiyo ovādoti
niyyādetvā imaṁ udānaṁ punappunaṁ abhāsi
adhicetaso appamajjato
munino monapathesu sikkhato
sokā na bhavanti tādino
upasantassa sadā satīmatoti.

[425] Bhikkhuniyo evamāhaṁsu nanu avocumhā nadāni ajja
ovādo iddho bhavissati taññevadāni udānaṁ ayyo cūḷapanthako
Punappunaṁ bhaṇissatīti. Assosi kho āyasmā cūḷapanthako tāsaṁ
bhikkhunīnaṁ imaṁ kathāsallāpaṁ. Athakho āyasmā cūḷapanthako vehāsaṁ
abbhuggantvā ākāse antalikkhe caṅkamatipi tiṭṭhatipi nisīdatipi
seyyaṁpi kappeti dhūmāyatipi pajjalatipi antaradhāyatipi taññeva 1
udānaṁ bhaṇati aññañca bahuṁ buddhavacanaṁ. Bhikkhuniyo evamāhaṁsu
acchariyaṁ vata bho abbhutaṁ vata bho na vata no ito pubbe
ovādo evaṁ iddho bhūtapubbo yathā ayyassa cūḷapanthakassāti.
Athakho āyasmā cūḷapanthako tā bhikkhuniyo yāva samandhakārā
ovaditvā uyyojesi gacchatha bhaginiyoti. Athakho tā bhikkhuniyo
nagaradvāre thakkite 2 bahinagare vasitvā kālasseva nagaraṁ pavisanti.
Manussā ujjhāyanti khīyanti vipācenti abrahmacāriniyo imā
bhikkhuniyo ārāme bhikkhūhi saddhiṁ vasitvā idāni nagaraṁ pavisantīti.
Assosuṁ kho bhikkhū tesaṁ manussānaṁ ujjhāyantānaṁ khīyantānaṁ
vipācentānaṁ. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma āyasmā cūḷapanthako atthaṅgate
suriye 3 bhikkhuniyo ovadissatīti .pe. Saccaṁ kira tvaṁ cūḷapanthaka
atthaṅgate suriye bhikkhuniyo ovadasīti. Saccaṁ bhagavāti. Vigarahi
buddho bhagavā kathaṁ hi nāma tvaṁ cūḷapanthaka atthaṅgate suriye
bhikkhuniyo ovadissasi netaṁ cūḷapanthaka appasannānaṁ vā
pasādāya .pe. Evañca pana bhikkhave imaṁ sikkhāpadaṁ uddiseyyātha
1 Ma. tañceva. 2 Ma. thakite. 3 Ma. sūriye. evamuparipi.
Sammatopi ce bhikkhu atthaṅgate suriye bhikkhuniyo ovadeyya
pācittiyanti.

[426] Sammato nāma ñatticatutthena kammena sammato.
Atthaṅgate suriyeti ogate 1 suriye. Bhikkhuniyo nāma ubhatosaṅghe
upasampannā. Ovadeyyāti aṭṭhahi vā garudhammehi aññena
vā dhammena ovadati āpatti pācittiyassa.

[427] Atthaṅgate atthaṅgatasaññī ovadati āpatti
pācittiyassa. Atthaṅgate vematiko ovadati āpatti pācittiyassa.
Atthaṅgate anatthaṅgatasaññī ovadati āpatti pācittiyassa.
Ekato upasampannaṁ 2 ovadati āpatti dukkaṭassa. Anatthaṅgate
atthaṅgatasaññī āpatti dukkaṭassa. Anatthaṅgate vematiko
āpatti dukkaṭassa. Anatthaṅgate anatthaṅgatasaññī anāpatti.

[428] Anāpatti uddesaṁ dento paripucchaṁ dento osārehi
ayyāti vuccamāno osāreti pañhaṁ pucchati pañhaṁ puṭṭho
katheti aññassatthāya bhaṇantaṁ bhikkhuniyo suṇanti sikkhamānāya
sāmaṇeriyā ummattakassa ādikammikassāti.
Dutiyasikkhāpadaṁ niṭṭhitaṁ.
-------
1 Ma. oggate. 2 yebhuyyena ekato upasampannāyāti pāṭho dissati.
Tatiyasikkhāpadaṁ

[429] Tena samayena buddho bhagavā sakkesu viharati kapilavatthusmiṁ
nigrodhārāme. Tena kho pana samayena chabbaggiyā bhikkhū
bhikkhunūpassayaṁ upasaṅkamitvā chabbaggiyā bhikkhuniyo ovadanti. Bhikkhuniyo
chabbaggiyā bhikkhuniyo etadavocuṁ etha ayye ovādaṁ gamissāmāti.
Yampi 1 mayaṁ ayye gaccheyyāma ovādassa kāraṇā ayyā
chabbaggiyā idheva amhe ovadantīti. Bhikkhuniyo ujjhāyanti
khīyanti vipācenti kathaṁ hi nāma chabbaggiyā bhikkhū bhikkhunūpassayaṁ
upasaṅkamitvā bhikkhuniyo ovadantīti [2]-. Athakho tā bhikkhuniyo
bhikkhūnaṁ etamatthaṁ ārocesuṁ. Ye te bhikkhū appicchā .pe.
Te ujjhāyanti khīyanti vipācenti kathaṁ hi nāma chabbaggiyā
bhikkhū bhikkhunūpassayaṁ upasaṅkamitvā bhikkhuniyo ovadantīti .pe.
Saccaṁ kira tumhe bhikkhave bhikkhunūpassayaṁ upasaṅkamitvā bhikkhuniyo
ovadathāti. Saccaṁ bhagavāti. Vigarahi buddho bhagavā kathaṁ hi
nāma tumhe moghapurisā bhikkhunūpassayaṁ upasaṅkamitvā bhikkhuniyo
ovadissatha netaṁ moghapurisā appasannānaṁ vā pasādāya .pe.
Evañca pana bhikkhave imaṁ sikkhāpadaṁ uddiseyyātha yo pana bhikkhu
bhikkhunūpassayaṁ upasaṅkamitvā bhikkhuniyo ovadeyya pācittiyanti.
1 Ma. Yu. yaṁ hi. 2 Sī. sabbaggiyā bhikkhuniyo ovādaṁ na gacchissantīti.
Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[430] Tena kho pana samayena mahāpajāpati gotamī gilānā
hoti. Therā bhikkhū yena mahāpajāpati gotamī tenupasaṅkamiṁsu
upasaṅkamitvā mahāpajāpatiṁ gotamiṁ etadavocuṁ kacci te gotami
khamanīyaṁ kacci yāpanīyanti. Na me ayyā khamanīyaṁ na yāpanīyaṁ
iṅghayyā dhammaṁ desethāti. Na tāva 1 bhagini kappati bhikkhunūpassayaṁ
upasaṅkamitvā bhikkhuniyā dhammaṁ desetunti kukkuccāyantā na desesuṁ.
Athakho bhagavā pubbaṇhasamayaṁ nivāsetvā pattacīvaramādāya yena
mahāpajāpati gotamī tenupasaṅkami upasaṅkamitvā paññatte
āsane nisīdi. Nisajja kho bhagavā mahāpajātiṁ gotamiṁ etadavoca
kacci te gotami khamanīyaṁ kacci yāpanīyanti. Pubbe me bhante
therā bhikkhū āgantvā dhammaṁ desenti tena me phāsu hoti
idāni pana bhagavatā paṭikkhittanti kukkuccāyantā na desenti
tena me na phāsu hotīti. Athakho bhagavā mahāpajātiṁ gotamiṁ
dhammiyā kathāya sandassetvā samādapetvā samuttejetvā
sampahaṁsetvā uṭṭhāyāsanā pakkāmi. Athakho bhagavā etasmiṁ nidāne
etasmiṁ pakaraṇe dhammiṁ kathaṁ katvā bhikkhū āmantesi anujānāmi
bhikkhave bhikkhunūpassayaṁ upasaṅkamitvā gilānaṁ bhikkhuniṁ ovadituṁ
evañca pana bhikkhave imaṁ sikkhāpadaṁ uddiseyyātha yo pana bhikkhu
bhikkhunūpassayaṁ upasaṅkamitvā bhikkhuniyo ovadeyya aññatra samayā
1 Ma. ayaṁ saddo natthi.
Pācittiyaṁ tatthāyaṁ samayo gilānā hoti bhikkhunī ayaṁ tattha
samayoti.

[431] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Bhikkhunūpassayo nāma yattha
bhikkhuniyo ekarattampi vasanti. Upasaṅkamitvāti tattha gantvā.
Bhikkhuniyo nāma ubhatosaṅghe upasampannā. Ovadeyyāti aṭṭhahi
garudhammehi ovadati āpatti pācittiyassa. Aññatra samayāti
ṭhapetvā samayaṁ. Gilānā nāma bhikkhunī na sakkoti ovādāya
vā saṁvāsāya vā gantuṁ.