[402] Tena samayena buddho bhagavā āḷaviyaṁ viharati aggāḷave
cetiye. Tena kho pana samayena āḷavikā bhikkhū navakammaṁ karontā
jānaṁ sappāṇakaṁ udakaṁ tiṇampi mattikampi siñcantipi
siñcāpentipi. Ye te bhikkhū appicchā .pe. Te ujjhāyanti khīyanti
vipācenti kathaṁ hi nāma āḷavikā bhikkhū jānaṁ sappāṇakaṁ udakaṁ
tiṇampi mattikampi siñcissantipi siñcāpessantipīti. Athakho te
bhikkhū bhagavato etamatthaṁ ārocesuṁ .pe. Saccaṁ kira tumhe bhikkhave
jānaṁ sappāṇakaṁ udakaṁ tiṇampi mattikampi siñcathapi siñcāpethapīti.
Saccaṁ bhagavāti. Vigarahi buddho bhagavā kathaṁ hi nāma tumhe
moghapurisā jānaṁ sappāṇakaṁ udakaṁ tiṇampi mattikampi sañcissathapi
siñcāpessathapi netaṁ moghapurisā appasannānaṁ vā pasādāya pasannānaṁ
vā bhiyyobhāvāya .pe. Evañca pana bhikkhave imaṁ sikkhāpadaṁ
uddiseyyātha yo pana bhikkhu jānaṁ sappāṇakaṁ udakaṁ tiṇaṁ vā
mattikaṁ vā siñceyya vā siñcāpeyya vā pācittiyanti.

[403] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Jānaṁ 1 nāma sāmaṁ vā jānāti
aññe vā tassa ārocenti.

[404] Siñceyyāti sayaṁ siñcati āpatti pācittiyassa.
1 Ma. jānāti.
Siñcāpeyyāti aññaṁ āṇāpeti āpatti pācittiyassa. Sakiṁ
āṇatto bahukaṁpi siñcati āpatti pācittiyassa. Sappāṇake
sappāṇakasaññī tiṇaṁ vā mattikaṁ vā siñcati vā siñcāpeti
vā āpatti pācittiyassa. Sappāṇake vematiko tiṇaṁ vā
mattikaṁ vā siñcati vā siñcāpeti vā āpatti dukkaṭassa.
Sappāṇake appāṇakasaññī tiṇaṁ vā mattikaṁ vā siñcati vā
siñcāpeti vā anāpatti. Appāṇake sappāṇakasaññī
āpatti dukkaṭassa. Appāṇake vematiko āpatti dukkaṭassa.
Appāṇake appāṇakasaññī anāpatti.

[405] Anāpatti asañcicca asatiyā ajānantassa ummattakassa
ādikammikassāti.
Dasamasikkhāpadaṁ niṭṭhitaṁ.
Bhūtagāmavaggo dutiyo.
-------
Tassuddānaṁ
bhūtaṁ aññāya ujjhāyaṁ pakkamantena te duve
pubbe nikkaḍḍhanāhacca dvāraṁ sappāṇakena 1 cāti.
-------
1 Yu. dvārasappāṇakena.
Ovādavaggassa paṭhamasikkhāpadaṁ

[406] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena therā bhikkhū bhikkhuniyo
ovadantā lābhino honti cīvarapiṇḍapātasenāsanagilānapaccaya-
bhesajjaparikkhārānaṁ. Athakho chabbaggiyānaṁ bhikkhūnaṁ etadahosi
etarahi kho āvuso therā bhikkhū bhikkhuniyo ovadantā lābhino honti
cīvarapiṇḍapātasenāsanagilānapaccayabhesajjaparikkhārānaṁ handāvuso
mayaṁpi bhikkhuniyo ovadāmāti. Athakho chabbaggiyā bhikkhū bhikkhuniyo
upasaṅkamitvā etadavocuṁ etha 1 amhepi bhaginiyo upasaṅkamatha
mayaṁpi ovadissāmāti. Athakho tā bhikkhuniyo yena chabbaggiyā
bhikkhū tenupasaṅkamiṁsu upasaṅkamitvā chabbaggiye bhikkhū abhivādetvā
ekamantaṁ nisīdiṁsu. Athakho chabbaggiyā bhikkhū bhikkhunīnaṁ parittaṁyeva
dhammiṁ kathaṁ katvā divasaṁ tiracchānakathāya vītināmetvā uyyojesuṁ
gacchatha bhaginiyoti. Athakho tā bhikkhuniyo yena bhagavā tenupasaṅkamiṁsu
upasaṅkamitvā bhagavantaṁ abhivādetvā ekamantaṁ aṭṭhaṁsu.
Ekamantaṁ ṭhitā kho tā bhikkhuniyo bhagavā etadavoca kacci
bhikkhuniyo ovādo iddho ahosīti. Kuto bhante ovādo iddho
bhavissati ayyā chabbaggiyā parittaṁyeva dhammiṁ kathaṁ katvā divasaṁ
tiracchānakathāya vītināmetvā uyyojesunti. Athakho bhagavā tā
bhikkhuniyo dhammiyā kathāya sandassesi samādapesi samuttejesi
1 Ma. ayaṁ pāṭho natthi.
Sampahaṁsesi. Athakho tā bhikkhuniyo bhagavatā dhammiyā kathāya
sandassitā samādapitā samuttejitā sampahaṁsitā uṭṭhāyāsanā
bhagavantaṁ abhivādetvā padakkhiṇaṁ katvā pakkamiṁsu. Athakho bhagavā
etasmiṁ nidāne etasmiṁ pakaraṇe bhikkhusaṅghaṁ sannipātāpetvā
chabbaggiye bhikkhū paṭipucchi saccaṁ kira tumhe bhikkhave bhikkhunīnaṁ
parittaṁyeva dhammiṁ kathaṁ katvā divasaṁ tiracchānakathāya vītināmetvā
uyyojethāti. Saccaṁ bhagavāti. Vigarahi buddho bhagavā kathaṁ hi
nāma tumhe moghapurisā bhikkhunīnaṁ parittaṁyeva dhammiṁ kathaṁ katvā
divasaṁ tiracchānakathāya vītināmetvā uyyojessatha netaṁ moghapurisā
appasannānaṁ vā pasādāya pasannānaṁ vā bhiyyobhāvāya .pe.
Vigarahitvā dhammiṁ kathaṁ katvā bhikkhū āmantesi anujānāmi bhikkhave
bhikkhunovādakaṁ sammannituṁ evañca pana bhikkhave sammannitabbo paṭhamaṁ
bhikkhu yācitabbo. Yācitvā byattena bhikkhunā paṭibalena saṅgho
ñāpetabbo suṇātu me bhante saṅgho yadi saṅghassa pattakallaṁ
saṅgho itthannāmaṁ bhikkhuṁ bhikkhunovādakaṁ sammanneyya. Esā
ñatti. Suṇātu me bhante saṅgho saṅgho itthannāmaṁ bhikkhuṁ
bhikkhunovādakaṁ sammannati. Yassāyasmato khamati itthannāmassa
bhikkhuno bhikkhunovādakassa sammati so tuṇhassa yassa nakkhamati
so bhāseyya. Dutiyampi etamatthaṁ vadāmi .pe. Tatiyampi
etamatthaṁ vadāmi. Suṇātu me bhante saṅgho saṅgho itthannāmaṁ
Bhikkhuṁ bhikkhunovādakaṁ sammannati. Yassāyasmato khamati itthannāmassa
bhikkhuno bhikkhunovādakassa sammati so tuṇhassa yassa nakkhamati
so bhāseyya. Sammato saṅghena itthannāmo bhikkhu bhikkhunovādako.
Khamati saṅghassa tasmā tuṇhī. Evametaṁ dhārayāmīti.
Athakho bhagavā chabbaggiye bhikkhū anekapariyāyena vigarahitvā dubbharatāya
.pe. Evañca pana bhikkhave imaṁ sikkhāpadaṁ uddiseyyātha yo
pana bhikkhu asammato bhikkhuniyo ovadeyya pācittiyanti.
Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[407] Tena kho pana samayena therā bhikkhū sammatā bhikkhuniyo
ovadantā tatheva lābhino honti cīvarapiṇḍapātasenāsanagilānapaccaya-
bhesajjaparikkhārānaṁ. Athakho chabbaggiyānaṁ bhikkhūnaṁ etadahosi
etarahi kho āvuso therā bhikkhū sammatā bhikkhuniyo ovadantā
tatheva lābhino honti cīvarapiṇḍapātasenāsanagilānapaccayabhesajjaparikkhārānaṁ
handāvuso mayaṁpi nissīmaṁ gantvā aññamaññaṁ
bhikkhunovādakaṁ sammannitvā bhikkhuniyo ovadāmāti. Athakho
chabbaggiyā bhikkhū nissīmaṁ gantvā aññamaññaṁ bhikkhunovādakaṁ
sammannitvā bhikkhuniyo upasaṅkamitvā etadavocuṁ mayaṁpi bhaginiyo
sammatā amhe upasaṅkamatha mayaṁpi ovadissāmāti. Athakho tā
bhikkhuniyo yena chabbaggiyā bhikkhū tenupasaṅkamiṁsu upasaṅkamitvā
chabbaggiye bhikkhū abhivādetvā ekamantaṁ nisīdiṁsu. Athakho chabbaggiyā
Bhikkhū bhikkhunīnaṁ parittaṁyeva dhammiṁ kathaṁ katvā divasaṁ tiracchānakathāya
vītināmetvā uyyojesuṁ gacchatha bhaginiyoti. Athakho tā bhikkhuniyo
yena bhagavā tenupasaṅkamiṁsu upasaṅkamitvā bhagavantaṁ abhivādetvā
ekamantaṁ aṭṭhaṁsu. Ekamantaṁ ṭhitā kho tā bhikkhuniyo bhagavā
etadavoca kacci bhikkhuniyo ovādo iddho ahosīti. Kuto bhante
ovādo iddho bhavissati ayyā chabbaggiyā parittaṁyeva dhammiṁ kathaṁ
katvā divasaṁ tiracchānakathāya vītināmetvā uyyojesunti. Athakho
bhagavā tā bhikkhuniyo dhammiyā kathāya sandassesi samādapesi
samuttejesi sampahaṁsesi. Athakho tā bhikkhuniyo bhagavatā dhammiyā
kathāya sandassitā samādapitā samuttejitā sampahaṁsitā uṭṭhāyāsanā
bhagavantaṁ abhivādetvā padakkhiṇaṁ katvā pakkamiṁsu. Athakho bhagavā
etasmiṁ nidāne etasmiṁ pakaraṇe bhikkhusaṅghaṁ sannipātāpetvā
chabbaggiye bhikkhū paṭipucchi saccaṁ kira tumhe bhikkhave bhikkhunīnaṁ
parittaṁyeva dhammiṁ kathaṁ katvā divasaṁ tiracchānakathāya vītināmetvā
uyyojethāti. Saccaṁ bhagavāti. Vigarahi buddho bhagavā kathaṁ hi
nāma tumhe moghapurisā bhikkhunīnaṁ parittaṁyeva dhammiṁ kathaṁ katvā
divasaṁ tiracchānakathāya vītināmetvā uyyojessatha netaṁ moghapurisā
appasannānaṁ vā pasādāya pasannānaṁ vā bhiyyobhāvāya .pe.
Vigarahitvā dhammiṁ kathaṁ katvā bhikkhū āmantesi anujānāmi bhikkhave
aṭṭhahaṅgehi samannāgataṁ bhikkhuṁ bhikkhunovādakaṁ sammannituṁ sīlavā
Hoti pātimokkhasaṁvarasaṁvuto viharati ācāragocarasampanno anumattesu
vajjesu bhayadassāvī samādāya sikkhati sikkhāpadesu bahussuto
hoti sutadharo sutasannicayo ye te dhammā ādikalyāṇā majjhekalyāṇā
pariyosānakalyāṇā sātthaṁ sabyañjanaṁ kevalaparipuṇṇaṁ
parisuddhaṁ brahmacariyaṁ abhivadanti tathārūpāssa dhammā bahussutā
honti dhatā vacasā paricitā manasānupekkhitā diṭṭhiyā suppaṭividdhā
ubhayāni kho panassa pātimokkhāni vitthārena svāgatāni
honti suvibhattāni suppavattīni suvinicchitāni suttaso anubyañjanaso
kalyāṇavāco hoti kalyāṇavākkaraṇo yebhuyyena bhikkhunīnaṁ piyo
hoti manāpo paṭibalo hoti bhikkhuniyo ovadituṁ na kho panetaṁ
bhagavantaṁ uddissa pabbajitāya kāsāyavatthavasanāya garudhammaṁ ajjhāpannapubbo
hoti vīsativasso vā hoti atirekavīsativasso vā
anujānāmi bhikkhave imehi aṭṭhahaṅgehi samannāgataṁ bhikkhuṁ bhikkhunovādakaṁ
sammannitunti.

[408] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Asammato nāma ñatticatutthena
kammena asammato. Bhikkhuniyo nāma ubhatosaṅghe upasampannā.

[409] Ovadeyyāti aṭṭhahi garudhammehi ovadati āpatti
pācittiyassa. Aññena dhammena ovadati āpatti dukkaṭassa.
Ekato upasampannaṁ ovadati āpatti dukkaṭassa.

[410] Tena sammatena bhikkhunā pariveṇaṁ sammajjitvā pānīyaṁ
paribhojanīyaṁ upaṭṭhāpetvā āsanaṁ paññāpetvā dutiyaṁ gahetvā
nisīditabbaṁ. Bhikkhunīhi tattha gantvā taṁ bhikkhuṁ abhivādetvā
ekamantaṁ nisīditabbaṁ. Tena sammatena 1 bhikkhunā pucchitabbā
samaggattha bhaginiyoti. Sace samaggamhāyyāti bhaṇanti vattanti
bhaginiyo aṭṭha garudhammāti. Sace vattanti ayyāti 2 bhaṇanti
eso bhaginiyo ovādoti niyyādetabbo. Sace na vattanti
ayyāti bhaṇanti osāretabbā vassasatūpasampannāya bhikkhuniyā
tadahupasampannassa bhikkhuno abhivādanaṁ paccuṭṭhānaṁ añjalikammaṁ
sāmīcikammaṁ kātabbaṁ ayaṁ 3 dhammo sakkatvā garukatvā mānetvā
pūjetvā yāvajīvaṁ anatikkamanīyo. Na bhikkhuniyā abhikkhuke āvāse
vassaṁ vasitabbaṁ ayampi dhammo sakkatvā garukatvā mānetvā pūjetvā
yāvajīvaṁ anatikkamanīyo anvaḍḍhamāsaṁ bhikkhuniyā bhikkhusaṅghato
dve dhammā paccāsiṁsitabbā 4 uposathapucchakañca ovādupasaṅkamanañca
ayampi dhammo sakkatvā garukatvā mānetvā pūjetvā yāvajīvaṁ
anatikkamanīyo. Vassaṁ vutthāya bhikkhuniyā ubhatosaṅghe tīhi ṭhānehi
pavāretabbaṁ diṭṭhena vā sutena vā parisaṅkāya vā ayampi dhammo
sakkatvā garukatvā mānetvā pūjetvā yāvajīvaṁ anatikkamanīyo.
Garudhammaṁ ajjhāpannāya bhikkhuniyā ubhatosaṅghe pakkhamānattaṁ caritabbaṁ
1 Ma. Yu. ayaṁ pāṭho na hoti. 2 Ma. vattantāyyāti. evamuparipi. 3 Ma.
ayampi. 4 Ma. paccāsīsitabbā.
Ayampi dhammo sakkatvā garukatvā mānetvā pūjetvā yāvajīvaṁ
anatikkamanīyo. Dve vassāni chasu dhammesu sikkhitasikkhāya sikkhamānāya
ubhatosaṅghe upasampadā pariyesitabbā ayampi dhammo sakkatvā garukatvā
mānetvā pūjetvā yāvajīvaṁ anatikkamanīyo na bhikkhuniyā kenaci
pariyāyena bhikkhu akkositabbo paribhāsitabbo ayampi dhammo
sakkatvā garukatvā mānetvā pūjetvā yāvajīvaṁ anatikkamanīyo ajjatagge
ovaṭo bhikkhunīnaṁ bhikkhūsu vacanapatho anovaṭo bhikkhūnaṁ bhikkhunīsu
vacanapatho ayampi dhammo sakkatvā garukatvā mānetvā pūjetvā
yāvajīvaṁ anatikkamanīyoti. Sace samaggamhāyyāti bhaṇanti aññaṁ
dhammaṁ bhaṇati āpatti dukkaṭassa. Sace vaggamhāyyāti bhaṇanti
aṭṭha garudhamme bhaṇati āpatti dukkaṭassa. Ovādaṁ aniyyādetvā
aññaṁ dhammaṁ bhaṇati āpatti dukkaṭassa.

[411] Adhammakamme adhammakammasaññī vaggaṁ bhikkhusaṅghaṁ vaggasaññī
ovadati āpatti pācittiyassa. Adhammakamme adhammakammasaññī
vaggaṁ bhikkhunīsaṅghaṁ vematiko ovadati āpatti
pācittiyassa. Adhammakamme adhammakammasaññī vaggaṁ bhikkhunīsaṅghaṁ
samaggasaññī ovadati āpatti pācittiyassa.