[392] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena dve bhikkhū
saṅghike vihāre uparivehāsakuṭiyā eko heṭṭhā viharati eko
upari. Uparimo bhikkhu āhaccapādakaṁ mañcaṁ sahasā abhinisīdi.
Mañcapādo patitvā 1 heṭṭhimassa bhikkhuno matthake avatthāsi.
So bhikkhu vissaramakāsi. Bhikkhū upadhāvitvā taṁ bhikkhuṁ etadavocuṁ
kissa tvaṁ āvuso vissaramakāsīti. Athakho so bhikkhu bhikkhūnaṁ
etamatthaṁ ārocesi. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma bhikkhu saṅghike
vihāre uparivehāsakuṭiyā āhaccapādakaṁ mañcaṁ sahasā abhinisīdissatīti.
Athakho te bhikkhū bhagavato etamatthaṁ ārocesuṁ. Athakho
bhagavā taṁ bhikkhuṁ paṭipucchi saccaṁ kira tvaṁ bhikkhu saṅghike vihāre
uparivehāsakuṭiyā āhaccapādakaṁ mañcaṁ sahasā abhinisīdasīti. Saccaṁ
bhagavāti. Vigarahi buddho bhagavā kathaṁ hi nāma tvaṁ moghapurisa
saṅghike vihāre uparivehāsakuṭiyā āhaccapādakaṁ mañcaṁ sahasā
abhinisīdissasi netaṁ moghapurisa appasannānaṁ vā pasādāya .pe.
Evañca pana bhikkhave imaṁ sikkhāpadaṁ uddiseyyātha yo pana
bhikkhu saṅghike vihāre uparivehāsakuṭiyā āhaccapādakaṁ mañcaṁ vā
1 Ma. nippatitvā.
Pīṭhaṁ vā abhinisīdeyya vā abhinipajjeyya vā pācittiyanti.

[393] Yo panāti yo yādiso .pe. Bhikkhūti .pe.
Ayaṁ imasmiṁ atthe adhippeto bhikkhūti. Saṅghiko nāma vihāro
saṅghassa dinno hoti pariccatto.

[394] Vehāsakuṭī nāma majjhimassa purisassa asīsaghaṭṭā.
Āhaccapādako nāma mañco aṅge vijjhitvā ṭhito hoti.
Āhaccapādakaṁ nāma pīṭhaṁ aṅge vijjhitvā ṭhitaṁ hoti.
Abhinisīdeyyāti tasmiṁ abhinisīdati āpatti pācittiyassa. Abhinipajjeyyāti
tasmiṁ abhinipajjati āpatti pācittiyassa.

[395] Saṅghike saṅghikasaññī uparivehāsakuṭiyā āhaccapādakaṁ
mañcaṁ vā pīṭhaṁ vā abhinisīdati vā abhinipajjati vā āpatti
pācittiyassa. Saṅghike vematiko uparivehāsakuṭiyā āhaccapādakaṁ
mañcaṁ vā pīṭhaṁ vā abhinisīdati vā abhinipajjati vā āpatti
pācittiyassa. Saṅghike puggalikasaññī uparivehāsakuṭiyā āhaccapādakaṁ
mañcaṁ vā pīṭhaṁ vā abhinisīdati vā abhinipajjati vā āpatti
pācittiyassa. Puggalike saṅghikasaññī āpatti dukkaṭassa.
Puggalike vematiko āpatti dukkaṭassa. Puggalike puggalikasaññī
aññassa puggalike āpatti dukkaṭassa. Attano puggalike
anāpatti.

[396] Anāpatti avehāsakuṭiyā sīsaghaṭṭāya 1 heṭṭhā
1 Ma. sīsasaṁghaṭṭāya.
Aparibhogaṁ hoti padarasañcitaṁ hoti paṭāṇi dinnā hoti tasmiṁ
ṭhito gaṇhāti vā laggeti vā ummattakassa
ādikammikassāti.
Aṭṭhamasikkhāpadaṁ niṭṭhitaṁ.
-------
Navamasikkhāpadaṁ

[397] Tena samayena buddho bhagavā kosambiyaṁ viharati ghositārāme.
Tena kho pana samayena āyasmato channassa upaṭṭhāko
mahāmatto āyasmato channassa vihāraṁ kārāpeti. Athakho
āyasmā channo katapariyositaṁ vihāraṁ punappunaṁ chādāpesi 1 punappunaṁ
limpāpesi 2 atibhāriko 3 vihāro paripati. Athakho āyasmā channo
tiṇañca kaṭṭhañca saṅkaḍḍhanto aññatarassa brāhmaṇassa yavakhettaṁ
dūsesi. Athakho so brāhmaṇo ujjhāyati khīyati vipāceti
kathaṁ hi nāma bhaddantā amhākaṁ yavakhettaṁ dūsessantīti. Assosuṁ
kho bhikkhū tassa brāhmaṇassa ujjhāyantassa khīyantassa
vipācentassa. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma āyasmā channo katapariyositaṁ
vihāraṁ punappunaṁ chādāpessati punappunaṁ limpāpessati atibhāriko
vihāro paripatīti. Athakho te bhikkhū bhagavato etamatthaṁ ārocesuṁ
.pe. Saccaṁ kira tvaṁ channa katapariyositaṁ vihāraṁ punappunaṁ
chādāpesi punappunaṁ limpāpesi atibhāriko vihāro paripatīti.
Saccaṁ bhagavāti. Vigarahi buddho bhagavā kathaṁ hi nāma tvaṁ
moghapurisa katapariyositaṁ vihāraṁ punappunaṁ chādāpessasi punappunaṁ
1 Ma. Yu. chādāpeti. 2 Ma. lepāpeti. Yu. limpāpeti. evamuparipi.
3 Ma. Yu. atibhārito. evamuparipi.
Limpāpessasi atibhāriko vihāro paripati netaṁ moghapurisa
appasannānaṁ vā pasādāya .pe. Evañca pana bhikkhave imaṁ
sikkhāpadaṁ uddiseyyātha mahallakaṁ pana bhikkhunā vihāraṁ
kārayamānena yāva dvārakosā aggalaṭṭhapanāya ālokasandhiparikammāya
dvitticchadanassa pariyāyaṁ appaharite ṭhitena adhiṭṭhātabbaṁ tato
ce uttariṁ 1 appaharitepi ṭhito adhiṭṭhaheyya pācittiyanti.

[398] Mahallako nāma vihāro sassāmiko vuccati. Vihāro
nāma ullitto vā hoti avalitto vā ullittāvalitto vā.
Kārayamānenāti karonto vā kārāpento vā. Yāva dvārakosāti
piṭṭhisaṅghāṭassa 2 sāmantā hatthapāsā. Aggalaṭṭhapanāyāti
dvāraṭṭhapanāya. Ālokasandhiparikammāyāti vātapānaparikammāya setavaṇṇaṁ
kāḷavaṇṇaṁ gerukavaṇṇaṁ 3 mālākammaṁ latākammaṁ makaradantakaṁ
pañcapaṭṭhikaṁ 4 . Dvitticchadanassa pariyāyaṁ appaharite ṭhitena
adhiṭṭhātabbanti haritaṁ nāma pubbaṇṇaṁ aparaṇṇaṁ. Sace harite
ṭhito adhiṭṭhāti āpatti dukkaṭassa. Maggena chādentassa dve
magge adhiṭṭhahitvā tatiyaṁ maggaṁ āṇāpetvā pakkamitabbaṁ.
Pariyāyena chādentassa dve pariyāye adhiṭṭhahitvā tatiyaṁ pariyāyaṁ
āṇāpetvā pakkamitabbaṁ.

[399] Tato ce uttariṁ appaharitepi ṭhito adhiṭṭhaheyyāti
1 Ma. Yu. uttari. 2 Ma. piṭṭhasaṅghāṭassa. 3 Ma. gerukaparikammaṁ. 4 Ma.
pañcapaṭikaṁ.
Iṭṭhakāya chādentassa iṭṭhakiṭṭhakāya āpatti pācittiyassa.
Silāya chādentassa silāya silāya āpatti pācittiyassa. Sudhāya
chādentassa piṇḍe piṇḍe āpatti pācittiyassa. Tiṇena
chādentassa karaḷe karaḷe āpatti pācittiyassa. Paṇṇena
chādentassa paṇṇe paṇṇe āpatti pācittiyassa.

[400] Atirekadvittipariyāye 1 atirekasaññī adhiṭṭhāti āpatti
pācittiyassa. Atirekadvittipariyāye vematiko adhiṭṭhāti āpatti
pācittiyassa. Atirekadvittipariyāye ūnakasaññī adhiṭṭhāti āpatti
pācittiyassa. Ūnakadvittipariyāye atirekasaññī āpatti
dukkaṭassa. Ūnakadvittipariyāye vematiko āpatti dukkaṭassa.
Ūnakadvittipariyāye ūnakasaññī anāpatti.

[401] Anāpatti dvittipariyāye ūnakadvittipariyāye leṇe
guhāya tiṇakuṭikāya aññassatthāya attano dhanena vāsāgāraṁ
ṭhapetvā sabbattha anāpatti ummattakassa ādikammikassāti.
Navamasikkhāpadaṁ niṭṭhitaṁ.
-------
1 Ma. atirekadvattipariyāye. evamīdisesu pāṭhesu.
Dasamasikkhāpadaṁ