[462] Tena kho pana samayena aññataro bhikkhu rājagahā
pabbajito ñātikulaṁ agamāsi. Manussā cirassāpi 3 bhaddanto
āgatoti sakkaccaṁ bhattaṁ akaṁsu. Tassa kulassa kulupikā bhikkhunī
te manusse etadavoca detha āvuso ayyassa bhattanti.
Athakho so bhikkhu bhagavatā paṭikkhittaṁ jānaṁ bhikkhunīparipācitaṁ
piṇḍapātaṁ bhuñjitunti kukkuccāyanto nappaṭiggahesi nāsikkhi
piṇḍāya carituṁ chinnabhatto ahosi. Athakho so bhikkhu ārāmaṁ
gantvā bhikkhūnaṁ etamatthaṁ ārocesi. Bhikkhū bhagavato etamatthaṁ
ārocesuṁ. Athakho bhagavā etasmiṁ nidāne etasmiṁ pakaraṇe
1 Ma. Yu. gharato. 2 Ma. Yu. pacchindi. 3 Ma. cirassampi.
Dhammiṁ kathaṁ katvā bhikkhū āmantesi anujānāmi bhikkhave pubbe
gihisamārambhe jānaṁ bhikkhunīparipācitaṁ piṇḍapātaṁ bhuñjituṁ evañca
pana bhikkhave imaṁ sikkhāpadaṁ uddiseyyātha yo pana bhikkhu jānaṁ
bhikkhunīparipācitaṁ piṇḍapātaṁ bhuñjeyya aññatra pubbe gihisamārambhā
pācittiyanti.

[463] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Jānāti nāma sāmaṁ vā
jānāti aññe vā tassa ārocenti sā vā āroceti.
Bhikkhunī nāma ubhatosaṅghe upasampannā. Paripāceti nāma pubbe
adātukāmānaṁ akattukāmānaṁ ayyo bhāṇako ayyo bahussuto
ayyo suttantiko ayyo vinayadharo ayyo dhammakathiko detha
ayyassa karotha ayyassāti esā paripāceti nāma. Piṇḍapāto
nāma pañcannaṁ bhojanānaṁ aññataraṁ bhojanaṁ. Aññatra pubbe
gihisamārambhāti ṭhapetvā gihisamārambhaṁ. Gihisamārambho nāma
ñātakā vā honti pavāritā vā pakatipaṭiyattā 1 vā. Aññatra
pubbe gihisamārambhā bhuñjissāmīti paṭiggaṇhāti āpatti
dukkaṭassa. Ajjhohāre ajjhohāre āpatti pācittiyassa.

[464] Paripācite paripācitasaññī bhuñjati aññatra pubbe
gihisamārambhā āpatti pācittiyassa. Paripācite vematiko
bhuñjati aññatra pubbe gihisamārambhā āpatti dukkaṭassa.
1 Ma. pakatipaṭiyattaṁ.
Paripācite aparipācitasaññī bhuñjati aññatra pubbe gihisamārambhā
anāpatti. Ekato upasampannāya paripācitaṁ bhuñjati aññatra
pubbe gihisamārambhā āpatti dukkaṭassa. Aparipācite paripācitasaññī
āpatti dukkaṭassa. Aparipācite vematiko āpatti
dukkaṭassa. Aparipācite aparipācitasaññī anāpatti.

[465] Anāpatti gihisamārambhe sikkhamānā paripāceti
sāmaṇerī paripāceti pañca bhojanāni ṭhapetvā sabbattha anāpatti
ummattakassa ādikammikassāti.
Navamasikkhāpadaṁ niṭṭhitaṁ.
--------
Dasamasikkhāpadaṁ

[466] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmato
udāyissa purāṇadutiyikā bhikkhunīsu pabbajitā hoti. Sā bhikkhunī 1
āyasmato udāyissa santike abhikkhaṇaṁ āgacchati. Āyasmāpi
udāyi tassā bhikkhuniyā santike abhikkhaṇaṁ gacchati. Tena kho
pana samayena āyasmā udāyi tassā bhikkhuniyā saddhiṁ eko
ekāya raho nisajjaṁ kappesi. Ye te bhikkhū appicchā .pe.
Te ujjhāyanti khīyanti vipācenti kathaṁ hi nāma āyasmā udāyi
bhikkhuniyā saddhiṁ eko ekāya raho nisajjaṁ kappessatīti .pe.
Saccaṁ kira tvaṁ udāyi bhikkhuniyā saddhiṁ eko ekāya raho nisajjaṁ
kappesīti. Saccaṁ bhagavāti. Vigarahi buddho bhagavā kathaṁ hi nāma
tvaṁ moghapurisa bhikkhuniyā saddhiṁ eko ekāya raho nisajjaṁ kappessasi
netaṁ moghapurisa appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha
yo pana bhikkhu bhikkhuniyā saddhiṁ eko ekāya raho nisajjaṁ kappeyya
pācittiyanti.

[467] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Bhikkhunī nāma ubhatosaṅghe
1 Ma. Yu. ayaṁ pāṭho. dissati.
Upasampannā. Saddhinti ekato. Eko ekāyāti bhikkhu ceva
hoti bhikkhunī ca. Raho nāma cakkhussa raho sotassa raho.
Cakkhussa raho nāma na sakkā hoti akkhīni vā nikhaniyamāne 1
bhamukaṁ vā ukkhipiyamāne sīsaṁ vā ukkhipiyamāne passituṁ. Sotassa
raho nāma na sakkā hoti pakatikathā sotuṁ. Nisajjaṁ kappeyyāti
bhikkhuniyā nisinnāya bhikkhu upanisinno vā hoti upanipanno vā
āpatti pācittiyassa. Bhikkhu nisinne bhikkhunī upanisinnā vā hoti
upanipannā vā āpatti pācittiyassa. Ubho vā nisinnā
honti ubho vā nipannā āpatti pācittiyassa.

[468] Raho rahosaññī eko ekāya nisajjaṁ kappeti āpatti
pācittiyassa. Raho vematiko eko ekāya nisajjaṁ kappeti
āpatti pācittiyassa. Raho arahosaññī eko ekāya nisajjaṁ
kappeti āpatti pācittiyassa. Araho rahosaññī āpatti
dukkaṭassa. Araho vematiko āpatti dukkaṭassa. Araho
arahosaññī anāpatti.

[469] Anāpatti yo koci viññū puriso dutiyo hoti tiṭṭhati
na nisīdati arahopekkho aññāvihito 2 nisīdati ummattakassa
ādikammikassāti.
Dasamasikkhāpadaṁ niṭṭhitaṁ.
Ovādavaggo tatiyo.
--------
1 Ma. akkhiṁ vā nikhaṇīyamāne. 2 Ma. aññavihito.
Tassuddānaṁ
asammatatthaṅgatā upassaya āmisadānena sibbati 1
addhānaṁ nāvaṁ bhuñjeyya 2 eko ekāya te dasāti.
----------
1 Ma. asammata atthaṅgatū passayāmisadānena. 2 Ma. sibbati addhānaṁ nāvaṁ
bhuñjeyya ....
Bhojanavaggassa paṭhamasikkhāpadaṁ

[470] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena sāvatthiyā
avidūre aññatarassa pūgassa āvasathapiṇḍo paññatto hoti.
Chabbaggiyā bhikkhū pubbaṇhasamayaṁ nivāsetvā pattacīvaramādāya
sāvatthiṁ piṇḍāya pavisitvā piṇḍaṁ alabhamānā āvasathaṁ agamaṁsu.
Manussā cirassāpi bhaddantā 1 āgatāti sakkaccaṁ parivisiṁsu.
Athakho chabbaggiyā bhikkhū dutiyaṁpi divasaṁ tatiyaṁpi divasaṁ pubbaṇhasamayaṁ
nivāsetvā pattacīvaramādāya sāvatthiṁ piṇḍāya pavisitvā piṇḍaṁ
alabhamānā āvasathaṁ gantvā bhuñjiṁsu. Athakho chabbaggiyānaṁ bhikkhūnaṁ
etadahosi kiṁ mayaṁ karissāma ārāmaṁ gatā 2 bhiyyopi idheva
āgantabbaṁ bhavissatīti. Tattheva anuvasitvā anuvasitvā āvasathapiṇḍaṁ
bhuñjanti. Titthiyā apasakkanti. Manussā ujjhāyanti khīyanti
vipācenti kathaṁ hi nāma samaṇā sakyaputtiyā anuvasitvā
anuvasitvā āvasathapiṇḍaṁ bhuñjissanti nayimesaññeva āvasathapiṇḍo
paññatto sabbesaññeva āvasathapiṇḍo paññattoti. Assosuṁ
kho bhikkhū tesaṁ manussānaṁ ujjhāyantānaṁ khīyantānaṁ vipācentānaṁ.
Ye te bhikkhū appicchā .pe. Te ujjhāyanti khīyanti vipācenti
kathaṁ hi nāma chabbaggiyā bhikkhū anuvasitvā anuvasitvā āvasathapiṇḍaṁ
1 Ma. cirassampi bhadantā. 2 Ma. gantvā.
Bhuñjissantīti .pe. Saccaṁ kira tumhe bhikkhave anuvasitvā
anuvasitvā āvasathapiṇḍaṁ bhuñjathāti. Saccaṁ bhagavāti. Vigarahi
buddho bhagavā kathaṁ hi nāma tumhe moghapurisā anuvasitvā
anuvasitvā āvasathapiṇḍaṁ bhuñjissatha netaṁ moghapurisā appasannānaṁ
vā pasādāya pasannānaṁ vā bhiyyobhāvāya .pe. Evañca pana
bhikkhave imaṁ sikkhāpadaṁ uddiseyyātha eko āvasathapiṇḍo
bhuñjitabbo tato ce uttariṁ 1 bhuñjeyya pācittiyanti.
Evañcidaṁ bhagavatā bhikkhūnaṁ sikkhāpadaṁ paññattaṁ hoti.

[471] Tena kho pana samayena āyasmā sārīputto kosalesu
janapadesu 2 sāvatthiṁ gacchanto yena aññataro āvasatho
tenupasaṅkami. Manussā cirassāpi 3 thero āgatoti sakkaccaṁ parivisiṁsu.
Athakho āyasmato sārīputtassa bhuttāvissa kharo ābādho uppajji.
Nāsakkhi tamhā āvasathā pakkamituṁ. Athakho te manussā dutiyampi
divasaṁ āyasmantaṁ sārīputtaṁ etadavocuṁ bhuñjatha bhanteti. Athakho
āyasmā sārīputto bhagavatā paṭikkhittaṁ anuvasitvā anuvasitvā
āvasathapiṇḍaṁ bhuñjitunti kukkuccāyanto na paṭiggahesi chinnabhatto
ahosi. Athakho āyasmā sārīputto sāvatthiṁ gantvā bhikkhūnaṁ
etamatthaṁ ārocesi. Bhikkhū bhagavato etamatthaṁ ārocesuṁ. Athakho
bhagavā etasmiṁ nidāne etasmiṁ pakaraṇe dhammiṁ kathaṁ katvā bhikkhū
1 Ma. Yu. uttari. 2 Ma. janapade. 3 Ma. cirassampi. evamuparipi.
Āmantesi anujānāmi bhikkhave gilānena bhikkhunā anuvasitvā
anuvasitvā āvasathapiṇḍaṁ bhuñjituṁ evañca pana bhikkhave imaṁ sikkhāpadaṁ
uddiseyyātha agilānena bhikkhunā eko āvasathapiṇḍo bhuñjitabbo
tato ce uttariṁ bhuñjeyya pācittiyanti.