[58] Kathaṁ nu kho bhante jānato kathaṁ passato saññojanā
samugghātaṁ gacchantīti. Cakkhuṁ kho bhikkhave anattato jānato
passato saññojanā samugghātaṁ gacchanti rūpe cakkhuviññāṇaṁ
cakkhusamphassaṁ yampidaṁ cakkhusamphassapaccayā uppajjati vedayitaṁ sukhaṁ
vā dukkhaṁ vā adukkhamasukhaṁ vā tampi anattato jānato passato
saññojanā samugghātaṁ gacchanti. Sotaṁ ghānaṁ jivhaṁ kāyaṁ
manaṁ dhamme manoviññāṇaṁ manosamphassaṁ yampidaṁ manosamphassapaccayā
uppajjati vedayitaṁ sukhaṁ vā dukkhaṁ vā adukkhamasukhaṁ vā
tampi anattato jānato passato saññojanā samugghātaṁ gacchanti.
Evaṁ kho bhikkhave jānato evaṁ passato saññojanā samugghātaṁ
gacchantīti. Tatiyaṁ.

[59] Kathaṁ nu kho bhante jānato kathaṁ passato āsavā pahīyantīti
.pe. Catutthaṁ.

[60] .pe. Āsavā samugghātaṁ gacchantīti .pe. Pañcamaṁ.
1 Ma. Yu. bhikkhu.

[61] .pe. Anusayā pahīyantīti .pe. Chaṭṭhaṁ.

[62] .pe. Anusayā samugghātaṁ gacchantīti. Cakkhuṁ kho
bhikkhave anattato jānato passato anusayā samugghātaṁ gacchanti
.pe. Sotaṁ ghānaṁ jivhaṁ kāyaṁ manaṁ dhamme manoviññāṇaṁ
manosamphassaṁ yampidaṁ manosamphassapaccayā uppajjati vedayitaṁ sukhaṁ
vā dukkhaṁ vā adukkhamasukhaṁ vā tampi anattato jānato passato
anusayā samugghātaṁ gacchanti. Evaṁ kho bhikkhave jānato evaṁ
passato anusayā samugghātaṁ gacchantīti. Sattamaṁ.

[63] Sabbūpādānapariññāya vo bhikkhave dhammaṁ desissāmi taṁ
suṇātha. Katamo ca bhikkhave sabbūpādānapariññāya dhammo.
Cakkhuñca paṭicca rūpe ca uppajjati cakkhuviññāṇaṁ tiṇṇaṁ
saṅgati phasso phassapaccayā vedanā. Evaṁ passaṁ bhikkhave
sutavā ariyasāvako cakkhusmiṁpi nibbindati rūpesupi nibbindati
cakkhuviññāṇepi nibbindati cakkhusamphassepi nibbindati vedanāyapi
nibbindati nibbindaṁ virajjati virāgā vimuccati vimokkhapariññātaṁ 1
me upādānanti pajānāti. Sotañca paṭicca sadde ca.
Ghānañca paṭicca gandhe ca. Jivhañca paṭicca rase ca.
Kāyañca paṭicca phoṭṭhabbe ca. Manañca paṭicca dhamme ca
uppajjati manoviññāṇaṁ tiṇṇaṁ saṅgati phasso phassapaccayā
vedanā. Evaṁ passaṁ bhikkhave sutavā ariyasāvako manasmiṁpi
1 Ma. Yu. vimokkhā pariññātaṁ. evamuparipi.
Nibbindati dhammesupi nibbindati manoviññāṇepi nibbindati
manosamphassepi nibbindati vedanāyapi nibbindati nibbindaṁ virajjati
virāgā vimuccati vimokkhapariññātaṁ me upādānanti pajānāti.
Ayaṁ kho bhikkhave sabbūpādānapariññāya dhammoti. Aṭṭhamaṁ.

[64] Sabbūpādānapariyādānāya vo bhikkhave dhammaṁ desissāmi taṁ
suṇātha. Katamo ca bhikkhave sabbūpādānapariyādānāya dhammo.
Cakkhuñca paṭicca rūpe ca uppajjati cakkhuviññāṇaṁ tiṇṇaṁ
saṅgati phasso phassapaccayā vedanā. Evaṁ passaṁ bhikkhave
sutavā ariyasāvako cakkhusmiṁpi nibbindati rūpesupi nibbindati
cakkhuviññāṇepi nibbindati cakkhusamphassepi nibbandati vedanāyapi
nibbindati nibbindaṁ virajjati virāgā vimuccati vimokkhapariyādinnaṁ
me upādānanti pajānāti .pe. Jivhañca paṭicca rase ca
uppajjati jivhāviññāṇaṁ .pe. Manañca paṭicca dhamme ca
uppajjati manoviññāṇaṁ tiṇṇaṁ saṅgati phasso phassapaccayā
vedanā. Evaṁ passaṁ bhikkhave sutavā ariyasāvako manasmiṁpi
nibbindati dhammesupi nibbindati manoviññāṇepi nibbindati
manosamphassepi nibbindati vedanāyapi nibbindati nibbindaṁ virajjati
virāgā vimuccati vimokkhapariyādinnaṁ me upādānanti pajānāti.
Ayaṁ kho bhikkhave sabbūpādānapariyādānāya dhammoti. Navamaṁ.

[65] Sabbūpādānapariyādānāya vo bhikkhave dhammaṁ desissāmi taṁ
Suṇātha. Katamo ca bhikkhave sabbūpādānapariyādānāya dhammo.
Taṁ kiṁ maññatha bhikkhave cakkhuṁ niccaṁ vā aniccaṁ vāti. Aniccaṁ
bhante. Yaṁ panāniccaṁ dukkhaṁ vā taṁ sukhaṁ vāti. Dukkhaṁ bhante.
Yaṁ panāniccaṁ dukkhaṁ vipariṇāmadhammaṁ kallaṁ nu taṁ samanupassituṁ
etaṁ mama esohamasmi eso me attāti. No hetaṁ bhante. Rūpā
.pe. Cakkhuviññāṇaṁ niccaṁ vā aniccaṁ vāti. Aniccaṁ bhante.
Cakkhusamphasso nicco vā anicco vāti. Anicco bhante.
Yampidaṁ cakkhusamphassapaccayā uppajjati vedayitaṁ sukhaṁ vā dukkhaṁ vā
adukkhamasukhaṁ vā tampi niccaṁ vā aniccaṁ vāti. Aniccaṁ
bhante. Sotaṁ ghānaṁ jivhā kāyo mano dhammā manoviññāṇaṁ
manosamphasso yampidaṁ manosamphassapaccayā uppajjati
vedayitaṁ sukhaṁ vā dukkhaṁ vā adukkhamasukhaṁ vā tampi niccaṁ vā
aniccaṁ vāti. Aniccaṁ bhante. Yaṁ panāniccaṁ dukkhaṁ vā taṁ
sukhaṁ vāti. Dukkhaṁ bhante. Yaṁ panāniccaṁ dukkhaṁ vipariṇāmadhammaṁ
kallaṁ nu taṁ samanupassituṁ etaṁ mama esohamasmi eso me
attāti. No hetaṁ bhante. Evaṁ passaṁ bhikkhave sutavā
ariyasāvako cakkhusmiṁpi nibbindati rūpesupi nibbindati
cakkhuviññāṇepi nibbindati cakkhusamphassepi nibbindati yampidaṁ
cakkhusamphassapaccayā uppajjati vedayitaṁ sukhaṁ vā dukkhaṁ vā adukkhamasukhaṁ vā
tasmiṁpi nibbindati .pe. Jivhāyapi nibbindati rasesupi nibbindati
Jivhāviññāṇepi jivhāsamphassepi yampidaṁ jivhāsamphassapaccayā
uppajjati .pe. Manasmiṁpi nibbindati dhammesupi nibbindati
manoviññāṇepi nibbindati manosamphassepi yampidaṁ manosamphassapaccayā
uppajjati vedayitaṁ sukhaṁ vā dukkhaṁ vā adukkhamasukhaṁ vā
tasmiṁpi nibbindati nibbindaṁ virajjati virāgā vimuccati.
Vimuttasmiṁ vimuttamiti ñāṇaṁ hoti. Khīṇā jāti vusitaṁ brahmacariyaṁ
kataṁ karaṇīyaṁ nāparaṁ itthattāyāti pajānāti. Ayaṁ kho bhikkhave
sabbūpādānapariyādānāya dhammoti. Dasamaṁ.
Avijjāvaggo paṭhamo.
Tassuddānaṁ
avijjā saññojanā dve āsavena dve vuttā
anusayā apare dve pariññā dve pariyādinnā 1 .
Vaggo tena pavuccatīti.
---------
1 Ma. Yu. pariyādinnaṁ.
Migajālavaggo dutiyo

[66] Sāvatthīnidānaṁ. Atha kho āyasmā migajālo yena
bhagavā .pe. Ekamantaṁ nisinno kho āyasmā migajālo bhagavantaṁ
etadavoca ekavihārī ekavihārīti bhante vuccati kittāvatā nu
kho bhante ekavihārī hoti kittāvatā ca pana sadutiyavihārī
hotīti. Santi kho migajāla cakkhuviññeyyā rūpā iṭṭhā kantā
manāpā piyarūpā kāmūpasañhitā rajaniyā 1 tañce bhikkhu abhinandati
abhivadati ajjhosāya tiṭṭhati tassa taṁ abhinandato abhivadato
ajjhosāya tiṭṭhato uppajjati nandi 2 nandiyā sati sārāgo
hoti sārāge sati saññogo hoti. Nandisaññojanasaṁyutto
kho migajāla bhikkhu sadutiyavihārīti vuccati .pe. Santi kho
migajāla jivhāviññeyyā rasā .pe. Manoviññeyyā dhammā
iṭṭhā kantā manāpā piyarūpā kāmūpasañhitā rajaniyā tañce
bhikkhu abhinandati abhivadati ajjhosāya tiṭṭhati tassa taṁ abhinandato
abhivadato ajjhosāya tiṭṭhato uppajjati nandi nandiyā sati
sārāgo hoti sārāge sati saññogo hoti. Nandisaññojanasaṁyutto
kho migajāla bhikkhu sadutiyavihārīti vuccati. Evaṁvihārī
ca migajāla bhikkhu kiñcāpi araññavanapatthāni 3 pantāni senāsanāni
1 Ma. Yu. rajanīyā. evamuparipi. 2 Ma. nandī. sabbattha īdisameva.
3 Yu. araññe ....
Paṭisevati appasaddāni appanigghosāni vijanavātāni manussarāhaseyyakāni
paṭisallānasāruppāni atha kho sadutiyavihārīti vuccati.
Taṁ kissa hetu. Taṇhā hissa dutiyā sāssa appahīnā tasmā
sadutiyavihārīti vuccati.

[67] Santi ca kho migajāla cakkhuviññeyyā rūpā iṭṭhā
kantā manāpā piyarūpā kāmūpasañhitā rajaniyā tañce bhikkhu
nābhinandati nābhivadati na ajjhosāya tiṭṭhati tassa taṁ anabhinandato
anabhivadato anajjhosāya tiṭṭhato nandi nirujjhati nandiyā asati
sārāgo na hoti sārāge asati saññogo na hoti.
Nandisaññojanavisaṁyutto kho migajāla bhikkhu ekavihārīti vuccati
.pe. Santi kho migajāla jivhāviññeyyā rasā .pe. Santi 1
kho migajāla manoviññeyyā dhammā iṭṭhā kantā manāpā
piyarūpā kāmūpasañhitā rajaniyā tañce bhikkhu nābhinandati nābhivadati
na ajjhosāya tiṭṭhati tassa taṁ anabhinandato anabhivadato
anajjhosāya tiṭṭhato nandi nirujjhati nandiyā asati sārāgo
na hoti sārāge asati saññogo na hoti. Nandisaññojanavisaṁyutto
kho migajāla bhikkhu ekavihārīti vuccati. Evaṁvihārī
ca migajāla bhikkhu kiñcāpi gāmante viharati ākiṇṇo 2 bhikkhūhi
bhikkhunīhi upāsakehi upāsikāhi rājūhi rājamahāmattehi titthiyehi
1 Ma. santi ca kho. evamuparipi. 2 Yu. ākiṇṇe.
Titthiyasāvakehi atha kho ekavihārīti vuccatīti. Evaṁvihārī ca
migajāla bhikkhu vuccatīti. Taṁ kissa hetu. Taṇhā hissa
dutiyā sāssa pahīnā tasmā ekavihārīti vuccati. Paṭhamaṁ.