[21] Kathañca gahapati apurakkharāno hoti. Idha gahapati ekaccassa
na evaṁ hoti evaṁrūpo siyaṁ anāgatamaddhānaṁ evaṁvedano siyaṁ
anāgatamaddhānaṁ evaṁsañño siyaṁ anāgatamaddhānaṁ evaṁsaṅkhāro
siyaṁ anāgatamaddhānaṁ evaṁviññāṇo siyaṁ anāgatamaddhānanti.
Evaṁ kho gahapati apurakkharāno hoti.

[22] Kathañca gahapati kathaṁ viggayha janena kattā hoti. Idha
gahapati ekacco evarūpiṁ kathaṁ kattā hoti na tvaṁ imaṁ dhammavinayaṁ
ājānāsi ahaṁ imaṁ dhammavinayaṁ ājānāmi kiṁ tvaṁ imaṁ dhammavinayaṁ
ājānissasi micchāpaṭipanno tvamasi ahamasmi sammāpaṭipanno
pure vacanīyaṁ pacchā avaca pacchā vacanīyaṁ pure avaca sahitamme
asahitante adhiciṇṇante viparāvattaṁ āropito te vādo cara 2
vādappamokkhāya niggahitosi nibbedhehi 3 vā sace pahosīti.
Evaṁ kho gahapati kathaṁ viggayha janena kattā hoti.
1 Po. purekkharāno. 2 Po. paravādappamokkhāya. 3 nibbeṭhehīti vā pāṭho.

[23] Kathañca gahapati kathaṁ na viggayha janena kattā hoti.
Idha gahapati bhikkhu na evarūpiṁ kathaṁ kattā hoti na tvaṁ imaṁ
dhammavinayaṁ ājānāsi ahaṁ imaṁ dhammavinayaṁ ājānāmi kiṁ tvaṁ imaṁ
dhammavinayaṁ ājānissasi micchāpaṭipanno tvamasi ahamasmi sammāpaṭipanno
pure vacanīyaṁ pacchā avaca pacchā vacanīyaṁ pure avaca
sahitamme asahitante adhiciṇṇante viparāvattaṁ āropito te
vādo cara vādappamokkhāya niggahitosi nibbedhehi vā sace
pahosīti. Evaṁ kho gahapati kathaṁ na viggayha janena kattā hoti.

[24] Iti kho gahapati yantaṁ vuttaṁ bhagavatā aṭṭhakavaggiye
māgaṇḍiyapañhe
okaṁ pahāya aniketasārī
gāme akubbaṁ muni santhavāni
kāmehi ritto apurakkharāno
kathaṁ na viggayha janena kayirāti.
Imassa kho gahapati bhagavatā saṅkhittena bhāsitassa evaṁ vitthārena
attho daṭṭhabboti.

[25] Evamme sutaṁ ekaṁ samayaṁ āyasmā mahākaccāno avantīsu
viharati kuraraghare papāte pabbate. Atha kho haliddikāni gahapati
yenāyasmā mahākaccāno tenupasaṅkami upasaṅkamitvā āyasmantaṁ
mahākaccānaṁ abhivādetvā ekamantaṁ nisīdi. Ekamantaṁ nisinno kho
Haliddikāni gahapati āyasmantaṁ mahākaccānaṁ etadavoca vuttamidaṁ
bhante bhagavatā sakkapañhe ye te samaṇabrāhmaṇā taṇhāsaṅkhayavimuttā
te accantaniṭṭhā accantayogakkhemino accantabrahmacārino
accantapariyosānā seṭṭhā devamanussānanti. Imassa
nu kho bhante bhagavatā saṅkhittena bhāsitassa kathaṁ vitthārena attho
daṭṭhabboti.

[26] Rūpadhātuyā kho gahapati yo chando yo rāgo yā nandi
yā taṇhā ye upāyupādānā cetaso adhiṭṭhānābhinivesānusayā
tesaṁ khayā virāgā nirodhā cāgā paṭinissaggā cittaṁ suvimuttanti
vuccati. Vedanādhātuyā kho gahapati .pe. Saññādhātuyā kho
gahapati. Saṅkhāradhātuyā kho gahapati. Viññāṇadhātuyā kho gahapati
yo chando yo rāgo yā nandi yā taṇhā ye upāyupādānā
cetaso adhiṭṭhānābhinivesānusayā tesaṁ khayā virāgā nirodhā cāgā
paṭinissaggā cittaṁ suvimuttanti vuccati. Iti kho gahapati yantaṁ
vuttaṁ bhagavatā sakkapañhe ye te samaṇabrāhmaṇā taṇhāsaṅkhayavimuttā
te accantaniṭṭhā accantayogakkhemino accantabrahmacārino
accantapariyosānā seṭṭhā devamanussānanti. Imassa
kho gahapati bhagavatā saṅkhittena bhāsitassa evaṁ vitthārena attho
daṭṭhabboti.

[27] Evamme sutaṁ ekaṁ samayaṁ bhagavā sāvatthiyaṁ viharati
Jetavane anāthapiṇḍikassa ārāme. Tatra kho bhagavā bhikkhū
āmantesi bhikkhavoti. Bhadanteti te bhikkhū bhagavato paccassosuṁ.
Bhagavā etadavoca samādhiṁ bhikkhave bhāvetha. Samāhito bhikkhave
bhikkhu yathābhūtaṁ pajānāti. Kiñca 1 yathābhūtaṁ pajānāti. Rūpassa
samudayañca atthaṅgamañca vedanāya samudayañca atthaṅgamañca
saññāya samudayañca atthaṅgamañca saṅkhārānaṁ samudayañca atthaṅgamañca
viññāṇassa samudayañca atthaṅgamañca.

[28] Ko ca bhikkhave rūpassa samudayo ko [2]- vedanāya samudayo
ko saññāya samudayo ko saṅkhārānaṁ samudayo ko viññāṇassa
samudayo. Idha bhikkhave abhinandati abhivadati ajjhosāya tiṭṭhati.
Kiñca abhinandati abhivadati ajjhosāya tiṭṭhati. Rūpaṁ abhinandati
abhivadati ajjhosāya tiṭṭhati tassa rūpaṁ abhinandato abhivadato
ajjhosāya tiṭṭhato uppajjati nandi yā rūpe nandi tadupādānaṁ
tassupādānapaccayā bhavo bhavapaccayā jāti jātipaccayā jarāmaraṇaṁ
sokaparidevadukkhadomanassupāyāsā sambhavanti. Evametassa
kevalassa dukkhakkhandhassa samudayo hoti. Vedanaṁ abhinandati .pe.
Saññaṁ abhinandati .pe. Saṅkhāre abhinandati .pe. Viññāṇaṁ
abhinandati abhivadati ajjhosāya tiṭṭhati tassa viññāṇaṁ abhinandato
abhivadato ajjhosāya tiṭṭhato uppajjati nandi yā viññāṇe
nandi tadupādānaṁ tassupādānapaccayā bhavo bhavapaccayā jāti
1 Po. sabbattha kiñcīti dissati. 2 Po. etthantare casaddo dissati. ito
paraṁ īdisameva.
.pe. Evametassa kevalassa dukkhakkhandhassa samudayo hoti. Ayaṁ
bhikkhave rūpassa samudayo ayaṁ vedanāya samudayo ayaṁ saññāya
samudayo ayaṁ saṅkhārānaṁ samudayo ayaṁ viññāṇassa samudayo.

[29] Ko ca bhikkhave rūpassa atthaṅgamo ko vedanāya.
Ko saññāya. Ko saṅkhārānaṁ. Ko viññāṇassa atthaṅgamo.
Idha bhikkhave nābhinandati nābhivadati nājjhosāya tiṭṭhati. Kiñca
nābhinandati nābhivadati nājjhosāya tiṭṭhati. Rūpaṁ nābhinandati nābhivadati
nājjhosāya tiṭṭhati tassa rūpaṁ anabhinandato anabhivadato anajjhosāya
tiṭṭhato yā rūpe nandi sā nirujjhati tassa nandinirodhā upādānanirodho
upādānanirodhā bhavanirodho .pe. Evametassa kevalassa
dukkhakkhandhassa nirodho hoti. Vedanaṁ nābhinandati nābhivadati nājjhosāya
tiṭṭhati tassa vedanaṁ anabhinandato anabhivadato anajjhosāya
tiṭṭhato yā vedanāya nandi sā nirujjhati tassa nandinirodhā
upādānanirodho upādānanirodhā bhavanirodho bhavanirodhā jātinirodho
.pe. Evametassa kevalassa dukkhakkhandhassa nirodho hoti.
Saññaṁ nābhinandati .pe. Saṅkhāre nābhinandati nābhivadati nājjhosāya
tiṭṭhati tassa saṅkhāre anabhinandato anabhivadato anajjhosāya
tiṭṭhato yā saṅkhāresu nandi sā nirujjhati tassa nandinirodhā
upādānanirodho upādānanirodhā bhavanirodho .pe. Evametassa
kevalassa dukkhakkhandhassa nirodho hoti. Viññāṇaṁ nābhinandati
Nābhivadati nājjhosāya tiṭṭhati tassa viññāṇaṁ anabhinandato
anabhivadato anajjhosāya tiṭṭhato yā viññāṇe nandi sā nirujjhati
tassa nandinirodhā upādānanirodho .pe. Evametassa kevalassa
dukkhakkhandhassa nirodho hoti. Ayaṁ bhikkhave rūpassa atthaṅgamo
ayaṁ vedanāya atthaṅgamo ayaṁ saññāya atthaṅgamo ayaṁ saṅkhārānaṁ
atthaṅgamo ayaṁ viññāṇassa atthaṅgamoti.

[30] Sāvatthiyaṁ 1 . Tatra kho .pe. Paṭisallāne 2 bhikkhave
yogamāpajjatha. Paṭisallīno bhikkhave bhikkhu yathābhūtaṁ pajānāti. Kiñca
yathābhūtaṁ pajānāti. Rūpassa samudayañca atthaṅgamañca vedanāya
samudayañca atthaṅgamañca saññāya samudayañca atthaṅgamañca
saṅkhārānaṁ samudayañca atthaṅgamañca viññāṇassa samudayañca
atthaṅgamañca. (yathā paṭhamasutte vitthāro tathā vitthāretabbaṁ 3 ).