[11] Evamme sutaṁ ekaṁ samayaṁ āyasmā mahākaccāno 1
avantīsu viharati kuraraghare 2 papāte 3 pabbate. Atha kho haliddikāni 4
gahapati yenāyasmā mahākaccāno tenupasaṅkami upasaṅkamitvā
āyasmantaṁ mahākaccānaṁ abhivādetvā ekamantaṁ nisīdi. Ekamantaṁ
nisinno kho haliddikāni gahapati āyasmantaṁ mahākaccānaṁ etadavoca
vuttamidaṁ bhante bhagavā aṭṭhakavaggiye māgaṇḍiyapañhe
okaṁ pahāya aniketasārī
gāme akubbaṁ muni santhavāni
kāmehi ritto apurakkharāno
kathaṁ na viggayha janena kayirāti.
Imassa nu kho bhante bhagavā saṅkhittena bhāsitassa kathaṁ
vitthārena attho daṭṭhabboti.

[12] Rūpadhātu kho gahapati viññāṇassa oko
rūpadhāturāgavinibandhañca pana viññāṇaṁ okasārīti vuccati. Vedanādhātu
kho gahapati viññāṇassa oko vedanādhāturāgavinibandhañca
pana viññāṇaṁ okasārīti vuccati. Saññādhātu kho gahapati
viññāṇassa oko saññādhāturāgavinibandhañca pana viññāṇaṁ
okasārīti vuccati. Saṅkhāradhātu kho gahapati viññāṇassa oko
saṅkhāradhāturāgavinibandhañca pana viññāṇaṁ okasārīti vuccati.
1 Po. mahākaccāyano. 2 Po. kuppaghare. 3 Po. Ma. pavatte. 4 Sī. Ma.
hāliddikāni.
Evaṁ kho gahapati okasārī hoti.

[13] Kathañca gahapati anokasārī hoti. Rūpadhātuyā kho gahapati
yo chando yo rāgo yā nandi yā taṇhā ye upāyupādānā
cetaso adhiṭṭhānābhinivesānusayā te tathāgatassa pahīnā ucchinnamūlā
tālāvatthukatā 1 anabhāvaṅkatā 2 āyatiṁ anuppādadhammā tasmā
tathāgato anokasārīti vuccati. Vedanādhātuyā kho gahapati.
Saññādhātuyā kho gahapati. Saṅkhāradhātuyā kho gahapati. Viññāṇadhātuyā
kho gahapati yo chando yo rāgo yā nandi yā taṇhā
ye upāyupādānā cetaso adhiṭṭhānābhinivesānusayā te tathāgatassa
pahīnā ucchinnamūlā tālāvatthukatā anabhāvaṅkatā āyatiṁ anuppādadhammā
tasmā tathāgato anokasārīti vuccati. Evaṁ kho gahapati
anokasārī hoti.

[14] Kathañca gahapati niketasārī hoti. Rūpanimittaniketavisāravinibandhā
kho gahapati niketasārīti vuccati. Saddanimitta .pe.
Gandhanimitta ... Rasanimitta ... Phoṭṭhabbanimitta ...
Dhammanimittaniketavisāravinibandhā kho gahapati niketasārīti vuccati. Evaṁ kho
gahapati niketasārī hoti.

[15] Kathañca gahapati aniketasārī hoti. Rūpanimittaniketavisāravinibandhā
kho gahapati tathāgatassa pahīnā ucchinnamūlā tālāvatthukatā
anabhāvaṅkatā āyatiṁ anuppādadhammā tasmā tathāgato aniketasārīti
1 Po. vatthugatā. 2 Yu. anabhāvakatā.
Vuccati. Saddanimitta .pe. Gandhanimitta ... Rasanimitta ...
Phoṭṭhabbanimitta ... Dhammanimittaniketavisāravinibandhā kho gahapati
tathāgatassa pahīnā ucchinnamūlā tālāvatthukatā anabhāvaṅkatā āyatiṁ
anuppādadhammā tasmā tathāgato aniketasārīti vuccati. Evaṁ
kho gahapati aniketasārī hoti.

[16] Kathañca gahapati gāme santhavajāto hoti. Idha gahapati
ekacco gihīhi saṁsaṭṭho viharati sahanandī sahasokī sukhitesu sukhito
dukkhitesu dukkhito uppannesu kiccakaraṇīyesu attanā tesu yogaṁ
āpajjati. Evaṁ kho gahapati gāme santhavajāto hoti.

[17] Kathañca gahapati gāme na santhavajāto hoti. Idha gahapati
bhikkhu gihīhi asaṁsaṭṭho viharati na sahanandī na sahasokī na sukhitesu
sukhito na dukkhitesu dukkhito uppannesu kiccakaraṇīyesu na attanā
tesu yogaṁ āpajjati. Evaṁ kho gahapati gāme na santhavajāto hoti.

[18] Kathañca gahapati kāmehi na ritto hoti. Idha gahapati
ekacco kāmesu avītarāgo 1 hoti avītachando avītapemo
avītapipāso avītapariḷāho avītataṇho. Evaṁ kho gahapati
kāmehi na ritto hoti.

[19] Kathañca gahapati kāmehi ritto hoti. Idha gahapati ekacco
kāmesu vītarāgo hoti vītachando vītapemo vītapipāso vītapariḷāho
1 katthaci avigatarāgotyādipi pāṭho dissati.
Vītataṇho. Evaṁ kho gahapati kāmehi ritto hoti.

[20] Kathañca gahapati purakkharāno 1 hoti. Idha gahapati ekaccassa
evaṁ hoti evaṁrūpo siyaṁ anāgatamaddhānaṁ evaṁvedano siyaṁ
anāgatamaddhānaṁ evaṁsañño siyaṁ anāgatamaddhānaṁ evaṁsaṅkhāro
siyaṁ anāgatamaddhānaṁ evaṁviññāṇo siyaṁ anāgatamaddhānanti.
Evaṁ kho gahapati purakkharāno hoti.